Kananet 25

Daiz ci Aburahami

1I̱ti̱k zin Aburahami ngaa imma ci een zara Keturah. 2I̱ti̱rra̱ zin ngaa neci logoz ciko Zimran ki Jokshan ki Medan ki Midian ki Ishbak ki Shuah. 3I̱ti̱rra̱ zin Jokshani Sheba ki Dedan; ovvo dooli cik Dedani e̱e̱ggi̱n olli Asshurites ki olli Letushites ki olli Leummites. 4Ovvo dooli cik Midian e̱e̱ggi̱n ciko Ephah ki Epher ki Hanoch ki Abida ki Eldaah. E̱e̱ggi̱n ne̱ko̱ do̱o̱k dooli cik Aburahami a̱rri̱ta̱ ngaa ci een Keturah.

5Utungek Aburahami kaal cik anyak enne do̱o̱k I̱sa̱ko̱. 6Ma̱i̱je̱ baling ngen enne aruge, aanyik muci logoz balik a̱rri̱ta̱i̱ ngaane ciginnek riantak#25:6 Ngaane ciginnek riantak: E̱e̱ggi̱n ngaai cik Aburahami riantak ko̱ Hagar ki Keturah. ke̱, kar zin enne ki̱tto̱ni̱k logoz ne̱ke̱ koot kabaito lo̱o̱ce̱ ci je̱e̱ni̱ kizeto reente ngati ngerinne I̱sa̱ko̱.

7Een e̱rki̱nya̱ cik abahe Aburahami do̱o̱k o̱bo̱n co̱de̱ ki moten turgerem ki tu̱r (175) 8Baling abak enne ke̱ edeca e̱rki̱to̱k ne̱k meelek ko̱, etteda zin enne zinin u̱lu̱k uk ngato ji̱ji̱ti̱gi̱nne̱k. 9A̱da̱c logoz ciginnek I̱sa̱ko̱ ki Ismail nonno ngi̱lo̱me̱ ci Machpelah lo̱o̱ce̱ ci Mamre, ma̱ne̱ ci Ephron ngerrti Zohari olle cik Hittite, 10ma̱na̱ ci uuta bali Aburahami ngati olli Hittites. A̱da̱ye̱k zin nege Aburaham ki ngaa cinne Sarah ngin neci. 11Baling a̱da̱k Aburahami, u̱mu̱yu̱k zin Ta̱mu̱ta̱dde̱n ngerinne I̱sa̱ko̱, abak zin ngati ojono ki nginti een Beer Lahai Roi.

Biilet ci Ismaili

12Een icu biilet ci Aburahami ngati ngerinne Ismail, ngati ngaa ci een Hagar, du̱ca̱i̱t bali a̱li̱ngli̱ng ki Sarah ke̱, a̱kku̱ Masire.

13E̱e̱ggi̱n ne̱ko̱ zar cik dooli cik Ismaili e̱he̱rye̱ ki bali ti̱ra̱nta̱, een Nebaiothi a̱bu̱ ci Ismaili kar kunuwozik Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Naphish, ki Kedemah. 16E̱e̱ggi̱n ne̱ko̱ dooli cik Ismaili ki alaat cigge̱k, zar cigge̱k e̱he̱rye̱ zare cik ngintik abahe nege. 17Abak Ismaili e̱rki̱nya̱ o̱bo̱n co̱de̱ ki moten i̱i̱yo̱ ki turgerem (137), kar ka̱da̱k, uk enne ngato ji̱ji̱ti̱gi̱nne̱k. 18Abak boor ci Ismaili ba̱li̱ye̱ lo̱o̱ce̱ ci een Havilah rok Shur, ojono ki lokore ki Masir, ki ming okko i̱nna̱ ki lo̱o̱c ci een Asshur. Abak zin nege do̱o̱k ngati iróng owowone ki gotonoggi.

Ya̱ko̱bo̱ ki I̱sa̱u̱

19Een nga̱ri̱do̱ cu ci I̱sa̱ko̱ ngerrti Aburahami.

Ize Aburahami be̱e̱ti̱ I̱sa̱ko̱, 20een e̱rki̱nya̱ cik I̱sa̱ko̱ moten we̱c baling a̱ti̱k enne Rebekah buweenyi Bethuweli, ci Aramean lo̱o̱ce̱ ci een Paddan Aram, een Rebekah ngooni Laban.

21Alawek I̱sa̱ko̱ Manyi zoz ci ngaa cinne, eci abile ba̱li̱ye̱ Rebekah. Izik zin Manyi lawinet cinne, anyaho zin ngaa cinne. 22Ocodo da̱ gon dooli kenge cinne, kar enne kize ne, “Nya zoz necu ming i̱nna̱ka̱ annit ko̱?” Uk zin enne ala Manyi.

23Iizek Manyi nonno ne,

“Anyai i̱nna̱ i̱do̱ngi̱ rama kenge cunne,

kar ol cik e̱e̱ggi̱n rama kengerto ecito;

okkomi atin ol co̱de̱ ngati gotonogginnu,

kar okko atin ngerunne wa een a̱bu̱ ko̱ a̱li̱ngli̱nge̱k gotoni wa dici.”

24Baling utubte i̱i̱nya̱ ciginnek tuyantak, anyak enne dooli cik macik cuude kenge cinne. 25Ma̱ri̱k do̱le̱c ci iyowa oowa ko̱, okko ele cinne do̱o̱k a̱tu̱be̱ ki ru̱u̱m ci anyak ima; a̱ka̱tte̱k zin nonno zar cik een I̱sa̱u̱.#25:25 I̱sa̱u̱: Utuge ci I̱bu̱ru̱, azi keng cik zar ne̱ko̱ ne, do̱le̱c ci anyak ele ima. 26Imma bali vu̱rrta̱, iyowa gotoniya re̱e̱nu̱n, abarik a̱gga̱m gotoni wa een I̱sa̱u̱ ko̱ gi̱nygi̱nye̱ni̱t; a̱ka̱tte̱k zin ol nonno zar cik een Ya̱ko̱bo̱.#25:26 Ya̱ko̱bo̱: Utuge ci I̱bu̱ru̱, azi keng cik zar ne̱ko̱ ne, gi̱nygi̱nye̱ni̱t, azi bo̱do̱k keng imma ne, e̱e̱t ci a̱lu̱t ol. Anyak da̱ I̱sa̱ko̱ e̱rki̱nya̱ moten torkonom baling a̱rri̱ta̱ Rebekah dooli ne̱ko̱.

Utuwoi I̱sa̱u̱ a̱bu̱ze̱t cinne

27Baling i̱ddi̱ki̱rre̱t logoz cik een cuude ko̱, i̱ki̱ya̱ I̱sa̱u̱ ize e̱e̱t ci akati elegje oroot, kar katal liyo, imma gotoniya Ya̱ko̱bo̱ een e̱e̱t ci ijakce, aave gon ce̱e̱za̱. 28Irez zin I̱sa̱ko̱ I̱sa̱u̱ eci atar enne i̱di̱ cik e̱le̱gje̱nnu̱, ma̱i̱je̱ Rebekah irez Ya̱ko̱bo̱.

29Okko i̱i̱te̱n imma baling aak Ya̱ko̱bo̱ u̱u̱ci̱ cik merdenu, oboda zin I̱sa̱u̱ liya, adak nonno magiz oroot. 30Izek zin enne Ya̱ko̱bo̱ ne, “La, inya u̱u̱ci̱ u̱gge̱ cik ma̱ri̱k! Ka̱da̱ha̱ anna magiz!” (Zoz ci awu ol I̱sa̱u̱ bo̱do̱k zare cik een Edom.#25:30 Edom: Utuge ci I̱bu̱ru̱, azi keng cik zar ne̱ko̱ ne, ma̱ri̱k.)

31O̱bo̱de̱k zin Ya̱ko̱bo̱ nonno, “Inya annit arrak a̱bu̱ze̱t cunne.”#25:31 Arrak a̱bu̱ze̱t cunne: Keere ci I̱bu̱ru̱, adima do̱le̱c wa maci een a̱bu̱ kaal cik meelek ngati baatinne kar enne kize do̱le̱c ci a̱ddi̱ki̱rne̱ gotonoggi do̱o̱k ming a̱da̱k be̱e̱ti̱nne̱ng.

32Azi I̱sa̱u̱ ne, “Cinno, ize ojon annit daizi, abunna a̱bu̱ze̱t ngatinanni niya?”

33Ma̱i̱je̱ Ya̱ko̱bo̱ ize ne, “Du̱l da̱ keet ngatinanni arrak.” U̱du̱l zin I̱sa̱u̱ keet kize olom ngatinne, utuwek a̱bu̱ze̱t cinne Ya̱ko̱bo̱.

34Aanyik zin Ya̱ko̱bo̱ I̱sa̱u̱ umune ki u̱u̱ci̱ cik merdenu. Adak zin I̱sa̱u̱ kuudek ki u̱u̱ci̱, itinga je̱e̱na̱ kar kuk.

Ibbez zin I̱sa̱u̱ a̱bu̱ze̱t cinne.

Currently Selected:

Kananet 25: tex

Highlight

Copy