Lu̱ka̱ 13

Uturtta mu̱nye̱n icima a̱da̱i̱to̱

1Imma i̱i̱te̱ne̱ neci ele, anyak da̱ ol u̱gge̱ cik u̱du̱kta̱k Ye̱su̱ zoz ci ol cik Ga̱li̱li̱ ongotan Pilato bi̱ye̱ cigge̱k ki wawa cigge̱k. 2Abarizek zin Ye̱su̱ nogo, “I̱no̱nnu̱ niga ommog mu̱nye̱na̱ cik ol cik Ga̱li̱li̱ aavtte ngatu ko̱, olli Ga̱li̱li̱ veelek eci nege ipirta go̱o̱le̱ necu? 3Ka̱du̱wa̱kku̱ng anna i̱ge̱ta̱, i̱llo̱i̱! Ma̱i̱je̱ ming ngen niga uturtta mu̱nye̱n ciggo̱k, aditannung mu̱nye̱na̱ ne̱ke̱ i̱ge̱t do̱o̱k. 4Icima ol balik e̱e̱ggi̱n omoto ki tu̱rge̱ balik aditai baling i̱ta̱k nogo ce̱e̱z ci wu̱u̱ni̱ aave ngati een Siloam ke̱, i̱no̱nnu̱ niga gerze da̱ nege oroot kommogit ol ne̱k abak Jerusalema ko̱? 5Ka̱du̱wa̱kku̱ng anna i̱ge̱ta̱, i̱llo̱i̱! Abarik ming iróng niga urtannu mu̱nye̱n ciggo̱k, aditannung atin mu̱nye̱na̱ ne̱ke̱ i̱ge̱t bu̱k veelek.”

Tubzenet ci keet ci een manggac iróng a̱a̱ri̱

6Kar zin Ye̱su̱ ku̱du̱wa̱k nogo tubzenet cu: “Anyak da̱ e̱e̱ti̱ keet ci een manggac, arirek ma̱na̱ cinne, kar enne kuk korong o̱ya̱u̱ cik keet neci, abarik iróng enne ngen amuda imma. 7Izek zin enne e̱e̱t ci ebek ma̱na̱ ko̱ ne, ‘I̱yo̱ko̱ kowo gon anna ma̱na̱ cu e̱rki̱nya̱ i̱i̱yo̱, iróng zin kamuda o̱ya̱u̱ u̱gge̱. Ettedak keet necu lo̱o̱c! Nya ming angaba keet necu lo̱o̱c ko̱?’

8“O̱bo̱de̱k zin e̱e̱ti̱ neci, ‘Ddi̱ki̱ryo̱i̱t, tungek keet necu ka̱vvu̱ do̱ e̱rki̱t co̱de̱, ka̱da̱ atin anna vu̱rru̱t cinne kar ku̱du̱te̱k coolo. 9Ming a̱bbi̱re̱ atin keet necu atilola, abunna! Ming iróng a̱bbi̱re̱, kengedak atin zin lo̱o̱c.’”

Angaru Ye̱su̱ ngaa ci ngooli I̱i̱te̱ne̱ wa Yu̱bze̱nto̱

10Imma da̱ I̱i̱te̱ne̱ wa Yu̱bze̱nto̱ edemez Ye̱su̱ ol Ce̱e̱ze̱ wa Lawinto, 11kar da̱ nginati anyak ngaa ci a̱du̱l kuuloci nonno kize ngool e̱rki̱nya̱ omoto ki tu̱rge̱. Ugulume zin da̱ bo̱i̱c cinne iróng ngen uule kibil ṯop. 12Baling icin Ye̱su̱ nonno, utu zin ngaa neci ngooli ke̱ kar kizek ne, “Ngaa cu, ogjai i̱nna̱ morize necu.” 13Kar zin enne katadek nonno azzin ciginnek, kar enne ataman niko kibil ṯop kar kitina Ta̱mu̱ta̱dde̱n.

14Imma ddi̱ki̱ryo̱i̱ti̱ wa Ce̱e̱ze̱ wa Lawinto omoze oroot, eci Ye̱su̱ angaru ngaa wa ngooli ko̱ I̱i̱te̱ne̱ wa Yu̱bze̱nto̱, kar kizek ol ne, “Anyak i̱i̱nya̱ torkonom cik li̱ngli̱ngo̱nta̱k. I̱vi̱ta̱ zin kar abunna ovvo e̱le̱tti̱ cuggo̱k adimane i̱i̱te̱ne̱ ci a̱li̱ngli̱nge̱ ol, iróng een I̱i̱te̱ne̱ wa Yu̱bze̱nto̱.”

15O̱bo̱de̱k zin Manyi nonno, “Niga ol cik a̱ru̱kku̱ talaben ko̱! Iróng gon niga do̱o̱k I̱i̱te̱ne̱ wa Yu̱bze̱nto̱ owanu tiin icima zi̱gi̱re̱ boora kar aanycik maam? 16Iróng zin ngaa icu een buweenyi Aburahami, wa aminye Sitani e̱rki̱nya̱ omoto ki tu̱rge̱ ko̱, aburnnu, ming eelai enne I̱i̱te̱ne̱ wa Yu̱bze̱nto̱ gi̱i̱ye̱ ci aminye nonno ko̱?”

17Baling u̱du̱wa̱ enne zoz necu, adak zin a̱li̱ya̱ni̱ ol balik adang nonno ke̱ do̱o̱k, imma ol do̱o̱k atalne gi̱i̱ye̱ ci abunna u̱tu̱gu̱ enne ko̱.

Tubzenet ci bu̱ra̱co̱co̱ ki gi̱i̱ ci amukcari

(Ma̱te̱yo̱ 13:31-33; Marko 4:30-32)

18I̱jji̱nno̱ zin Ye̱su̱, “Ogon ba̱a̱li̱ne̱t ci Ta̱mu̱ta̱dde̱no̱ kiwagon ni̱i̱? Katubuzi wo̱ye̱ anna ki gi̱i̱ jang? 19Ogon ki bu̱ra̱co̱c ci bolbolento, ci okkoye e̱e̱ti̱ kar kirir ma̱ne̱ cinne. Alize zee kize keet, kar iballi cik a̱vvu̱ ta̱mu̱-kenga keteehenyit ce̱e̱zi̱ cigge̱k alawoi cik keet neci.”

20I̱jji̱nno̱ zin bo̱do̱k Ye̱su̱ dee, azi ne, “Katubuzi wo̱ye̱ anna ba̱a̱li̱ne̱t ci Ta̱mu̱ta̱dde̱no̱ ki nya? 21Ogon ki nyigita cik meertak cik adima ngaa kar kongotanek ki ovou ci a̱ppwe̱ kar vu̱rrta̱ aabub kize lata.”

Tatug ci luduci

(Ma̱te̱yo̱ 7:13-14,21-23)

22Uk zin Ye̱su̱ oto o̱ro̱gjo̱we̱, edemez ol o̱ro̱gjo̱we̱ ngati okkoye enne Jerusalema. 23I̱jji̱n zin e̱e̱ti̱ imma nonno, “Manyi, ovvo atin ol cikidik amuda ti̱ri̱ze̱ne̱t?”

Izek enne nogo ne, 24“U̱tu̱gu̱z li̱ngli̱ngo̱n do̱o̱k kar i̱tto̱z tatug ci luduci, ka̱du̱wa̱kku̱ng anna i̱ge̱ta̱, eci ol cik meelek orong atin ki̱tto̱zo̱, iróng zin nege uule ki̱tto̱zo̱. 25Ming okko manyi ce̱e̱z ingazi lak co̱de̱ kar kunyug tatug, abilnnu atin niga reena ilalu oṯokṯokwanu tatug, ‘Ddi̱ki̱ryo̱i̱t, oowikket agit tatug.’

“Ma̱i̱je̱ atin enne abarizi, ‘Iróng anna ka̱gga̱yyu̱ng icima a̱vvu̱nnu̱ niga nga.’

26“A̱nne̱kku̱ atin niga nonno ne, ‘Kadaktowa ba̱li̱ye̱ naga kar bo̱do̱k kuuda maam ki i̱nne̱ta̱, kar bo̱do̱k i̱nna̱ demez ol go̱o̱lo̱we̱ cik o̱ro̱gjo̱k cigga̱k.’

27“Ma̱i̱je̱ atin enne abariz zoz cunno̱ng, ‘Iróng anna ka̱gga̱yyu̱ng icima a̱vvu̱nnu̱ niga nga. Oto, niga ol wak gon ogonnu kaal cik gerzek ko̱.’

28“A̱lu̱yyu̱ atin niga oroot, kar bo̱do̱k adait e̱le̱tti̱ ngati ovvo acinnu Aburaham, I̱sa̱ko̱, Ya̱ko̱bo̱ ki a̱ri̱tto̱k ba̱a̱li̱nte̱ ci Ta̱mu̱ta̱dde̱no̱, abarik atin Ta̱mu̱ta̱dde̱n ottokung i̱ge̱ta̱ oot twa̱. 29A̱vvu̱ zin atin ol o̱ro̱gjo̱we̱ cik lo̱o̱tu̱ ko̱ veelek, kar karakta ngintinne̱ng kwo̱o̱re̱ ci aave ba̱a̱li̱nte̱ ci Ta̱mu̱ta̱dde̱no̱. 30De̱de̱, anyak ol cik e̱e̱ggi̱n vu̱rrti̱ ovvo atin nege e̱e̱ggi̱n o̱o̱tti̱, kar cik e̱e̱ggi̱n o̱o̱tti̱ ovvo atin nege e̱e̱ggi̱n vu̱rrti̱.”

A̱lu̱ Ye̱su̱ zo̱ze̱ ci Jerusalemi

31Imma i̱i̱te̱n neci i̱vi̱tta̱k olli Varacisi Ye̱su̱ kar kizettek nonno ne, “Tungek ngin necu lo̱o̱c kar bit ngamani. Orong He̱ro̱di̱ ku̱ru̱wi̱n!”

32Abarizek zin enne nogo, “I̱mi̱rrte̱ oot u̱du̱kta̱k i̱re̱r neci, ‘Kottoi anna kuulo cik lo̱rye̱nta̱k kar kangaru ol wazin necu ki loza, kar i̱i̱te̱n ci een i̱i̱yo̱ kuzuca atin anna gi̱i̱ ci korongi ku̱tu̱gu̱.’ 33Imma zin kaale do̱o̱k, korongi anna koto wazin necu ki loza kar i̱i̱te̱n ci reng, i̱llo̱i̱ atin a̱ri̱to̱i̱t imma ci okko a̱da̱i̱ reena Jerusalema!

Irez Ye̱su̱ olli Jerusalemi

(Ma̱te̱yo̱ 23:37-39)

34“Olli Jerusalemi, olli Jerusalemi, niga ol wak i̱di̱tta̱ a̱ri̱tto̱k cik zoz ci Ta̱mu̱ta̱dde̱no̱, kar kovoccit biyene ol wak i̱tto̱na̱kku̱ng Ta̱mu̱ta̱dde̱n i̱ge̱ta̱, korongi gon anna kuluta dooli ciggo̱k ngi̱nto̱de̱, ki ming alutak tuulici jooro ṯaaba ciginnek, abarik niga aburnnu! 35Icinnet, utungozik ce̱e̱z cunno̱ng lo̱o̱c. Ka̱du̱wa̱kku̱ng anna i̱ge̱ta̱, iróng atin niga ngen acinnang bo̱do̱k zee ming izetu ne, ‘U̱mu̱yu̱k Ta̱mu̱ta̱dde̱n e̱e̱t ci a̱kku̱ zare cik Manyi.#13:35 E̱e̱t ci a̱kku̱ zare cik Manyi: Een e̱e̱ti̱ neci Ye̱su̱.’#Caliwon 118:26 ”

Currently Selected:

Lu̱ka̱ 13: tex

Highlight

Copy