MALACHI 1
1
Ima Emi Abasi Amade Jacob
1MBIOMO UYO JEHOVAH EMI OKOTODE UBƆK MALACHI OSIM ISRAEL.
2Jehovah ɔdɔhɔ, ete, Mmama mbufo. Ndien mbufo edɔhɔ, ete, Didie ke afo ama nnyin? Jehovah ɔdɔhɔ ete, Nte Esau ikedige eyen eka Jacob? 3ndien ŋkama Jacob, nnyuŋ nsua Esau, nnyuŋ nnim ikpɔ obot esie ke ikpikpu ebiet, nnyuŋ nnim udeme esie ke iduŋ wilderness. 4Koro Edom ɔdɔhɔde ete, “Nnyin imesuana, edi iyetɔŋɔ ntak ibɔp ŋwure”; ntem ke Jehovah mme udim ɔdɔhɔ ete, Mmɔ eyebɔp, edi ami nyewuri: ndien eyesio mmɔ enyiŋ “Adaŋa idiɔk,” ye “Mbio emi Jehovah ofutde esit ye mmɔ ke nsinsi.” 5Ndien enyin mbufo eyekut, ndien mbufo eyedɔhɔ ete, Yak Jehovah okpon akan adaŋa Israel.
6Eyen okpono ete, ofin onyuŋ okpono andinyene enye: edi edieke ami ndide ete, ukpono mi odu mmɔŋ? Edieke ami nnyuŋ ndide andinyene, uteŋe mi odu mmɔŋ? Ntem ke Jehovah mme udim ɔdɔhɔ mbufo mme oku emi esede enyiŋ mi ke ndek. Ndien mbufo ebup ete, Ke didie ke nnyin ise enyiŋ fo ke ndek? 7Mbufo ke ediɔk edidehe uyo ke itie-uwa mi; ndien mbufo edɔhɔ ete, Nnyin ida nso isabare fi? Koro mbufo edɔhɔde, ete, Okpokoro Jehovah edi obukpo. 8Ndien ke ini mbufo edade nnan edi ediwa, nte idiɔkke? Ndien ke ini mbufo edade mbuŋɔ ye eke ɔdɔŋɔde udɔŋɔ edi, nte idiɔkke? Da enye naŋa sɔk ɔbɔŋ fo; nte enye edinem esit ye afo? Nte enye edinyuŋ okpono iso fo? Jehovah mme udim ɔdɔhɔ. 9Ke emi, mbɔk, mbufo ekpe Abasi ubɔk, ete, enye atua nnyin mbɔm: ŋkpɔ emi oto mbufo ke ubɔk: nte enye edikpono mbufo iso? Jehovah mme udim ɔdɔhɔ.
10Anie ke idem otu mbufo edisin itim? Mbufo inyuŋ ibarake ikaŋ ke itie-uwa mi ke ikpikpu. Jehovah mme udim ɔdɔhɔ ete, Mbufo inemke mi esit baba; inuak-udia emi orode mbufo ke ubɔk inyuŋ inemke mi esit. 11Koro enyiŋ mi eyekpon ke otu mme idut ɔtɔŋɔde ke edem usiaha-utin tutu osim ke edem usop; ndien mmɔ eyefɔp incense ye edisana uwa enɔ enyiŋ mi ke kpukpru ebiet: koro enyiŋ mi eyekpon ke otu mme idut, Jehovah mme udim ɔdɔhɔ. 12Edi mbufo ke ebiat enye: koro edɔhɔde ete, Okpokoro Jehovah emedehe, ndien mfri esie, kpa udia esie, edi obukpo. 13Mbufo enyuŋ edɔhɔ, ete, Sese, ke efek owo didie! Mbufo enyuŋ ebat enye ke mbio, Jehovah mme udim ɔdɔhɔ; mbufo enyuŋ eda ŋkpɔ ŋkanubɔk, ye mbuŋɔ, ye se idɔŋɔde, edi, enyuŋ eda inuak-udia edi: nte nyenyime ndibɔ enye ke ubɔk mbufo? Jehovah ɔdɔhɔ. 14Edi osuk ɔdɔdiɔk ɔnɔ owo abiaŋa, eke ayara odude ke otu ufene esie, ndien enye akaŋa, onyuŋ awa obukpo ŋkpɔ ɔnɔ Ɔbɔŋ: koro ami ndide akwa edidem, enyiŋ mi onyuŋ enyene ndik ke otu mme idut. Jehovah mme udim ɔdɔhɔ.
Currently Selected:
MALACHI 1: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.
