LUKE 12

Jesus Oduri Mme Mbet Esie Utɔŋ Kabaŋa Mbubik

(Mt 10.26-31)

1KE idaha oro, ke adaŋemi ediwak thousand owo ema ekobono ɔtɔ kiet, tutu mme owo edigi kiet eken, Enye ɔtɔŋɔ ndidɔhɔ mbet Esie ke akpa, ete Ekpeme idem ye leaven mme Pharisee, emi edide mbubik. 2Edi ŋkpɔ iduhe eke efukde fuk, eke midiyarakere; ŋkpɔ inyuŋ iduhe eke edipde dip, eke owo midifiɔkke. 3Mmɔdo ikɔ ekededi eke mbufo etiŋde ke ekim ke eyekop ke uŋwana, odu eke mbufo edɔŋde ke utɔŋ owo ke ndibe ubet, ke eyekwɔrɔ ke enyɔŋ ɔkɔm.

Ekufehe Mmɔ Emi Ewotde Ikpɔhidem

(Mt 10.26-31)

4 Edi mmɔdɔhɔ mbufo, mme ufan Mi, nte, Ekufehe mmɔ emi ewotde ikpɔhidem, ndien ke ebede oro, mikemeke ndinam nkpɔ efen. 5Edi nyesian mbufo Enye emi ekpefehede; efehe Enye emi, ke ama owot; onyuŋ enyenede odudu ndiduɔk ke hell: mmɔsɔŋɔ ndɔhɔ mbufo nte, efehe Enye. 6Nte inyamke ŋkpri inuen ition ke obubit okuk iba? 7Ndien Abasi ifreke ndomo mmɔ kiet. Edi emebat kpa idet kpukpru ke ibuot mbufo. Ekufehe ndien: mbufo emesɔŋ urua ekan ediwak ŋkpri inuen. 8Ndɔhɔ mbufo nte, Kpukpru owo eke edinyimede ke iso owo ete, Idi okim, Eyen Owo eyenyuŋ onyime ete, Mmɔ oro edi eke Imɔ ke iso mme angel Abasi: 9edi owo eke akaŋde mi ke iso owo ete, Imɔ idige okim, eyenyuŋ ekaŋ enye ke iso mme angel Abasi. 10Ndien kpukpru owo eke editiŋde ikɔ adian Eyen Owo, eyefen enye: edi owo eke editiŋde ikɔ-isuŋi adian Edisana Spirit, idifenke enye. 11Edi kadaŋemi mmɔ edidade mbufo eka ke mme synagogue ye ke iso mme andikara, ye mme enyene-odudu, ekutimere esit ekere ebaŋa ido nte mbufo edibɔrɔde ke nyaŋa-idem, me se mbufo editiŋde: 12koro kpa ke idaha oro Edisana Spirit eyeteme mbufo se mbufo enyenede nditiŋ.

13Edi owo kiet ke otu oro ɔdɔhɔ Enye ete, Andikpep, dɔhɔ eyen-eka mi abahare akpa ete nnyin ye ami. 14Edi Jesus ete enye, Owo, anie okonim Mi nte ebierikpe ye edeme-udeme ke ufɔt mbufo? 15Enye onyuŋ ɔdɔhɔ mmɔ ete, Etim ekpeme idem mbufo ke kpukpru oruk erisin esit ke ŋkpɔ owo: koro owo enyene se enyenyene, uwem esie isineke enye ke ubɔk.

16Edi Enye otop ŋke ɔnɔ mmɔ ete, Iŋwaŋ owo inyene kiet ɔfɔn ŋkpɔ eti-eti; 17enye onyuŋ eneni ke esit esie ete, Ndinam nso ŋkpɔ? koro nnyeneke ebiet eke mbonde ŋkpɔ mi. 18Ndien enye ɔdɔhɔ ete, Nyenam emi: nyewuri mme ufɔk-ubon-udia mi, nnyuŋ mbɔp se ikponde ikan; do ke ndibon kpukpru mfri ye inyene mi. 19Ndien nyedɔhɔ ukpɔŋ mi nte, Ukpɔŋ mi, omobon ediwak ŋkpɔ nte edikemde ediwak isua; da nduɔk-odudu, dia nyuŋ ŋwɔŋ, nyuŋ dat esit. 20Edi Abasi ɔdɔhɔ enye ete, Afo anana ibuot, eye-kpak ukpɔŋ fo ke ubɔk fo ke okoneyo emi; ndien anie edidia ŋkpɔ eke ɔkɔkɔde onim? 21Ntem ke etie ye owo eke ɔkɔde inyene ɔnɔ idem esie, edi minyeneke inyene ke ŋkaŋ Abasi.

22Edi Enye ɔdɔhɔ mbet Esie ete, Mmɔdo ndɔhɔ mbufo nte, Ekutimere esit ebaŋa uwem mbufo, ete, ididia nso? mme ikpɔhidem mbufo, ete, idisine nso? 23Uwem akan udia, ikpɔhidem onyuŋ akan edisine-ŋkpɔ. 24Ese mme inuen enyɔŋ, ete, mmɔ itɔhɔ tɔ, inyuŋ idɔkke dɔk; inyeneke ubet ubon-ŋkpɔ ye ufɔk ibokpot; ndien Abasi ɔbɔk mmɔ; mbufo emekpon ekan mme inuen adaŋa didie! 25Anie ke otu mbufo ekeme ndida ekikere ndian ibio idomo okuk kiet ke idaha esie? 26Edieke mbufo mikemeke ndien ndinam kpa se idide ata ekpri, nsinam mbufo etimerede esit ekere ebaŋa mme ŋkpɔ efen? 27Ese ekpɔŋ-idim nte mmɔ ekɔride: mmɔ ifiakke ndidi, inyuŋ idɔkke ɔfɔŋ; edi ndɔhɔ mbufo nte, Solomon ke ofuri ubɔŋ esie ikesineke se iyede nte kiet ke otu mmɔ. 28Edi edieke Abasi esinede mbiet iŋwaŋ ŋkpɔ ntem, kpa mbiet eke odude mfin, ndien mkpɔŋ emen esin ke usaŋ-uyo; adaŋa didie akan oro ke Enye edisine mbufo ŋkpɔ, O nditɔ ekpri mbuɔtidem? 29Mbufo ekunyuŋ eyom se mbufo edidiade, ye se mbufo ediŋwɔŋde, ekunyuŋ eyik ke ekikere esit mbufo. 30Koro mme idut ererimbot eyom kpukpru mme ŋkpɔ emi: edi Ete mbufo ɔmɔfiɔk ete mme ŋkpɔ emi enana mbufo. 31Ekam eyom Obio Ubɔŋ Abasi, ndien eyedian mme ŋkpɔ emi enɔ mbufo. 32Ekufehe ndik, ekpri otu erɔŋ; koro edide eti uduak Ete mbufo ndida Obio Ubɔŋ oro nnɔ mbufo. 33Enyam se mbufo enyenede eda efɔn ido ye mme ubuene; enam ekpat-okuk eke midikanike enɔ idem mbufo; ebon inyene ke heaven eke midikpuhu mbufo, ke ɔtɔ inɔ misaŋake ikpere, uta-ŋkpɔ minyuŋ ibiatke. 34Koro ɔtɔ nte ŋkpɔ-uto mbufo odude, do ke esit mbufo edinyuŋ odu.

Jesus Ekpep Ikɔt Esie Ete Efak ɔfɔŋ

35 Efak ɔfɔŋ ke isin mbufo eda, enam mme utuenikaŋ mbufo esak; 36mbufo ke idem mbufo enyuŋ ebiet mmɔ emi etiede ebet ete-ufɔk mmɔ, ke ini enye editode udia-ndɔ ɔnyɔŋ; man ke adaŋemi enye edidide edituak usuŋ, mmɔ ekpeberere enɔ enye ini kiet. 37Ɔfɔfɔn ɔnɔ mme asaŋutom emi ete mmɔ edidide okut mmɔ etiede ekpeme; ke akpanikɔ ke ndɔhɔ mbufo nte, enye ke idem esie eyefak ɔfɔŋ, anam mmɔ etetie ke okpokoro udia, onyuŋ ada mbet ɔnɔ mmɔ. 38Edieke edinyuŋ edide ufɔt okoneyo, mme ŋkpɔusen, ke enye edidi okut mmɔ enamde ntem, ɔfɔfɔn ɔnɔ mme asaŋutom oro. 39Edi efiɔk emi ete, edieke enyene-ufɔk ɔkpɔfiɔkde ini eke inɔ edidide, enye ekpekpeme, ikponyuŋ iyakke ebuŋ ufɔk esie eduk. 40Mbufo nde ebeŋe idem: koro Eyen Owo eyedi ke ini eke mbufo midorike enyin.

41Edi Peter ɔdɔhɔ Enye ete, Ɔbɔŋ, nte Afo otop ŋke emi ɔnɔ nnyin, mme otop ɔnɔ kpukpru owo? 42Ndien Ɔbɔŋ ɔdɔhɔ ete, Anie ndien edi akama-ukpɔhɔre, emi anamde akpanikɔ onyuŋ edide ɔniɔŋ, emi ete-ufɔk esie edinimde enye nte andikara kpukpru mbon ufɔk esie, man enye edeme udia ɔnɔ mmɔ ke edikem ini? 43Ɔfɔfɔn ɔnɔ asaŋutom oro ete-ufɔk esie edidide okut enye anamde ntem. 44Ke akpanikɔ ke ndɔhɔ mbufo nte, ete ufɔk esie eyenam enye edi andikara kpukpru se enyenede. 45Edi edieke asaŋutom oro edidɔhɔde ke esit esie ete, Ete-ufɔk mi ebigi eridi, edinyuŋ ɔtɔŋɔde ndimia ifin iren ye ifin iban eken, ndinyuŋ ndia ŋkpɔ, nnyuŋ ŋŋwɔŋ mmin nyuhɔ; 46ete-ufɔk owo oro eyedi ke usen eke enye midorike enyin, ye ke hour eke enye mifiɔkke, eyenyuŋ amia enye akamba ufen, onyuŋ ɔnɔ enye udeme ke otu mmɔ emi minimke ke akpanikɔ. 47Edi ofin emi ɔkɔfiɔkde mbet ete esie, ndien mibeŋeke idem, minyuŋ inamke nte uduak esie etemede, eyemia enye ediwak ubɔk ikpa; edi enye emi mifiɔkke, 48ndien anamde ŋkpɔ eke edotde ufen, eyemia enye ubɔk eke miwakke. Ndien owo ekededi eke enɔde enye ediwak ŋkpɔ, ke ediyom ediwak ŋkpɔ ke ubɔk esie: kpa ntre ŋko owo eke eyakde ediwak ŋkpɔ enɔ enye, ke ubɔk esie ke edibup se iwakde ikan.

49 Ŋkedi ndisin ikaŋ ke isɔŋ: ikaŋ oro akpakam obubere naŋa! 50Edi mmenyene baptism eke edinimde Mi; ndien ndu ke mbaba adaŋa didie tutu enam enye ema! 51Nte mbufo ese ete ŋkedi ndida emem ndi ke isɔŋ? Ndɔhɔ mbufo nte, Baba; 52akam edi ubahare ke nda ndi; koro ɔtɔŋɔde ke emi ubahare eyedu ke otu owo ition ke ufɔk kiet, owo ita eda ŋkaŋ kiet, iba eda ke ŋkaŋ eken. 53Ete eyedianare ye eyen-eren esie, eyen eyenyuŋ adianare ye ete; eka eyedianare ye eyen esie aŋwan, eyen-aŋwan eyenyuŋ adianare ye eka; eka ebe eyedianare ye ŋwan eyen, ŋwan eyen eyenyuŋ adianare ye eka ebe.

54Enye onyuŋ ɔdɔhɔ mme otu owo ete, Ke ini mbufo ekutde idiɔk enyɔŋ ɔwɔrɔde ke edem usop-utin, idaha oro mbufo ete, Edim ke edi; ndien osu ke uyo mbufo. 55Ke ini ofim usuk onyuŋ abarade, mbufo ete, Eyo eyefiop eti-eti; ndien ɔwɔrɔ kpasuk ntre. 56Mme mbubik, mbufo emefiɔk mme idiɔŋɔ eke edude ke iso isɔŋ ye ikpa-enyɔŋ; nsidi ndien ntak eke mbufo midomoke ini emi ifiɔk. 57Nsinyuŋ idi ntak eke mbufo ke idem mbufo midomoke ŋkpɔ ibiere se inende? 58Ke ini afo asaŋade ye owo-utɔk fo aka ke iso ebierikpe, ŋwana eti-eti ndinam emem ye enye ke usuŋ; mbak enye edidudi fi aka ke iso ebierikpe, ebierikpe onyuŋ ayak fi iɔnɔ isuŋutom, isuŋutom onyuŋ esin fi ke ufɔk-ŋkpɔkɔbi. 59Ndɔhɔ fi nte, uduwɔrɔke do, tutu osio akpatre okuk isɔn fo.

Currently Selected:

LUKE 12: ENA

Highlight

Copy