1 ŊWED THESSALONICA 3
3
Ntak Emi Paul Okosiode Timothy Ɔdɔŋ
1MMƆDO ke ini nnyin mikemeke aba ndime ime, ikut ite ɔfɔn nnyin ndisuhɔ ikpɔŋ ke Athens: 2Ndien idɔŋ Timothy, eyen-ete nnyin, emi onyuŋ edide anam-utom Abasi ye gospel Christ, ite anam mbufo esɔŋɔ eda, onyuŋ ɔsɔŋɔ mbufo esit ke mbuɔtidem mbufo; 3mbak owo ndomo kiet edisehere ɔkpɔŋ itie esie ke ntak ukut oro; koro mbufo ke idem mbufo efiɔkde ete oro edi akaŋa nnyin. 4Koro ke akpanikɔ ke adaŋemi ikodude ye mbufo, nnyin ibem iso isian mbufo ite nnyin iyebe ke ukut; mbufo emenyuŋ efiɔk ete ama ɔwɔrɔ osu kpa ntre. 5Ke ntak emi ami ŋko ŋkekemeke ndime ime aba, nsio owo ndɔŋ, man mfiɔk mbaŋa mbuɔtidem mbufo, mbak ke usuŋ ekededi andidomo ama odomo mbufo, okpɔsɔŋ utom nnyin okponyuŋ ɔwɔrɔ ikpikpu. 6Edi ke adaŋemi Timothy otode ke ŋkaŋ mbufo edi ke ɔtɔ nnyin idahemi, onyuŋ adade eti mbuk mbuɔtidem ye ima mbufo ɔsɔk nnyin onyuŋ asiande nnyin ete mbufo eteti nnyin ke eti esit kpukpru ini, onyuŋ ɔdɔdɔŋ mbufo ndikut nnyin kpa nte ɔdɔŋde nnyin ndikut mbufo; 7ntre ke etop mbuɔtidem mbufo ɔsɔŋɔ nnyin esit abaŋa mbufo, nditɔ-ete, ke ufɔt ndusihere ye ukut nnyin. 8Imokop uwem ndien ke idem, edieke mbufo esɔŋɔde eda ke Ɔbɔŋ. 9Koro nso ekɔm ke nnyin ikeme ndikɔm Abasi mbaŋa mbufo, ke ofuri idara eke idarade ke ntak mbufo ke iso Abasi nnyin? 10Nnyin isɔŋɔ ibɔŋ akam eti-eti okoneyo ye uwemeyo, ite ikpakam ikut mbufo iso, inyuŋ inam se inanade mbufo ke mbuɔtidem ɔyɔhɔ.
11Abasi ye Ete nnyin ke Idem Esie, ye Ɔbɔŋ nnyin Jesus, akpakam ada nnyin usuŋ edi ke ɔtɔ mbufo: 12Ɔbɔŋ akpakam onyuŋ anam mbufo ekɔri enyene ima ɔyɔhɔ ɔyɔhɔ ye kiet eken, enyuŋ enyene ima ye kpukpru owo, kpa nte nnyin inyenede ye mbufo; 13man oto do Enye anam esit mbufo enyene iwuk onyuŋ anana ndo ke edisana ido ke iso Abasi ye Ete nnyin, ke ini Ɔbɔŋ nnyin Jesus edidide ye kpukpru nti ikɔt Esie.
Currently Selected:
1 ŊWED THESSALONICA 3: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.
