Kada Bulawan 5
5
Pangpakainga' danggi' manggauk sala
1Ee anakku', parinawai tee kamaccan,
pesa'dingngii tee kamapahangan la kuajaranko,
2muissenni umbo dikua matarruh mangpikkiri',
muparinawai mangkada topaissen.
3Apa ia to timunna baine sala kedo mpau bang kada macanning susi canik,
na gaja macca massede,
4apa undinna memmapai' susi pa'du
namataran susi pa'dang mataran patomali.
5Ia to baine susi joo mangnguju lako lamunan,
narui' toomoko do' lino tomate.
6Te'da naparinawai to lalan mangnguju lako katuoan,
te'da naissenni kumua sala lalanmi.
7Iamo joo, ee kamu' anakku', pesa'dingngina'
danggi' paboko'i penawa tee kadangku'.
8Pamambelako kalemu jio mai baine sala kedo,
moi bolana danggi' murandanni.
9Danggi' mumadoang disede la mpangbengan angga'mu,
na ia to wattu malolle'mu napake sala tomaparrang.
10Na cappu' punala bang to kasugiranmu nakande tau laen,
na totangmutandai mpuapai to assele' bo'jo'mu,
11undinna sumarro mandamoko
sanga bukummu mandamo sikande balulang natumang saki.
12Mumane' mangkada kumua,
“Oo, matumbari kukaba'ci ori aku' to pangpangngajah?
Ciapari kucia'ra dipakainga'?
13Ciapari na te'da kupesa'dingngii to kadanna gurungku',
na te'da kuturu'i to tonnajahhina'?
14Garapamora kutiuloh do' mangrupa-rupa kamasolangan,
na te'da angga'ku' jio olona tobuda.”
15Iamo joo, tatta'ko mpugauk janjimmu lako bainemu
na ia manda mukabudai.
16Te'da bua'na nnangah kamasannangan
jio mai to tangngia bainemu.
17Ia joo kamasannangan iko manda sola bainemu la mperasaii,
tangngia sola tau laen.
18Ake' mudibarakka'i sola bainemu unamo iko,
mumasannang sola joo ana'dara to mupubaine tempon malolle'mu,
19baine lolo to marimpah susi jonga baine marimpah,
na ia to kamakassingan pangkaleanna liwa' mpamacinnako,
butung mupumame-mame sanga nakamali'ko.
20Ee anakku', apara bua'mu mpumame-mame baine sala kedo?
Apara bua'mu manggauk sala sola bainena tau?
21Sininna to napugauk tolino Nakita ngasan Puang Allataala.
Moi umbo naola to tolino nang te'da nasala matan-Na Puang Allataala.
22Ia to togaja', naatta panggaukan gaja'na
na dosana menjaji poja lako kalena,
23napumatei, sanga cia'i ntarima pangpangngajah.
Kabangosanna ia ssolanganni.
Currently Selected:
Kada Bulawan 5: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
