Lu̱ka̱ 19

Zakayos e̱e̱t ci aluta mucuru

1I̱tto̱ Ye̱su̱ orog ci een Je̱ri̱ko̱, etted zin enne orog orgena. 2Anyak da̱ e̱e̱t imma o̱rge̱ neci ci een zara Zakayos; een da̱ enne ddi̱ki̱ryo̱i̱t ci ol wak aluta mucuru olle kar enne kize i̱to̱i̱t oroot. 3Orong da̱ enne kicin ngene ci een Ye̱su̱ ko̱, ma̱i̱je̱ ngatu een enne e̱e̱t ci u̱tu̱ri̱ oroot, iróng zin enne ngen acin nonno, eci meele ol. 4I̱vi̱r zin enne ol oowa kar kuk kottod keet ci een munec gool abanyca orong kicin Ye̱su̱, ming okko enne a̱kku̱ go̱o̱le̱ neci.

5Baling uzuca Ye̱su̱ nginti aave enne ke̱, icin zin enne ta̱dde̱n kar kizek nonno ne, “Zakayos, lucai ataman. Kokko la̱du̱n anna wazin cu kaave ce̱e̱ze̱ cunne.” 6Ulucai zin Zakayosi keeta ta̱dde̱na̱ ataman kar kuwe Ye̱su̱ ce̱e̱ze̱ cinne talninta.

7Imma ol balik icinnet zoz neci do̱o̱k kar zin kungungunet, “Okko enne een e̱re̱nno̱i̱t ce̱e̱ze̱ ci e̱e̱t ci ‘mu̱nye̱nu̱.’”

8Ma̱i̱je̱ Zakayosi itinga je̱e̱na̱ kar kizek Manyi ne, “Cinno, Manyi, kengeri atin anna kaal cigannik gegera kar kanyik ol wak amati, kar ming ku̱lu̱ta̱ da̱ ba̱li̱ye̱ e̱e̱t imma gi̱i̱ye̱ emani, ka̱ru̱i̱ atin anna o̱ro̱bi̱ya̱ ne̱ke̱ lak we̱c.”

9A̱nne̱k zin Ye̱su̱ nonno ne, “Wazin necu i̱ki̱ya̱ ti̱ri̱ze̱ne̱t ce̱e̱z cu, eci e̱e̱ti̱ cu bu̱k een ngerrti Aburahami. 10Eci Ngerrti E̱e̱to̱ a̱kku̱ ki̱ki̱ya̱ koronga kar ki̱ti̱ri̱z ol balik i̱ti̱yye̱t tu̱.”

Tubzenet ci o̱ro̱bi̱ya̱u̱

(Ma̱te̱yo̱ 25:14-30)

11Baling ngen ol wak owo ki Ye̱su̱ ko̱ aziye de̱mzi̱ne̱t cinne, u̱du̱wa̱k zin enne nogo bo̱do̱k tubzenet cu, eci enne ojongoz Jerusalem kar ol ki̱no̱ni̱t kizeto ne okko ba̱a̱li̱ne̱t ci Ta̱mu̱ta̱dde̱no̱ i̱ye̱la̱i̱ lak co̱de̱. 12Kar zin enne kize ne, “Anyak da̱ e̱e̱t imma ci a̱ddi̱ki̱re̱ oroot ci okko lo̱o̱ce̱ ci reeni kar enne kuk ka̱gga̱mo̱zi̱k kize alaan, kar enne koboda. 13Baling ngen enne kuk, utu zin enne du̱cca̱k waginnek een omoto kar kaanyik nogo o̱ro̱bi̱ya̱ lodet omoto cik een ziik.#19:13 Lo̱do̱ ci o̱ro̱bi̱ya̱ cik e̱e̱ggi̱n ziik: A̱ru̱we̱k ol e̱e̱t o̱ro̱bi̱ya̱ cik lo̱do̱ co̱de̱ ngati a̱li̱ngli̱nge̱ nye̱lo̱we̱ i̱i̱yo̱. Kar enne kize ne, ‘I̱li̱ngli̱ngte̱ o̱ro̱bi̱ya̱ ne̱ko̱, zee koboda anna.’

14“Imma ol cik lo̱o̱c cinne, amarine nonno oroot, kar zin ki̱tto̱ntte̱k ol u̱gge̱ koot oowa ngatinne kizeto ne, ‘Iróng naga korongnya e̱e̱t cu kize alaan cinna̱ng.’

15“Atahaltta zin ol nonno kize alaan, kar zin enne koboda lo̱o̱c cinne. Utu zin enne du̱cca̱k waginnek een omoto, balik aanyik enne lodet omoto cik o̱ro̱bi̱ya̱u̱ ke̱. Orong ka̱gga̱ i̱ti̱rre̱t ucca o̱ro̱bi̱ya̱na̱ ne̱ke̱, izeto izong.

16“I̱ki̱ya̱ zin du̱ca̱i̱ti̱ wa oowu kar kizek nonno ne, ‘Alaan, i̱ti̱r lo̱do̱ co̱de̱ ci o̱ro̱bi̱ya̱u̱ balik aanya i̱nna̱ annit ke̱ izeto omoto.’

17“Ize zin alaani ne, ‘U̱tu̱gu̱ i̱nna̱ gi̱i̱ ci abunna! Eci i̱nna̱ e̱e̱ni̱ du̱ca̱i̱t ci abunna azunne kaal cikidik ko̱, i̱yo̱ko̱ zin katahalai anna i̱nne̱ta̱ ize ddi̱ki̱ryo̱i̱t ci o̱ro̱gjo̱k omoto.’

18“I̱ki̱ya̱k zin bo̱do̱k du̱ca̱i̱ti̱ imma alaan kar kize ne, ‘Alaan, i̱ti̱rre̱t o̱ro̱bi̱ya̱na̱ balik aanya i̱nna̱ annita ke̱ lak tu̱r.’

19“Iizek zin alaani nonno ne, ‘U̱tu̱gu̱ i̱nna̱ bo̱do̱k gi̱i̱ ci abunna oroot. I̱yo̱ko̱ zin ize i̱nna̱ ddi̱ki̱ryo̱i̱t ci o̱ro̱gjo̱k tu̱r.’

20“I̱ki̱ya̱ zin bo̱do̱k du̱ca̱i̱ti̱ wa vu̱rrto̱, anyaha o̱ro̱bi̱ya̱ balik aanyik alaani nonno ke̱ niko, kar kize ne, ‘Alaan, kuzute anna o̱ro̱bi̱ya̱ ne̱ko̱ ka̱vvu̱to̱ ru̱u̱me̱ cu. 21Ko̱ngo̱o̱li̱nni̱ anna i̱nne̱ta̱, eci i̱nna̱ e̱e̱ni̱ gu̱zu̱lo̱i̱t. Abarik i̱nna̱ orongi ol kabaltei i̱nne̱t kaal kar i̱jja̱ lungan labak, ming ngen i̱nna̱ tu̱gu̱ gi̱i̱ imma bu̱k.’

22“Abarizek zin alaani cinne nonno, ‘Kettediki atin anna i̱nne̱t lo̱ki̱ko̱ zo̱ze̱ ci a̱du̱wa̱ i̱nna̱, e̱e̱ni̱ i̱nna̱ du̱ca̱i̱t ci mu̱nye̱nu̱! A̱gga̱ i̱nna̱ ming ke̱e̱ni̱ anna e̱e̱t ci kokkomi kak, kokkoye kaal cik ngen karik cigannik, kar ketteda kaal cik ngen anna keevu. 23Ming a̱gga̱ i̱nna̱ baiz cinanni niko, iróng zin da̱ i̱nna̱ arike o̱ro̱bi̱ya̱ cigannik ki̱ti̱rre̱t nya? Kar zin ming kokko anna koboda kamuda i̱ti̱rre̱t izeto meele.’

24“Kar zin enne kizek ol cik abile abanyca ko̱ ne, ‘A̱gga̱mtta̱ lo̱do̱ ci o̱ro̱bi̱ya̱u̱ ngatinne kar anycik du̱ca̱i̱t bali a̱rri̱t o̱ro̱bi̱ya̱na̱ ciginnek lak omoto ke̱.’

25“Izeto zin nege ne, ‘Alaan, anyak enne la̱du̱n omoto!’

26“O̱bo̱de̱k zin bo̱do̱k alaani nogo, a̱nne̱k ne, ‘Ka̱du̱wa̱kku̱ng anna, ngati e̱e̱t imma ci anyak la̱du̱n, anyonik atin nonno, ma̱i̱je̱ ngati e̱e̱t ci iróng anyak gi̱i̱ imma, a̱gga̱mnya̱i̱ atin ngatinne rok ne̱k anyak enne ke̱. 27Ma̱i̱je̱ ngati mo̱ddo̱ wagannik aburna annit kize alaan ci kabali nogo ko̱, anyaktta nogo ngintu kar u̱ru̱we̱t ka̱da̱i̱to̱ kicin anna.’”

I̱i̱zo̱ Ye̱su̱ Jerusalem talninta

(Ma̱te̱yo̱ 21:1-11; Marko 11:1-11; Jon 12:12-19)

28Baling u̱du̱wa̱ Ye̱su̱ zoz cu, uk zin enne oowa okko rok Jerusalem. 29Baling ojongoz enne o̱ro̱gjo̱k cik Bethphage ki Bethany biye ci een zara Bee ci I̱ngi̱ro̱u̱,#19:29 Bee ci I̱ngi̱ro̱u̱: Biye cu, anyak keen cik meelek i̱ngi̱ro̱u̱. Okoli keet ci een i̱ngi̱ro̱c ko̱ o̱ya̱u̱ cik wo̱ye̱ adak ol icima amacca ol maal ci irez olli Ya̱u̱do̱ oroot ngati aahe da̱i̱ne̱t icima atukule urez. i̱tto̱n zin enne nuyak ciginnek rama koot oowa, a̱nne̱k nogo ne, 30“Oot zin o̱rge̱ ci aave oowe cunno̱ng ko̱, kar zin niga i̱tto̱zzo̱, arubannu atin mo̱o̱le̱t ci zi̱gi̱ro̱ ming e̱ce̱bje̱ keeta vu̱rrta̱, ngen da̱ e̱e̱ti̱ imma kotowe bu̱k. Oogtta kar anyaktta rok annit ngatu. 31Ming a̱jji̱nnu̱ng e̱e̱ti̱ imma azi ne, ‘Nya ming ooganu zi̱gi̱r ko̱?’ U̱du̱kta̱k nonno, izektek ne, ‘Orong Manyi zi̱gi̱r necu.’”

32U̱mu̱dda̱ zin ol balik ovvo oowa ke̱ zoz neci ki baling a̱du̱wa̱k enne nogo ke̱. 33Baling ovvo nege ooga mo̱o̱le̱t ci zi̱gi̱ro̱, icinnet da̱ ma̱ci̱gi̱ zi̱gi̱r nogo. Kar zin ki̱jji̱nne̱t nogo kizettek ne, “Nya ming ooganu zi̱gi̱r cinna̱ng ko̱?”

34O̱bo̱dde̱k zin bo̱do̱k nege, a̱nne̱k ne, “Orong Manyi.”

35Anyaktta zin nuyaha ne̱ke̱ mo̱o̱le̱t ci zi̱gi̱r neci rok Ye̱su̱, kar zin ku̱ju̱kte̱k ru̱u̱ma̱ni̱ cigge̱k zi̱gi̱r, kar kartik Ye̱su̱ ka̱vvu̱i̱. 36Baling otowe enne mo̱o̱le̱t neci, u̱ju̱ktte̱k zin ol ru̱u̱ma̱ni̱ cigge̱k gool ngati a̱di̱ngdi̱nga̱ne̱ nonno.

37Baling okko Ye̱su̱ ojongoz gool ci aluce okko Biye ci I̱ngi̱ro̱u̱ lo̱o̱ta̱, a̱ka̱tte̱ zin nuyaha cik meelek inatit Ta̱mu̱ta̱dde̱n muluwanine cik a̱ppi̱nte̱k eci enne u̱tu̱gu̱ kaal cik a̱vu̱la̱ balik icinnet nege ke̱, azi ne,

38“U̱mu̱yu̱k Ta̱mu̱ta̱dde̱n e̱e̱t ci a̱kku̱ zare cik Manyi!#19:38 E̱e̱t ci a̱kku̱ zare cik Manyi: Een e̱e̱ti̱ neci Ye̱su̱.”#Caliwon 118:26

“Aave gano ta̱mu̱-kenga ki di̱ngdi̱ngo̱n ci aave ta̱dde̱na̱!”

39Imma Varacisi uggak orgene ci ollu a̱nne̱k Ye̱su̱ ne, “De̱me̱zo̱i̱t, gerenyek bong nuyak cigunnek!”

40O̱bo̱de̱k zin enne nogo, “Ka̱du̱wa̱kku̱ng anna i̱ge̱ta̱, ming ijaktte nege li̱i̱m, ovvo atin biyena ozozi.”

41Baling ojongoz Ye̱su̱ Jerusalem kar kicin orog neci a̱ddi̱ki̱re̱ ke̱, kar zin u̱tu̱lu̱we̱k. 42Kar kize ne, “Ming a̱gga̱yyu̱ niga wazin cu nya ci anyahakku̱ng i̱ge̱t gano, ma̱i̱je̱ i̱yo̱ko̱ a̱lu̱gnye̱ zoz necu eberene ciggo̱k. 43Ovvo zin atin i̱i̱nya̱ cik a̱vvu̱na̱kku̱ng i̱ge̱ta̱ ko̱ kar mo̱ddo̱ ciggo̱k kidimanit lo̱dhi̱dhi̱re̱t cik aburuk a̱lu̱wa̱ ci biyen ko̱ o̱to̱ do̱o̱k. 44Orocekung atin nege i̱ge̱ta̱ ki dooli do̱o̱k di̱la̱twa̱ cuggo̱k ecito. Iróng atin nege ungnek bee co̱de̱ ka̱vvu̱ o̱o̱we̱ ci gononi, eci iróng niga ba̱li̱ye̱ elemnyyu i̱i̱te̱n ci a̱kku̱na̱kku̱ng Ta̱mu̱ta̱dde̱n i̱ge̱ta̱.”

Aave Ye̱su̱ Ce̱e̱ze̱ wa Ta̱mu̱ta̱dde̱no̱

(Ma̱te̱yo̱ 21:12-17; Marko 11:15-19; Jon 2:13-22)

45I̱tto̱ zin enne Ce̱e̱z wa Ta̱mu̱ta̱dde̱no̱ kar kottok ol wak ataline kaal nginati. 46A̱nne̱k enne nogo ne, “E̱he̱rye̱ Warage ci Ta̱mu̱ta̱dde̱no̱, ‘Awu atin ol Ce̱e̱z cinanni kize Ce̱e̱z wa Lawinto,’#Isaya 56:7 abarik niga anyikku kize ‘nyaperit ci a̱lu̱ngnye̱ ogoryaha.’#Jeremiah 7:11”

47Kar enne odohize kedemezo Ce̱e̱ze̱ wa Ta̱mu̱ta̱dde̱no̱. Imma zin alaata cik olli wawaco ki de̱me̱zzo̱k wak lo̱ti̱nno̱k wak Musesi ki lo̱ddi̱ki̱re̱ wak Ya̱u̱da̱k orongit ku̱ru̱we̱t nonno ka̱da̱k. 48Iróng zin nege ngen amuda gool ci kar ku̱ru̱kte̱ nonno, eci ol do̱o̱k elemtta zoz cinne.

Currently Selected:

Lu̱ka̱ 19: tex

Highlight

Copy