Ester 7

Haman naparapa' Ester lako raja

7:1-10

1Mangpenduannami raja sola Haman kumande na mangngiso'-iso' sola Datu Ester. 2Ia tonna mukkun nniso' anggoro', mekutana pole' omi raja lako Ester, nakua, “Ee Datu Ester, apara mukadoangngi? Paumi! Moi mupeta'da sitangngana to karajaanku', la kuben tooko.” 3Mebalii Datu Ester lako raja nakua, “Ie', ia ke tapuelohhi, meta'da tulungna' angkutuo sola bangsaku'. 4Nasaba' ia tee aku' sola bangsaku' mangkamo dibaluk la dicappu'i dipatei. Ia ke dibaluk mandarakan la dipukaunan, la kamma' bangmo' te'da kulassarai'ki'. Apa ia tee too, la disessakan kidicappu'i dipatei.” 5Sitarruhna mekutanai Raja Ahasweros lako Datu Ester nakua, “Indara ia to barani mpugaukki susi tuu? Umboi nanii joo tau?” 6Mebalii Ester nakua, “Haman tomasa'ga' iamo nnewakan na la sessakan!” Liwa'i laja' Haman ngkitai raja sola datu. 7Gaja birihhi raja, nata'pa messun male lako rante istana. Naissen Haman kumua nnalami kara'tasan raja la ssessai, iamo joo namari'pih bang lan istana sola Datu Ester la meta'da tulungngi nadipasalama'.

8Ka'tu rannumi Haman, napembambangan kalena lako cadokkoanna Datu Ester la meta'da dampang, apa sirumpai joo wattu, pole todami raja jio mai rante istana. Ia tonna kitai to Haman susi joo, manggarra'i nakua, “Barani unapoko manggauk sala lako baineku' ntee jio oloku' lan istanaku'?”

Mangkanna mangkada raja susi joo, ta'pa ratumi to todisua mbukku' ulunna Haman. 9Namangkada to Harbona, sala mesa'na pangjamana to nakatappa'i raja nakua, “Ie', den ariri tokesan duangpulo dua metere' matandena jio sikandoppi' bolana Haman. Mangka napake'deh Haman la nanii ntoke' Mordekhai, to tomangka mpasalama' sunga'na raja.” Napangparentanmi raja nakua, “Toke'mi Haman jao ntuu joo ariri tokesan!” 10Susimi joo Haman ditoke' jao ariri tokesan to napasadia la nanii ntoke' Mordekhai. Mangkamira joo, namane' ra'da birihna raja.

Currently Selected:

Ester 7: mvpAD

Highlight

Copy