Tílëdí apootarra 7
7
Gonli Ecen
1 Seeƴohi gaana meelte Ecen won ɗi tígí daaha tih : « Iña na wonu sun fu ra lahaꞌ ɗaaha a ? » 2Ecen won tih : « Ɗon fi koy-yaayyee ke soꞌ ƴeh, baappee ke soꞌ ƴeh, síkíríi sëꞌ mi won ɗon. Ciffi yen Abraham húmú homaꞌ ri Mesopotami balaa ri saañ dék Haran ra, Koope fa lah ndam ra húmú feeñiyohte ri, 3won ɗi tih : “Kolee ginon, fu hel mboko yu ndín, fu saañ gina nay mi roo kúré rë.”#Saame Dalaana 12.1 4Tígí daaha, Abraham kolohte gini Kalde daaha, saañce dékké Haran. Filoon fi baaha, húlëꞌ boffi ra, Koope këlíɗté rí Haran kúɗté rí gina homu ron woteh bee ra. 5Bín fë, Koope onay ri feey deeha. Ɗi luk ɗii onay guuttaa lukki ƴin ra sah di feey, ndaa ɗi gappe ri won ɗi tih : “May yere ro feey fi bee fu lahaꞌ ri, ɗoni ɓëy talu.”#Saame Dalaana 12.7 Añcaŋ, bín fë ɗeef Abraham lahay koy doom. 6Koope antee húmú tík sun won ɗi tih : “Yúhé biti séttú ay dék gini henay bi wa ; wa ay naa habu ñaam, wa moklu lool níi hen kíil tíméer iniil (400). 7Ndaa ay tíl níi mi keen sun fi gina nay waa ñaamlee ra. Tígí daaha, wa ay naa koloh, wa ac jaamiyohi soꞌ tígí deh.”#Saame Dalaana 15.13-14 » 8Ecen ɓaatte won tih : « Koope antee pok yin hanndal ki ɓani Abraham. Yee tíinndúu yee pok ɗi baa ra, ac biti ɓani ɓëy tali lecoh. Ɗaaha, Abraham lecce koohi Isaak waali peeye fa filoon fi límí ; ti ɗaaha nen, Isaak lecce koohi Yakop ; Yakop lecce koyyee ke ri daa caacci yen ra, wa fi kélfë yí talli sabboo a ana yi Israyel.
9« Caaccaa ka yen ƴaa húmú eeñnjuute koy boffi wa Suseef níi yaayute ri, ɗi kúrúté Ésíp hente ñaam. Ndaa Koope ñéerëꞌté a ri, 10kélíssé rí coono fi ɓéeɓ. Ɗi onte ri nuf tahte ɗi neɓaꞌte buuri Ésíp. Buura tíkké rí af gina, tíkké iña faami ɓéeɓ yaꞌi. 11Filoon fi baaha, yaaɓ haalte filiɓ gina, laɓpe Ésíp ɓéeɓ a Kanaan. Ɓëewë súfúñúté súfúñí misikke, caacci yen lahuy yii ñamun wa. 12Kelaꞌ Yakop biti pep ín yaayu Ésíp rë, ɗéɓpée wol koyyee ke ri daa caacci yen ra dín fë. 13Waali ana fa payuu wa dín fë rë, Suseef teekirohte koy-baappi, wonte buur biti iña ɓëy faam wa. 14Filoon fi baaha, Suseef kallirohte Yakop boffi, a ɓëy faami ɓéeɓ. Wa henute ow sabay paana a ow iip (75). 15Yakop sayaꞌ Ésíp ɗaaha. Ɗi húlëꞌ në, te koyyee ke ri daa caacci yen ra húlúu në ɓal. 16Ɓúudé yí wë kúrúté, hacute hacaa ya húmú lom Abraham séttí Hamoor na a hélíis rë, di Sihem.
17« Bi na húmú leɓoh wahtaa nay lahe yee gap Koope Abraham ra, tali yen na ɓaatti gaan, wa na ɓaatuu caak Ésíp. 18Hompe níi lahte buuri acce filoon fe kúɗté gina, ɗi kéllëy yin yii leŋke Suseef na. 19Buuri baa húmú nofaꞌte ɓëy tali yen, mokilte caacci yen níi túuƴcé wë bedi koyyi baakerri wa, wa húl. 20Mëyíis límúu jamanii baaha, baakeri wunte níi wun, neɓaꞌte Koope. Ɗi yefute faam boffi níi hente céyín éeyë. 21Ɗi míllúutée betu filoon fe, koy ki ɓelii buur píité rí, koɗte ri ɗi hente koohi. 22Ɗaaha, Mëyíis yoonte pesadi ɓëy Ésíp níi ɗúmpé ces. Ɗi mínté won, te ri hereñce pagaɗ.
23« Tílëꞌ níi ɗi lahte kíil sabay iniil (40) ra, nufa payte yérí mboko yi, ɓëy tali Israyel. 24Payaꞌ ri yérí wë, ɗi otte ow di ɓëy Ésíp na mokil ow waa na. Tígí daaha, ɗi yejohte yíllírí ɓëeꞌ na moklu ra, laɓpe ɓëyí Ésíp, ɓëeꞌ húlté. 25Ɗi habaꞌ biti koon mboko yi ay yúh biti Koope daa ñeyaꞌ ɗii na sëmlëꞌí wë, ndeke wa yíih yin na. 26Kéy fín fë, ɗi otte ow ana di ɓëy Israyel na haaꞌuu, ɗi na aattiyaꞌ wa won tih : “Ɗon i koy-yaay yaawe ! Ɗon haaꞌuu yi ɗeeha ?” 27Ndaa bee luk yínëe doole waa na ra yeñce Mëyíis, won ɗi tih : “Daa fal ro njíidí nay fun aattiyee ? 28Fu fahaꞌ hawi soꞌ húl ti di hawaꞌ fu koy ki Ésíbë aaꞌ ra neh a ?” 29Kelaꞌ Mëyíis unni ƴah, ɗi hegohte saañce Majaan hompe dín fë. Ɗi lahte koy ana daaha.#Saame Kolohi koyyi Israyel Ésíp 2.11-22 ; 18.3-4
30« Kíil sabay iniil (40) filoon fi baaha, malaaka feeñiyohte Mëyíis njaar kíi filiɓ dúuf, di luufa hom hëbís daŋi Sinayii#7.30 Sinayii : Daa ri daŋa húmú lap Mëyíis na yeɗ ɗi Koope túuƴëꞌ yí sabboo ya ra. Ɗi na wonuu Horep ɓal. ra. 31Olaꞌ ri yii bah, ɗi éem éemë níi, na leɓoh olsohi yee tígë. Tígí daaha, ɗi kelohte un Koo-Yíkëe na won ɗi tih : 32“Daa mi Koope fi ciffu Abraham, Koope fi ciffu Isaak, Koope fi ciffu Yakop.” Mëyíis tíit tíitë níi na saak, kaañay ɓéyíɗ afi. 33Koo-Yíkëe won ɗi tígí daaha tih : “Nísé ñafaɗɗa kottu ; tígë hom fu ra tígí selate. 34Mi otte pesi misiga homuu ɓëewí sëꞌ Ésíp rë. Mi kelohte íiní wë, te mi cép sëmlëꞌí wë. Leegi aye mi wol ro Ésíp.”#Saame Kolohi koyyi Israyel Ésíp 3.1-10 »
35Ecen ɓaatte won tih : « Ɓëy Israyel húmú kaaꞌuuy Mëyíis níi wonute ri biti daa fal ri njíidí nay waa aattiyee woo ? Mëyíis fi baa daa ri bee ñeyaꞌ Koope malaakaa feeñiyohte ri filiɓ dúufë na kaɗ ɗa, wolte ri nda ri hen njíidí ɓëewí, sëmlëꞌ wë rë. 36Daa ri ɗúhíɗ wë Ésíp, na paŋ ɗi iñi éemílëꞌté a i kimtaan filiɓ gini baaha ra, di kísí fí Bëhëerrë rë, a kíillí sabay iniilla (40) homu wa luufa ra. 37Ɗi fi Mëyíis ɓal daa won ɓëy Israyel bitih : “Koo ay ron wolaꞌ yonente ti soꞌ nen, bi ay ɗúhée heedon.”#Saame Nérsí Kootaa 18.15 38Húmú teeꞌuu ɓëy Israyel luufa ra, ɗi fi Mëyíis daa húmú hanndal ki caacci yen a malaakaa na húmú won ɗii na sun fi daŋi Sinayii ra. Mëyíis liilaꞌ Unni Koope daaha, Unna na tah ow pes ɗa, te daa ri léhín yen fi ɓëy Israyel wa. 39Ndaa caacci yen húmú kaaꞌuute síkírëhí, wa fahuuy rii ot, na fahuu nimil Ésíp. 40Wa wonu Aaron tih : “Yípíɗ fun yúul, këllëh fun waala, ndah mbata Mëyíis fë ɗúhíɗ fun Ésíp rë, fun yíih yee homaꞌ ri ra.”#Saame Kolohi koyyi Israyel Ésíp 32.1, 23 41Tígí daaha, wa yugusute ɗoon hente yúul, hawrute na, wa na anuu bíƴëh keeññi wa sosse níi sos di yii yéŋké biti daa wa yugusiru affi wa ri. 42Koope súugëꞌ wë daaha, yerisse wa, wa na jaamiyuu iña sun, ti di bíníyúu rí téeríi yonente ya ra nen bitih :
“Ɗon fi ɓëy Israyel,
kíillí sabay iniilla (40) homu ɗon luufa ra,
iña húmú hawu ron ra, ɗon hawru soꞌ wa a ?
Iña na húmú sarahu ron ra, ɗon sarahu soꞌ wa a ?
43 Wa húmúy ƴi soꞌ neh a ?
Ndaa iñi yéŋké biti ɗon daa yugusu wa a yaꞌ yon,
ɗon jaamiyuu wa !
Ndah ɗon kúrúté taantii yúulën Molok,
ɗon kúrúté huli yúulën Refan,
daa tah may ron lëeyíɗ,
mi yeñ ɗon Babilon suc !” # Saame Amos 5.25-27
44« Homuu caacci yen luufa ra, taantaa na nédís wë biti Koope ee leelii wa ra húmú waa na. Ɗee húmú nahaꞌ Koo ri Mëyíis rë, ɗi yugusuu ɗaaha, Mëyíis yugus mani bee húmú teeɓ ɗi Koope ra. 45Taantaa hellute caacca tíkúu në rë. Ɓeyaꞌ Yosuwe njíit kë rë, wa kúrúté taantaa gina liilu wa ra, bee habraꞌ wa Koope níi wa líkúté ɓëewë dékú në rë. Taantaa hom daaha níi bee lahaꞌ nguur ki Dawit ra. 46Ɗi fi Dawit, bi neɓaꞌ ri Koope, ɗi ɗaŋke Koo nda ri mín ɗii taɓahiɗ Faam, ɗi fi Koope fi Yakop. 47Di filiɓ ƴaaha ɓéeɓ, Salomoo daa míllëꞌ ríi taɓahiɗ Faam fa. 48Añcaŋ, Koope fa sunaa-sun dékéh faam fi ow daa taɓah ri, ti di wonuu ri filiɓ téeríi yonente ya ra nen bitih :
49 Yíkëe won tih : “Sun-Koo daa ñaani Nguur ki soꞌ,
feey fa daa tíkíi kotti soꞌ.
Ɗon ay soo mínée taɓahiɗ faam ɗíh ?
Faam fi bi níi won ti daa mi nay naa déké ?
50 Daa mi sak ƴaa ɓéeɓ a yaꞌ soꞌ neh a ?” # Saame Isayii 66.1-2 »
51Ecen tíkké won wa tih : « Ɗon fi ƴee ɗon wooñnjuute, keeññon súhté te nuffon likke ti ɓëewí lecuy nen ! Ɗon dékúu kaaꞌaꞌi síkírëhí Ruuh-Peseŋ ! Ɗon ɓeyu caaccon kep ! 52Lahay yonentii caaccon mokluy ri ! Wa lukuu hap ƴee waariyu ayi Ɓëeꞌ-júɓ ɗë, te ɓëyí baaha daa ri bee yaayu ron, ɗon hawute ri ra. 53Ɗon daa liilu Kootaa ñéyíɗ Koope malaaka ya na ra, ɗon antee naa ñeyuy ! »
Húlí Ecen
54Keluu ɓëy këemë unni ƴah, keeññi wa haay Ecen haayo níi madu ɓëewí sayu sayo nen. 55Ndaa bi líif Ecen a Ruuh-Peseŋ, ɗi ƴíiɗté sun, otte ndami Koope, Yéesú caŋke hëbís Koope, hompe yaꞌi ñamaa fi. 56Ɗi won tih : « Ëlí kan ! Mi otte sun-Koo kúnsëhté abeh, Koy-ɓëeꞌ caŋke hëbís Koope, hompe yaꞌi ñamaa fi. »
57Tígí daaha, wa na fogu sun, dapute nuffi wa, yípírúuté rí, 58ɗúhrúté rí filoon gina, na tawu ri laꞌ hawi húl. Seede ya nísúté búuɓɓí wë, déŋéenúté wë kúkëy wahambaane hampe wa, kúkëyë hínú Sool. 59Bi na tawu ri ɓëewë laꞌ, Ecen na ɗaŋ won tih : « Yéesú-Yíkëe, téebílée coonaa fi soꞌ ! » 60Ɗi antee hen gítëp ƴekke, foŋke won tih : « Yíkëe, ngana habiiɗ wa bakaadi beh ! » Wonaꞌ ri uni bah, ɗi lússé.
Currently Selected:
Tílëdí apootarra 7: NDV
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
