UTOM MME APOSTLE 14

Paul ye Barnabas Eka Obio Iconium Ndikwɔrɔ Ikɔ Abasi

1EDIKEM ke Iconium mmɔ mbiba eduk ke synagogue mme Jew, enyuŋ ekwɔrɔ ikɔ ke ido eke esinde ata ediwak mme Jew ye mme Greek nde enim ke akpanikɔ. 2Edi mme Jew eke esɔŋde ibuot edemere mme Gentile esin mmɔ esua nditɔ-ete. 3Ntre ke mmɔ etie do anyan ini ekwɔrɔ ikɔ ye uko ke Ɔbɔŋ; Ɔbɔŋ onyuŋ onyime ikɔ mfɔn Esie, ɔnɔ mmɔ ndinam mme idiɔŋɔ ye mme utibe-ŋkpɔ. 4Edi mbio-obio ebahare; usuk mmɔ eda ye mme Jew, usuk eda ye mme apostle. 5Edi ke ini mme Gentile ye mme Jew ye mbɔŋ mmɔ ebumerede eka ndisuene mmɔ, nnyuŋ ntɔŋɔ mmɔ ke itiat, 6mmɔ efiɔk se iyomde nditibe, enyuŋ efeŋe eka Lystra ye Derbe, mme obio Lycaonia, ye isɔŋ eke akande edem oro okuk: 7enyuŋ ekwɔrɔ gospel do.

8Ndien owo kiet odu ke Lystra, emi ukot esie misɔŋke; enye edi owo mbuŋɔ toto ke emana esie, akanam isaŋake. 9Enye okop nte Paul etiŋde ikɔ: ndien Paul owuk enyin ese enye, okut ete enye enyene mbuɔtidem nte ekemde ndinam idem ɔsɔŋ enye, 10onyuŋ ɔdɔhɔ enye ke ɔkpɔsɔŋ uyo ete, Daha ke enyɔŋ, neŋere da ke ukot. Ndien enye obumere adaha ke enyɔŋ, asaŋa. 11Ke ini mme otu owo ekutde se Paul anamde, mmɔ esio mkpo efiori ke usem Lycaonia, ete, Mme abasi emada mbiet owo esuhɔre edi ke ɔtɔ nnyin. 12Mmɔ enyuŋ ekot Barnabas, ete, Jupiter, ye Paul, ete, Mercury, sia enye etiŋde ikɔ akan. 13Ndien oku Jupiter, emi temple esie adade ke iso obio, ada enaŋ ye ekara emi enamde ke flower, edi ke inua-otop obio, oyom ndiwa uwa ye mme otu owo oro. 14Edi ke ini mme apostle, Barnabas ye Paul, ekopde, mmɔ ewai ɔfɔŋidem mmɔ, ebumere eduk ke otu mbio-obio, efiori ete, 15Mbɔŋ owo, nso ke mbufo enam? Nnyin nde idi owo, ibiet mbufo ke uduot nnyin, inyuŋ ida eti etop isɔk mbufo, ite mbufo ekabare ekpɔŋ mme ikpikpu ŋkpɔ emi etiene Abasi uwem, emi akanamde enyɔŋ ye isɔŋ ye inyaŋ ye kpukpru se idude mmɔ ke esit. 16Ke mme eyo eke ebede Enye akayak kpukpru mme idut esaŋa ke mme usuŋ idem mmɔ. 17Edi Enye iyakke ŋkpɔ-ntiense anana ɔnɔ Enye, ke emi Enye ɔfɔnde ido, onyuŋ ɔnɔde mbufo edim heaven ye ini eduek, onyuŋ ɔnɔde mbufo udia, anam esit mbufo ɔyɔhɔ ye idaresit. 18Edi ɔsɔŋ mme apostle ndida kpa ikɔ emi ŋkpan mme otu owo ndiwa uwa nnɔ mmɔ.

19Edi mme Jew eto ke Antioch ye Iconium edi do: ndien ke mmɔ ema ekeyut mme otu owo, mmɔ etɔŋɔ Paul ke itiat, enyuŋ eduri enye esio ke obio, ese ete enye akpa. 20Edi nte mbet edade ekan enye ekuk, enye adaha ke enyɔŋ oduk ke obio: ndien ke ndaŋ-nsiere enye ɔwɔrɔ ye Barnabas aka ke Derbe. 21Ke mmɔ ema ekekwɔrɔ gospel enɔ obio oro, enyuŋ enam ediwak owo ekabare edi mbet, mmɔ efiak enyɔŋ Lystra, ye Iconium, ye Antioch, ekɔsɔŋɔ mbet esit: 22ekpe ye mmɔ ete esuk eyire ke mbuɔtidem, enyuŋ esian mmɔ ete, nnyin inyene ndibe ke ediwak ukut nduk ke Obio Ubɔŋ Abasi. 23Edi ke ema ekemek mbiowo enim enɔ mmɔ ke kpukpru ufɔk Abasi, enyuŋ ebɔŋ akam, enyuŋ etre udia, eyak mmɔ esin ke ubɔk Ɔbɔŋ emi mmɔ ekebuɔtde idem ye Enye. 24Ekem mmɔ esaŋa ke Pisidia ebe edi ke Pamphylia. 25Ndien ke mmɔ ema ekekwɔrɔ ikɔ ke Perga, mmɔ esuhɔre edi ke Attalia; 26enyuŋ eto do ewat edi ke Antioch, ke ebiet emi ekayakde mmɔ esin ke ubɔk mfɔn Abasi, ete mmɔ enam utom emi mmɔ ekenamde ema ke emi. 27Edi ke ini mmɔ esimde do, mmɔ ekot ufɔk Abasi ebon ɔtɔ kiet, ebuk kpukpru se Abasi akadade mmɔ anam, ye adaŋa nte Enye ekebererede usuŋ mbuɔtidem ɔnɔ mme Gentile. 28Mmɔ enyuŋ etie do ye mbet anyan ini.

Currently Selected:

UTOM MME APOSTLE 14: ENA

Highlight

Copy