Jon 7

Ye̱su̱ ki gotonoggi

1Imma bali vu̱rrta̱, eron Ye̱su̱ uk lo̱o̱ce̱ ci Ga̱li̱li̱, alit lo̱o̱c ci Ju̱de̱ya̱ eci ol cik een Ya̱u̱d orong ku̱ru̱we̱t nonno ka̱da̱k. 2Baling ize ojon Kwo̱o̱r ci Ti̱te̱tu̱ Ya̱u̱do̱#7:2 Kwo̱o̱r ci Ti̱te̱tu̱: Adak olli Ya̱u̱do̱ kwo̱o̱r necu kar ka̱vvu̱to̱ nege ti̱te̱te̱ i̱i̱nya̱ turgerem e̱rki̱ta̱, ka̱a̱dda̱ ji̱ji̱ti̱gge̱k, balik o̱bo̱dda̱ Masire kar kabaito ti̱te̱te̱ balala e̱rki̱nya̱ moten we̱c. Ikeb Leviticus. 23:39-43.; 3izettek gotonoggi Ye̱su̱ nonno ne, “Orong tungek ngintu lo̱o̱c bit Ju̱de̱ya̱kte̱ abunna ming okko ogoni kaal cik a̱vu̱la̱ kicinnet nuyaha wagunnek. 4Iróng e̱e̱t a̱lu̱gu̱ny gi̱i̱ ci ogon ming orong ku̱bu̱lte̱ zara ciginnek, tu̱gu̱ kaal kicinnet ol lo̱o̱co̱we̱ do̱o̱k.” 5Iróng zin gotonoggi Ye̱su̱ bu̱k elemi zoz cinne.

6O̱bo̱de̱k zin Ye̱su̱ gotonoggi, a̱nne̱k ne, “Ngen i̱i̱ wananni ki̱ki̱ya̱, een necu i̱i̱ cunno̱ng. 7Iróng olli lo̱o̱tu̱ amarinnung, abarik amarinnan eci anna ka̱du̱wa̱ke̱ nogo kaal cik gerzek ogon nege. 8Oot kwo̱o̱re̱ neci, iróng anna kokko kwo̱o̱re̱ neci eci ngen i̱i̱ wainne abunna ki̱ki̱ya̱.” 9Baling u̱du̱wa̱ zoz cinne niko, erahek zin o̱rge̱ ci Ga̱li̱li̱.

10Baling oot gotonoggja kwo̱o̱re̱ neci, inik zin Ye̱su̱ lo̱mu̱k unu nogo bu̱k, ci iróng i̱ye̱le̱k ele cinne ol. 11Orongit zin lo̱ddi̱ki̱re̱ ci Ya̱u̱do̱ ngati adahe ol kwo̱o̱r ke̱, kar zin ki̱jji̱nto̱, “I̱nno̱ e̱e̱t neci?”

12Ongongonet zin koole neci zo̱ze̱ ci Ye̱su̱, azi uggak ne, “Een enne e̱e̱t ci abunna.”

Ovvo bo̱do̱k uggak azi ne, “A̱zze̱to̱, een Ye̱su̱ e̱e̱t ci a̱lu̱t ol.” 13Abarik i̱llo̱i̱ e̱e̱t imma ci ozoz zoz kiziyet ol do̱o̱k eci nege o̱ngo̱o̱le̱ lo̱ddi̱ki̱re̱ cik Ya̱u̱do̱.

Edemez Ye̱su̱ ol kwo̱o̱ra̱

14Baling ngen ol adak kwo̱o̱r, uk Ye̱su̱ Ce̱e̱ze̱ wa Ta̱mu̱ta̱dde̱no̱ kar kakate de̱mzi̱ne̱t. 15U̱ku̱lte̱k zin olli Ya̱u̱do̱ je̱e̱n de̱mzi̱nte̱ ci Ye̱su̱, kar zin ki̱jji̱nto̱ kizeto ne, “Amuda e̱e̱ti̱ cu de̱mzi̱ne̱t cu ku̱ baling ngen kuk de̱mzi̱ne̱t?”

16O̱bo̱de̱k Ye̱su̱ nogo, a̱nne̱k ne, “Iróng de̱mzi̱ne̱t icu een cinanni. A̱kku̱ de̱mzi̱ne̱t icu ngati e̱e̱t bali i̱tto̱na̱na̱ ke̱. 17Ming anyak e̱e̱t ci orong ki̱li̱ngli̱nge̱ de̱mzi̱ne̱t ci Ta̱mu̱ta̱dde̱no̱, amuda atin enne keng ci de̱mzi̱ne̱t necu a̱kku̱ ngati Ta̱mu̱ta̱dde̱no̱ icima kozozi de̱mzi̱ne̱t ci a̱kku̱ o̱o̱we̱ cinanni do̱. 18Imma e̱e̱ti̱ ci ozoz zoz o̱o̱we̱ cinne do̱, orong ki̱di̱ngdi̱nga̱ni̱t ol nonno, abarik e̱e̱ti̱ wa ozoz zoz ci e̱e̱t wa i̱tto̱na̱na̱ ko̱, a̱di̱ngdi̱nga̱n nonno, een e̱e̱t ci ozoz zoz ci een de̱de̱, iróng enne anyak volong. 19Ngen ba̱li̱ye̱ Musesi ka̱a̱nyu̱ng lo̱ti̱nno̱k? A̱zze̱ zin e̱e̱ti̱ imma ngatinno̱ng ci azunne lo̱ti̱nno̱k ne̱ke̱ to. Nya ming orongnyu u̱ru̱kta̱ng ko̱?”

20O̱bo̱dde̱k zin koole ne̱ke̱ nonno, a̱nne̱k ne, “Anyai i̱nna̱ kuulo cik lo̱rye̱nta̱k,#7:20 Kuulo cik lo̱rye̱nta̱k: E̱e̱ggi̱n bali nege anjilonya ki Ta̱mu̱ta̱dde̱n ta̱mu̱-kenga ngati alaan cinne̱ng wa een Sitan ko̱ kar bali nege kutuburret Ta̱mu̱ta̱dde̱n kar zin Ta̱mu̱ta̱dde̱n kottok nogo ta̱mu̱-kenga. Kar zin nege kizeto kuulo cik lo̱rye̱nta̱k cik atiza ol lo̱o̱ta̱ ngatu ko̱. IkebO̱no̱zzo̱k 12:7-9. ngene ci orong ku̱ru̱wi̱n?”

21O̱bo̱de̱k bo̱do̱k Ye̱su̱ nogo, a̱nne̱k ne, “Ku̱tu̱gu̱ gi̱i̱ ci a̱vu̱la̱ co̱de̱, u̱ku̱ltte̱u̱ zin niga je̱e̱n. 22U̱du̱wa̱u̱ng Musesi zoz ci etteddu wucic vi̱ca̱vi̱ca̱#7:22 Etted vi̱ca̱vi̱ca̱: U̱du̱wa̱k bali Ta̱mu̱ta̱dde̱n Aburaham a̱nne̱k ne, ming anyait dooli cigunnek macik i̱i̱nya̱ tu̱rge̱, anyik ol kettedit wucic vi̱ca̱vi̱cce̱t kar ki̱ye̱la̱ azi ne, e̱e̱ggi̱n nege dooli cik Ta̱mu̱ta̱dde̱no̱. IkebKananet 17:9-14., (a̱kku̱ keeri necu ngato be̱e̱ti̱ggo̱k), etteddu zin dooli vi̱ca̱vi̱cce̱t I̱i̱te̱ne̱ wa Yu̱bze̱nto̱ nya? 23Ming ettede wucic vi̱ca̱vi̱ca̱ ci do̱le̱co̱ I̱i̱te̱ne̱ wa Yu̱bze̱nto̱, iróng zin lo̱ti̱nno̱wa̱ wak Musesi a̱du̱le̱, nya zin ming omozinnu niga ngatinanni niko ko̱ ming kangaru anna e̱e̱t ci diiri I̱i̱te̱ne̱ wa Yu̱bze̱nto̱? 24Ma zin ettedekku e̱e̱t lo̱ki̱ko̱ kaale cik acinnu eberene, etteddek e̱e̱t lo̱ki̱ko̱ ju̱rru̱m.”

Een Ye̱su̱ e̱e̱t wa atahalai kize ti̱ri̱zo̱i̱t de̱de̱?

25Imma i̱i̱te̱ne̱ neci, i̱jji̱nto̱ zin ol uggak Jerusalema, izeto ne, “Iróng dim i̱ye̱ necu een e̱e̱t wanai orong ol ku̱ru̱we̱t ka̱da̱k ko̱? 26Icinnet da̱ ming ozozik koole, i̱llo̱i̱ zin rok e̱e̱t imma ci a̱ppu̱k utug. A̱gga̱c bong ette lo̱ddi̱ki̱re̱ ming een enne Ki̱ri̱sto̱ wa een ti̱ri̱zo̱i̱t de̱de̱? 27Ka̱gga̱yya̱ ri̱t nginti a̱kku̱nne̱ e̱e̱ti̱ necu. Ming okko a̱kku̱ Ki̱ri̱sto̱, i̱llo̱i̱ atin e̱e̱t ci a̱gga̱ nginti a̱kku̱nne̱.”

28Baling ngen Ye̱su̱ edemez ol reena Ce̱e̱ze̱ wa Ta̱mu̱ta̱dde̱no̱, egereny zin oroot, ize ne, “A̱gga̱yya̱ng de̱de̱, a̱gga̱yyu̱ nginti ka̱kku̱ne̱? Iróng anna ka̱kku̱ni̱ ngintu do̱ o̱o̱we̱ cinanni, ma̱i̱je̱ e̱e̱ti̱ ci i̱tto̱na̱na̱ a̱du̱wa̱ zoz ci een de̱de̱. Iróng zin niga a̱gga̱yyu̱ nonno. 29Ka̱gga̱ zin abarik anna nonno eci ka̱kku̱ni̱ ngatinne, nonno ci i̱tto̱na̱na̱n.”

30Orongit zin ol uggak ke̱ce̱bbi̱t nonno, ngen zin e̱e̱ti̱ imma ku̱u̱me̱k nonno a̱zzi̱t, ma̱rri̱t ming ngen ki̱ki̱ya̱ i̱i̱te̱ni̱ ci kar keceboi enne. 31Ma̱i̱je̱ bo̱do̱k ngatu, anyak ol cik meelek ngen a̱tu̱ nonno dee, kar kizeto ne, “Ming okko Ki̱ri̱sto̱ wa een ti̱ri̱zo̱i̱ti̱ a̱kku̱, okko atin enne ogon kaal cik meelek a̱vu̱la̱ kommog cik ogon e̱e̱ti̱ necu?”

I̱tto̱n olli Varacisi ol cigge̱k koot ke̱ce̱bbi̱t Ye̱su̱

32Baling iziyyet Varacisi ol ne̱ke̱ ming omomot zo̱ze̱ ci Ye̱su̱, i̱tto̱nni̱t zin alaat cik olli wawaco ki Varacis aciir cik gon ebek Ce̱e̱z wa Ta̱mu̱ta̱dde̱no̱, kar koot ka̱gga̱mi̱t nonno.

33A̱nne̱k zin Ye̱su̱ nogo ne, “Kaavtte anna ki i̱ge̱t ngatu i̱i̱nya̱ cikidik. Kokko atin ngati e̱e̱t wa i̱tto̱na̱na̱. 34Orongnyang atin zee bak iróng amudannang, imma nginti kaave anna, iróng niga azucannu.”

35Ozozzit zin ol cik een Ya̱u̱d nege do̱, anno ne, “I̱ni̱n ci orong e̱e̱ti̱ necu kar kuuwe ci iróng wo̱ye̱ naga karubane nonno ko̱? Okko atin enne lo̱o̱co̱we̱ cik abahe ol wagga̱c azanonnik ol cik een Gi̱ri̱k, kar kuk kedemez nogo? 36Azi ungec ci zoz cinne ne, ‘Orongnyang iróng atin amudannang,’ kar ‘Nginti kaave iróng a̱vvu̱nnu̱ rok’?”

Ozoz Ye̱su̱ zoz ci obod ki maam cik rugeto

37Baling okko een i̱i̱te̱n ci a̱ddi̱ki̱re̱ kar kedecai kwo̱o̱r, ibil Ye̱su̱ je̱e̱na̱ kar kozoz muluwe ci a̱bu̱le̱, azi ne, “Ming anyak e̱e̱t ci a̱ru̱k koor, anyik ki̱ki̱ya̱n kar kuude. 38Ki i̱yo̱ko̱ ming e̱he̱rye̱ Warage ci Ta̱mu̱ta̱dde̱no̱ azi ne, ming a̱tu̱ya̱ e̱e̱ti̱ imma annita, a̱rri̱ya̱ atin morena cik anyak maam cik rugeto zinine cinne.” 39Ozoz keng ci zoz necu zoz ci Vongizo, Vongiz ci atin aruba ol wak a̱tu̱ nonno; eci ngen Vongizi kanyozik ol, ngen li̱ngli̱ngo̱ni̱ ci Ye̱su̱ ki̱di̱ngdi̱nga̱ne̱.

Engertto ol lak ram

40Baling iziyyet ol ne̱ke̱ zoz ci Ye̱su̱, izeto uggak ne, “Een e̱e̱ti̱ cu a̱ri̱to̱i̱t ci zoz ci Ta̱mu̱ta̱dde̱no̱ de̱de̱.”

41Ovvo ol uggak azi ne, “Een e̱e̱ti̱ cu Ki̱ri̱sto̱ bali atahalai kize Ti̱ri̱zo̱i̱t.”

Ovvo uggak a̱jji̱nne̱ azi ne, “A̱kku̱ wo̱ye̱ Ki̱ri̱sto̱ Ti̱ri̱zo̱i̱ti̱ lo̱o̱ce̱ ci een Ga̱li̱li̱ ku̱? 42E̱he̱rye̱ Warage ci Ta̱mu̱ta̱dde̱no̱ azi ne, a̱kku̱ atin Ki̱ri̱sto̱ wa atahalai kize Ti̱ri̱zo̱i̱t biilete ci Da̱vi̱de̱,#7:42 Da̱vi̱de̱: Atahala Ta̱mu̱ta̱dde̱n nonno kize alaan ci Israilo kar bo̱do̱k a̱kku̱ atin alaani ci riili boore cinne, ci atin abal lo̱o̱c udut. Een alaani neci Ye̱su̱ Ki̱ri̱sto̱. IkebCaliwon 132:11-12; Buk wa To̱ni̱a̱u̱ 2:30. Abak bali Da̱vi̱de̱ e̱rki̱nya̱ i̱bbo̱ng co̱de̱ baling ngen Ye̱su̱ ki̱ti̱rra̱i̱. Ikeb1 Samwel 16-30; 2 Samwel 1-24; 1 Alaat 1-2. a̱rri̱ta̱i̱ o̱rge̱ ci een zara Betelem, o̱rge̱ bali abahe Da̱vi̱de̱ ke̱.”#7:42 Betelem, o̱rge̱ bali abahe Da̱vi̱de̱: A̱rri̱ta̱i̱ Ye̱su̱ Betelema, a̱kku̱ biilete ci Da̱vi̱de̱. IkebMa̱te̱yo̱ 2:1; Lu̱ka̱ 2:4-6. 43Engertto zin ol orgena zo̱ze̱ ci Ye̱su̱. 44Orongit uggak ke̱ce̱bbi̱t nonno, ngen zin e̱e̱ti̱ imma katadik nonno a̱zzi̱t.

Iróng ddi̱ki̱ryo̱wa̱ wak Ya̱u̱do̱ a̱tu̱we̱

45Bali vu̱rrta̱, oot ol cik ebekce ko̱ rok alaat cik olli wawaco ki Varacis, i̱jji̱nne̱t zoz ci azi ne, “Iróng anyahannu nonno ce̱e̱zto̱ nya?”

46O̱bo̱dde̱k zin ol cik ebekce ko̱ nogo, izeto ne, “Ngen ku̱mu̱dda̱ e̱e̱t imma ci ozoz ki i̱yo̱ko̱ e̱e̱ti̱ cu ko̱.”

47I̱jji̱nne̱t zin ol wak e̱e̱ggi̱n Varacis ko̱ nogo izettek ne, “Utuwa e̱e̱ti̱ necu o̱o̱tti̱ cuggo̱k bu̱k?” 48“I̱llo̱i̱ lo̱ddi̱ki̱re̱ icima Varacis cik a̱tu̱ zoz ci Ye̱su̱. 49Imma ol wak iróng a̱gga̱ lo̱ti̱nno̱k wak Musesi amuda atin to̱ri̱ne̱t ci Ta̱mu̱ta̱dde̱no̱.”

50Anyak e̱e̱t imma orgene cinne̱ng ci een zara Nikomede, een enne bu̱k Varacisoc, uk ba̱li̱ye̱ enne rok Ye̱su̱, a̱nne̱k zin nogo ne, 51“Azi lo̱ti̱nno̱wa̱ cigga̱c ne, iróng ol etted lo̱ki̱ko̱ ci e̱e̱to̱ ming ngen ku̱mu̱dda̱ gi̱i̱ ci ogon enne.”

52O̱bo̱dde̱k zin nege nonno, a̱nne̱k ne, “E̱e̱ni̱ i̱nna̱ e̱e̱t ci Ga̱li̱li̱? Cin ju̱rru̱m, amuda atidic iróng a̱ri̱to̱i̱ti̱ a̱kku̱ o̱rge̱ ci Ga̱li̱li̱.”

53Ibil zin zo̱ze̱ neci, azantte ol oot ce̱e̱zi̱nne̱.

Currently Selected:

Jon 7: tex

Highlight

Copy