MARK 4

Jesus otop Nke Abaŋa Asuan Mkpasip

(Mt 13.1-9; Lk 8.4-8)

1EKEM Enye ɔtɔŋɔ ntak ɔtɔŋɔ ndikpep owo ŋkpɔ ke mben akwa inyaŋ. Ata akamba otu owo enyuŋ ebono etiene Enye, tutu esin Enye oduk ke ubom etie ke inyaŋ; ofuri otu owo enyuŋ eda ke obot ke mben inyaŋ. 2Ndien Enye ekpep mmɔ ediwak ŋkpɔ ke ŋke, onyuŋ ɔdɔhɔ mmɔ ke erikpep Esie ete, Ekpaŋ utɔŋ. 3Sese, asuan-mkpasip ɔwɔrɔ aka ndisuan; 4Ndien, edikem, nte enye asuande, ndusuk mkpasip eduɔŋɔ ke mben ɔkpɔusuŋ, mme inuen enyuŋ edi nditaŋ eta. 5Ndusuk eduɔŋɔ ke isɔŋ itiat, ke ɔtɔ eke mmɔ minyeneke uwak ntan; enyuŋ etibe idaha oro, 6koro ntan mituŋɔke; ekem ke ini utin asiahade, ɔfɔp mmɔ; ndien sia minyeneke oruŋ eyemere. 7Ndusuk eduɔŋɔ ke ikɔt ŋkukim, ndien ŋkukim oro ekɔri ebaba mmɔ ewot, mmɔ inyuŋ iŋwumke mfri. 8Mmɔ eken eduɔŋɔ ke eti isɔŋ, enyuŋ efiari mfri, ekɔri enyuŋ etɔt, esioŋo mfri utim ikedip ye duop, ye utim ikaata, ye utim ikikie. 9Enye onyuŋ ɔdɔhɔ ete, Owo eke enyenede utɔŋ ndikop, yak okop.

10Ekem ke adaŋemi Enye odude ke Idem Esie, mmɔ emi edude ye Enye ye mbet duopeba ebup Enye ebaŋa mme ŋke oro 11Ndien Enye ɔdɔhɔ mmɔ ete, Eyak ndibe ŋkpɔ Obio Ubɔŋ Abasi enɔ mbufo; edi mmɔ emi edude ke edem, kpukpru ŋkpɔ ke esine ke ŋke esim mmɔ; 12man mmɔ esuk ese ŋkpɔ, edi ekukut; enyuŋ esuk ekop ŋko, edi ekufiɔk; mbak mmɔ edikabare, ndien edahado enɔ mmɔ. 13Enye onyuŋ ɔdɔhɔ mmɔ ete, Nte mbufo ifiɔkke se ŋke emi ɔwɔrɔde? edinam didie ndien efiɔk kpukpru ŋke? 14Asuan-mkpasip asuan ikɔ Abasi 15Mmɔ emi edi mbon mben ɔkpɔusuŋ, emi ikɔ eduɔŋɔde ke esit: ke adaŋemi mmɔ ekokopde, Satan edi kpa idaha oro editaŋ ikɔ eke esuande ke esit mmɔ efep. 16Kpasuk ntre emi edi mmɔ emi mkpasip eduɔŋɔde ke isɔŋ itiat, ke adaŋemi mmɔ ekokopde ikɔ, mmɔ ebɔ kpa idaha oro ye idaresit; 17edi mmɔ inyeneke oruŋ ke idemmɔ, edi ebigi ke ini esisit; ndien ke ini ukut mme isin-enyin otibede kabaŋa ikɔ idaha oro eduɔ. 18Mmɔ efen edi mmɔ emi mkpasip eduɔŋɔde ke ufɔt ŋkukim; emi edi mmɔ emi ekokopde ikɔ, ndien ekikere ŋkpɔ eyo emi, 19ye abiaŋa inyene, ye mme idiɔk itɔŋ ŋkpɔ eŋwen eduk ebaba ikɔ ewot; ntre ke ikɔ akabare anana mfri. 20Mmɔ emi mkpasip eduɔŋɔde ke eti isɔŋ, edi mmɔ emi ekopde ikɔ enyuŋ edarade enye, enyuŋ eŋwum mfri utim ikedip ye duop, ye utim ikaata, ye utim ikikie.

21Ekem Enye ɔdɔhɔ mmɔ ete, Nte eda utuenikaŋ edi, man emen enim ke idak abaŋ, me ke idak mkpana ekunyuŋ ewuk ke uwukutuenikaŋ? 22Koro baba ŋkpɔ kiet idibeke, ibɔhɔke man akpayarare; baba ŋkpɔ kiet inyuŋ ifuhɔke ina, ibɔhɔke man ɔkpɔwɔrɔ ke uŋwana. 23Edieke owo enyenede utɔŋ ndikop, yak okop.

24Enye onyuŋ ɔdɔhɔ mmɔ ete, Etiŋ enyin ekpeme se mbufo ekopde. Udomo eke mbufo edade edomo enɔ owo, ke eyeda edomo enɔ mbufo, eyenyuŋ ekɔrɔ enɔ mbufo. 25Koro eyeda enɔ owo eke enyenede edian; edi ama edi owo eke minyeneke, eyebɔ enye kpa se enye enyenede.

26Enye onyuŋ ɔdɔhɔ ete, Obio Ubɔŋ Abasi etie ntem, nte ŋkpɔ eke owo asuande mkpasip ke isɔŋ; 27onyuŋ edede idap onyuŋ adahade ke enyɔŋ, ke okoneyo ye ke uwem-eyo; ndien mkpasip otibe onyuŋ ɔkɔri, enye ifiɔkke nte asaŋade ɔkɔri. 28Isɔŋ osioŋɔ mfri ke idem esie; ebem iso afiari ikɔŋ, ndien editop idem, ndien edidian ɔyɔhɔ ibokpot. 29Ndien ke ini ibokpot ɔsɔŋde, enye osio ofut ukpeŋe-ŋkpɔ ini kiet, koro ekemde ini ukpeŋe.

Jesus otop Nke Abaŋa Asuan Mkpasip Mustard

(Mt 13.31-32,34; Lk 13.18-19)

30Enye onyuŋ ɔdɔhɔ ete, Nnyin idisaŋa didie iwut mbiet Obio Ubɔŋ Abasi? mme nso oruk ŋke ke nnyin idida iyarare enye iwut? 31Ebiet mkpasip mustard kiet, emi ekpride akan kpukpru mkpasip eke edude ke isɔŋ, ke ini etɔde enye ke isɔŋ; 32edi ema etɔ enye, enye ɔkɔri akabare okpon akan kpukpru mbiet, onyuŋ asiaha ikpɔ ŋkɔk; ntre ke mme inuen enyɔŋ ekeme ndikubɔ ke mfut esie.

33Enye onyuŋ ada ediwak ŋke eke etiede ntem etiŋ ikɔ ɔnɔ mmɔ nte mmɔ ekemede ndikop; 34minyuŋ idige ke ŋke, Enye itiŋke ikɔ inɔ mmɔ; edi Enye asiak kpukpru ŋkpɔ ɔnɔ mbet Esie ke idem mmɔ ikpɔŋ.

Jesus Asua Ɔnɔ Oyobio

(Mt 8.23-27; Lk 8.22-25)

35Ndien ke usen oro, ke ini osimde mbubreyo, Enye ɔdɔhɔ mmɔ ete, Eyak iwat ibe ika ke edem oko. 36Ntre ke mmɔ ekpɔŋ otu owo, eda Enye kpa nte Enye etiede ye mmɔ ke ubom. 37Mme ubom efen enyuŋ edu ye Enye. Edi akwa oyobio otibe ofime, mbufut onyuŋ adaha oduk ke esit ubom, tutu mmɔŋ ɔtɔŋɔ ndiyɔhɔ ke ubom. 38Ndien Enye ke Idem Esie odu ke etak ubom, ke ede idap ke udoribuot: ndien mmɔ edemere Enye, ete Enye, Andikpep, nte Afo ukereke ete nnyin itak? 39Ndien Enye edemere asua ɔnɔ ofim, onyuŋ ɔdɔhɔ inyaŋ ete, Dobo, na suŋ. Ndien ofim odobo, mmɔŋ onyuŋ ana suŋ-ŋ. 40Ndien Enye ɔdɔhɔ mmɔ ete, Nsinam mbufo efehede ndik? nte mbufo inyeneke kaŋa mbuɔtidem? 41Ndien ndik anam mmɔ eti-eti, mmɔ enyuŋ edɔhɔ kiet eken ete, Anie naŋa edi emi, emi, kpa ofim ye inyaŋ ekopde uyo Esie?

Currently Selected:

MARK 4: ENA

Highlight

Copy