Yosua 21
21
Kota diben suku Lewi
1-2Ia tonna mangtenda unapa to to-Israel jio kota Silo jio tana Kanaan, malei to tomatua-tua suku Lewi mangngolo lako imang Eleazar, Yosua anakkana Nun, sola lako sininna to matua-tua suku to-Israel laenna. Namangkada nakua, “Mangkami Napangparentan PUANG Allataala lako Nabi Musa kumua, ia to kami' suku Lewi la dibenkan kota kinii torro sola padang la kinii rrewai patuoanki'.”#Bilangan 35:1-8 3Jaji nabenmi to-Israel ba'tu pira-pira kota jio mai tana manahna, sola padang pangrewan, susi to mangka Napangparentan PUANG Allataala.
4Ia to pamulanna nnampa' undi diben kota, iamo to rapunna Kehat suku Lewi. Ia to rapunna Imang Harun bati'na Kehat diben sangpulo tallu kota jio mai tana manahna suku Yehuda, Simeon, na Benyamin. 5Ia to rapunna bati' Kehat laennapa diben sangpulo kota jio mai tana manahna suku Efraim, Dan, na sitangngana suku Manasye to torro llan kalambunanna Sa'dan Yordan.
6Ia to rapunna Gerson suku Lewi diben sangpulo tallu kota jio mai tana manahna suku Isakhar, Asyer, na sitangngana suku Manasye to torro jio kadellekanna Sa'dan Yordan.
7Ia to rapunna Merari suku Lewi diben sangpulo dua kota jio mai tana manahna suku Ruben, Gad, na Zebulon.
8Susimi joo to ba'tu pira-pira kotana to-Israel diundi nadiben lako suku Lewi sola padang la nanii rrewai patuoanna, situru' to mangka Napangparentan PUANG Allataala lako Nabi Musa.
Kota to diben bati'na Kehat
9-19Ia to suku Lewi to pamulanna diben kota, iamo to rapunna Imang Harun bati'na Kehat. Den sangpulo tallu kota dibenni sola padang pangrewan. Jio mai tana manahna suku Yehuda na Simeon dibenni kasera kota, iamo to kota Libna, Yatir, Estemoa, Holon, Debir, Ain, Yuta, Bet-Semes, na Hebron. Ia to kota Hebron tonna tee disanga kota Kiryat-Arba. Ia to disanga Arba, iamo tojolona Enak. Ia joo kota Hebron, mesa' kota jao membuntunna suku Yehuda nanii male membuni to tote'da naanggai'i papatean. Kotanara diben lako suku Lewi, sanga mangkami diben Kaleb, anakkana Yefune napumanahhi to bara'bahna sola kampongna.
Jio mai tana manahna suku Benyamin dibenni appa' kota, iamo to kota Gibeon, Geba, Anatot, na Almon.
20-26Ia to suku Lewi rapunna bati' Kehat laennapa diben sangpulo kota sola padang pangrewan. Jio mai tana manahna suku Efraim dibenni appa' kota, iamo to kota Bet-Horon, Kibzaim, Gezer na Sikhem. Ia tee kota Sikhem mesa' kota jao membuntunna tana suku Efraim to wa'ding nanii male membuni to tote'da naanggai'i papatean. Jio mai tana manahna suku Dan diben tooi appa' kota, iamo to kota Elteke, Gibeton, Ayalon na Gat-Rimon. Jio mai tana manahna sitangngana suku Manasye to mangmanah llan kalambunanna Sa'dan Yordan dibenni dua kota, iamo to kota Taanakh na kota Gat-Rimon.
Kota diben rapunna Gerson sola Merari
27-33Denpa rapu laenna suku Lewi, iamo to rapunna Gerson. Ia to rapunna Gerson dibenni sangpulo tallu kota sola padang pangrewan. Jio mai tana manahna sitangngana suku Manasye to jio kadellekanna Sa'dan Yordan dibenni dua kota, iamo to kota Beestera, na Golan. Ia tee kota Golan mesa' kota jio Basan to wa'ding nanii male membuni to tote'da naanggai'i papatean. Jio mai tana manahna suku Isakhar dibenni appa' kota, iamo to kota Kisyon, Dobrat, Yarmut, na En-Ganim. Jio mai tana manahna suku Asyer dibenni appa' kota, iamo to kota Misal, Abdon, Helkat, na Rehob. Jio mai tana manahna suku Naftali dibenni tallu kota, iamo to kota Hamot-Dor, Kartan, na Kedesh. Ia tee Kedesh mesa' kota jio tana Galilea to wa'ding nanii membuni to tote'da naanggai'i papatean.
34-40Denpa rapu laenna suku Lewi, iamo to rapunna Merari. Ia tee rapunna Merari diben sangpulo dua kota sola padang pangrewan. Jio mai tana manahna suku Zebulon dibenni appa' kota, iamo to kota Yokneam, Karta, Dimna, na Nahalal. Jio mai tana manahna suku Ruben, dibenni appa' kota, iamo to kota Bezer, Yahas, Kedemot, na Mefaat. Jio mai tana manahna suku Gad dibenni appa' kota, iamo to kota Mahanaim, Hesybon, Yaezer, na Ramot. Ia tee Ramot mesa' kota jio Gilead to wa'ding dinii membuni ke te'da nadianggai' papatean.
41-42Jaji den patang pulo karua kota sola padang pangrewan jio mai tana manahna suku Israel, diben suku Lewi nanii torro.
Napumanahmi to-Israel to tana Kanaan
43Susimi joo PUANG Allataala mben tana Kanaan lako to-Israel, susi to Nabasse ton-Namassapah lako tojolona to-Israel. Nakuasaimi to-Israel to tana Kanaan, nanii torro tarruh. 44Na susi to mangka Nabasse Puang Allataala lako tojolona, namanyaman nnii torro, nasaba' Najagaii PUANG Allataala. Te'da lalo ewana barani nnewai, nasaba' Nabenni kapataloan PUANG Allataala. 45Napugauk ngasan PUANG Allataala to basse-Na lako to-Israel, te'da tang-Napugauk.
Currently Selected:
Yosua 21: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
