Tílëdí apootarra 4
4
Yee tëekɗúu Peer a Saŋ këem rë
1Bi homu Peer a Saŋ na wonu a ɓëewë di Faam fi gaani Koope, seeƴoh ya, kélfíi wohoh yi Faam fi gaana a saduseŋŋa ayute. 2Ɗeefuu wa Peer a Saŋ na waariyu ɓëewë biti di këllúu Yéesú ɓúudé, ɓëewë gémú ɗii na ra ay këllúu ɓúudé ɗaaha ra, keeññi wa haayte. 3Tígí daaha, wa habute wa, téƴúté wë. Bi dal Koo ñúkúf, wa yefute wa daaha níi kéy fín fë. 4Filiɓ fi baaha ɓéeɓ, ow caak di ɓëewë na húmú síkírúu iña wonu apootarra ra gémúté. Ɓëewë gémú rë warutee mit ow júnní iip (5.000).
5Kéy fín fë, kélfë yí yëwúɗɗë, ɓaha ya gina a yëeddëh yí kootii Mëyíis teeꞌuute Yerusalem. 6Filiɓ fi wa, Haan seeƴohi gaana húmú në, Kayif, Saŋ, Iliksaan a ɓëy faam seeƴohi gaana ɓéeɓ. 7Wa kalluute Peer a Saŋ kúrúté fíi wë, wa meelute wa wonu tih : « Daa yeɗ ɗon sañ-saña paƴuu ɗon lëfëñídí bee ra ? Daa nah ron ri ? » 8Peer yíppée líif a Ruuh-Peseŋ, won wa tih : « Kélfë yí ƴeh ! Ɓaha yi ƴeh ! 9Hém paƴa paƴu fun lëfëñíɗ ɗë daa tah fun tëekɗú këem woteh raa, 10ɗon fi ƴeh, a ɓëy tali Israyel ɓéeɓ, yúhí biti yee tah ɓëyí bee wah níi caŋ fíiyën rë, ow kay neh daa tah ɗi koloh : Yéesú-Kiristaa fi ɓëy Nasaret doŋ, bee ɗon húmú daaƴu ri kurwah, Koope këlíɗté rí ɓúudé rë daa tah. 11Yéesú daa ɓëeꞌ në wonaꞌ Téerëe bitih : “Laꞌa habuu taɓahoh ya biti lahay njiriñ ra daa míllëꞌ ham lasa.”#Saame Kañaa ya 118.22 12Daa ri mín yen sëmlëꞌ kut : henay ri, lahay ɓëyí ee feey fi bee mín yen sëmlëꞌ. »
13Oluu ɓëy këemí gaana ɗee na wonuu Peer a Saŋ te wa ɓëewí jaŋiyuy, yíih yin ra, wa éemúté níi éem. Wa yúhúté biti ɓal wani Yéesú daa na húmú ñéerúu. 14Wa olute ɓëeꞌ paƴu ra caŋke hëbís Peer a Saŋ ɓal, tígí daaha, wa lahluy yii wonun wa. 15Wa nahuute ɗúhrí wë ëssín, wa na anuu wonantaꞌ filiɓ fi wa tih : 16« Yen ay hene ɓëewí ƴee ɗíh ? Biti wa pagute kimtaan wëerté ɓëy Yerusalem ɓéeɓ te yen míníh ríi kaaꞌ. 17Ndaa yen warutee paŋ níi yaa ɓanti líiwëlsëꞌ gina : yen hëɓël wë, wa ɓanti won ow yii leŋke Yéesú fí bah. »
18Tígí daaha, wa dëekrúuté Peer a Saŋ, kadduute wa ɓiiƴ wonu wa tih : « Níi ɗon won ow mbée ɗon waare yii leŋke tii Yéesú rek ! » 19Peer a Saŋ wonu wa tih : « Ëlsíi yee lukki ñee waal ra, ɗon won nda fun waɗti síkírúun ɗon mbée Koope ! 20Fun déꞌ, fun yúhúté biti fun míníh héddëh yee olu fun a yee keluu fun ra. » 21Ɓëy këemë yaabaatute na hëɓlëetú wë, ndaa wa míllúutée wëe yeris. Wa lahuy yii pagun wa níi wa mín keen sun fi wa, ndah ɓëewë ɓéeɓ na kañu ndami Koope di yee lah ra. 22Kíillí ɓëeꞌ wah kimtaana ra, lukke kíil sabay iniil (40).
Ɗee na ɗaguu ɓëewë gémú Yéesú rë
23Yeɗɗuu wa ra, Peer a Saŋ suute ɗeefrute këewí wë, ɓíllúté wë iña wonu kélfë yí seeƴoh ya a ɓaha ya gina wa fi ƴaa ra ɓéeɓ. 24Keluu yaawa iña ɓíllú wë ƴaa ra, wa yabute ɓéeɓ na ɗagu Koo wonu tih : « Koo-Yíkëe, daa fu sak sun, feey fa, kísí fë a iña filiɓ fi wa ɓéeɓ. 25Daa fu ñee Ruuh-Peseŋ, fu wonɗohte ciffi fun Dawit súrgúu tih :
“Ɓëy ëldúnë híigúu yi ɗeeha ɓal ?
Heetta gapuu yi ɗeeha oroh ?
26 Buurra ëldúnë koluute haaꞌ,
ɓëewë kúrú gina ra teeꞌuute,
teeꞌuute suu yejee Koo-Yíkëe në,
suu yejee a Buura ɗi fal ri ra.” # Saame Kañaa ya 2.1-2
27« Te yee won Dawit ra lahaꞌ ɗaaha, bee teeꞌuu Erot a Poos Pilaat filiɓ gini bee ra, ñéerúuté ɓëewí koluu i gin kay a talli Israyel, na gapuu súrgúu Yéesú, súrgíi selaa fal fu ra. 28Ɗaaha, wa pagute nufa maañ fuu tíɓ di gaanaa ku a di yee fahaꞌ fu ra. 29Leegi, yeele ɗee na gapuu wa fun ra Koo-Yíkëe, fu on fun fi súrgë yú fídí waariyun fun unnu. 30Teeɓee dooluu nda fun ñeyaꞌ tii súrgúu Yéesú, súrgíi seluu, fun paƴ jéríɗɗë, fun paŋ i kimtaan a iñi éemílëꞌté. »
31Wocuu wa ɗaŋa ra, tígë homu wa ra yíppée hégíƴëh, wa ɓéeɓ líifúté a Ruuh-Peseŋ, yefluute na waariyu Unni Koope a fít.
Di na pesuu ɓëewë gémú Yéesú rë
32Wa fa gémú Yéesú rë ɓéeɓ henute yínë, bokute nuf. Ow yínë waa na, na haageh won biti iñi ay teye afi na kut ; ëe-ëeꞌ, ɓëewë ɓéeɓ daa teyu alal ma. 33Ɗee na seedeyuu apootarra kolohi Yéesú-Yíkëe ɓúudé rë lahte doole, te Koope onte ɓëewë gémú rë ɓéeɓ mali gaante. 34Ow ñakay dara waa na, ndah ɓëyí fí lahte meey mbée faam waa na ɓéeɓ, payaꞌ payoo yaay ri, kúɗ cadum fa 35kom wa apootarra ; filoon fi baaha raa, hélsë woruu filiɓ fi wa, ow fi ow ɓéeɓ yeru yii mín paƴ ɗee teem sohlii ra. 36-37Man ti ɓëyí bee hínú Suseef húmú yaay meeyi, kúɗté hélsë kompe wa apootarra ra nen rek. Ɓëeꞌ dék Síipër, non tali Léwí. Apootarra húmú dëekúu rí Barnabaas. Iti fi tii baa daa ri : ɓëeꞌ në on ow doole ra.
Currently Selected:
Tílëdí apootarra 4: NDV
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
