ZECHARIAH 5
5
Ɔyɔhɔ Ŋkukut Zechariah Itiokiet: Ikpa-Ŋwed Emi Efede
1NDIEN ŋkabare, nnyuŋ mmenere enyin mi ŋkut; ndien, sese, ikpa-ŋwed eke efede. 2Ndien enye ɔdɔhɔ mi, ete, Afo okut nso ŋkpɔ? Ndien mbɔrɔ nte, Ami mmokut ikpa-ŋwed eke efede, uniɔŋ esie edi ibio-idomo-okuk edip, ubara esie ŋko edi ibio-idomo-okuk duop.
3Ndien enye ɔdɔhɔ mi, ete, Emi edi isuŋi eke ɔwɔrɔde asaŋa ke iso ofuri isɔŋ: koro eyesɔhi kpukpru inɔ ke edem emi efep, nte enye asaŋade; enyuŋ esɔhi kpukpru owo eke etomode ke edem eken efep, 4nte enye asaŋade. Jehovah mme udim ɔdɔhɔ ete, Nyeda enye ŋwɔrɔ, ndien enye eyeduk ke ufɔk inɔ, ye ke ufɔk owo eke otomode nsu-nsu ke enyiŋ mi: ndien enye eyeduŋ ke ufɔt ufɔk esie, onyuŋ osobo ufɔk ye eto esie, ye itiat esie.
5Ndien angel oro ekenemdede ye ami ɔwɔrɔ, onyuŋ ɔdɔhɔ mi, ete, Menere ndien enyin fo, nyuŋ se nsiwɔrɔ ntre. Ndien ndɔhɔ nte, Enye edi nso? 6Ndien enye ɔdɔhɔ ete, Emi edi ephah eke ɔwɔrɔde. Enye onyuŋ ɔdɔhɔ ŋko, ete, Iso mmɔ etie ntem ke ofuri isɔŋ. 7Ndien, sese, mmɔ emenere talent ŋket efep: ndien ŋwan kiet etie do ke esit ephah oro. 8Ndien enye ɔdɔhɔ ete, Emi edi idiɔk-ŋkpɔ. Enye onyuŋ emen ŋwan ɔduɔk ke esit ephah oro; onyuŋ odori enye itiat ŋket ke inua.
9Ndien mmenere enyin mi ŋkut, ndien, sese, iban iba eto edi, ofum onyuŋ odu mmɔ ke mba: mmɔ enyuŋ enyene mba iba-iba, ebiet mba akpantana: ndien mmɔ emen ephah oro esin ke ufɔt isɔŋ ye ikpa-enyɔŋ. 10Ndien mbup angel oro ekenemede ye ami, nte, Mme mmɔ emi eda ephah emi eka mmɔŋ? 11Ndien enye ɔbɔrɔ mi, ete, Ndibɔp ufɔk ke isɔŋ Shinar nnɔ enye: ndien eyewuk enye, enyuŋ ediɔk enye do ke itie esiemɔ.
Currently Selected:
ZECHARIAH 5: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.
