Kananet 19

I̱li̱be̱ orogi ci Sodomi ki Gomorrah

1Uzucca anjilonya cik e̱e̱ggi̱n ram orog ci een Sodom yo̱mo̱na̱, imma Loti aave arane ci o̱rgu̱. Baling okko enne acin nogo kar ku̱lu̱le̱ kicin lo̱o̱c. 2Izek zin enne nogo ne, “Alaat wagannik, i̱vi̱ta̱ arrak ce̱e̱z ci du̱ca̱i̱t cunno̱ng. Abunna ovvo u̱u̱nyyu̱ zo̱o̱ cuggo̱k kar a̱ta̱gu̱z nginati kar zin nge̱rre̱t oot gool cunno̱ng.”

O̱bo̱dde̱k zin nege nonno a̱nne̱k ne, “Iróng een niko, kooginna atidic naga buurato ngatu.”

3Ilalek zin Loti nogo oroot abunna ming ovvo ki nonno kar ki̱tto̱zzo̱ ce̱e̱z cinne. Idimanek zin enne nogo da̱i̱ne̱t, aak da̱i̱ne̱t cik iróng amukcari, kar nege kadait. 4Baling ngen nege koot ungnyak, i̱vi̱ta̱ zin ol cik macik o̱rge̱ ci Sodomi o̱to̱ veelek, logoz ki ma̱ti̱yo̱ bu̱k, iliyet zin ce̱e̱z ci Loti ne riu. 5Utuwec zin nege Lot izettek ne, “I̱go̱k ol wak e̱e̱ggi̱n e̱re̱nno̱k a̱vvu̱ ce̱e̱z cunne ba̱a̱li̱n cu ko̱? Nyahakket agita, abunna ming kooginna nogo.”

6Iyok zin Loti uk u̱ru̱me̱k nogo re̱e̱nu̱n kar zin kunyug tatug vu̱rrte̱ cinne 7kar kizek nogo ne, “A̱zze̱to̱, gonogga. Ma ogonnu gi̱i̱ ci mu̱nye̱nu̱ ko̱. 8Icinnet da̱, kanyai anna dooli cik nga̱a̱ye̱k rama, ngen ka̱ta̱gu̱zzo̱ ki e̱e̱t imma udut. Inya kanyahaung re̱e̱nu̱n ngintu, kar u̱tu̱gu̱zze̱k nogo gi̱i̱ ci orongnyu niga u̱tu̱gu̱z ko̱. Abarik, ma ogonikku ol ne̱ko̱ gi̱i̱ imma, eci nege a̱vvu̱to̱ ce̱e̱ze̱ cinanni, kebei anna nogo.”

9A̱nne̱k zin nege Lot ne, “Nyehe go̱o̱le̱ cinna̱ng, a̱vvu̱ ol ne̱ke̱ ngintu e̱e̱ggi̱n i̱do̱ngi̱, kar i̱yo̱ko̱ orongi ize alaan ci ettedi zoz i̱nna̱! Kogoniki atidic naga i̱nne̱t gi̱i̱ ci gerze kommog cinne̱ng.” Adangek nege zoz Lot kar kicaktozik nonno orongit ku̱du̱lle̱t tatug.

10Ma̱i̱je̱ ol ne̱k ce̱e̱za̱ ke̱ i̱tto̱nntta̱ azzin u̱tu̱gu̱rre̱t Lot kuk ca̱a̱to̱ kar zin kunyuget tatug. 11Kar zin kazagarit ol ne̱k abile tatuge ci ce̱e̱zu̱ ko̱, cidici ki ci a̱ddi̱ki̱re̱ do̱o̱k kizeto ru̱be̱ne̱ ci iróng nege acin tatug.

12Izektek ol ne̱k e̱e̱ggi̱n rama Lot ne, “Anyai i̱nna̱ e̱e̱t imma ci immonu, kawunyya icima alawanet, cigunnek o̱rge̱ cu? Inyek nogo o̱rge̱ cu, 13eci kovvo naga kegerzana ngintu. Ize meele mu̱nye̱na̱ oroot cik acin Manyi ngati ol cik orog necu, kar enne ki̱tto̱na̱i̱t agit abunna kegerzana orog necu.”

I̱vi̱re̱t Loti ki ollinne Sodoma oot Zoarakte

14Uk zin Loti u̱du̱wa̱k kawunyya ciginnek, balik owo dooli ciginnek ke̱. A̱nne̱k ne, “Amadantte ngatu ataman, eci Manyi orong atidic ki̱li̱b orog cu.” Ma̱i̱je̱ kawunyya ciginnek azi ne amice i̱yo̱ko̱ enne.

15Ma baling ala looci, izettek anjilonya Lot ne, “Ataman! Dima ngaa cunne ki dooli cigunnek nga̱a̱ye̱k rama aavtte ngatu ko̱, icima okko i̱nna̱ aditai ming edeze orogi.”

16Baling ngen enne a̱gi̱zgi̱zi̱, a̱gga̱mi̱t zin ol ne̱ke̱ a̱zzi̱t cinne ki azzin cik ngaa cinne ki dooli cik nga̱a̱ye̱k e̱e̱ggi̱n rama ko̱, kar kiyoktai nogo labak o̱rge̱ neci, eci Manyi edete ngatinne̱ng. 17Baling iyoktai nege nogo orog abanyit, ize e̱e̱ti̱ imma ngatinne̱ng ne, “I̱vi̱re̱t zo̱ze̱ ci ruget cunno̱ng! Ma acinnu vu̱rru̱t, ma abillu ngamani mu̱u̱ra̱! I̱vi̱re̱t oot biyene ta̱dde̱na̱ icima ovvo atin niga aditannu.”

18Ma̱i̱je̱ Loti a̱nne̱k nogo ne, “A̱zze̱to̱, alaat wagannik bai! 19Umuda du̱ca̱i̱ti̱ cunno̱ng rezinet ngu̱me̱ cunno̱ng, i̱ye̱le̱kku̱ zin niga bunnat annit zo̱ze̱ ci eelannu ruget cinanni. Ma̱i̱je̱ ngatu iróng ngen ka̱vi̱ri̱ biyene; okko atin li̱be̱ne̱t okko oowe cinanni, kar atin anna ka̱da̱u̱. 20Icinnet, icu orog ci aave ojonun oroot kar ki̱vi̱r kuk nginati, kar bo̱do̱k kize ojon. Anycang kuk nginati kar rugeti cinanne ka̱vvu̱to̱.”

21Iizek zin anjilo Lot ne, “Yo, kelemna zin zoz ci a̱jji̱nni̱ i̱nna̱ ko̱ bu̱k; iróng atin anna ka̱li̱bi̱ orog ci ozozi i̱nna̱ zoz cinne ko̱. 22Abarik vi̱r bit nginati ataman, eci iróng atidic anna kogonni gi̱i̱ imma zee zuca i̱nna̱ ngineci.” (Zoz zin ci akanneke ol zar orog neci kize Zoar#19:22 Zoar: Utuge ci I̱bu̱ru̱, azi keng cik zar ne̱ko̱ ne, orog cidici. ko̱ nenen necu.)

23Baling okko Loti arawa orog ci Zoari ko̱, okko i̱i̱ iyowa nginati. 24U̱ddu̱ta̱k zin Manyi lo̱o̱c gwo̱o̱ kiwagon ta̱mu̱ ming alanyit oroot o̱ro̱gjo̱we̱ cik Sodomi ki Gomorrah. 25I̱li̱b zin enne o̱ro̱gjo̱k ne̱ke̱ ki mu̱u̱r do̱o̱k, ki ol cik abak o̱ro̱gjo̱we̱ ne̱ke̱ ki keen do̱o̱k. 26Ma̱i̱je̱ ngaa ci Loti edev vu̱rru̱t, kar zin ele cinne kutuhuwe kibil ku̱tu̱gu̱ ki bee ci een mile.

27Ma̱i̱je̱ nge̱rre̱ti̱n ci reng, itinga Aburahami ingani i̱mi̱re̱ uk ngin bali abilne enne ngati Manyi ke̱. 28Edev zin enne o̱to̱n ci Sodomi ki Gomorrah, ki bo̱do̱k nginti okko ki mu̱u̱r do̱o̱k, edenya enne bbu̱rre̱t ci a̱ppwe̱ ingazi lo̱o̱ce̱ neci, ogon ki bbu̱rre̱ti̱ ci iyowa zara.

29Baling i̱li̱b Ta̱mu̱ta̱dde̱n o̱ro̱gjo̱k ne̱k balik mu̱u̱ra̱ ke̱, a̱a̱da̱ zin enne zoz ci Aburahami, kar zin kanyaha Lot o̱ro̱gjo̱we̱ balik a̱li̱b enne ke̱, ngati abahe Loti.

Ngiliz ci dooli cik Loti

30Utungtek Loti ki dooli ciginnek nga̱a̱ye̱k ko̱ Zoar lo̱o̱c, kar zin koot ka̱vvu̱to̱ biyene, eci enne o̱ngo̱o̱le̱ ngati abahe Zoarakte. Abak enne ki doolik nga̱a̱ye̱k rama ngi̱lo̱ma̱. 31Okko i̱i̱te̱n imma a̱nne̱k do̱le̱c ci a̱ddi̱ki̱re̱ ko̱ ngooni wa dici ko̱ ne, “Anyat be̱e̱ti̱nna̱, i̱llo̱i̱ zin e̱e̱t imma ci maci ngatu kar ka̱ta̱gu̱zze̱ta̱, ki ming abak ol lo̱o̱co̱we̱ do̱o̱k ko̱. 32Kanycik be̱e̱ti̱nna̱ kuud merte kibbahe kar zin ka̱ta̱gu̱zzo̱ ki nonno bu̱k abunna ming a̱rri̱ta̱kke̱t dooli kar biileti cinna ka̱vvu̱ to.”

33Ma̱i̱je̱ ba̱a̱li̱n neci eliya, aanycik zin nege be̱e̱ti̱nne̱ng kuud merte kibbahe, kar zin do̱le̱c wa a̱ddi̱ki̱re̱ kuk ca̱a̱to̱ ka̱ta̱gu̱zzo̱ ki nonno. Iróng enne bu̱k a̱gga̱ baling a̱ta̱gu̱zzo̱ enne ki nonno icima baling okko enne ingazi.

34Imma i̱i̱te̱n ci reng, a̱nne̱k do̱le̱c wa a̱ddi̱ki̱re̱ ko̱ ngooni cidici ko̱ ne, “Be̱le̱ja̱ ka̱ta̱gu̱zza̱ anna ki baba. Kanycik bo̱do̱k nonno kuud merte dee ba̱a̱li̱n cu, kar zin i̱nna̱ oot a̱ta̱gu̱z ki nonno bu̱k abunna ming kavada tatuget cigga̱c ngati be̱e̱ti̱nna̱.” 35Aanycik zin be̱e̱ti̱nne̱ng kuud merte ba̱a̱li̱n neci bo̱do̱k, kar do̱le̱c cidici kuk ka̱ta̱gu̱zzo̱ ki nonno. Iróng zin enne bo̱do̱k a̱gga̱ ming a̱ta̱gu̱zzo̱ ki buweenyinne icima i̱i̱ ci okko enne ingane.

36Anyaktto zin dooli cik Loti nga̱a̱ye̱k ko̱ do̱o̱k ngati a̱rri̱to̱ni̱ke̱ be̱e̱ti̱nne̱ng nogo. 37I̱ti̱rra̱ zin do̱le̱c ci a̱ddi̱ki̱re̱ ko̱ do̱le̱c ci maci, kar zin enne kakatek nonno zar cik een Moab;#19:37 Moab: Utuge ci I̱bu̱ru̱, azi keng cik zar ne̱ko̱ ne, a̱kku̱ ngati baba. een enne ji̱ji̱ti̱ ol cik e̱e̱ggi̱n Moab rok i̱yo̱ko̱. 38I̱ti̱rra̱ zin bo̱do̱k do̱le̱c wa dici lo̱gu̱t ci maci, akannek zar kize Ben-Ammi.#19:38 Ben-Ammi: Utuge ci I̱bu̱ru̱, azi keng cik zar ne̱ko̱ ne, ngerrti ol cigannik. Een enne ji̱ji̱ti̱ ol ne̱k e̱e̱ggi̱n Ammon ko̱ rok i̱yo̱ko̱.

Currently Selected:

Kananet 19: tex

Highlight

Copy