Jon 16

1Kar zin Ye̱su̱ kizek nogo ne, “Ku̱du̱wa̱u̱ng ba̱li̱ye̱ anna i̱ge̱t no̱ngi̱tto̱n ne̱ko̱ gerza ming a̱ti̱kku̱ tu̱. 2Ovvo atin ol ottokung Ce̱e̱ze̱ wa Lawinto. I̱ki̱ya̱ i̱i̱ de̱de̱ ci okko gon e̱e̱ti̱ ci a̱ru̱kku̱ng a̱da̱i̱to̱ ngati i̱no̱ne̱ azi ne ka̱li̱ngli̱ngo̱ni̱k Ta̱mu̱ta̱dde̱n. 3Ogonekku̱ng atin kaal ne̱ko̱ eci nege iróng a̱gga̱ Baba, iróng a̱gga̱ya̱ annit bu̱k. 4Ka̱du̱wa̱kku̱ng zoz cu eci ming i̱ki̱ya̱ i̱i̱te̱ni̱ neci, ovvo atin a̱a̱da̱nnu̱ zoz bali ku̱du̱wa̱kku̱ng ke̱. Iróng arrak ba̱li̱ye̱ ka̱du̱wa̱kku̱ng zoz cu oowa ma̱rri̱t ba̱li̱ye̱ ming ngen kaavtte bu̱k.”

Li̱ngli̱ngo̱n ci Vongiz ci A̱li̱le̱

5“I̱yo̱ko̱ kokko anna ngati e̱e̱t bali i̱tto̱na̱na̱ annit ke̱, i̱llo̱i̱ zin rok e̱e̱t imma ngatinno̱ng ci a̱jji̱nna̱ annita, ‘Okko i̱nna̱ nga?’ 6Omozinnu i̱yo̱ko̱ niga ma̱rri̱t anna ming ku̱du̱wa̱u̱ng no̱ngi̱tto̱n ne̱ko̱. 7Ka̱du̱wa̱kku̱ng zin zoz wa een de̱de̱, abunna abarik ming kokko anna kar niga ubunntta. Kokko abarik anna kar kuk ki̱tto̱na̱kku̱ng De̱me̱zo̱i̱t kar ki̱ti̱ri̱zzu̱ng. 8Ming uk i̱ki̱ya̱ De̱me̱zo̱i̱ti̱ neci, okko atin ovoca ol wak lo̱o̱tu̱ ogon mu̱nye̱n, okko atin a̱du̱wa̱ gool ci abunna orong Ta̱mu̱ta̱dde̱n ol kabakte ki te̱di̱ne̱t lo̱ki̱ko̱ cik olli lo̱o̱tu̱. 9I̱yo̱ko̱ zin i̱ye̱le̱k atin De̱me̱zo̱i̱ti̱ nogo u̱tu̱gu̱zzo̱ nege mu̱nye̱n ma̱rri̱t ming iróng a̱tu̱yya̱ng; 10i̱ye̱le̱k atin De̱me̱zo̱i̱ti̱ nogo bunnat ci Ta̱mu̱ta̱dde̱no̱ a̱kku̱ go̱o̱le̱ ci kokkoye anna ngati Baba kar zin bo̱do̱k atin iróng ngen acinnang udut. 11I̱ye̱le̱k atin De̱me̱zo̱i̱ti̱ nogo zoz ci lo̱ki̱ko̱ ci etteddek Ta̱mu̱ta̱dde̱n alaan ci kuulou wa lo̱o̱c cu.

12“Kanyai de̱mzi̱ne̱t cik meelek korongi ku̱du̱wa̱u̱ng, abarik bong wo̱ye̱ iróng ngen azunnu do̱o̱k. 13Ming i̱ki̱ya̱ De̱me̱zo̱i̱ti̱ ci een Vongiz wa een de̱de̱, okko atin i̱ye̱le̱kku̱ng de̱mzi̱ne̱t wak e̱e̱ggi̱n de̱de̱. Iróng atin zoz ci okko enne a̱du̱wa̱ ko̱ een zoz cinne, a̱du̱wa̱kku̱ng atin zoz ci izik enne, kar zin atin ku̱du̱wa̱u̱ng gi̱i̱ ci atin okko a̱kku̱. 14Okko atin a̱di̱ngdi̱nga̱n zar cigannik ngati a̱du̱wa̱kku̱ng kaal wak ke̱de̱me̱zi̱ anna a̱gga̱c. 15Kodowina anna ki Baba, kaala ne̱ke̱ kodowina naga ke̱ do̱o̱k cigannik. Zoz zin ci ka̱nne̱kku̱ng ne okko atin De̱me̱zo̱i̱ti̱ adima gi̱i̱ ci een cinanni a̱a̱nyu̱ng a̱gga̱c ko̱ nenen.

16“Kar zin arrak do̱yo̱i̱t iróng atin niga ngen acinnang, kar zin arrak do̱yo̱i̱t bo̱do̱k acinnang atin niga annita.”

Utuhuwe u̱lu̱wa̱ ci nuyau kize talli

17Ovvo nuyaha cik Ye̱su̱ uggak a̱jji̱nno̱ nege do̱ azi ne, “Nya ming azi Ye̱su̱ ne iróng atin arrak acinnang nginti dici, kar bo̱do̱k nginti dici icintang, ‘Eci zin anna kokko ngati Baba’?” 18Ngen demezyaha a̱jji̱nno̱ dee, azi ne, “Ungec ci zoz cinne ko̱, azi dim ne nya, ming azi ne, ‘Acinnang atin niga annit nginti dici ko̱?’ Ma iróng naga ka̱gga̱ ungec ci zoz neci ozoz enne ke̱.”

19Oroota Ye̱su̱ zoz neci ming orong nege ki̱jji̱nne̱t nonno ungec ci zoz neci, kar zin Ye̱su̱ kizek nogo ne, “A̱jji̱nnu̱ niga e̱le̱tti̱ cuggo̱k zo̱ze̱ ci kazi ne, acinnang atin niga annit ngati dici, kar bo̱do̱k, ‘Nginti dici atin kurumte anna ki i̱ge̱ta̱’? 20Ku̱du̱wa̱u̱ng anna i̱ge̱t zoz ci een de̱de̱, a̱lu̱yyu̱ atin niga kar bo̱do̱k atalit, imma olli lo̱o̱tu̱ atalne. Abalaccu atin niga oroot, abarik atin balaci cunno̱ng ukce kize talninet.

21“Ming ukca ngaa do̱le̱c anyak u̱u̱ce̱z oroot, eci utubte nonno i̱i̱nya̱ ciginnek tuyanto, abarik ming okko do̱le̱c iyowa, erehek nonno u̱ce̱zi̱ abarik atalo enne eci i̱ti̱rya̱i̱ do̱le̱c. 22Ogon zin atin bo̱do̱k ngatinno̱ng ki i̱yo̱ko̱: I̱yo̱ko̱ zin ize i̱i̱ cunno̱ng ci omozinnu icu, kacinnung zin atin anna i̱ge̱t bo̱do̱k kar bo̱do̱k ataltto, i̱llo̱i̱ zin e̱e̱t imma ci okko okkoye talinet cunno̱ng to.

23“Ku̱du̱wa̱u̱ng anna i̱ge̱t zoz ci een de̱de̱, i̱i̱te̱ne̱ neci a̱zze̱ e̱e̱ti̱ imma ci a̱jji̱nna̱ annit gi̱i̱ imma to. A̱a̱nyu̱ng atin Baba i̱ge̱t gi̱i̱ imma ci a̱jji̱nnu̱ niga zare cigannik. 24Imma rok i̱yo̱ko̱ ngen niga i̱jji̱nne̱t gi̱i̱ imma zare cigannik. I̱jji̱nne̱t kar atin niga u̱mu̱dda̱, kar bo̱do̱k atin talninet cunno̱ng ke̱le̱zzo̱.

25“Ku̱du̱wa̱u̱ng anna i̱ge̱ta̱ ba̱li̱ye̱ kaal ne̱ko̱ nga̱ri̱de̱te̱, ka̱lu̱gu̱nyi̱ u̱nge̱tti̱ cik zo̱zzo̱k ne̱ko̱ ko̱. Abarik zin atin a̱kku̱ i̱i̱te̱ni̱ ci iróng anna ngen kozozi nga̱ri̱de̱te̱ icima ka̱lu̱gu̱nyi̱ u̱nge̱tti̱ cik zo̱zzo̱k ne̱ke̱, abarik atin ka̱du̱wa̱kku̱ng i̱ge̱t zoz ci Baba go̱o̱le̱ ci voori. 26Ming i̱ki̱ya̱ i̱i̱te̱ni̱ neci, a̱jji̱nnu̱ atin niga Baba kaal cik meelek zare cigannik. Iróng anna kazi ne, ka̱jji̱nni̱ atin anna Baba ngatinno̱ng. 27Irezung Baba enne eliya i̱ge̱ta̱, eci irezttang niga annita, kar zin bo̱do̱k elemttang annita, eci anna ka̱kku̱ni̱ ngati Ta̱mu̱ta̱dde̱no̱. 28Ka̱kku̱ni̱ anna ngati Baba ka̱kku̱na̱k lo̱o̱c, abarik zin i̱yo̱ko̱ kutungeya lo̱o̱c ki̱mi̱re̱ kuwa ngati Baba.”

29Ovvo zin nuyaha cik Ye̱su̱ a̱nne̱k nonno ne, “I̱yo̱ko̱, iróng i̱nna̱ ngen ozozi nga̱ri̱de̱te̱ ki ba̱li̱ye̱. Abarik ozozi zoz kubunna, ilemi zin zo̱zzo̱k u̱nge̱tti̱ ju̱rru̱m kubunnta kizikta naga bu̱k. 30Ka̱gga̱yya̱ i̱yo̱ko̱ ming a̱gga̱ i̱nna̱ kaal do̱o̱k kar bo̱do̱k iróng kanyak ji̱ne̱ne̱t imma ci ka̱jji̱nni̱ i̱nne̱ta̱. Aanyyet zoz necu agita kelemtta de̱de̱ ming a̱kku̱nni̱ i̱nna̱ ngati Ta̱mu̱ta̱dde̱no̱.”

31O̱bo̱de̱k Ye̱su̱ nogo a̱nne̱k ne, “Ovvo niga elemnyang bali vu̱rrta̱. 32Abarik a̱kku̱ i̱i̱, i̱ki̱ya̱ de̱de̱, utube, ovvo atin niga azaninnu, ngen ngene ce̱e̱ze̱ cinne. Ungnekkang atin annit do̱. Iróng zin anna kaave do̱, eci anna karumena ki Baba bu̱k.”

33“Ku̱du̱wa̱u̱ng anna i̱ge̱t kaal ne̱ko̱, kar anyait gano ngatinanni. Anyakku atin no̱ngi̱tto̱n lo̱o̱ce̱ cu. Abarik inimet zin, kommoga anna no̱ngi̱tto̱n cik lo̱o̱tu̱.”

Currently Selected:

Jon 16: tex

Highlight

Copy