Ester 2

Ester diangka' menjaji datu

2:1-18

1Ba'tu pirang-pirang taun mangkanna joo, moi nate'damo namagalli raja, tatta' unapa napikkiri' to apa napugauk Datu Wasti lako kalena. 2Iamo joo, ia to pangjama nakatappa'i raja, mbenni pangtimbangan susi tee, “Oo Puang, la'bih melo ke diangaranki' to ana'dara sigaja lolo. 3La taangka' to pangjama lan sininna propinsi karajaan, la nnangah ana'dara simalolo, nasolan ngasanni lako istana baine inde' benteng Susan. Na dipabarakkanni lako Hegai to kapala istana baine, la nnurusu'i najampang meloi nabenni mangrupa-rupa to busarungngu' napakei dikua namalolo. 4Mangkai joo too, la tapileii to ana'dara kaminang takabudai, taangka'i menjaji datu sullena Datu Wasti.” Nasitujui raja joo pangpakainga' anna pugaukki.

5Jio benteng Susan den mesa' to-Yahudi jio mai pangrapuanna Benyamin disanga Mordekhai anakkana Yair na bati'na Simei sola Kis. 6Ia tonna ditalomo to to-Yerusalem natalo Nebukadnezar raja Babel dipali'i to Kis. Ia joo wattu dipali' tooi to rajana to-Yehuda disanga Yoyakin#2:6 Ia to Yoyakin disanga too Yekhonya. nabudapa tolaen nasolan. 7Den sampunna Mordekhai, mesa' ana'dara gaja lolo na melo pangkaleanna, disanga Ester, nadisanga too Hadasa lan basa Ibrani. Matemo to tomatuanna, naala anakkiq Mordekhai, najampangngi susi anak jajianna.

8Ia tonna dipangpeissenanmo to parentana raja, buda to ana'dara dirempun jio benteng Susan, na den todai Ester sola to ana'dara. Nadisolan lako istana raja, nadipabarakkanni Hegai, to kapala istana baine. 9Masannangngi penawanna Hegai ngkita Ester, na gaja ngkabudaii. Nata'pa benni to mangrupa-rupa apa mangpemalolo, napattantu tooi to kande melo nabenni. Napalelei to Ester lako ngenan to kaminang melo lan istana baine. Napileian tooi to pitu ana'dara lan istana raja la njampangngi. 10Napangngingaran rampa'i Mordekhai to Ester nadanggi' napaui kumua to-Yahudii. 11Allo-allo tuli lumingka-mingkai Mordekhai jio rante istana baine la mpekutananni, matumba unara to Ester na apara jaji lako kalena.

12Situru' atoran, ia to baine diben to apa mangpemalolo sisangtaun, annan bulanna nanii mpake minynyak dipasirau kamanynyang, na annan pole' o bulanna nanii mpake minynya'-minynya' to gaja busarungngu'. Mangkai joo too, simesa'-mesa' ana'dara disua male mangngolo lako Raja Ahasweros. 13Ia ke wattunnami to mesa' ana'dara la mangngolo lako raja, wa'ding ia mbawai apa bangmo to nakabudai jio mai istana baine napakei ke malei mangngolo lako raja. 14Na ia ke bongimi disolanni tama ngenanna raja lan istana, namasawanna disolan omi lako ngenan laen, naurusu'i Saagas to dipattantumo nnurusu' baine buninna raja. Ia joo baine buninna raja, te'damo na la mangngolo pole' lako raja, saliwanna ke nakadoangngi unapi raja, natambai pole'pi napaui to sanganna.

15Nadete'mi wattunna Ester la mangngolo lako raja. Ester anakkana Abihail ambe'urena Mordekhai. Naala anakkiq Mordekhai to Ester, najampangngi susi anak jajianna. Masannang ngasanni to tau ngkita Ester. Ia tonna malemo mangngolo lako raja ia mandara napake to napangpatujuanni Hagai, kapala istana baine. 16Susimi joo Ester disolan male mangngolo lako Raja Ahasweros lan istana raja, tonna bulan mangpessangpulo, iamo to bulan Tebet, tonna pitung taunmo raja mangparenta. 17La'bih napakamoja' sola nakacinnai ia raja to Ester na ia to sininna baine laen, aranni napapakean raja mahkota ba'tu songko' karajaan, naangka'i menjaji datu, sullena Datu Wasti. 18Mangkai joo too mpadenmi pangmaroasan la'da' raja, tanda kanaanggasanna to Ester, natambai ngasanni to pangjamana sola tomajao pangka'na. Napangpeissenan tooi raja, na te'da nadisima to tau lan sininna propinsi joo wattu, nantawa-tawa paraseng situru' to nakaelohhi raja.

Mordekhai mpasalama' sunga'na raja

2:19-23

19Ia tonna mangpenduannamo dirempun to ana'dara, naangka'mi raja to Mordekhai menjaji pangjama lan istana. 20Te'da unapa napaui Ester kumua to-Yahudii, nasaba' tangnaeloranni Mordekhai. Tattaqi mangpesa'ding Ester lako Mordekhai, susi tonna biccu' unapa. 21Den wattu, tonna mangjamamo Mordekhai lan istana, na den dua tau pangjaga babangan istana disanga Bigtan sola Teresh sikangkolo'i la mpatei Raja Ahasweros, nasaba' liwa' nakaba'ci. 22Ia joo apa naissen Mordekhai, ta'pa napaui lako Ester, napau todai Ester lako raja. 23Ia joo akkattana joo tau sola dua diparessa tarruh na tonganna tongan susi, aranni ditoke' sola dua. Napangparentanni raja na ia joo apa jaji, diuki' lan Sura' to dinii nnuki' sininna apa jaji lan karajaan.

Currently Selected:

Ester 2: mvpAD

Highlight

Copy