Ester 1
1
Datu Wasti cia' ntarima parentana Raja Ahasweros
1:1-22
1-2Jio Persia tonna anu' den raja disanga Ahasweros to torro jio benteng Susan, iamo kota lompo Persia. Ia joo Raja Ahasweros mparenta saratuh duangpulo pitu propinsi, mangpamula jio mai tana India ratu lako tana Etiopia. 3Ia tonna tallungtaunmo mangparenta, Raja Ahasweros mpadenmi pangmaroasan la'da' lako sininna pangjamana sola tomajao pangka'na. Ratumi to pangbarani jio mai Persia na Media jio pangmaroasan, susi too to gubernur sola tomajao pangka'na lan propinsi. 4Annan bulanna nanii raja mpangpekitanni to kasugiranna istana sola kamala'biranna karajaanna.
5Mangkai joo too, mpaden pole' omi pangmaroasan raja lako sininna tau jio benteng Susan, la lako tosugih la lako tokaasi-asi. Ia joo pangmaroasan, dipaden sangminggu masainna lan rante istana raja. 6Ia to rante istana, diballo-balloi mpake kaen pesapa' jio mai kaen lenan bulau na mabusa, dikapu' ulang allusu' makudara' nadipengkadangan jio gallang salaka, to dipale'ke' jio ariri batu pualam. Nadisalii too mangrupa-rupa batu sigaja melo. Den batu pualam mabusa sola batu pualam malea, den too to batu bulau na mutiara to cundallak. Jao ntuu joo sali den too cadokkoan bulawan sola cadokkoan salaka. 7Napangparentanni raja nadipebudai dipangngolo to anggoro' lan mangrupa-rupa cere' bulawan. 8Ia to toratu te'da nadianggean nniso' anggoro', nasaba' napangparentanmo raja lako tonasua lan istana, anna ia to simesa'-mesa' toratu elohna bang apa ia to nakadoangngi.
9Ia joo wattu ia to bainena raja disanga Datu Wasti, mpaden todai pangmaroasan lan istana lako sininna baine. 10Ia tonna allo mangpempitumo, gaja sannangmi raja, nasaba' mangkamo nniso' buda anggoro'. Natambaimi pitu to pangjamana nakatappa'i, iamo to Mehuman, Bizta, Harbona, Bigta, Abagta, Zetar na Karkas. 11Nasuai raja to tau anna solanni to Datu Wasti lako raja, mpake mahkota karajaan. Madoangngi raja mpangpekitan kamaloloanna bainena lako tomajao pangka'na sola lako sininna toratunna. 12Apa ia tonna paratuanni to todisua to parentana raja, cia'i male joo Datu Wasti, anna gaja birih raja. 13Den kabiasanna raja, iamo to mpeta'da pangtimbangan lako tomacca mangra'tah kara-kara sola tonnissen ada'. Iamo joo natambaii to tomangpakainga'na to la'bih nnissen kara'tasan matumba to nang la dipugauk ke denni passalan susinna to napugauk Datu Wasti. 14Ia to tomangpakainga'na tuli natambai, iamo to: Karsena, Setar, Admata, Tarsis, Meres, Marsena na Memukan. Puanggawa ngasan jio Persia sola Media joo tau pitu, to kaminang majao pangka'na lan karajaan. 15Nakua raja lako tee tau pitu, “Denmo tau mangka kusua male lako Datu Wasti anna mangngolo lako aku', apa cia'i. Situru' atoran apa to sipato' la digaukanni Datu Wasti?” 16Mangkadami Memukan lako raja sola lako to tomajao pangka'na nakua, “Oo Puang, ia joo panggaukan, tangngia kita' manda to tangnaangga' Datu Wasti, apa sininna to pangjama-Ta', la'bih-la'bih to simesa'-mesa' muane lan tee kaparentan! 17Nasaba' la naissen ngasan baine kumua mangka tapangparentan namangngolo Datu Wasti apa cia'i male, na ia ke naissenni joo panggaukanna Datu Wasti pada la tangnnangga'mi muanena. 18Jaji ia ke naissenni tee too to baine to majao pangka'na muanena jio Persia sola Media nang la pada napauanni muanena. Assele'na iamo to kumua ia to baine la nnewai parentana muanena, na ia to muane la ngkagallii bainena. 19Iamo joo, ia ke wa'dingngi, meta'dakan antaala kara'tasan, to kumua te'damo nawa'ding mangngolo Datu Wasti lako Kita'. Ia joo kara'tasan, nang la dipupenjajimi atoran jio Persia sola Media, nate'damo nawa'ding la dita'dei. Na mangkai joo, pileimi to baine laen la menjaji baine-Ta' to la'bih melo ia na Datu Wasti. 20Ia ke kaissenanmi joo kara'tasan-Ta' lako sininna tee karajaan gaja luah, ia to simesa'-mesa' baine la ntaratte'mo muanena moi nakaasi-asi iarika nasugih.”
21Ia joo peta'danna Memukan nasitujui raja sola to tomajao pangka'na, nata'pa mpugaukki raja. 22Ngkiringngi sura' parenta raja lako sininna propinsi karajaan, mpake basa sola pangnguki' simesa'-mesa' propinsi. Ia joo pepasan dipangpeissenan lan simesa'-mesa' basa kumua, “Nang la ambe' ia to menjaji kapala lan bola na basana too to dipake.”
Currently Selected:
Ester 1: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
