Dalaana 6
6
Iña komaꞌ mbënë më rë
1Daluu ɓëewë ɓaatoh feey fa níi wa lahute i koy ɓeleɓ ra, 2ɓëy sun olute biti tuŋki cafaƴƴa ɗamute níi ɗam, wa yeeluutee naa ɓeɓ ɓeleɓ. 3Tígí daaha, Koo-Yahwee won nufi tih : « Bakaaɗɗi ow tahte níi mii yeris coonaa fa yeɗ mi ri ra, tas ɗii na faraah ; ndée ɗi boꞌ faan kut, te yee tas fíi rë, pesi ii luklil kíil tíméer a kíil sabay ana (120). »
4Bín fë, ɗeef i ow gaan, jímbëŋ sun, húmú feey fa, te wa húmú lísú në, na ɓeyu ɓëy sun tuŋki cafaƴƴa feey fa ɓeleɓ níi wa lahute i koy ra. Daa wa ƴaal jammbaarree kíilë lahute tii níi rë#6.4 Lahte ɓëewí habuu ri ɗeh : Jamanii baaha ɗeef i ow gaan jímbëŋ húmú feey fa. Mani wa húmú tasute na níi filoon fe sah.... 5Olaꞌ Yahwee biti pagaɗɗi ɓossa ɓëewë në ɓaatohte feey fa, te faraah nuffi wa yejaꞌ wa yin ɓos kut ra, 6keeña ɗúmpé níi rí réeccíyëhté yee sakaꞌ ri ow ra. 7Ɗi antee won nufi tih : « May hap ɓëewë sak mi feey fa ra ɓéeɓ húl níi wa ɗúm ces ; may waa hap, mi hap raɓɓi gaanna a ƴutuuɗɗa, mi hap ƴakka. Mi réeccíyëhté yee sakaꞌ mi wa ra. » 8Ndaa keeñ Yahwee sosse Nowe na.
Gaali Nowe
9-10Bee daa naaɓii Nowe. Ɗi húmú lahaꞌ koy ƴaal éeyë : Sem, Haam a Yafet. Di filiɓ ɓëewë wa húmú boku pes bín fë rë, Nowe kut daa húmú júɓ në, lante pagaɗ te ñéerëꞌté a Koope. 11Ndaa Koope otte biti pagaɗɗi ɓëewí kayya yahte feey fa : ɓëewë feey fa húmú caakute capaꞌ a hawantaꞌ filiɓ fi wa. 12Kon olsaꞌ Koope feey fa ra, ɗi otte biti ëldúnë yahte, af biti tílëdí ɓëewë ñeyay waal.
13Koope won Nowe tígí daaha tih : « Mi caŋke biti may ɗúmlëꞌ a ɓëewë ɓéeɓ. Pagaɗɗi wa tahte níi feey fa líiffé capaꞌ a hawantaꞌ ; may waa hap ɓéeɓ húl, mi muuyil feey fa. 14Yugusire ɗoni ɓëy faamu gaal gaan ; lah yugusee ri a kilki maante, fu saam i las filiɓ, fu leef filiɓ fi gaala a fëel fë ɓéeɓ godoroŋ. 15Lah téyírée rí ɗeh : utaa ka lah hena jaak tíméer a jaak sabay iip (150), hagaa ka hen jaak sabay ana a jaak iip (25), cagaa ka hen jaak sabboo a jaak iip (15). 16Lah saamɗe ri taal. Hanndal ki taala a ɓúk gaala, lah hena genwal jaak. Lah saamɗe ri íl fu pëeꞌíɗ ɗí hatin, fu lecsaꞌ ri faam éeyë : yínë paaꞌ feey, bee ñee na ra tíkëh sun fi, bee míllëꞌ rë paaꞌ sun.
17« Soꞌ mi bee nék, may yeñ mbënë mí gaante, hap yii na pes ɓéeɓ húl. Yii hom sun fi feey fa ɓéeɓ, ay húl. 18Ndaa mi pokke hanndal ki yen biti fay múc. Lah haale gaala, ɗoni ɓeleɓu a koyyu a ɓeleɓɓi wa. 19Lah ɓekaalee ɓal heedi yii na pes ɓéeɓ ana-ana, ƴaal a ɓeleɓ, ɗoni wa bok ɗon múc. 20Ƴaal yínë a ɓeleɓ yínë di heetti raɓɓa ɓéeɓ : ƴakka, raɓɓi gaanna a ƴutuuɗɗa ɓéeɓ ay ac ñéerëꞌ a ro, nda wa mín múc. 21Te ɗo fi beh, saame di yii na ñamu ɓéeɓ fu gaɗ, hen pesii ɗoni wa. » 22Nowe pagaꞌte iñƴaa ɗah. Ɗi pagaꞌ wa ɗee túuƴëꞌ rí Koope ra.
Currently Selected:
Dalaana 6: NDV
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
