Lu̱ge̱z 18

Eronak Jethro kau cinne Muses

1Een Jethro e̱e̱t ci wawaco o̱rge̱ ci een Midian kar bo̱do̱k kize i̱nyi̱k ci Musesi, izik kaal do̱o̱k cik ogonek Ta̱mu̱ta̱dde̱n Muses ki ol ciginnek Israil, ki bo̱do̱k gool ci anyahane Manyi olli Israilo Masire.

2I̱tto̱n zin da̱ Musesi ngaa cinne Zipporah, kar i̱nyi̱k cinne Jethro ka̱gga̱ma̱ buweenyinne 3ki logoz ciginnek rama. Azi zar cik do̱le̱c co̱de̱ ne Gershom, eci Musesi ize ne, “Kize anna i̱do̱nge̱ni̱t lo̱o̱ce̱ ci reng,” 4kar do̱le̱c co̱de̱ bo̱do̱k een zara Eliezer, eci ize enne ne, “Ta̱mu̱ta̱dde̱n ci baba cinanni ko̱ een ti̱ri̱zo̱i̱t cinanni; eelawa enne annit nya̱tu̱ba̱te̱ ci alaan ci Masiro.”

5I̱ki̱ya̱k zin i̱nyi̱k ci Musesi, Jethro ki ngaa ci Musesi ki logoz ciginnek nonno balala, nyaperite ci aave ojonun ki be ci Ta̱mu̱ta̱dde̱no̱. 6I̱tto̱na̱k zin da̱ Jethro Muses zoz cu, “Ka̱kku̱nna̱ki̱ anna Jethro i̱nyi̱k cunne ki ngaa cunne ki logoz rama.”

7Uk zin Musesi u̱ru̱me̱k i̱nyi̱k cinne gool, kar zin enne kakatek u̱zu̱ngti̱nne̱ ngati i̱nyi̱k cinne kar kiza nonno. Izayo zin niko kar koot ti̱ta̱ ecito. 8U̱du̱wa̱k zin Musesi i̱nyi̱k kaal cik ogonik Manyi alaan ki olli Masiro do̱o̱k zo̱ze̱ ci olli Israilo, ki pirnanet ci amuda olli Israilo goola ki eelannet ci eelanne Ta̱mu̱ta̱dde̱n nogo.

9Atalo zin Jethro kaale cik abunna u̱tu̱gu̱we̱k Manyi olli Israilo ngati angarane nogo azzine cik olli Masiro. 10Kar enne kize ne, “Kinnati Manyi wa angarannung azzine cik olli Masiro ki alaan cinne̱ng. Kinnati Ta̱mu̱ta̱dde̱n ci eela ol gi̱de̱nta̱ azzine cik olli Masiro. 11I̱yo̱ko̱, ka̱gga̱ a̱ddi̱ki̱re̱ Manyi kommog ta̱mu̱ta̱dde̱ne̱t do̱o̱k, eci u̱tu̱gu̱we̱k enne zoz neci ol balik aminye olli Israilo.” 12Kar zin Jethro i̱nyi̱k ci Musesi kanyaha kaal cik apahek enne Ta̱mu̱ta̱dde̱n kize ci atuzek enne nonno. Kar zin Aaroni ki lo̱ddi̱ki̱re̱ cik Israilo do̱o̱k ki̱vi̱ta̱ kadakto ki i̱nyi̱k ci Musesi ngu̱me̱ ci Ta̱mu̱ta̱dde̱no̱.

13Imma i̱i̱te̱n ci reng, a̱vvu̱ Musesi lecere cinne kize alaan ci lo̱ki̱ko̱, kar ol kibilet aburuk nonno nge̱rre̱t zee kize looci yo̱mo̱n. 14Baling icin i̱nyi̱k cinne kaal cik ogonik Musesi ol do̱o̱k, a̱nne̱k zin nonno ne, “Nya ci ogonik i̱nna̱ ol ko̱? Nya ming aave i̱nna̱ do̱ ize alaan ko̱, imma ol ne̱ko̱ do̱o̱k abile aburuki nge̱rre̱t zee kize looci yo̱mo̱n ko̱?”

15Abarizek zin Musesi nonno, “Eci a̱vvu̱na̱ka̱ ol ko̱ orong ka̱gga̱c zoz ci Ta̱mu̱ta̱dde̱no̱. 16Ming anyak nege dango e̱le̱tti̱ne̱, anyaha ol zoz neci, kar anna kidiman zoz cinne̱ng, kar bo̱do̱k ku̱du̱wa̱k nogo lo̱ti̱nno̱k cik Ta̱mu̱ta̱dde̱no̱.”

17O̱bo̱de̱k zin i̱nyi̱k ci Musesi nonno, “Gi̱i̱ ci ogoni i̱nna̱ ko̱ iróng abunna. 18Okko i̱nna̱ apirna, ovvo bo̱do̱k zu̱we̱ apirna, eci a̱ppwa̱ li̱ngli̱ngo̱ni̱ ngatunne, iróng i̱nna̱ do̱ e̱e̱ti̱ co̱de̱ u̱u̱li̱ li̱ngli̱ngo̱n necu. 19Zik ti̱lo̱wi̱ne̱t cinanni i̱yo̱ko̱ niko, kar anyik bai Ta̱mu̱ta̱dde̱n ka̱vvu̱ ngatunne. Ize i̱nna̱ zoc ci ollu zo̱ze̱ ci Ta̱mu̱ta̱dde̱no̱ kar nyahak no̱ngi̱tto̱n cigge̱k Ta̱mu̱ta̱dde̱n. 20Demezek nogo ti̱lo̱wi̱ne̱t ki lo̱ti̱nno̱k, kar ye̱le̱k nogo gool ci abahe nege ki li̱ngli̱ngo̱n ci adiman nege. 21Tahala olle, ol cik anyak arizet, o̱ngo̱o̱le̱ Ta̱mu̱ta̱dde̱n, ol cik a̱gga̱m kaal ju̱rru̱m, iróng orong ogor, kar anyik nogo kizeto lo̱ddi̱ki̱re̱ cik abal ol cik meelek, i̱bbo̱nge̱t cik meelek, icima obet cik meelek, icima moten tu̱r, icima omoto. 22Anyik nogo ki̱li̱ngli̱nge̱t kizeto alaat wak etted no̱ngi̱tto̱n cik ollu lo̱ki̱ka̱, ma̱i̱je̱ ming anyak no̱ngi̱tto̱n cik okkomi, anyik kanyaktai i̱nne̱ta̱; anyik nogo kedecca no̱ngi̱tto̱n cik obokce. Anyik zoz necu li̱ngli̱ngo̱n cunne kovolvol, eci ozol nege ki i̱nne̱t li̱ngli̱ngo̱n ci lo̱ki̱ko̱. 23Ming u̱tu̱gu̱ i̱nna̱ zoz necu kar Ta̱mu̱ta̱dde̱n ku̱du̱wa̱i̱n, okko i̱nna̱ anime no̱ngi̱tto̱n, kar ol do̱o̱k wak anyak no̱ngi̱tto̱n ovvo atali lo̱ki̱ko̱ cunne.”

24Aziye Musesi zoz ci i̱nyi̱k cinne kar zin ku̱tu̱gu̱ kaal cik a̱du̱wa̱ enne ke̱ do̱o̱k. 25Atahala enne ol cik anyak arizet olle cik Israilo kar kanyik nogo kizeto lo̱ddi̱ki̱re̱ cik ollu, abal ol cik een i̱bbo̱nge̱t cik meelek, ol cik een obet cik meelek, ki moten tu̱r, ki bo̱do̱k ol omoto. 26A̱li̱ngli̱ng nege kizeto alaat cik ollu lo̱ki̱ka̱ gwo̱o̱nya̱ do̱o̱k. Anyahak nege Muses no̱ngi̱tto̱n cik okkomi, imma no̱ngi̱tto̱n cik obokce edeca nege e̱le̱tti̱ne̱.

27I̱nya̱ma̱ne̱k zin Musesi i̱nyi̱k cinne gool, kar Jethro ki̱mi̱re̱ kuk o̱rge̱ cinne.

Currently Selected:

Lu̱ge̱z 18: tex

Highlight

Copy