Lu̱ge̱z 2

Ti̱ra̱ne̱t ci Musesi

1Imma e̱rki̱te̱ bali a̱li̱ngli̱nge̱k olli Israilo olli Masiro, anyak da̱ e̱e̱t imma ci een boor co Le̱vi̱ ci a̱ti̱k do̱le̱c ci een boor cinne̱ng. 2I̱ti̱rra̱ zin ngaa necu do̱le̱c ci maci alina oroot. Baling icin enne alina do̱le̱c cinne oroot, idima zin do̱le̱c kar zin ku̱lu̱gu̱ny nye̱lo̱we̱ i̱i̱yo̱. 3Ma̱i̱je̱ baling iróng ngaa neci uule ngati a̱lu̱ngnye̱ nonno, idima dho̱ngku̱ idiman zee kar ki̱di̱l imaduwa ju̱rru̱m kar zin kidima do̱le̱c kabahek ecito, kar kaarik tabara cik aavtte more ci een Nail ti̱ti̱ma̱. 4Ma̱i̱je̱ ngoonya abile reena, angamnik nonno orong kicin nya wo̱ye̱ ci i̱i̱na̱k nonno.

5Uk zin buweenyi alaan ci Masiro rok moro Naila raninet, imma ol wak ebek nonno ko̱ owo moro ti̱ti̱ma̱. Icin zin enne dho̱ngku̱ ci aave orgene ci tabarau kar zin enne ki̱tto̱n du̱ca̱i̱t wa nga̱a̱ye̱ kuk kanyaha dho̱ngku̱ neci. 6Baling okko buweenyi alaano oo amuda anyak do̱le̱c cidici maci, a̱lu̱ ecito, atamatek zin enne do̱le̱c neci. Kar kize ne, “Een neci do̱le̱c ci olli I̱bu̱ru̱.”

7Ataman niko i̱jji̱n ngoonya buweenyi alaan ci Masiro, “Inya kuk kanyaha ngaa imma ci I̱bu̱ru̱ abunna oroktine do̱le̱c necu kize cunne?”

8O̱bo̱de̱k zin enne, “Abunna, bit nyaha.” Kar do̱le̱c neci kuk kanyaha e̱e̱ti̱ do̱le̱co̱. 9Izek zin buweenyi alaan ci Masiro nonno ne, “Bite do̱le̱c necu, tarkuwoi kize cinanni, ka̱ru̱we̱ki̱ atigon anna i̱nne̱t o̱ro̱bi̱ya̱.” Idima zin ngaa necu do̱le̱c, kar zin katarkuwoi. 10Baling i̱ddi̱ki̱r do̱le̱c necu, uk aanyik buweenyi alaan ci Masiro kize do̱le̱c cinne. Akatek zin enne zar cik een Muses, azi ungec ne, “Kacalla maame.”

I̱vi̱r Musesi Masire uk Midianikte

11Baling okko a̱ddi̱ki̱re̱ Musesi, itinga uk icin ol ciginnek Israilo ngati a̱li̱ngli̱nge̱ nege li̱ngli̱ngo̱n ci a̱ppwe̱. Icin enne e̱e̱t imma ci Masiro ming a̱ru̱k e̱e̱t ci I̱bu̱ru̱, wak een ol ciginnek e̱le̱tti̱. 12Icin zin Musesi lo̱o̱c ming aave e̱e̱ti̱ imma ojonun, i̱llo̱i̱ zin e̱e̱t imma, kar zin enne ku̱ru̱k e̱e̱t neci Masiro ke̱ ka̱da̱k kar ku̱lu̱gu̱ny kadawek azac. 13Kar i̱i̱te̱n imma, uruba enne olli I̱bu̱ru̱ rama ming oyoho, kar ki̱jji̱n e̱e̱t ci abaci ko̱, “A̱ru̱i̱ e̱e̱t ci een I̱bu̱ru̱ ki i̱nna̱ bu̱k ko̱ nya?”

14Izek zin e̱e̱ti̱ neci nonno ne, “Ngene ci aanyi i̱nne̱t ize alaan ci ettedi zoz cinna̱ng? Orongi i̱yo̱ko̱ ru̱wa̱ ki bali ming a̱ru̱i̱ i̱nna̱ e̱e̱t bali Masiro ke̱?” O̱to̱ngo̱o̱le̱ zin Musesi kar ki̱no̱n, “A̱gga̱c ol zoz bali kogonni anna ke̱.”

15Baling izik alaani zoz necu, orong zin ku̱ru̱k Muses, i̱vi̱r zin Musesi ngati alaan ci Masiro kar kuk kabak lo̱o̱ce̱ ci een zara Midian, kar zin kuk ka̱vvu̱ lo̱o̱ta̱ ṯu̱k abanyca. 16Anyak da̱ e̱e̱ti̱ ci Midiani wawaco lo̱o̱ce̱ neci dooli cik nga̱a̱ye̱k een turgerem, a̱vvu̱ ṯu̱k ovvo aṯila maam kar bo̱do̱k ke̱e̱ltti̱k u̱gge̱ i̱bo̱ kuudet eezena ki a̱zza̱ cik be̱e̱ti̱nne̱ng. 17A̱vvu̱ tuwayowa uggak vu̱rrta̱ kar kotoit nogo ṯu̱wa̱, ma̱i̱je̱ Musesi itinga je̱e̱na̱ kar kangara nogo kar ke̱e̱li̱k kaal cik dooli ne̱ke̱.

18Baling i̱mi̱rrte̱ dooli ne̱k nga̱a̱ye̱k ke̱ oot ngati be̱e̱ti̱nne̱ng Reuel, i̱jji̱n zin enne nogo, “Nya ming obodanu niga wazin necu ataman ko̱?”

19O̱bo̱dde̱k zin nege, “Ming ka̱vvu̱nna̱ ataman ko̱, eelawet e̱e̱ti̱ ci Masiro ngati tuwayok cik a̱ju̱ra̱ke̱t maam, kar zin enne kuuduz eeza ki a̱zza̱ cigga̱c bu̱k.”

20I̱jji̱n zin be̱e̱ti̱nne̱ng nogo, “I̱nno̱ zin e̱e̱t neci? Nya ming ungneku nonno lo̱o̱c ko̱? U̱tu̱ya̱ nonno ki̱ki̱ya̱ kadaho.”

21Elema zin Musesi ngati abahe enne ce̱e̱ze̱ ci e̱e̱t neci, kar kaanyik nonno ki̱ti̱k buweenyinne wa een zara Zipporah. 22Baling abaito bu̱k, i̱ti̱rra̱ zin Zipporah do̱le̱c ci maci, akatek zin Musesi do̱le̱c zar cik een Gershom, azi ungec cinne ne, “Kiize anna i̱do̱ngo̱je̱ni̱t lo̱o̱ce̱ ci reng.”

23Imma zin vu̱rrta̱, a̱da̱k alaani ci Masiro. Ma̱i̱je̱ olli Israilo ngen abalac ngati a̱gi̱dde̱ ol ne̱ke̱ nogo kizeto du̱cca̱k. U̱tu̱lu̱zzo̱ zin nege oroot orongit Ta̱mu̱ta̱dde̱n keela nogo. 24Izik zin Ta̱mu̱ta̱dde̱n u̱lu̱wa̱ cinne̱ng kar ka̱a̱da̱ olom#2:24 Olom: Idiman Ta̱mu̱ta̱dde̱n olom ki Aburaham kar kaanyik nonno dooli cik meelek ka̱vvu̱to̱ lo̱o̱ce̱ ci Kanaani. IkebKananet 17:1-8. cinne ki Aburaham, ki I̱sa̱ko̱ ki Ya̱ko̱bo̱. 25Icin zin Ta̱mu̱ta̱dde̱n olli Israilo ming apirna kar zin enne katamatek nogo.

Currently Selected:

Lu̱ge̱z 2: tex

Highlight

Copy