Kananet 20

Aburaham ki Abimelech

1U̱lu̱g zin Aburahami nginati uk lo̱o̱ce̱ ci een Negev kar kabak orgene ci Kadeshi ki Shur. Kar ka̱vvu̱ o̱rge̱ ci een Gerar arrak do̱yo̱i̱t, 2kar nginati ozoz Aburahami zoz ci ngaa cinne Sarah azi ne, “Een enne Sarah ngoona.” Kar zin Abimelech alaani ci Gerari ki̱tto̱na̱ ol kanyaktak nonno Sarah kar zin ko̱o̱tte̱ nonno.

3Ma̱i̱je̱ Ta̱mu̱ta̱dde̱n i̱ki̱ya̱k Abimelech ba̱a̱li̱n co̱de̱ o̱no̱zo̱we̱ kar zin kizek nonno ne, “U̱tu̱gu̱ i̱nna̱ ki e̱e̱ti̱ ci a̱da̱ha̱ zo̱ze̱ ci ngaa ci uuwe i̱nna̱ ko̱; een enne ngaa ci e̱e̱to̱.”

4Ngen zin da̱ Abimelechi ka̱ta̱gu̱zzo̱ ki Sarah udut, ize zin enne ne, “Manyi, a̱li̱bi̱ atin i̱nna̱ lo̱o̱c ci ol cik ngen ku̱tu̱gu̱zzo̱ mu̱nye̱n? 5Ngen enne kizeya annit ne, ‘Een enne ngooni,’ ngen bo̱do̱k Sarah bu̱k kizeya annit ne, ‘Een enne gotona’? Ku̱tu̱gu̱ anna zoz necu zinine ci abunna ki azzin cik caalek.”

6Izek zin Ta̱mu̱ta̱dde̱n nonno o̱no̱zo̱we̱ ne, “De̱de̱, ka̱gga̱yi̱ anna i̱nne̱ta̱, u̱tu̱gu̱ i̱nna̱ zoz necu zinine ci voori, kar anna kuzuti i̱nne̱ta̱ ngati orongi tu̱gu̱ mu̱nye̱n ngatinanni. Zoz zin ci iróng anna kaanyi i̱nne̱t u̱u̱m nonno ko̱ necu. 7I̱yo̱ko̱ bodehe ngaa necu e̱e̱t cinne, eci enne een a̱ri̱to̱i̱t#20:7 A̱ri̱to̱i̱t: Een e̱e̱t ci a̱du̱wa̱k ol zoz ci Ta̱mu̱ta̱dde̱no̱. ci zoz cinanni, kar atin kalawei i̱nne̱t Ta̱mu̱ta̱dde̱n kar kaanyi ruget. Ma̱i̱je̱ ming iróng i̱nna̱ obodeke nonno ngaa cinne, abunna ming a̱gga̱ aditai atin i̱nna̱ doolinne.”

8Imma bali nge̱rre̱t ingani, utu Abimelechi lo̱ddi̱ki̱re̱ wak abal lo̱o̱c ki nonno, kar baling u̱du̱wa̱k enne nogo o̱no̱zzo̱k waginnek ke̱ do̱o̱k, o̱to̱ngo̱o̱ltte̱ zin nege lo̱o̱c oroot. 9Utu zin Abimelechi Aburaham ca̱a̱to̱ kar kizek ne, “Ogonikket i̱nna̱ agit nya? Ku̱tu̱gu̱we̱i̱ da̱ anna i̱nne̱t gi̱i̱ ci gerze kar i̱nna̱ nyaha annit dezo ki lo̱o̱c cinanni ko̱? U̱tu̱gu̱we̱ya̱ bai i̱nna̱ annit zoz ci iróng wo̱ye̱ ogonikan.” 10I̱jji̱n zin bo̱do̱k Abimelechi Aburaham izek ne, “Anyai i̱nna̱ nya zinina kar tu̱gu̱ zoz cu niko ko̱?”

11O̱bo̱de̱k zin Aburahami nonno, “Ka̱nne̱k anna ele cinanni, ‘I̱llo̱i̱ de̱de̱ ngo̱li̱ne̱t ci Ta̱mu̱ta̱dde̱no̱ ngatu, kar atin nege ku̱ru̱kta̱ annit zo̱ze̱ ci ngaa cinanni.’ 12Kar bo̱do̱k, een enne de̱de̱ ngoona, buweenyi baba iróng een ngati ya̱i̱; kar enne ki̱ki̱ya̱ kize ngaa cinanni. 13Baling aanya Ta̱mu̱ta̱dde̱n keeron kutungek orog ci baba lo̱o̱c, ku̱du̱wa̱ Sarah ka̱nne̱k ne, ‘Een necu gool ci i̱ye̱le̱ka̱ i̱nna̱ annit rezinet cunne: Okko ngati kovvoye naga do̱o̱k, du̱wa̱k ol zoz cu, “Een enne gotona.”’”

14Idima zin Abimelechi a̱zza̱ ki tiin ki du̱cca̱k cik nga̱a̱ye̱k ki cik macik kar kaanyik Aburaham, kar zin kobodek nonno Sarah ngaa cinne. 15Kar Abimelechi kize ne, “Lo̱o̱c cinanni ci aave i̱nna̱ ko̱; bak ngati orong zinin cunne.”

16Okko ngati Sarah a̱nne̱k enne ne, “Kanyike anna gotonnu i̱bbo̱ng co̱de̱ (1,000) o̱ro̱bi̱ya̱ ziik cik ataltali.#20:16 Ziik cik ataltali: E̱e̱ggi̱n o̱ro̱bi̱ya̱na̱ ne̱ko̱ cik a̱di̱ngdi̱nge̱. E̱e̱ggi̱n kaala ne̱ko̱ cik ka̱di̱le̱ ba̱ci̱ bali kimeryi ke̱, abunna bo̱do̱k ming a̱gga̱ ol do̱o̱k ming ngen i̱nna̱ bac zoz imma.”

17Alawek zin Aburahami Abimelech Ta̱mu̱ta̱dde̱n, kar enne kangaru nonno ki ngaa cinne, ki du̱cca̱k ciginnek nga̱a̱ye̱k kar atin nege kaanyait dooli bo̱do̱k, 18eci bali Manyi unyuk ke̱ngti̱ cik ngaanu do̱o̱k ce̱e̱ze̱ ci Abimelechi zo̱ze̱ ci Sarah ngaa ci Aburahami.

Currently Selected:

Kananet 20: tex

Highlight

Copy