Lu̱ge̱z 14
14
Etteddit olli Israilo Liil ci Ma̱ri̱
1A̱nne̱k zin Manyi Muses ne, 2“Du̱wa̱k olli Israilo kobodda ki vu̱rru̱t kar ki̱ye̱be̱zi̱t ojonun ki Pi-Hahiroth, orgen ci Migdoli ki Nyatapar ci Ma̱ri̱. Anyik nogo ki̱ye̱be̱zi̱t nyatapar ti̱ti̱ma̱, aanycik ke̱ngti̱ Baal Zephon. 3I̱no̱n atin alaani ci Masiro azi ne, ‘A̱ma̱li̱ltte̱ olli Israilo o̱o̱tti̱ ngen a̱lu̱c lo̱o̱c ci Masiro, alam zin balal nogo.’ 4Kanyike atin anna oo ci alaano kokkom, kar atin enne kunu nogo. Kar atin anna kumuda gool ci a̱di̱ngdi̱nga̱na̱ ol zo̱ze̱ ci alaano ki aciir ciginnek, kar olli Masiro ka̱gga̱ ke̱e̱ni̱ anna de̱de̱ Ta̱mu̱ta̱dde̱n.” U̱tu̱gu̱zzo̱ zin olli Israilo zoz bali u̱du̱wa̱k Manyi nogo ke̱ kar zin ki̱ye̱be̱zi̱t ngin bali a̱du̱wa̱k Manyi nogo ke̱.
5Baling izik alaani ci Masiro zoz ci a̱lu̱ge̱ olli Israilo, utuhu alaani ki lo̱ddi̱ki̱re̱ ciginnek zi̱nze̱tti̱ cigge̱k zo̱ze̱ bali elemtta nege ke̱ kar kizeto ne, “Nya ci ku̱tu̱gu̱zzo̱ naga ko̱? Kaanycik olli Israilo ku̱lu̱ge̱t kar i̱yo̱ko̱ i̱zze̱c ol wak a̱li̱ngli̱ngngo̱ni̱ke̱ta̱.” 6Aanyik zin alaani aciir ciginnek kidimanit toromile ci ovvoye nege illa kerewo ju̱rru̱m kar kuwe aciir ciginnek ki nonno. 7Idima zin enne toromilet obet torkonom wak abunna oroot, ki bo̱do̱k toromilet do̱o̱k Masire ki lo̱ddi̱ki̱re̱ cigge̱k. 8Aanyik zin Manyi oo ci alaan ci Masiro kokkom kak, kar enne kunu olli Israilo balala, wak iiriny we̱t cinne̱ng mazeta. 9Unuwet zin olli Masiro ki vartange ki toromilet cik alaano ki aciir bu̱k nogo, kar zin kurubta nogo ming i̱ye̱be̱z nyatapar ti̱ti̱ma̱ ngati ojono ki Pi-Hahiroth, edevo ki Baal Zephon.
10Baling ize ojon alaani ci Masiro ki aciir ciginnek ngatinne̱ng, icinnet da̱ olli Israilo nogo ming anuwa vu̱rru̱t cinne̱ng, a̱bba̱ri̱te̱t zin nege kar ku̱tu̱lu̱zze̱k Manyi. 11Izektek zin nege Muses ne, “I̱llo̱i̱ bali ilomet Masire, nya i̱nna̱ ming anyahannet ki̱vi̱ta̱ ka̱da̱kta̱ ngatu balala ko̱? U̱tu̱gu̱ i̱nna̱ nya ming a̱lu̱ga̱ne̱t Masire ko̱? 12Ngen naga ba̱li̱ye̱ ku̱du̱kta̱i̱ i̱nne̱ta̱ Masire ka̱nne̱ki̱ ne, ‘Tunget agit ka̱vvu̱t niko; inyet ki̱li̱ngli̱ngto̱zi̱ya̱ olli Masiro’? Maya wo̱ye̱ da̱ ngati ka̱li̱ngli̱nge̱ka̱ olli Masiro ki daiz ci balala ko̱!”
13O̱bo̱de̱k zin Musesi ol, a̱nne̱k ne, “Ma o̱ngo̱o̱li̱nnu̱ lo̱o̱c. Abarik acinnu atidic ti̱ri̱ze̱ne̱t ci Manyi wazin necu. Ovvo olli Masiro acinnu a̱vvu̱na̱kku̱ng ko̱, iróng atin acinnu udut. 14Oor atin Manyi illa cunno̱ng; ibilet niga dee.”
15Iizek zin Manyi Muses ne, “Nya bo̱do̱k ming a̱lu̱we̱ka̱ng orongnyu keelaung anna ko̱? Du̱wa̱k olli Israilo kotozzo. 16Dong cool wainne anyai a̱tta̱ ko̱, ru̱k maam kar kengerto maama orgena, kodok nyatapari ne kak, kar olli Israilo kettedit nyatapar koot ti̱ti̱me̱ co̱de̱ ke̱. 17Kanyike atin anna o̱o̱tti̱ cik olli Masiro kokkomit kak kar kunuwet olli Israilo vu̱rrta̱. Kar atin zara cigannik ku̱bu̱lte̱ zo̱ze̱ ci alaan ci Masiro ki aciir ciginnek, ngati i̱zo̱we̱ liil ki vartange ki toromilet cigge̱k do̱o̱k. 18Ovvo atin olli Masiro a̱gga̱ya̱ ke̱e̱ni̱ anna Manyi ming u̱bu̱lte̱ zara cigannik zo̱ze̱ ci alaan ci Masiro ki toromilet ki ol wak owo vartangine.”
19Kar anjilo ci Ta̱mu̱ta̱dde̱no̱ bali owo o̱o̱we̱ ci olli Israilo ke̱, i̱mi̱re̱ uk vu̱rrte̱ cinne̱ng. Ma̱i̱je̱ di̱i̱zo̱ci̱ bali owo nogo oowa ke̱, i̱mi̱re̱ uk vu̱rrte̱ cinne̱ng, 20owo orgene ci aciir cik Masiro ki olli Israilo. Imma ba̱a̱li̱n kenga, anyaha di̱i̱z mu̱hu̱ri̱te̱n o̱to̱n co̱de̱ ci aavtte olli Masiro ke̱, kar tukuleci kataran o̱to̱n ci aavtte olli Israilo, kar ba̱a̱l i̱llo̱i̱ ol cik ovvo ojonun gonogginne.
21Odong zin Musesi keet cinne anyak a̱tta̱ ko̱ kuvek nyatapar, anyaha zin Manyi ngoot ci a̱ppwe̱ o̱to̱ne̱ ci je̱e̱ni̱ ku̱vu̱wa̱no̱ kaal, kar nyatapari kodok niko orgena, engerto maama. 22Otozo zin olli Israilo orgena ngati odok kak ko̱, eelit maama cik nyataparo o̱to̱ne̱ ci angeto ki ci a̱zzo̱.
23Ma̱i̱je̱ olli Masiro ngen emena ottok nogo niko, kar toromileta cik alaan ci Masiro ki aciir ki ol wak owo vartangine kunuwet olli Israilo kar ki̱tto̱zo̱ nyatapar. 24Imma nge̱rre̱t ri̱ri̱wo̱na̱, edenya Manyi aciir cik Masiro ngati aave enne di̱i̱zo̱ca̱ ci atuze kar kaanyik o̱o̱tti̱ cigge̱k ka̱ma̱li̱ltte̱. 25U̱du̱l zin Manyi zo̱o̱ cik toromilet cigge̱k do̱o̱k, kar kokkom macucenet cinne̱ng. Kar olli Masiro kizeto ne, “Kutungttek olli Israilo lo̱o̱c! Ta̱mu̱ta̱dde̱n ci ooriyeta.”
26A̱nne̱k zin Manyi Muses ne, “Dong a̱zzi̱t cunne ki keet uuv nyatapar kar tawani ki̱ri̱k ki̱ti̱k olli Masiro ki toromilet cigge̱k ki aciir wak owo vartangine.” 27Odongek zin Musesi a̱zzi̱t cinne nyatapar, kar zin wazin kenga i̱ri̱ye̱t zin maama ki ba̱li̱ye̱. Ovvo olli Masiro orongit ki̱vi̱re̱t kijarit maam kar Manyi ku̱ju̱ke̱k nogo nyatapar. 28A̱ri̱k tawani ku̱bu̱ng toromilet ki aciir wak owo vartangine ko̱ ki aciir cik alaan ci Masiro veelek balik annu olli Israilo rok nyatapar. I̱llo̱i̱ e̱e̱t imma ngatinne̱ng ci aruge.
29Ma̱i̱je̱ olli Israilo etted nyatapar ngati odoi kak, ngati abilne tawani o̱to̱ne̱ ci angeto ki ci a̱zzo̱. 30Imma i̱i̱te̱n neci ele, angara Manyi olli Israilo azzine cik olli Masiro, kar olli Israilo kicinnet olli Masiro cik a̱da̱i̱to̱ liil abanyca. 31Baling icinnet olli Israilo doiz ci Ta̱mu̱ta̱dde̱no̱ ogonik olli Masiro, o̱to̱ngo̱o̱ltte̱ zin ol Manyi kar kaarttek zi̱nze̱tti̱ nonno ki Muses wa een du̱ca̱i̱t cinne ko̱.
Currently Selected:
Lu̱ge̱z 14: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
