1 ŊWED THESSALONICA 5
5
Edu ke Mbeŋe-Idem Ebet Edidi Christ
1NDITƆ-ETE, inaŋa nte ewet baba ŋkpɔ kiet enɔ mbufo ebaŋa mme ini ye mme eyo. 2Koro mbufo ke idem mbufo emetim efiɔk ete usen Ɔbɔŋ mɔŋ edi nte inɔ ke okoneyo. 3Ini mme owo edɔhɔde ete, idu ke emem ye ifure, kpa adaŋoro ke nsobo abuat mmɔ, nte emi uman abuatde ŋwan idibi; ndien mmɔ idikwe usuŋ ubɔhɔ. 4Edi mbufo nditɔ-ete iduhe ke ekim, eke ekpesinde usen oro abuat mbufo nte inɔ: 5koro kpukpru mbufo edi nditɔ uŋwana ye nditɔ uwemeyo: nnyin idige mbon okoneyo inyuŋ idige mbon ekim. 6Mmɔdo ndien, eyak nnyin ikude idap, nte mmɔ eken, edi eyak nnyin itaba idap ikpeme, imum idem ikama. 7Koro mmɔ eke edede idap ede ke okoneyo; mmɔ eke enyuŋ ekpade mmin ekpa mmin ke okoneyo. 8Edi eyak nnyin, emi idide nditɔ uwemeyo, imum idem nnyin ikama, isine mbuɔtidem ye ima nte ŋkpɔ ikpanesit, inyuŋ iyara idori-enyin erinyaŋa nte ndun ibuot. 9Koro Abasi mikonimke nnyin inɔ iyaresit, edi okonim nnyin ete ibɔ erinyaŋa ke Ɔbɔŋ nnyin Jesus Christ; 10emi akakpade ke ibuot nnyin, man, ye nnyin itabade idap ke uwem, ye nnyin idede, ikpodu uwem ye Enye. 11Mmɔdo mbufo esɔŋɔ kiet eken esit, enyuŋ enam kiet eken ɔkɔri, kpa nte mbufo enanam.
12Imebeŋe mbufo, nditɔ-ete, ite ediɔŋɔ mmɔ emi enamde utom ke otu mbufo, enyuŋ ekararde mbufo ke Ɔbɔŋ, enyuŋ enɔde mbufo item. 13Ekpono mmɔ eti-eti ke ima kabaŋa utom mmɔ. 14Edu ke emem ke ufɔt mbufo. Imonyuŋ ikpe ye mbufo, nditɔ-ete, esua enɔ mmɔ eke esaŋade otime-otime, esɔŋɔ mbon iduɔ-esit idem, ekama mbon mmem-idem, enyene anyan ime ye kpukpru owo. 15Ekpeme ekuyak owo ada idiɔk osio owo usiene idiɔk; edi kpukpru ini ebine se ifɔnde, owo anam ntre ye kiet eken, onyuŋ anam ntre ye kpukpru owo. 16Edat esit kpukpru ini; 17Ekudop akam; 18Enɔ ekɔm ke kpukpru ŋkpɔ; koro emi edi se Abasi amade mbufo enam ke Christ Jesus. 19Ekunimi Spirit; 20Ekusin erisiak uduak Abasi ke ndek; 21edomo kpukpru ŋkpɔ ese; emum se ifɔnde ekama; 22Ebet kpukpru oruk idiɔk-ŋkpɔ.
23Abasi emem ke Idem Esie akpakam anam mbufo esana ofuri-ofuri, onyuŋ ekpeme mbufo ofuri-ofuri ke spirit ye ukpɔŋ ye ikpɔhidem, anam mbufo ekunyene ndo ke ini Ɔbɔŋ nnyin Jesus Christ edidide. 24Enye emi okotde mbufo edi Abasi akpanikɔ; Enye eyenyuŋ anam se Enye ɔkɔŋwɔŋɔde osu.
25Nditɔ-ete, enam mkpe-ubɔk enɔ nnyin.
26Ekɔm kpukpru nditɔ-ete ye edisana ntim-inua. 27Mmowuk mbufo ke Ɔbɔŋ nte mbufo enam ekot ŋwed emi enɔ kpukpru nditɔ-ete.
28Mfɔn Ɔbɔŋ nnyin Jesus Christ akpakam odu ye mbufo. Amen
Currently Selected:
1 ŊWED THESSALONICA 5: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.
