Lu̱ge̱z 15

Lo̱ng ci Musesi ki Miriam

1E̱be̱nte̱k zin Musesi ki olli Israilo Ta̱mu̱ta̱dde̱n lo̱ng cu:

“Ke̱be̱ni̱k atin Manyi lo̱ng,

eci enne ommog mo̱ddo̱ ciginnek veelek.

U̱ju̱ke̱k zin vartange

ki ol wak amacuc vartange do̱o̱k nyatapar.

2Een Manyi doiz cinanni,

kar bo̱do̱k kize lo̱ng cinanni,

eci enne i̱ti̱ri̱za̱ annita.

Een enne Ta̱mu̱ta̱dde̱n cinanni, kar atin anna ki̱di̱ngdi̱nga̱n nonno,

ki Ta̱mu̱ta̱dde̱n ci baba, kinnati atin anna nonno.

3Manyi ci oor illa oroot;

een zara ciginnek Manyi.

4U̱ju̱ke̱k enne toromilet ki aciir

cik alaan ci Masiro

Nyatapar ci Ma̱ri̱,

kar zin enne kutudud aciir cik alaano zinino.

5Utududde zin nege maame ecito

kiwagon ming a̱ku̱wa̱ maama biyen ko̱.

6Okko a̱zzi̱ti̱ cunne a̱zzo̱, Oh Manyi,

wa anyak doiz.

Okko a̱zzi̱ti̱ cunne a̱zzo̱ Manyi,

idita mo̱ddo̱ cigunnek.

7Imma zin doize ci ele cunne de̱de̱,

ommogu zin i̱nna̱ ol do̱o̱k

wak adangnyi i̱nne̱ta̱.

Idita zin zoz ci aburneke i̱nna̱ nogo nong ne pid,

u̱tu̱gu̱ ki i̱yo̱ko̱ gwa̱a̱ ming adita tabara.

8Manyi, doiz cunne ci aanyik

nyatapar ko̱, kengerto maama orgena kodok nyatapari keng ne kak,

kar anyik maam keelit abanyoi ki i̱yo̱ko̱ a̱lu̱wa̱ ko̱.

9Odongit ba̱li̱ye̱ mo̱ddo̱ e̱le̱tti̱,

‘Kottoi atin anna nogo,

ka̱gga̱mi̱ atin anna nogo.

Kengera atin kaal cik kaama ngatinne̱ng go̱o̱le̱ ci korongnya.

Kanyai atin illa cinanni,

kar kidita nogo lai.’

10Ma̱i̱je̱ i̱nna̱ abu ngoot cunne,

idita zin nyatapari nogo ne lai.

Utudud zin tawani nogo u̱tu̱gu̱zzo̱ kiwagon biyena cik i̱i̱na̱k nyatapar.

11Manyi, i̱llo̱i̱ ta̱mu̱ta̱dde̱n imma lo̱o̱ta̱ ngatu

ci wo̱ye̱ katubuz ki i̱nne̱ta̱.

Anyai i̱nna̱ di̱ngdi̱ngo̱n, a̱li̱li̱ bo̱do̱k,

o̱ngo̱o̱li̱nni̱ ol i̱nne̱ta̱ do̱o̱k,

kar bo̱do̱k ogoni kaal cik a̱vu̱la̱.

12Odongu i̱nna̱

a̱zzi̱t cunne a̱zzo̱

kar looci ku̱ku̱k mo̱ddo̱ ne lai.

13Azunne atin i̱nna̱ ol balik i̱ti̱ri̱zu̱

i̱nna̱ ke̱ rezinte cunne aave udut.

Abali atin i̱nna̱ nogo rok ngintunne a̱li̱le̱ abahe i̱nna̱ ko̱.

14Aziye atin lo̱o̱co̱wa̱ do̱o̱k doiz ki di̱ngdi̱ngo̱n cunne

kar kaanyik nogo bba̱ri̱to̱n ci a̱ppwe̱ oroot;

ming ovvo nege aziye kaal cik a̱vu̱la̱ ogone orgene ci olli Philistia, o̱ngo̱o̱le̱ atin nege oroot.

15Ovvo atin alaata cik Edomi ki cik Moabi

o̱ngo̱o̱le̱.

Ovvo atin olli Kanaani do̱o̱k adunye zi̱nze̱tti̱,

16okko atin bba̱ri̱to̱ni̱ i̱i̱na̱k nogo.

Eci doize ci Ta̱mu̱ta̱dde̱no̱,

okkomi atin nege kiwagon be,

zee ki̱vi̱ta̱ ol cigunnek kozoroc, Manyi,

zee kozoroc ol balik anyaha i̱nna̱ ke̱.

17Anyahak atin i̱nna̱ ol cigunnek ki̱vi̱ta̱ kabaito

biye cunne atahala i̱nna̱ ko̱, Manyi,

nginti eteheenyu i̱nna̱ azzine cigunnek okko abahe,

wa een ce̱e̱z cunne.

18Abal atin Manyi lo̱o̱c

udut kuṯurei looci.”

Lo̱ng ci Miriami

19Baling i̱tto̱zzo̱ vartange cik alaan ci Masiro ki toromilet ki ol wak owo vartangine nyatapara, obodai zin Manyi tawan ci nyataparo ki̱ti̱k nogo ki̱ri̱k ki ba̱li̱ye̱, ma̱i̱je̱ olli Israilo etteddit nyatapar ngati odoi baling ngen abile tawani. 20Idima zin a̱ri̱to̱i̱ti̱ ci nga̱a̱ye̱ een zara Miriam ngooni Aaron ko̱ i̱do̱ng cinne kar ku̱ru̱k, kar zin ngaai do̱o̱k kidimtta i̱do̱ngwa̱ kurugumet kunuwet nonno. 21E̱be̱ne̱k zin Miriami nogo lo̱ng cu:

“E̱be̱nte̱k Manyi tegel ci kinnate nonno,

eci anyak enne doiz!

Ommog enne vartange

ki aciir do̱o̱k kar ku̱u̱be̱k nyatapar.”

Maam cik a̱tka̱ti̱ lo̱o̱ce̱ ci Marah ki Elim

22Itingawe Musesi olli Israilo Nyatapare ci Ma̱ri̱ koot rok balal ci een zara Shur. Owo nege i̱i̱nya̱ i̱i̱yo̱ balala ci iróng amuda maam. 23Baling u̱zu̱cca̱ nege nginti een Marah, iróng ngen nege aud maam cik ngin neci eci akaka maama. (Zoz zin ci awu nege ngin neci kize Marah (a̱tka̱ti̱) utuge cinne̱ng ko̱ nenen necu) 24Ungungunet ol zo̱ze̱ ci Musesi kar kizettek nonno ne, “Kaud atidic naga nya?”

25U̱tu̱lu̱we̱k zin Musesi Ta̱mu̱ta̱dde̱n, kar Manyi ki̱ye̱le̱k nonno keet cidici. U̱ju̱ke̱k zin enne keet neci maam, emedit zin maama udenta niko.

Imma nginati, itiman zin Manyi nogo kar ku̱du̱wa̱k ti̱lo̱wi̱ne̱t ki lo̱ti̱nno̱k. 26A̱nne̱k nogo ne, “Ming aziknnu niga ju̱rru̱m muluk ci Manyi Ta̱mu̱ta̱dde̱n cunno̱ng kar u̱tu̱gu̱z zoz ci een de̱de̱ ngu̱me̱ cinne, kar bo̱do̱k ming ogonnu kaal cik abunna orong Manyi, iróng atin kanyahakung zeret imma ci ogon ki bali zeret ci i̱i̱na̱k olli Masiro ke̱, eci anna ke̱e̱ni̱ Ta̱mu̱ta̱dde̱n ci kangaru ol mo̱ri̱zo̱we̱.”

27Baling utungtek olli Israilo Marah lo̱o̱c, i̱vi̱tta̱k zin Elim, nginti anyak moren omoto ki rama, kar bo̱do̱k kanyak keen cik e̱e̱ggi̱n etelle moten turgerem. Kar zin ki̱vi̱ta̱k nginti aavtte maama ojonun kar ki̱ye̱be̱zi̱t nginati.

Currently Selected:

Lu̱ge̱z 15: tex

Highlight

Copy