Lu̱ge̱z 16

Da̱i̱ne̱t cik i̱i̱na̱ ta̱mu̱-kenga

1U̱lu̱ge̱t zin booryowa cik olli Israilo ngin bali een Elim i̱i̱nya̱we̱ cik een omoto ki tu̱r nye̱lo̱we̱ ci een rama ngati u̱lu̱gta̱ nege Masira, kar kuzuca Balal ci Sin, ci aave orgene ci Elim ki Sinai. 2Imma balala egerenycek zu̱we̱ do̱o̱k Muses ki Aaron. 3A̱nne̱k olli Israilo nogo ne, “Maya ming ka̱da̱kna̱ a̱tte̱ ci Manyi Masire! Kabak ba̱li̱ye̱ Masire labak, kanyak i̱jjo̱nyya̱ cik abbize i̱di̱, kadak da̱i̱ne̱t cik korongnya naga, abarik niga a̱lu̱ga̱ne̱tu̱ abunna kovvo kapirnanna balala ngatu, aditai atin zu̱we̱ cu do̱o̱k zo̱ze̱ ci magizo.”

4Izek zin Manyi Muses ne, “Kanyike atin anna da̱i̱ne̱t ki̱ta̱zzo̱ ta̱mu̱-kenga kiwagon ta̱mu̱. Anyik ol koot keberta cik eleno ki nogo i̱i̱te̱n co̱de̱. Imma zin go̱o̱le̱ necu katimani atin anna nogo ming annu nege lo̱ti̱nno̱k cigannik. 5Ming izeto i̱i̱nya̱ torkonom biranoca, abunna ming ovvo nege aluta da̱i̱ne̱t lak rama kar kait.”

6Izektek zin Musesi ki Aaron olli Israilo do̱o̱k ne, “Yo̱mo̱na̱, ovvo atin niga a̱gga̱yyu̱ Manyi ci iyowannung i̱ge̱t Masire, 7kar nge̱rre̱t acinnu atin niga di̱ngdi̱ngo̱n ci Manyi, eci enne izik u̱lu̱wa̱ cunno̱ng a̱lu̱we̱kku̱ niga nonno, ke̱e̱ggi̱nna̱ naga nya ngatinno̱ng ci anganyetu niga agita ko̱?” 8A̱nne̱k zin bo̱do̱k Musesi nogo ne, “Ovvo atin niga a̱gga̱yyu̱ Ta̱mu̱ta̱dde̱n ba̱li̱ye̱ ci a̱a̱nyu̱ng i̱di̱ng ci adakku yo̱mo̱na̱ ko̱, ki da̱i̱ne̱t cik nge̱rre̱ti̱nu̱ orongnyu niga ko̱, eci izik enne u̱lu̱wa̱ cunno̱ng a̱lu̱we̱kku̱ niga nonno. Ke̱e̱ggi̱nna̱ naga nya? Iróng niga a̱lu̱we̱ke̱ttu̱ agita, abarik u̱tu̱lu̱ze̱k Manyi.”

9A̱nne̱k zin Musesi Aaron ne, “Du̱wa̱k zoz cu olli Israilo do̱o̱k, ‘I̱vi̱tta̱k Manyi, eci enne izik u̱lu̱wa̱ cunno̱ng.’”

10Baling ngen Aaroni ozozik zu̱we̱ ci Israilo do̱o̱k, egelemit zin nege o̱to̱n ci balalo, kar zin nginati i̱ye̱la̱i̱ di̱ngdi̱ngo̱ni̱ ci Manyi di̱i̱zo̱ca̱.

11A̱nne̱k zin Manyi Muses ne, 12“Kiziya anna u̱lu̱wa̱ ci olli Israilo. Du̱wa̱k nogo zoz cu, ‘Ming okko een yo̱mo̱n adait i̱di̱ng, kar nge̱rre̱t anyakku atin da̱i̱ne̱t. Kar atin a̱gga̱c ke̱e̱ni̱ anna Manyi Ta̱mu̱ta̱dde̱n cunno̱ng.’”

13Imma yo̱mo̱n neci ele itazak tawuraknya cik meelek nyaperit ci olli Israilo, kar nge̱rre̱t a̱gga̱m zizi nyaperit veelek. 14Baling ovvo zizi a̱zze̱, i̱ye̱ltta̱i̱ zin kaala cik voorik ogon ki lo̱ri̱mo̱ti̱ a̱ju̱ka̱ ta̱mu̱ i̱i̱na̱k lo̱o̱c balala. 15Baling icinnet olli Israilo kaal ne̱ke̱, ozozit zin nege do̱, “Nya ne̱ko̱?” Eci iróng nege a̱gga̱ nya ne̱ke̱.

A̱nne̱k zin Musesi nogo ne, “E̱e̱ggi̱n ne̱ko̱ da̱i̱ne̱t cik a̱a̱nyu̱ng Manyi abunna ming adakku. 16Icu ti̱lo̱wi̱ne̱t ci Manyi: ‘Anyik gon e̱e̱t kuluta da̱i̱ne̱t cik orong enne. Idimtta uduce rama kize cik e̱e̱t co̱de̱ ngati ol ne̱k abak ti̱te̱ cunne ko̱.’”

17U̱tu̱gu̱zzo̱ zin olli Israilo ki baling u̱du̱ya̱i̱ zoz ke̱; aluta ol uggak da̱i̱ne̱t cik meelek, aluta uggak cikidik. 18Baling ovvo nege atiman da̱i̱ne̱t ne̱ke̱ uduca, ovvo ol cik aluta da̱i̱ne̱t cik meelek iróng anyak cik meelek, ovvo ol cik aluta da̱i̱ne̱t cikidik iróng anyak cikidik. U̱lu̱tta̱ nege da̱i̱ne̱t cik eleno ki nogo do̱o̱k.

19Iizek zin Musesi nogo ne, “Ma anyikku e̱e̱t imma ki̱ya̱ng da̱i̱ne̱t ne̱ko̱ rok loza nge̱rre̱t kize lo̱ngo̱o̱le̱.”

20Imma ol ne̱ke̱ e̱le̱tti̱ne̱ iróng ol uggak ngatinne̱ng aziye zoz ci Musesi; i̱ya̱ngi̱t da̱i̱ne̱t u̱gge̱ kize lo̱ngo̱o̱le̱, abarik ibbitet uluta akate mu̱we̱z. Omoze zin Musesi ngatinne̱ng.

21Aluta gon ol nge̱rre̱t da̱i̱ne̱t cik eleno ki nogo, kar ming okko koor a̱bu̱re̱, alayane da̱i̱ne̱t ne̱ke̱ ki̱zze̱c. 22Imma i̱i̱te̱ne̱ ci een torkonom biranoca, a̱kku̱ gon e̱e̱ti̱ co̱de̱ aluta da̱i̱ne̱t ne̱ke̱ lak ram, kar zin lo̱ddi̱ki̱re̱ cigge̱k koot ku̱du̱kta̱k zoz necu Muses. 23A̱nne̱k zin Musesi nogo ne, “Icu zoz ci a̱du̱wa̱ Ta̱mu̱ta̱dde̱n: ‘Een loza I̱i̱te̱n wa Yu̱bze̱nto̱#16:23 I̱i̱te̱n wa Yu̱bze̱nto̱: Een i̱i̱te̱ni̱ ci a̱yu̱bze̱ olli Ya̱u̱do̱ kar kalac gon Ta̱mu̱ta̱dde̱n. Okko bo̱do̱k gon i̱i̱te̱ne̱ cu a̱a̱dda̱ nege Ta̱mu̱ta̱dde̱n kize Tehenyait ki Ti̱ri̱zo̱i̱t cinne̱ng. Awu olli Ya̱u̱do̱ i̱i̱te̱n necu kize i̱i̱te̱n ci een turgerem biranoca, ma̱i̱je̱ Tenneti awu i̱i̱te̱n necu kize i̱i̱te̱n ci een torkonom biranoca. IkebLu̱ge̱z 20:8-11 kiDeuteronomy 5:12-16., i̱i̱te̱n wa a̱li̱le̱ Yu̱bze̱nto̱ Manyi. Ait zin da̱i̱ne̱t cik orongnyu niga ko̱, kar da̱i̱ne̱t cik anyigzai anyik kizeto ja̱mi̱te̱n cik lo̱ze̱ti̱nu̱.’”

24Aartik zin da̱i̱ne̱t ne̱k anyigzai ke̱ ka̱vvu̱to̱ kize cik nge̱rre̱ti̱nu̱, ki bali ming a̱du̱wa̱ Musesi ke̱. Iróng zin da̱i̱ne̱t ne̱ke̱ aguza icima a̱gga̱m u̱lu̱ta̱. 25A̱nne̱k zin Musesi nogo ne, “Adait da̱i̱ne̱t ne̱ko̱ wazin necu, eci wazin cu een I̱i̱te̱n wa Yu̱bze̱nto̱ Manyi. Iróng atin amudannu da̱i̱ne̱t u̱gge̱ lo̱o̱ta̱ wazin necu. 26Alutanu niga da̱i̱ne̱t ne̱ko̱ gwo̱o̱nya̱ torkonom, ma̱i̱je̱ ming ize i̱i̱te̱ne̱ ci een turgerem, I̱i̱te̱n wa Yu̱bze̱nto̱, i̱llo̱i̱ atin da̱i̱ne̱t u̱gge̱.”

27Imma i̱i̱te̱ne̱ ci een turgerem ko̱, oot ol uggak dee ovvo aluta da̱i̱ne̱t kiwagon ko̱, iróng zin ngen amuda gi̱i̱ imma. 28A̱nne̱k zin Manyi Muses ne, “Aburnnu atin ngati iróng azunnu lo̱ti̱nno̱k cigannik rok atinga? 29Abunna ming a̱gga̱yyu̱ o̱o̱tti̱ne̱ cuggo̱k a̱a̱nyu̱ng Manyi I̱i̱te̱n wa Yu̱bze̱nto̱; zoz zin ci a̱a̱nyu̱ng enne i̱ge̱t da̱i̱ne̱t cik gwo̱o̱nya̱ rama i̱i̱te̱ne̱ ci een torkonom. Anyik ol do̱o̱k ka̱vvu̱to̱ nga̱to̱de̱ i̱i̱te̱n ci een turgerem; iróng e̱e̱ti̱ imma iyowa okko ngamani.” 30I̱ye̱be̱zi̱t zin ol i̱i̱te̱ne̱ ci een turgerem Yu̱bze̱nto̱.

31Akannek olli Israilo da̱i̱ne̱t ne̱ke̱ zar cik een maana.#16:31 Maana: Utuge ci I̱bu̱ru̱, azi keng ci zoz cu ne, “Nyaa icu?” Ogon da̱i̱ne̱t ne̱ke̱ ki i̱yo̱ko̱ laziyenti ci voori ko̱, emede ki ci anyak le̱te̱c. 32Ize zin Musesi ne, “Icu zoz ci i̱lo̱ti̱kke̱t Manyi: ‘Idimtta maana uduce rama kar u̱zu̱tte̱ kize cik bu̱u̱llo̱k cik atin a̱vvu̱ ke̱. Kar atin kicinnet da̱i̱ne̱t balik ka̱a̱nyu̱ng i̱ge̱t adait balala ko̱ baling ka̱lu̱ga̱nu̱ng anna i̱ge̱ta̱ Masire.’”

33Izek zin Musesi Aaron ne, “Dima í̱jjó̱ kar arik uduc ci anyak da̱i̱ne̱t cik een maana ko̱ ecito. Kar arik nginti Manyi kar bu̱u̱llo̱wa̱ ki̱vi̱ta̱ atin kicinnet.”

34Ogon ki bali i̱lo̱t Ta̱mu̱ta̱dde̱n Muses ke̱, arik zin Aaroni uduc ci anyak maana ko̱ ngin bali a̱du̱wa̱ Manyi ke̱. 35Adak olli Israilo da̱i̱ne̱t cik een maana ko̱ e̱rki̱nya̱ moten we̱c zee ki̱vi̱ta̱k lokore ci lo̱o̱c ci abunna een Kanaan ci abahe ol uggak ko̱.

36(Een uduci ci atimane nege maana ko̱ zara omer, eleno ki coviyac.)

Currently Selected:

Lu̱ge̱z 16: tex

Highlight

Copy