Lu̱ge̱z 9

Zeret ci a̱da̱kne̱ kaala

1Kar zin Manyi kizek Muses ne, “Bit rok alaan ci Masiro, kar du̱wa̱k nonno, izek ne, ‘Zoz ci a̱du̱wa̱ Manyi Ta̱mu̱ta̱dde̱n ci olli I̱bu̱ru̱ icu, azi ne, “Anyik ol cigannik ku̱lu̱ge̱t koot abunna ovvo nege alayan.” 2Ming a̱ju̱ra̱ne̱ i̱nna̱ lu̱ge̱z cinne̱ng kar gon lam nogo, 3anyahak atin komizi ci Manyi zeret ci gerze kaal cuggo̱k boorete, vartange ki zi̱gi̱re̱, ki naganaganya, ki tiin, ki a̱zza̱, ki eeza. 4Ma̱i̱je̱ Manyi ahal atin kaal cik olli Israilo ngati kaal cik olli Masiro, kar atin iróng kaala cik olli Israilo a̱da̱i̱ zeret.’”

5Atahala zin Manyi i̱i̱te̱n kar kize ne, “Loza okko Ta̱mu̱ta̱dde̱n ogon gi̱i̱ cu.” 6Imma i̱i̱te̱n ci reng, u̱tu̱gu̱ Manyi zoz neci de̱de̱. A̱da̱i̱to̱ zin kaala cik olli Masiro do̱o̱k, ma̱i̱je̱ kaala cik olli Israilo i̱llo̱i̱ rok co̱de̱ ci a̱da̱i̱. 7I̱tto̱na̱ zin alaani ci Masiro ol koot koobit zoz neci, a̱gga̱ enne i̱llo̱i̱ kaale cik olli Israilo ci a̱da̱i̱ imma rok co̱de̱. Ngen zin abarik zinin cinne odoi, alam zin olli Israilo ngati a̱lu̱ge̱.

Zeret ci dulaninu

8A̱nne̱k Manyi Muses ki Aaron ne, “Adamutta bbu̱u̱r caala azzine do̱o̱k kar anyik Muses kazacek ta̱dde̱n ngati aave alaani ci Masiro bu̱k. 9Kar bbu̱u̱ri̱ necu ku̱tu̱gu̱ ki tu̱du̱wa̱ci̱ lo̱o̱ce̱ ci Masiro do̱o̱k, kar zeret ci atin okko anyahak ol ki elegje do̱o̱k dulani ki̱ta̱k lo̱o̱c ci Masiro do̱o̱k.”

10A̱ka̱tta̱ zin nege bbu̱u̱r caala kar koot ngati alaano. Azacek zin Musesi bbu̱u̱r ta̱dde̱n, kar zeret ci anyaha dulani ka̱gga̱m ol ki elegje ki̱tta̱. 11Iróng zin ngarreta ngen abile ngu̱me̱ ci Muses eci dulanina a̱gga̱m nogo do̱o̱k ki olli Masiro. 12Ma̱i̱je̱ Manyi aanyik zinin cinne kodok kak, iróng aziye zoz ci Musesi ki Aaron, ki bali u̱du̱wa̱k Manyi Muses ke̱.

Zeret ci aṯilne ta̱mu̱ kize teltelen

13A̱nne̱k zin Manyi Muses ne, “Tinga je̱e̱na̱ ingani nge̱rre̱t ri̱ri̱wo̱na̱, ditozik alaan ci Masiro kar izek nonno ne, ‘Icu zoz ci a̱du̱wa̱ Manyi, Ta̱mu̱ta̱dde̱n ci olli I̱bu̱ru̱: Anyik ol cigannik ku̱lu̱ge̱t koot, kar atin nege kalayya annita, 14icima kokko atin ki̱tto̱nna̱k zeret ol cik a̱li̱ngli̱ngnyu̱ bu̱k ko̱ ki olli o̱rgu̱ do̱o̱k, kar abunna ming a̱gga̱ i̱llo̱i̱ e̱e̱t imma ci ogon ki anna lo̱o̱ce̱ cu do̱o̱k. 15Imma i̱yo̱ko̱ ki̱tto̱na̱ wo̱ye̱ anna zeret ci a̱ddi̱ki̱re̱ kar ki̱ti̱vi̱la̱u̱ng i̱nne̱t ki ol cigunnek lo̱o̱ce̱ cu veelek. 16Abarik anna kidimani i̱nne̱t ize alaan kar doiz cinanni ki̱ye̱le̱i̱ kar ol ko̱to̱ngo̱o̱lte̱ya̱ annit lo̱o̱co̱we̱ do̱o̱k. 17Ngen i̱nna̱ odongi ele cunne aburi iróng orongi anyike olli Israilo ku̱lu̱ge̱t. 18Imma zin i̱yo̱ko̱, loza i̱i̱we̱ cu ele, kokko anna ki̱tto̱na̱ ta̱mu̱ ci a̱ddi̱ki̱re̱ anyak biyen cik ngen olli Masiro kicinnet i̱i̱te̱n imma Masire. 19Du̱wa̱k ol cigunnek abal kaal boora ko̱, abunna ming anyahak kaal ne̱ke̱ ngintik anyak ce̱e̱zi̱, eci ovvo biyena cik ta̱mwa̱k ko̱ i̱i̱na̱k ol do̱o̱k ki kaal cik aavtte zara bak a̱da̱i̱.’”

20O̱to̱ngo̱o̱ltte̱ zin ol wak a̱li̱ngli̱ng ki alaan ci Masiro ko̱ zoz ci Manyi kar kiyihet kanyaktak kaal ki du̱cca̱k do̱o̱k orog. 21Ma̱i̱je̱ ol wak ibbez zoz ci Manyi utungtek du̱cca̱k cigge̱k ki kaal zari.

22Izek zin Manyi Muses ne, “Dong a̱zzi̱t uuv ta̱mu̱-keng kar teltelena ki̱ta̱za̱k ol ki elegje ki keen do̱o̱k lo̱o̱ce̱ ci Masiro.” 23Baling odong Musesi cool kar kuuv ta̱mu̱-keng, i̱tto̱na̱ zin Manyi borowoc ki teltelen cik i̱i̱na̱k olli Masiro, okko borowoci ataran zin rok lo̱o̱c, 24itazzo zin teltelena kar ta̱mu̱ kabad kobodozik. Een necu lamlam ci ommog veelek lo̱o̱ce̱ ci Masiro. 25Ovvocit teltelena cik i̱i̱na̱ ta̱mu̱-kenga kaal do̱o̱k lo̱o̱ce̱ ci Masiro ol cik diirik ki elegje; egerzan rok ma̱ne̱n ki keen. 26Ma̱i̱je̱ lo̱o̱ce̱ ci een Goshen, iróng teltelena i̱i̱na̱ nginati, orog ci abahe olli Israilo.

27I̱tto̱na̱k zin alaani ci Masiro zoz Muses ki Aaron, a̱nne̱k ne, “I̱i̱ cu ku̱tu̱gu̱ anna de̱de̱ mu̱nye̱n, ilem zoz ci Manyi, kabaca anna ki ol cigannik veelek. 28Alayek Manyi Ta̱mu̱ta̱dde̱n ize a̱ppwa̱ borowoci ki teltelen. Ka̱a̱nyu̱ng atin anna i̱ge̱t u̱lu̱ge̱t, iróng atin ngen abakku ngatu.”

29O̱bo̱de̱k zin Musesi nonno, “Ming kiyowa anna orgato, kokko kala Manyi kabanyik azzin. Abile atin borowoci, iróng atin biyena ngen i̱i̱na̱k lo̱o̱c, kar atin a̱gga̱c een looci cu ci Manyi. 30Abarik anna ka̱gga̱ zoz cunno̱ng, i̱nne̱ta̱ ki ol wak a̱li̱ngli̱ngnyu̱ bu̱k ko̱, ngen o̱to̱ngo̱o̱ltte̱ Manyi Ta̱mu̱ta̱dde̱n.”

31Imma ngatu egerzan ta̱mu̱ labi balik izeto te̱di̱ne̱t ke̱ do̱o̱k ma̱ne̱ne̱. 32Imma labina balik ngen idice ke̱ nogo do̱ cik anyigzai eci ngen kobotbotit.

33Utungek zin Musesi alaan ci Masiro lo̱o̱c kar kuk orgato. Abanyek zin a̱zzi̱t Manyi ta̱mu̱-kenga; ibilet zin borowoci ki teltelen, ibil zin bo̱do̱k ta̱mu̱. 34Baling icin enne ibilet ta̱mu̱ ki teltelen ki borowoc, u̱tu̱gu̱ zin enne mu̱nye̱n bo̱do̱k dee: Utuhu zinin cinne ki ol cik a̱li̱ngli̱ng ki nonno ko̱. 35Alammit olli Israilo ngati a̱lu̱ge̱ ki baling u̱du̱wa̱k Manyi Muses ke̱.

Currently Selected:

Lu̱ge̱z 9: tex

Highlight

Copy