Kananet 50

1U̱ju̱ke̱k Yosevo ele cinne baatinne kar zin ku̱tu̱lu̱we̱k nonno, kar zin kiza nonno. 2U̱du̱wa̱k zin Yosevo di̱kto̱rnya̱ wak a̱li̱ngli̱ng ki nonno ko̱ kidimanit ele ci baatinne Israil abunna iróng a̱mu̱we̱. Idimanit zin di̱kto̱rnya̱ nonno, 3okkoye zin ele cinne gwo̱o̱nya̱ moten we̱c, e̱e̱ggi̱n ne̱ko̱ gwo̱o̱nya̱ cik oronge di̱kto̱rnya̱ kidimanit ele cinne. Kar olli Masiro ku̱tu̱lu̱zzo̱ nonno gwo̱o̱nya̱ moten turgerem.

4Baling edeccai gwo̱o̱nya̱ cik u̱lu̱wa̱nu̱, izek zin Yosevo ol cik aavtte ce̱e̱ze̱ ci alaano ne, “Ming elemannu niga zoz cinanni, ozozek alaan zoz cinanni. U̱du̱kta̱k nonno, 5‘Aanya ba̱li̱ye̱ baba annit ku̱du̱l keet kize ne, “Ize ojon kokko anna ka̱da̱i̱; daweka annit ilomi bali kadimanek anna ele cinanni ke̱ lo̱o̱ce̱ ci Kanaani.” I̱yo̱ko̱ inya annit kitinga kuk ka̱da̱ baba; kar zin atin anna koboda.’”

6Ize zin alaani ne, “Tinga bit da baatunne, ki baling aanyi enne i̱nne̱t du̱l keet ke̱.”

7Uk zin Yosevo a̱da̱ baatinne. I̱nya̱ma̱ni̱t zin ddi̱ki̱ryo̱wa̱ cik alaano nonno, ddi̱ki̱ryyo̱k ciginnek ki ddi̱ki̱ryyo̱k cik olli Masiro do̱o̱k. 8Imma bo̱do̱k anyak Yosevo ol cik ce̱e̱z cinne ki gotonoggi ki boorinne rok nginti adawek nege baatinne. Utungtek nege dooli ki kaal do̱o̱k Goshen, Masire. 9Oot zin toromileta wak a̱gu̱ru̱t vartange ko̱ ki ol wak ottod vartange bu̱k ki nogo. A̱ppwa̱ bali da̱ koole neci oroot.

10Baling u̱zu̱cca̱ nginti een Atad ci gon a̱ru̱we̱ ol labi, ojono ki moro ci Jordani, u̱tu̱lu̱zzo̱ zin nege oroot; kar zin nginati a̱vvu̱ Yosevo gwo̱o̱nya̱ turgerem a̱lu̱ baatinne. 11Baling icinnet olli Kanaani wak abak nginati nogo ming a̱lu̱ ngati een Atad, a̱ru̱we̱ ol labi ko̱, izeto zin nege ne, “Anyak olli Masiro u̱lu̱wa̱.” Zoz zin ci akannek nege nginti ojono ki moro ci een Jordan kize zara Abel Mizraim.#50:11 Abel Mizraim: Utuge ci I̱bu̱ru̱, azi keng cik zar ne̱ko̱ ne, u̱lu̱wa̱ ci olli Masiro.

12U̱tu̱gu̱zzo̱ zin dooli cik Ya̱ko̱bo̱ zoz bali a̱du̱wa̱k be̱e̱ti̱nne̱ng nogo ke̱: 13Odongit nege ele cinne oot a̱da̱c lo̱o̱ce̱ ci Kanaani ngi̱lo̱me̱ ci aave ngati een Machpelah ojono ki Mamre, ngin bali uuta Aburahami kize ilomet ngati Ephroni wa een e̱e̱t ci Hittite, ki ma̱na̱ bu̱k. 14Baling a̱da̱c nege be̱e̱ti̱nne̱ng, i̱mi̱re̱ Yosevo uk Masire ki gotonoggi ki ol balik orkora ki nonno ke̱, kar ki̱vi̱ta̱ ka̱da̱c baatinne ko̱.

A̱nne̱k Yosevo gotonoggi ne ma o̱ngo̱o̱li̱nnu̱

15Baling icinnet gotonoggi Yosevo ming a̱da̱k be̱e̱ti̱nne̱ng, i̱no̱ni̱t nege do̱ kar kizeto ne, “I̱yo̱ko̱ ming a̱gga̱m Yosevo zoz ba̱li̱ye̱ kar atin enne acacannet zo̱ze̱ bali gerze kogonik naga nonno ke̱?” 16I̱tto̱nte̱k zin nege zoz Yosevo izettek ne, “Utungek baatunne zoz cu lo̱o̱c baling ngen enne ka̱da̱k: 17‘Icu zoz ci kar niga u̱du̱kta̱k Yosevo: Ka̱jji̱nni̱ anna i̱nne̱t kar lalek gotonoggu mu̱nye̱ne̱ ki kaal wak gerzek ogoniki nege i̱nne̱t ba̱li̱ye̱ ke̱.’ I̱yo̱ko̱ lalek mu̱nye̱n cik du̱cca̱k cik Ta̱mu̱ta̱dde̱n ci baatunne.” Baling uzuca zoz cinne̱ng nonno, u̱tu̱lu̱ zin Yosevo.

18I̱vi̱ta̱ zin gotonoggja u̱ju̱ktte̱k e̱le̱tti̱ cigge̱k lo̱o̱c ngu̱me̱ cinne. Kar izeto ne, “Ke̱e̱ggi̱nna̱ naga du̱cca̱k cigunnek.”

19Abarik zin Yosevo a̱nne̱k gotonoggi ne, “Ma o̱ngo̱o̱li̱nna̱ng. Kaave i̱yo̱ko̱ anna ngati Ta̱mu̱ta̱dde̱no̱? 20Orongnyu ba̱li̱ye̱ niga u̱ru̱kta̱ng annit la̱du̱n, ma̱i̱je̱ Ta̱mu̱ta̱dde̱n orong ku̱tu̱gu̱ zoz ci abunna ki i̱yo̱ko̱ ming ogone kaala ko̱, kar enne ki̱ti̱ri̱z ol cik meelek. 21I̱yo̱ko̱ zin, ma o̱ngo̱o̱li̱nnu̱ gi̱i̱ imma. Ka̱a̱nyu̱ng atin da̱i̱ne̱t i̱ge̱t ki dooli ciggo̱k.” U̱du̱wa̱k zin enne nogo zoz ci aanyik zi̱nze̱tti̱ cigge̱k ka̱vvu̱to̱ lo̱o̱ta̱, kar kozozek muluwe ci alali.

Daiz ci Yosevo

22Abak Yosevo ki ol cik ce̱e̱z ci baatinne do̱o̱k Masire. Abak enne e̱rki̱nya̱ o̱bo̱n co̱de̱ ki omoto (110), 23kicin bu̱u̱llo̱k i̱i̱yo̱ wak dooli cik Ephraimi. Ki bo̱do̱k dooli cik Makiri ngerrti Manasseh, balik arike ol onyoto cik Yosevo baling a̱rri̱ta̱i̱ nege ke̱.

24Izek zin Yosevo gotonoggi ne, “Ize annit ojon daizi. Ka̱gga̱ zin abarik anna, okko atin Ta̱mu̱ta̱dde̱n eelannung okkoyyung lo̱o̱ce̱ cu rok lo̱o̱c bali ogone enne olom ki Aburaham, ki I̱sa̱ko̱ ki Ya̱ko̱bo̱ ke̱.” 25Aanyik zin Yosevo doolik Israilo ku̱du̱lle̱t keet kar kize ne, “A̱kku̱ atin Ta̱mu̱ta̱dde̱n de̱de̱ okko eelannung, kar la̱du̱n odongit emme cigannik ngatu.”

26A̱da̱k zin Yosevo Masira ngati anyak enne e̱rki̱nya̱ o̱bo̱n co̱de̱ ki omoto (110). Kar baling idimanit nege ele cinne, kar kaartik ce̱e̱ndu̱k Masire.

Currently Selected:

Kananet 50: tex

Highlight

Copy