Lu̱ka̱ 7

Tu̱we̱ne̱t ci ddi̱ki̱ryo̱i̱t wa aciiru

(Ma̱te̱yo̱ 8:5-13; Jon 4:43-54)

1Baling edeca Ye̱su̱ zoz ngati ozozek ol cik aziye zoz cinne, i̱tto̱ zin orog ci een Kapernaum. 2Anyak da̱ ddi̱ki̱ryo̱i̱ti̱ ci aciiru#7:2 Ddi̱ki̱ryo̱i̱ti̱ ci aciiru: Een enne ddi̱ki̱ryo̱i̱t ci a̱gga̱m aciir o̱bo̱n co̱de̱. Romi du̱ca̱i̱t ci irez enne oroot, odoyai kize daizoit. 3Izik ddi̱ki̱ryo̱i̱ti̱ zoz ci Ye̱su̱ kar enne ki̱tto̱n lo̱ddi̱ki̱re̱ cik Ya̱u̱da̱k koot ngatinne, ovvo a̱jji̱n nonno abunna ming a̱kku̱ kar ki̱ki̱ya̱ kangaru du̱ca̱i̱t cinne. 4Baling i̱vi̱tta̱k nege Ye̱su̱, ilalttek zin nege nonno oroot, “Agano ming ogonik i̱nna̱ e̱e̱t neci zoz cu, 5eci enne irez lo̱o̱c cinna ko̱ kar bo̱do̱k enne keteehenyet agit Ce̱e̱z wa Lawinto.” 6Kar zin Ye̱su̱ korkorrit ki nogo.

Iróng da̱ enne aave reena ce̱e̱za̱ baling i̱tto̱na̱ ddi̱ki̱ryo̱i̱ti̱ gonoggi u̱gge̱ koot kizettek nonno ne: “Manyi, ma azuca ele cunne gaganiko, eci iróng agano ming a̱kku̱nni̱ i̱nna̱ rok ce̱e̱z cinanni. 7Zoz ci iróng anna kogonni ele cinanni kazi ne kabunna kar ki̱ki̱ya̱ rok i̱nne̱ta̱. Abarik du̱wa̱ zoz, kar atin du̱ca̱i̱ti̱ cinanne kubunna. 8Eci anna bu̱k eliya kanyai ddi̱ki̱ryo̱i̱t cinanni, kanyai anna bu̱k aciir cik aavtte vu̱rrte̱ cinanni. Ming ka̱du̱wa̱k anna zoz co̱de̱ aciiroc, ‘Bito,’ kar enne kuk; kar bo̱do̱k aciiroc co̱de̱ ke̱, ‘I̱jja̱,’ kar enne ki̱ki̱ya̱. Ka̱nne̱k du̱ca̱i̱t cinanni ne, ‘Tu̱gu̱ gi̱i̱ cu,’ ogon enne.”

9Baling izik Ye̱su̱ zoz necu, u̱ku̱le̱k enne nonno, kar zin kutuhuwe kicin zu̱we̱ ne̱k annu nonno ke̱, kar kize ne, “Ka̱du̱wa̱kku̱ng, ngen anna kumuda tu̱we̱ne̱t ci ogon niko udut Israila.” 10I̱mi̱rrte̱ zin gonoggi ddi̱ki̱ryo̱i̱t balik i̱tto̱n enne ke̱ rok ce̱e̱z, kar kurubta du̱ca̱i̱t ubunna.

Ingane Ye̱su̱ ngerrti ngaa ci boye daiza

11Imma ataman niko, uk Ye̱su̱ rok orog ci een zara Nain, kar nuyaha ciginnek ki koole ci a̱ppwe̱ korkorrit ki nonno. 12Baling okko enne ojon ki aran ci o̱rgu̱, u̱ru̱mto̱ ki ol cik odonga e̱e̱t ci a̱da̱ha̱, o̱de̱ye̱ da̱ lo̱gu̱t neci ṯok ngati yaatinne, okko bo̱do̱k yaatinne een ngaa ci boye. A̱vvu̱ koole ci a̱ppwe̱ ki ngaa neci. 13Baling icin Manyi ngaa ci boye ko̱, i̱ta̱k zinin cinne nonno kar kize ne, “Ma a̱lu̱!”

14Uk zin enne u̱u̱m kwe̱e̱n ci odonge ol lo̱gu̱t ci a̱da̱k ko̱, kar ol ne̱k odonga nonno ko̱ kibilet li̱i̱m. Ize enne ne, “Logozit, ka̱nne̱ki̱ anna i̱nne̱t ne, tinga je̱e̱na̱.” 15Itinga zin lo̱gu̱t bali a̱da̱k ke̱ je̱e̱na̱ kar kozoz, kar zin Ye̱su̱ kobodek kaanyik nonno yaatinne.

16O̱to̱ngo̱o̱ltte̱ zin nege do̱o̱k kar zin kinnatit Ta̱mu̱ta̱dde̱n, kizeto ne, “I̱ye̱la̱i̱ a̱ri̱to̱i̱ti̱ ci a̱ddi̱ki̱re̱ orgene cinna. I̱ki̱ya̱ Ta̱mu̱ta̱dde̱n eela ol ciginnek.” 17U̱zu̱cca̱ zin kaviyaha cik Ye̱su̱ ko̱ lo̱o̱c ci Ju̱de̱ya̱ veelek ki o̱ro̱gjo̱k cik aavtte abanyca bu̱k.

Ye̱su̱ ki Jon Ba̱ti̱ti̱mo̱

(Ma̱te̱yo̱ 11:1-19)

18U̱du̱kta̱k nuyaha cik Jon Ba̱ti̱ti̱mo̱ nonno zoz ci obod ki kaal ne̱ko̱ do̱o̱k. Utu zin enne rama ngatinne̱ng, 19i̱tto̱ni̱k enne nogo koot ngati Manyi ki̱jji̱nne̱t kizeto ne, “E̱e̱ni̱ dim i̱nna̱ e̱e̱t ci weda a̱kku̱ ko̱, icima kereya e̱e̱t imma ci aave do̱?”

20Baling i̱vi̱tta̱k nuyaha ne̱ke̱ Ye̱su̱, izektek zin nonno ne, “I̱tto̱na̱ne̱t Jon Ba̱ti̱ti̱mo̱ agit rok i̱nne̱ta̱ kar naga ki̱jji̱nti̱, ka̱nne̱ki̱ ne, ‘E̱e̱ni̱ dim i̱nna̱ e̱e̱t ci weda a̱kku̱ ko̱, icima kereya e̱e̱t imma ci aave do̱?’”

21Imma i̱i̱te̱ne̱ neci ele, angaru Ye̱su̱ ol cik meelek anyak mo̱ri̱zzo̱k cik aavtte do̱ do̱, ki ol wak anyak kuulo cik lo̱rye̱nta̱k, kar koo ebere cik ol cik ru̱be̱ni̱k. 22O̱bo̱de̱k zin enne nuyak balik i̱tto̱na̱i̱ ke̱, “I̱mi̱rrte̱ oot u̱du̱kta̱k Jon Ba̱ti̱ti̱mo̱, nya ci icinntu niga ki kaal cik iziktu niga: Icinte ol cik ru̱be̱ni̱k, otozo ol wak ngoolik, ubunntta ol wak anyak dhovo, izikto ol wak adite iina, itingazzo ol wak a̱da̱i̱to̱ daiza, kar kaviyaha cik abunna kuwaktozik ol cik amati. 23U̱mu̱yu̱we̱ e̱e̱ti̱ ci iróng a̱yu̱we̱ zo̱ze̱ cinanni.”

24Baling i̱mi̱rrte̱ nuyaha balik i̱tto̱na̱ Joni ke̱, akate zin Ye̱su̱ ozozek koole zoz ci Joni: “Ovvoyyu da̱ niga balala ovvo acinnu nya? Ovvo da̱ niga acinnu yaya ci omone ngooti? 25Ming iróng een niko, ovvoyyu da̱ niga ovvo acinnu nya? E̱e̱t ci aim ru̱u̱ma̱ni̱ cik a̱zi̱ze̱? I̱llo̱i̱, aavtte ol cik aim ru̱u̱ma̱ni̱ cik a̱zi̱ze̱ adak o̱ro̱bi̱ya̱ cik meelek kar kabaito baiz ci odonge nege e̱le̱tti̱ ce̱e̱zi̱nne̱ cik alaatu. 26Abarik ovvoyyu da̱ ba̱li̱ye̱ niga ovvo acinnu nya? A̱ri̱to̱i̱t? De̱de̱, ka̱du̱wa̱kku̱ng anna i̱ge̱ta̱, ovvo niga acinnu e̱e̱t ci ommog a̱ri̱to̱i̱t. 27Een enne e̱e̱t ci e̱he̱rye̱ zoz cinne azi ne:

“‘Ki̱tto̱nni̱ atin anna to̱na̱i̱t cinanni ki̱ki̱ya̱ o̱o̱we̱ cunne,#7:27 To̱na̱i̱t cinanni ki̱ki̱ya̱ o̱o̱we̱ cunne: Een Joni bali to̱na̱i̱t ci okko adimanek Ye̱su̱ gool.

nonno ci okko atin adiman gool o̱o̱we̱ cunne.’#Malachi 3:1

28Ka̱du̱wa̱kku̱ng anna i̱ge̱ta̱, ovvo zin olle ne̱k a̱rri̱ta̱ ngaai ko̱, i̱llo̱i̱ e̱e̱t imma ci ommog Jon; okko e̱e̱ti̱ ci een vu̱rru̱t ba̱a̱li̱nte̱ ci Ta̱mu̱ta̱dde̱no̱ ci a̱ddi̱ki̱re̱ kommog nonno.”

29Baling iziyyet ol do̱o̱k, rok ol wak a̱gga̱ma̱ mucuru olle ko̱ zoz ci Ye̱su̱, elemtta de̱de̱ ming ilem gool ci Ta̱mu̱ta̱dde̱no̱, eci Jon Ba̱ti̱ti̱mo̱ ba̱li̱ye̱ ci a̱gga̱me̱k nogo ba̱ti̱ti̱mo̱. 30Ma̱i̱je̱ olli Varacisi ki ol wak a̱gga̱ lo̱ti̱nno̱k ju̱rru̱m, utuburet zoz ci Ta̱mu̱ta̱dde̱no̱ baize cinne̱ng, eci ngen Joni ka̱gga̱me̱k nogo ba̱ti̱ti̱mo̱.

31“Katubzek wo̱ye̱ anna ol cik bu̱u̱l cu ki nya? Ogon nege ku̱? 32Ogon nege ki dooli cik aavtte cuwa kar kutuwec e̱le̱tti̱ cigge̱k:

“‘Kutubuyeung naga i̱ge̱t te̱te̱li̱,

iróng niga arugumnyu;

Kebenta naga lo̱ng ci u̱lu̱wa̱nu̱,

kar iróng niga a̱lu̱yyu̱.’

33Eci Jon Ba̱ti̱ti̱mo̱ a̱kku̱ iróng adakce icima aud merte, kar niga izet ne, ‘Anyak enne kuuloc ci lo̱rye̱nto̱.’ 34A̱kku̱ Ngerrti E̱e̱to̱ adakce, aude, kar niga izet ne, ‘Een enne elemnyoit kar bo̱do̱k kize bba̱kco̱i̱t, een enne gonen ki ol wak aluta mucuru olle ki olli mu̱nye̱nu̱.’ 35Ma̱i̱je̱ genyizi i̱ye̱la̱i̱ een de̱de̱ ngati dooli ciginnek do̱o̱k.”

U̱vu̱d ngaa ci mu̱nye̱nu̱ Ye̱su̱ maala

36I̱yo̱ko̱ utu e̱e̱ti̱ co̱de̱ ci Varacisi Ye̱su̱ rok ce̱e̱z cinne ki̱ki̱ya̱ kadaho ce̱e̱ze̱ cinne, uk zin enne rok ce̱e̱z ci Varaciso kar ka̱vvu̱to̱ ngati da̱i̱nto̱. 37Baling izik ngaa ci da̱ abak mu̱nye̱ne̱ o̱rge̱ neci ming aave Ye̱su̱ adakce ce̱e̱ze̱ ci Varaciso, anyaha zin enne gi̱i̱ ci ogon ki de̱e̱re̱#7:37 Gi̱i̱ ci ogon ki de̱e̱re̱: Adimana ol gi̱i̱ cu biye ci een zara alabaster. ci anyak maal ci ongooli laala, 38ibil zin enne bo̱i̱ce̱ cinne zone ciginnek, akate zin enne uculahan zo̱o̱ cik Ye̱su̱ ti̱la̱lo̱i̱ ciginnek. Kar zin enne ki̱ti̱vi̱l imane ciginnek, kar kucucu zo̱o̱ ciginnek kar ku̱du̱te̱k maal.

39Baling icin Varacisi bali awa nonno ke̱ zoz necu, a̱nne̱k zin ele cinne ne, “Ming een e̱e̱ti̱ cu a̱ri̱to̱i̱t ci zoz ci Ta̱mu̱ta̱dde̱no̱ de̱de̱, a̱gga̱ wo̱ye̱ enne ngene ci u̱u̱m nonno ko̱, kar bo̱do̱k ka̱gga̱ ngaa ci ogon ku̱ cu, een enne ngaa ci mu̱nye̱nu̱.”

40O̱bo̱de̱k zin Ye̱su̱ nonno, “Si̱mo̱ne̱, kanyai anna zoz ci korongi ku̱du̱wa̱i̱n.”

Ize zin bo̱do̱k Si̱mo̱ne̱ ne, “Du̱wa̱ka̱n de̱me̱zo̱i̱t.”

41“A̱gga̱ma̱ da̱ ol cik een rama o̱ro̱bi̱ya̱ e̱e̱te̱ emani kize nga̱bo̱lo̱. A̱gga̱ma̱ e̱e̱ti̱ co̱de̱ o̱ro̱bi̱ya̱ cik e̱e̱ggi̱n ziik#7:41 O̱ro̱bi̱ya̱ cik e̱e̱ggi̱n ziik: Een o̱ro̱bi̱ya̱c co̱de̱ ci een zi̱i̱t ci a̱li̱ngli̱nge̱ e̱e̱ti̱ i̱i̱te̱n co̱de̱. obet tu̱r (500), kar goniya ka̱gga̱ma̱ o̱ro̱bi̱ya̱ moten tu̱r. 42I̱llo̱i̱ e̱e̱t imma ngatinne̱ng ci kar wo̱ye̱ ku̱ru̱k o̱ro̱bi̱ya̱ ne̱ke̱, alalek zin enne nogo do̱o̱k ngabolet ne̱ke̱. I̱yo̱ko̱ ngene ngatinne̱ng ci wo̱ye̱ irez nonno oroot?”

43O̱bo̱de̱k zin Si̱mo̱ne̱ nonno, “Ma wo̱ye̱ ming alalek enne e̱e̱t ci anyak nga̱bo̱lo̱ ci a̱ppwe̱ ko̱.”

Ize zin Ye̱su̱ ne, “De̱de̱, ettedu i̱nna̱ ju̱rru̱m.”

44Kar zin enne kutuhuwe kicin ngaa neci kar kizek Si̱mo̱ne̱ ne, “Acinni i̱nna̱ ngaa cu? Ki̱ki̱ya̱ anna rok ce̱e̱z cunne, ngen i̱nna̱ inya annit maam cik kunyene anna zo̱o̱ cigannik, abarik enne uculahan zo̱o̱ cigannik ti̱la̱lo̱i̱ kar ki̱ti̱vi̱l zo̱o̱ cigannik imane ciginnek. 45Ngen i̱nna̱ zawan, ma̱i̱je̱ ngaa cu, i̱i̱ ci ki̱zo̱we̱ anna, ngen enne kibiliz cucuwenet zo̱o̱ cigannik. 46Ngen i̱nna̱ arik maal oo cinanni, ma̱i̱je̱ ngaa icu u̱ddu̱te̱k maal zo̱o̱ cigannik. 47I̱yo̱ko̱ zin, ka̱du̱wa̱ki̱ anna i̱nne̱ta̱, aartai mu̱nye̱na̱ ciginnek meelek ko̱, eci enne ireze oroot. Ma̱i̱je̱ e̱e̱ti̱ ci aartai mu̱nye̱na̱ ciginnek cikidik ireze bo̱do̱k enne idic.”

48A̱nne̱k zin Ye̱su̱ ngaa neci ne, “Aartai i̱nne̱t mu̱nye̱na̱.”

49Kar ol balik e̱e̱ggi̱n e̱re̱nno̱k ke̱ kozozit nege do̱, “Ngene dim e̱e̱ti̱ ci aara ol mu̱nye̱n ko̱?”

50U̱du̱wa̱k zin Ye̱su̱ ngaa, “I̱ti̱ri̱zi̱ i̱nne̱t tu̱we̱ne̱t cunne; bit yahe.”

Currently Selected:

Lu̱ka̱ 7: tex

Highlight

Copy