Ester 8

Raja Ahasweros nneloran to-Yahudi nnewa ewana

8:1-17

1Allo ia bang unapa joo napangbenganni raja lako Datu Ester to sininna ewananna Haman, ewa la'da'na to-Yahudi. Napaui Ester lako raja kumua anakkurenai Mordekhai. Mangpamula joo wattu, dieloran to Mordekhai mangngolo lako raja, moi nate'da naditambai jolo. 2Napasunni raja to cincinna to mangka naala pole' jio mai Haman, napangbenganni lako Mordekhai. Naangka'i Ester to Mordekhai menjaji to ngkuasai ewananna Haman. 3Mangkai joo too mangngolo pole' omi Ester lako raja. Suju'i Ester nalolong wai matanna meta'da tulung anna dita'dei joo akkatta gaja'na Haman bati'na Agag la nacappu'i napatei to to-Yahudi. 4Napupangjillokki raja to tekken bulawanna lako Ester, anna ke'deh Ester mangngolo nakua, 5“Ie', ia ke tapuelohhi sola tapakamoja'na' la mpasunki' sura' parenta la nta'dei joo sura'na Haman anakkana Hamedata bati'na Agag, to mpangparentanni nadimusai ngasan to to-Yahudi inde' karajaan. 6Tangkusara ngkitai to bangsaku' sola rapungku' disessa na dipatei.” 7Mangkadai Raja Ahasweros lako Datu Ester sola Mordekhai nakua, “Na mangkamo kutoke' to Haman nasaba' madoangngi la mmusai to-Yahudi, na ia to ewananna mangkamo kupangbengan lako Ester. 8Uki' pole' kamu' sura' mpusanga sangangku' mpaui to misanga napumelo to-Yahudi, mimane' nca'i ca' karajaan. Ia to sura' mangka diuki' nadica' mpusanga sangangku', te'damo nawa'ding dita'dei.”

9Ia bang unamo joo allo, tonna tanggala' duangpulo tallu bulan tallu ba'tu bulan Siwan, natambai Mordekhai to juru pangnguki'na raja napangparentanni lako, naukisanni sura' to sininna gubernur sola kapala kaparentan sola ia ngasan to tomapangka' lan saratuh duangpulo pitu propinsi mangpamula jio mai tana India ratu lako tana Etiopia. Ia joo sura' diuki' mpake basa sola pangnguki' simesa'-mesa' propinsi. Nakiringan too to-Yahudi joo sura' mpake basa sola pangnguki' to-Yahudi. 10Ia joo sura' diuki' mpusanga sanganna Raja Ahasweros, na dica' mpake ca' karajaan. Sitarruhna, nasuai Mordekhai to todisua male mbawai joo sura' mangka dipalembah lako sininna propinsi lan karajaan, ssakei nyarangna raja to kaminang matika' kinjara'. 11Ia to diuki' lan joo sura' kumua, naeloran raja to to-Yahudi jio simesa'-mesa' kota namangmesa mpangngewai kalena. Ia ke den ewana jio mai bangsa sola propinsi la umbo-umbo nanii rrarii, wa'dingngi mangngewa, nabunoi sininna to torrarii moi bainena na anakkana. Wa'ding namusai to ewana narampai to ewananna. 12Ia joo parenta nang la dipugauk lan sininna karajaan Persia, situru' to allo napattantumo Haman la mbunoi sininna to-Yahudi tonna tanggala' sangpulo tallu bulan sangpulo dua, iamo to bulan Adar. 13Ia joo sura' parenta nang la dipasun menjaji sura' atoran, nadipangpeissenan lako tau lan sininna propinsi na sadia to bangsa Yahudi nnewa ewana ke nadete'mi joo allona. 14Situru' parentana raja naparri-parri ngasanni male to todisua, ssakei nyarangna raja. Moi jio benteng Susan dipangpeissenan too joo parenta. 15Mangkai joo too malemi Mordekhai ssalai istana mpake pakean tomajao pangka'na, to kaen bulau na mabusa sola baju malando kaen allusu' makudara', namangsongko' bulawan liwa' kassing. Gaja sannangngi sola mario to tau lan kota Susan, na simetamba-tamban. 16Gaja parannu penawanna to to-Yahudi namasannang. Mario-rioi nagaja ditaratte'. 17Moi jio simesa'-mesa' kota sola propinsi la umbo-umbo dinii mbacai joo sura' parentana raja, mario masannang to to-Yahudi namangmaroah-roah. Na buda tau jio mai bangsa laen to menjajimo to-Yahudi nturu'i to agamana sola ada'na, nasaba' malaja'i lako joo to-Yahudi.

Currently Selected:

Ester 8: mvpAD

Highlight

Copy