Dalaana 19
19
Múgí Sodom a Gomoor
1Malaaka yi ana ya këllúu helute Koo-Yahwee Abraham na ra, lahuu wa Sodom fíníin fín, ɗeef Lot húmú took këemí ɓaha ya gina. Olaꞌ ri wa, ɗi kolohte téebílëhí wë, ɗi ƴekke sígímíɗté wë níi feey. 2Ɗi won wa tih : « Ɓaha yi ƴeh, hém neɓaꞌ ron, ɗëlí faam ɗon hos kotti ron, ɗon neeꞌ na. Koo yíil rëe, ɗon ɓeyaat waalon. » Wa wonu ri tih : « Miteh ri, fun ay mín neeꞌ këemí gina. » 3Ndaa Lot cagohte wa níi wa míllúutée tah saañ faami. Ɗi pagiɗte wa ñam, nahaꞌte yugus kuun, wa ñamute. 4Wa liiluyti fanoh doom, ƴaalla gina ɓéeɓ : ɓaha a kúkëy, ow tasay na, ayute gírmbëlúté faam fa. 5Wa dëekúté Lot, wonu ri tih : « Ɓëewë ayu faamu fíníin fé rë dih ? Ɗúhré wë deh, fun fanoh a wa. » 6Lot ɗúhté waa na ëssë, kúnté ílí faam fa, 7antee waa won tih : « Ɗaa neh, këewé ! Ngënë pëgí yii man ɗah, daa mi na ɗaŋ ron ri. 8Cëgí mi won ɗon : mi lahte koy ɓeleɓ ana ƴi yíih ƴaal doom, cëe mi kom ron wa ɗon paŋ wa yii neɓaꞌ ron. Ndaa ngënë léɓí ɓëewí ƴee na, wa haneelli soꞌ, te yii kat wa dee soꞌ. » 9Ndaa wa wonu ri tih : « Kolee tígë ɗoo na ! Fu haneel gini bee kut, fu antee habaꞌ biti wonu daa nay lahe a ? Añcaŋ fay waa luk maloh ɓos ! » Wa yejute Lot hatin a doole, yuluute ɗofi ílí faam fa. 10Tígí daaha, malaaka yi ana ya kúnsúté ílë, habute Lot, nimlirute ri filiɓ faam fa, kúnúté ílë. 11Wa yejute yii happe íllí ɓëewë homu ëssë rë, ɓaha neh, kúkëy neh, níi wa yíihlíh tígí paaꞌ ílí faam fa.
Hegohi Lot a ɓëy faami
12Malaaka yi ana ya wonu Lot tih : « Fu lahay i mboko kay dee woo ? Koy ƴaal, koy ɓeleɓ, mbée goro, ɓëy tappe ɗoo na ɓéeɓ, ɗúhré rí gina. 13Ndée iñi ɓossa yabu ɓëy gini bee ra lahte níi Koo-Yahwee na, tahte níi ɗi yeñce fun múklí gina, te fun ewu kotta. » 14Tígí daaha, Lot payte goro yi na, fiilli koyyi ana yi, won wa tih : « Yípíi koloh dee ɗon saañ, ndée Yahwee caŋke múklí gina. » Ndaa wa habuu biti ri hom bëenndëꞌ.
15Lahaꞌ miir-miira ra, malaaka ya caguute Lot, wonu ri tih : « Yípée koloh fu kúrëelëh ɓeleɓu a koyyi ana yu ɓeleɓ, toñeh Koope ƴahti keen sun fi gina raa, ñíinnën teem na. » 16Bi na ñaamsaꞌ nuf Lot, malaaka yi ana ya habute yaꞌ yi ɓani ɓeleɓi a koyyi ana yi ɓeleɓ, ɗúhrúté wë gina, te yin katay wa, af biti Yahwee húmú fahaꞌte sëmlëꞌí wë. 17Ɗúhrúu wë gina, ow di malaaka ya won Lot tih : « Hegee fu sëmlëꞌ afu ; ngana heeltoh te ngana cagaaloh deyi bee ɓéeɓ. Tílé fu ɗapee daŋin hém fu fahaꞌ pes. » 18Lot tahte won ɗi tih : « Ɗaa neh, ɓahaa. 19Mi yúhté biti fu pagiɗte soꞌ yin wun te fu naaꞌte keeñ soo na níi naaꞌ níi mi pesse. Ndaa mi mínéh koloh dee níi daŋin, te loola haweh soꞌ húl. 20Fu otte gin-taahi ƴutuudi bín ɗee leɓaꞌ ri raa ? May mín múkë níi mi lah na. Ƴinaꞌ ri níi, yeɗɗe mi ɗapee na, nda mi pes. » 21Malaakaa won ɗi tih : « Kon mi onilte ro níi mii leɓ gina wonaꞌ fu baa ra. 22Yípíi múkë ɗon ɗapee dín fë, ndée mi mínéh paŋ yin te ɗon lëhíh në. » Yii baa daa tah gini baa wonuu Sowaar (daa ri : yin ƴutuuɗ).
23Púlí naꞌ ɗeef Lot na haal Sowaar. 24Tígí daaha, Yahwee lasse bacal laꞌ yi njaaroh kíi, ƴi ɗúhëꞌ sun-Koo, na toɓ sun fi Sodom a Gomoor. 25Ɗi muuyilte ginni ana yi ƴaa a ɓëewë filiɓ, deyi baa a yii paal na ɓéeɓ. 26Ndaa bi húmú heeltoh ɓeleɓ Lot, ɗi yíssëhté deeƴ miraa.
27Ɓaabin cúɓ, Abraham saañce tígë húmú cagu ɓani Yahwee ra. 28Ɓéyrëꞌ rí afi ɗi yeelte waal Sodom a Gomoor a deyi baa ɓéeɓ rë, ɗi ot ɗúukëe súul síis ti ɗúukëe paloɓ nen#19.28 ti ɗúukëe paloɓ nen : Di ébrë, bíníyú ɗeh : ti ɗúukëe fúur nen. ɗofohte feey fa. 29Na tam Koope ginna húmú dék Lot deyi baa ra, ɗi húmú halay Abraham, tahte níi ɗi sëmlëꞌté Lot loola muuylaꞌ ri ginni ƴaaha ra.
Ɓëewë coosaanuu Lot na ra
30Filoon fe, Lot néekíñëꞌté hom Sowaar, tahte níi ɓani koyyi ana yi ɓeleɓ koluute daaha, laayute daŋin, dékúté filiɓ kil. 31Lahte bis, koy ki gaana won ñéedë tih : « Baap hompe ɓaha a deyi bee lahay ƴaali nay yen koore, ti ɗee henaꞌ ri ɓaah ɓëewë në ɓéeɓ rë. 32Aye yen hëníɗ baap béeñ níi ri mani, yen fanoh a ri nda ri mín lah tal. » 33Elgi baaha, wa hënndúté boffa béeñ níi ri manite, koy ki gaana fanohte a ri. Ndaa fanohi a kolohi ɓéeɓ, boffa yégëy yin na. 34Kéy fín fë, koy ki gaana won ñéedë tih : « Ole ! Mi fanohte a baap níimmbë. Teem elgee raa, yen hënndíl rí béeñ níi ri mani, fu pay fu fanoh a ɗi. Hen ɗaaha raa, tali baap ii múk. » 35Lahaꞌ elga ra, wa hënndëetúté boffa béeñ níi ri maniyilte, ñéedë fanohte a ri. Ndaa fanohi a kolohi ɓéeɓ, boffa yégëy yin na. 36Koyyi ana yi Lot koluu daaha pokute loo. 37Mitaꞌ loo koy ki ɓahaa ra, ɗi lahte koy ƴaal, dëekëꞌté rí Mohap (daa ri : ɗúhëꞌ boffa na). Mohaɓɓa coosaanuu ɓëyí baa na. 38Ñéedë ɓal lahaꞌ koy ƴaal, dëekëꞌté rí Ben-Ami (daa ri : koy mboko mi soꞌ). Amonna coosaanuu ɓëyí baa na.
Currently Selected:
Dalaana 19: NDV
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
