GENESIS 14

Emum Lot Ndien Abram Aka Akanyaŋa Enye

1EDIKEM, ke usen Amraphel edidem Shinar, Arioch edidem Ellasar, Chedorlaomer edidem Elam, ye eke Tidal edidem mme idut; 2mmɔ eŋwana ekɔŋ ye Bera edidem Sodom, ye Birsha edidem Gomorrah, ye Shinab edidem Admah, ye Shemeber edidem Zeboim, ye edidem Bela, 3enye edi Zoar. Mme mmɔ emi kpukpru edi ekɔŋ ke itihere Siddim, enye edi Inyaŋ Inuŋ. 4Mmɔ enam ŋkpɔ enɔ Chedorlaomer ke isua duopeba, ndien esɔŋ ibuot ke ɔyɔhɔ isua duopeta. 5Ekem ke ɔyɔhɔ isua duopenaŋ, Chedorlaomer ye ndidem emi esaŋade ye enye, edi edisuan mme Rephaim ke Ashteroth-karnaim, ye mme Zuzim ke Ham, ye mme 6Emim ke Shaveh-kiriathaim, ye mme Horite ke akamba obot mmɔ Seir, osim ke ofriyo Paran, emi 7ekperede wilderness. Ndien mmɔ efiak edi ke En-mishpat, enye edi Kadesh, edisuan ofuri isɔŋ mme Amalekite, ye mme Amorite nde emi etiede ke Hazazon-tamar. 8Ndien edidem Sodom ɔwɔrɔ ye edidem Gomorrah, ye edidem Admah, ye edidem Zeboim, ye edidem Bela, enye edi Zoar, ndien mmɔ edi ediŋwana ekɔŋ ye mmɔ ke itihere Siddim; 9ye Chedorlaomer edidem Elam, ye Tidal edidem mme idut, ye Amraphel edidem Shinar, ye Arioch edidem Ellasar, ndidem inaŋ ye ition oro. 10Ndien obube bitumen ewak ke itihere Siddim; ndien ndidem Sodom ye Gomorrah efeŋe itɔk, ekeduɔŋɔ do; ndien mmɔ ekesuhɔde efeŋe eka ikpɔ obot. 11Ndien mmɔ etaŋ kpukpru inyene Sodom ye Gomorrah, ye udia mmɔ kpukpru, enyɔŋɔ. 12Mmɔ enyuŋ eda Lot, eyen eyen eka Abram, emi etiede ke Sodom ye inyene esie enyɔŋɔ. 13Ekem owo kiet emi ɔkɔbɔhɔde, edi editiŋ ɔnɔ Abram eyen Hebrew, ndien enye oduŋ ke ɔtɔwɔk eto Mamre, eyen mme Amorite, eyen eka Eshcol, ye eyen eka Aner; mmɔ oro enyuŋ ediana ye Abram ke ufan.

14Ekem, Abram okop ete ke ekemum eyen ete imɔ enyɔŋɔ, ndien enye osio nditɔ ufɔk esie, emi enye ekekpepde mmɔ ekɔŋ, owo ikie ita ye efureta, ekebine tutu osim ke Dan. 15Ndien enye ye nditɔ ufɔk esie ebahare idem mmɔ; etiene mmɔ oro ke okoneyo, edisuan mmɔ, enyuŋ ebine mmɔ tutu osim ke Hobah, emi odude ke ubɔk ufien Damascus. 16Ndien enye ada kpukpru inyene oro afiak, onyuŋ ada Lot eyen ete esiemɔ, ye inyene esie, afiak, ye iban nde, ye kpukpru owo.

17Ekem edidem Sodom ɔwɔrɔ aka ke itihere Shaveh, enye edi itihere edidem, ete isobo ye enye, ke ini enye otode ndisuan Chedorlaomer ye ndidem oro ekedude ye enye, afiak edi. 18Ndien Melchizedek edidem Salem osio uyo ye wine edi: enye onyuŋ edi oku Abasi Ibom. 19Ndiem enye ɔdiɔŋ enye, ete, Abasi Ibom, andinyene enyɔŋ ye isɔŋ, osuk ɔdiɔŋ Abram: 20enyuŋ etoro Abasi Ibom, emi adade mme asua fo, esin fi ke ubɔk. Ndien enye osio ubak kpukpru ŋkpɔ kiet kiet ke itie duop ɔnɔ enye.

21Ndien edidem Sodom ɔdɔhɔ Abram, ete, Nɔ mi owo-owo, ndien bɔ inyene ke idem fo. 22Ndien Abram ɔdɔhɔ edidem Sodom, ete, Mma mmen ubɔk nnɔ Jehovah, Abasi Ibom, andinyene 23enyɔŋ ye isɔŋ, nte ke mbɔhɔ baba ndidi ye idem uruk ikpa-ukot ke kpukpru se inyenede fi, mbak afo edidɔhɔ ete, Edi ami mfori Abram: 24ke mibɔhɔke se mkparawa ekediade, ye udeme mbɔŋ emi esaŋade ye ami, Aner, ye Eshcol, ye Mamre: yak mmɔ ebɔ udeme mmɔ.

Currently Selected:

GENESIS 14: ENA

Highlight

Copy