Ester 3
3
Akkattana Haman la nnancuru' to-Yahudi
3:1-15
1Ba'tu pirang-pirang taun mangkanna joo, napaendekmi Raja Ahasweros pangka'na to mesa' tau disanga Haman menjaji wakkele' raja. Ia tee Haman, anakkana Hamedata jio mai bati'na Agag#3:1 Ia tee Agag iamo rajana to-Amalek ba'tu ewana to-Yahudi tonna mangparenta Raja Saul. Napangparentanni Puang Allataala lako Raja Saul nabunoi ngasanni to to-Amalek sola Raja Agag. Apa te'da naturu'i Raja Saul joo parenta-Na Puang Allataala (kitai lan 1Samuel pasala' 15). . 2Napangparentanni raja lako sininna pangjamana anna ditaratte' Haman, na mengguntu' ssuju'i. Naturu' ngasan tau joo parenta, saliwanna Mordekhai. 3Ia to pangjama istana mekutana lako Mordekhai nakua, “Ciapari mucia' nturu' parentana raja?” 4Allo-allo naparuku pangjama to Mordekhai anna turu' bangmo, apa cia'i mpesa'dingngii. Nakua ora, “To-Yahudina' aku', te'da kuwa'ding ssompa tolino.” Namale to pangjama mparapa'i lako Haman, sanga madoangngi nnissenni kumua la naapari to Mordekhai. 5Liwa' galli Haman tonna issenmi kumua cia'i Mordekhai mengguntu' ssuju'i. 6Na ia tonna issenmi kumua to-Yahudi pale' joo Mordekhai, nnalami kara'tasan la mbunoi, na te'da na ia manda, apa la naancuru' ngasan to sininna to-Yahudi jio karajaan Persia. 7Ia tonna sangpulo duamo taunna Raja Ahasweros mangparenta, tonna bulan mesa', iamo to bulan Nisan, massuami Haman mangloterei jio olona (lan basa Persia mangloterei susi joo disanga purim), la nanii nnissenni to allo sola bulan melo la mpugaukki joo akkatta gaja'na. Anna pattantui to tanggala' sangpulo tallu bulan sangpulo dua1, iamo to bulan Adar.
8Mangkadami Haman lako raja nakua, “Ie' Raja, den mesa' bangsa makalaen-laen, to silele jio simesa'-mesa' propinsi inde' karajaan. Gaja sisala ada'na na ia to ada'ta'. Te'da naturu'i to atoran inde' karajaan. Jaji melo ke danggi' taeloranni mpupangngeloh bang elohna. 9Ia ke tasitujui, melo ke mpasunki' sura' parenta, nadiancuru' to tau. Na ia ke madoangki' ntarimai tee peta'danku' nang la kubenni pera' to tonnurusu' doi'ta' talluratuhpa patangpulo sa'bu kilo banda'na, to la dipake ke denni kaparalluan karajaan.” 10Ia tonna sa'dingngi raja joo, ta'pa nnalaii cincinna la dipake nca'i mpaassahhi joo parenta nasitujui anna benni Haman anakkana Hamedata bati'na Agag, ewa la'da'na to-Yahudi. 11Nakua toopa raja lako Haman, “Elohmu ikona, la muapari to tau sola doi'na.”
12-13Na ia tonna tanggala' sangpulo tallu bulan mesa', natambai Haman to juru pangnguki'na raja. Nasuai Haman to tau nnuki' sura' susi to napangparentan, na ia joo sura' dipalembah tama sininna basa na diuki' pole' o tama sininna pangnguki' to dipake lan sininna karajaan. Ia joo sura' diuki' mpusanga sanganna Raja Ahasweros, nadica' mpake cincinna raja, nata'pa male to todisua mbawai lako sininna tomajao pangka'na, lako gubernur, sola lako tontoe ada' lan sininna propinsi. Ia to dipau lan joo sura' iamo to parenta kumua, ianna tanggala' sangpulo tallu bulan Adar, sininna to-Yahudi la tomatua, la tomalolle', la baine, la pea, nang la dicappu'i dipatei, na ia to ewananna la dirampa. 14Ia joo sura' parenta nang la dipasun menjaji atoran, nadipangpeissenan lako tau lan sininna propinsi nasadia jolo aranni nadete' to allo pura dipattantumo. 15Situru' parentana raja naparri-parri to todisua male mbawai joo sura' mangka dipalembah lako sininna karajaan. Massuai raja anna ia joo parenta dipangpeissenan too jio benteng Susan. Mangkai joo too, cumadokko-dokkomi Haman sola raja mangngiso' anggoro', apa marongkai to tau jio kota Susan, nasaba' ia joo kareba.
Currently Selected:
Ester 3: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
