Lúkkë 6
6
Yéesú a bisa na hílsúu rë
(Saame Maccëe 12.1-8 ; Marka 2.23-28)
1 Bisa na hílsúu yëwúɗɗë rë ín, Yéesú a taalibe yi ñeyu waali húus filiɓ i meey bele. Taalibe ya homu waala, yabute na kodu yaaŋnga yi belaa, na ɓuluñu na húñú. 2Lahte fariseŋŋi wonu wa tih : « Haalaˈ yi níi ɗon na pagu yii Kootaa kaddaˈte ri bisa na hílsúu rë ? » 3Yéesú won wa tih : « Ɗon yúhú yee húmú paŋ Dawit bee yaaɓuu ɓani ɓëewí rë maan ? 4Ɗi húmú haal Faam Koope#6.4 Faam Koope : Tígë seeƴoh yi ɓëy Israyel húmú hawruu Koope na ra. Na húmú taɓahay Salomoo Faam fi gaani Koope Yerusalem ra, Mëyíis húmú yugusaˈ Faam Koope a taanta gaan ti di húmú nahaˈ ri Koope ra nen, na homu wa luufa ra., ñampe na mbúurëe yefu fíi Koope ra, ƴee seeƴoh ya kut daa waruu naa ñam ra, yeɗte na ɓëewí, wa ñamute ɓal. » 5Yéesú ɓaatte won wa tih : « Soˈ mi Koy-ɓëeˈ, daa mi lah sañ-sañ sun fi bisa na hílsúu rë. »
Yéesú a ɓëeˈ yaˈa ɓeedoh ra
(Saame Maccëe 12.9-14 ; Marka 3.1-6)
6Lahte bis hílsëe kay, Yéesú haalte tígë na ɗaguu yëwúɗɗë Koope ra, yampe na yëeddëˈ. Ɓëyí yaˈi ñamaa fa ɓeedohte húmú në. 7Yëeddëh yí kootii Mëyíis a fariseŋŋa na olsuu Yéesú nda ri ay paƴ ow bisa na hílsúu rë, nda wa lah yii yabun wa ri. 8Ndaa bi yúh rí yee nuffi wa, tígí daaha ɗi won ɓëeˈ tih : « Kolee fu caŋ fíi ɓëewë ɓéeɓ deh. » Ɓëeˈ kolohte caŋke daaha. 9Yéesú antee waa won tih : « Cëe mi meel ron : Kootaa nahaˈ yi bisa na hílsúu rë ? Paŋ yin wun mbée paŋ yin ɓos ? Sëmlëˈ ow mbée yeris ɓëeˈ húl ? » 10Ɗi yeelte ɓëewë ɓéeɓ níi, antee won ɓëeˈ yaˈa ɓeedoh ra tih : « Yere yaˈu ! » Ɓëeˈ yeɗte yaˈi, yaˈa yíppée wah koloŋ. 11Ndaa keeññi ɓëewë ñéerúuy a Yéesú rë haayte níi wa na peenu yee nay wa rii mínée paŋ ra.
Tansi apootarra
(Saame Maccëe 10.1-4 ; Marka 3.13-19)
12Lahte bis, Yéesú lappe sun daŋ ɗaŋi Koope, ɗi ɗaŋke elga ɓéeɓ. 13Ladaˈ Koo ra, ɗi dëekké taalibe yi, tanisse na ow sabboo a ow ana, falte wa apootar. 14Tii yi wa daa wa ƴeh : Simoŋ fa Yéesú yeɗ ri tii Peer ra a Anndere koy-yaafi, Saak a Saŋ, Fílíp, Bartalemi, 15Maccëe, Toomaa, Saak fi Alfe, Simoŋ fi jammbaara#6.15 jammbaara : Mín hen ɓëyí far-farlohte kootii Mëyíis, mbée ɓëyí non ɓëewë na haaˈuu nguur ki ɓëy Rom ra., 16Yudaas fi Saak a Yudaas Iskariyot fa míllëˈtée yaay Yéesú rë.
Yëeddëˈí Yéesú a paƴi ɓëewë
(Saame Maccëe 4.23-25)
17Yéesú kolohte ɓani apootarri na cépú daŋa. Lahaˈ ri tígí yéeddëˈté di araal daŋa ra, ɗi caŋke daaha ɗeef taalibe caak húmú në. I ow caak kay húmú në ɓal : ƴee ɗúhúu Yerusalem a ginni kayya Yúdée ɓéeɓ, ƴee i gin-taah ɓúk kísí fë : Tíir a Sidon. 18Wa húmú ayu síkírëhí Yéesú a paƴohi jérrí wë. Ƴee yébítëh na ham wa ra wahute ɓal. 19Ɓëewë ɓéeɓ na saamu leɓi faan Yéesú af biti lahte yii na ɗúhëˈ ɗii na paƴe wa ɓéeɓ.
Ɓëewë lahu sos-keeñ a ƴee torohu ra
(Saame Maccëe 5.1-12)
20Yéesú yeelte taalibe yi tígí daaha, won wa tih :
« Ɗon lahute sos-keeñ ɗon fi ñëkíɗɗë :
daa ron lahuu Nguur ki Koope.
21Ɗon lahute sos-keeñ ɗon fa yaaɓu ra :
ɗon ay lah njélí doyte.
Ɗon lahute sos-keeñ ɗon fa na looyu ra :
ɗon ay lah neɓ.
22Ɗon lahute sos-keeñ biti ɓëewë kaaˈ ron, tík ɗon dín,
sol ron te wa habaˈ biti ɗon ow ɓos
af soˈ mi Koy-ɓëeˈ.
23Dëmíi ɗon bec ndah sos-keeñ biti iñƴaaha lah :
waafi mitte ín ɗon seh sun-Koo ra.
Yúhí biti caacci wa húmú mokluu yonente ya ɗaaha.
24Ndaa mas ɗon fi yíkëe yí alalla :
ɗon pesute nebi ron níi wocce !
25Mas ɗon fa lahu njélí doyte ra :
ɗon ay yaaɓ.
Mas ɗon fa neɓluu ra :
ɗon ay lah dígëem ɗon looy.
26Mas biti ɓëewë ɓéeɓ wone wun sun fon.
Caacci wa húmú henuu yonente yi paɗɗah ya ɗaaha. »
Yii leŋke kaaˈoh yon
(Saame Maccëe 5.38-48 ; 7.1-5, 12, 16-20 ; 12.33-35)
27Yéesú ɓaatte won tih : « Ɗon fa síkírúu sëˈ ƴee ra, mi won ɗon tee : lah fëhíi kaaˈoh yon ɗon pagiɗ haaˈoh yon yin wun ; 28yéeníyíi ɓëewë në cuju ron ra yin wun, ɗon ɗagiɗ ɓëewë na moklu ron ra. 29Ow laɓ ro mbeƴ, lah yere ri kakaabi yínëe. Ow naaf sabidooru, ngana kaddaˈ ri ɓeyi búubí jíitlëe ɓal. 30Ɓëyí ɗaŋ ro one ri. Ɓëyí ɓeɓ yii daa fu lahaˈ ri, ngana meel ɗi ri. 31Iña fahuu ron biti ɓëewë pagiɗ ɗon wa ra, lah pëgíríi wë ɓëewí kayya ɗaaha.
32« Ɗon fahuun ɓëewí fahuute ron kut raa, ɗon séentúu në waafi mën ɗíh ? Bakaaroh ya sah fahuute ɓëewë daa fahuu wa ra. 33Ɗon pagrun yin wun ɓëewë në pagiru ron yin wun kut raa, ɗon séentúu në waafi mën ɗíh ? Bakaaroh ya sah henuu ri ɗaaha. 34Te ɗon wëtɗún ɓëewë habuu ron biti kut wa ay ron yíníl rëe, ɗon séentúu në waafi mën ɗíh ? Bakaaroh ɓal na wëtíɗ bakaaroh, séentée biti ri ay yínlú teemi yee wëtɗëˈ rí rë. 35Ɗaa neh ! Lah fëhíi kaaˈoh yon, ɗon pagiɗ wa yin wun te ngënë séentíi yíníl biti ron wëtɗëˈ. Hen ɗaaha raa, waafon ay gaan. Ɗon ay teeɓee biti ɗon koyyi Koope fa sunaa-sun ɗaaha, ndée keeña naaˈte ɓëewë në gérmíh a ƴee ɓosu ra na. 36Di naaˈaˈ Boffon keeñ níi naaˈ, lah mëdí ɗaaha nen naaˈ-keeñ. 37Ɗon heefuy ow raa, Koope ii ron heef ɓal ; ɗon habruy ow yin raa, Koope ii ron habiɗ yin ɓal ; lah bëelíi, Koope ay ron baal. 38Ëní ɓëewí kayya, Koope ay ron on : boonnon ay túmú níi líif, ɗegu níi yúfée. Ɗee na natɗuu ɗon ɓëewë rë, Koope ay ron natɗee ɗaaha. »
39Yéesú ñeyaatte wa léeh won wa tih : « Búumíɗ mínéh nook búumíɗ neh a ? Lahaa ɗaaha raa, wa ɓéeɓ ana ay keen ngas. 40Yoodoh lukeh yëeddëhí mín ; ndaa yoodohi yoon níi ɗúmël ɓéeɓ ay mín ti yëeddëhí nen.
41« Fu olsoh yi losa íl koy-yaafu te fu kénsëey dúuñë ílú ? 42Ɗo fa olay sah dúuñë ílú rë, fu mínëˈ won koy-yaafu biti fay rii nísíɗ losa ílí ɗíh ? Wonu teem ɓúkú ! Nísé dúuñë ílú níi íllú lan paaƴ, fanti mín nís losa íl koy-yaafu.
43« Tal kilki lahte njiriñ na líméh koy kilki lahay njiriñ, te tal kilki lahay njiriñ na líméh koy ki lahte njiriñ. 44Tal kilik yúhsúu koy ka : ñoltok na líméh koy sún te tal hak na líméh koy ɓaˈ. 45Ɓëyí naaˈte keeñ hom wonaˈ yii wunte ndah keeñi naaˈa lahaˈ ri ra ; ɓëyí ɓosse keeñ nék hom wonaˈ yii ɓosse ndah ɓosi keeña homaˈ ri ra. Yii won ow ɓéeɓ ɗúhëˈ rí keeñi kaah.
Ɓëyí hoffe
(Saame Maccëe 7.24-27)
46« Yi tah ɗon dékée dëekëˈí sëˈ Yíkëe te ɗon na pëgíh iña na won mi ron ra ? 47Cëe mi teeɓ ron ɗee na man ɓëyí na ac soo na ɓéeɓ, na síkírëh unna na won mi ra te pagaˈ wa ɗaaha : 48ɗi madaˈ a ɓëyí saañ taɓahe faam, hacce feey fa níi daɓpe ngaŋa, yíppé taɓaha sun. Ayaˈ mbënë më rë, mulaa na hút na laɓoh faam fa, ndaa mínéh ríi bëp bi híin taɓaha. 49Ndaa ɓëyí síkírëh sëˈ te anti ñeyay woni soˈ, ɗi madaˈ a ɓëeˈ taɓah faami te hacay dalaa ra. Ayaˈ mulaa laɓohte faam fa ra, ɗi yíppée bëp, poysaˈte ɓéeɓ. »
Currently Selected:
Lúkkë 6: NDV
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.