2 TIMOTHY 1

1Ni-wehnag Timothy:

Ia ant ep wo haꞌichu i m-oꞌohani ahni Paul mani d kehshaj g Jesus Christ. Do Jiosh tatchui mant wo i ahgahi ab amjed g alidaj. T hab wo bei g wechij doakag hegam mat ab wo i s-wohoch ab amjed g alidaj hab masma mash wa heki hu hab kaij matsh hab wo e juh.

2Ab g ni-kaiham ahpi map d ni-alidag t-wohochudadag ed.

Ab o wa si s-m-hoꞌigeꞌid g t-ohg Jiosh g t-kownalig Jesus Christ wehm ch ab wo wa baꞌich i m-mahkad g i wehmtadag ch s-ap tahhadkam.

Mash g Paul am i gewkemhun g Timothy

3Chum ani hekid ab si hoꞌigeꞌid g Jiosh mani hekid i ni-hoꞌigeꞌidahun m-wehhejed. Jiosh ash wa am ha tashogid g t-shohshon matt has masma wo himad g t-doakag ch ab wo si has elidad. Kuni hab masma hab ni-wua ch hab pi shaꞌi ni-kudut. 4P ahpi hab waꞌap ab s-wohochud g s-kehg haꞌichu ahgaj g Jiosh. Kuni s-chegito mapt si pi ap e taht mant hekid am i m-dagito. Kuni s-m-neidamk mapt ep wo si s-hehgigk. 5Am apt ha oidk hab e juh g e-huꞌul Lois ch e-jeꞌe Eunice mapt ab i s-wohoch g Jiosh haꞌichu ahga.

6Pt wo s-chegito matt ab toa g t-nohnhoi m-ab k am m-wehhejed t-hoꞌigeꞌidahu. T g Jiosh ab m-mah g gewkdag k am m-chehgi mapt has i mahs chikpan hab wo junihid wehhejed. Pegih, pt wo i e gewkad k am hab wo junihid. 7Jiosh at ab t-mah g Hekia S-apꞌekam Gewkdag mat an wo t-uꞌukchid ch ab wo t-mahkchid g gewkdag ch pihk elidadag ch dodolimadag ahchim mach d hemajkamgaj. Kutt heg hekaj pi haꞌichu wo shaꞌi ehbidad.

8Pegih, pt pi has wo e elidad am wehhejed neokch g t-kownalig Jesus ch hab wa masma pi has wo e elidad ab ni-amjed mani wehhejed d lihso. Ab o t-mahkch g Jiosh g gewkdag matt am wehhejed wo t-shoꞌigch. Kupt wo si nako g e-shoꞌigdag am ahgachugch g s-kehg haꞌichu ahgaj. 9Do Jiosh mat t-doꞌibia ab pi apꞌekam t amjed. Pi att has masma has wo t-juh k wo t-doꞌibia. Gd hu i si wehpeg at am i apꞌech mat wo s-t-hoꞌigeꞌel am gahi wuhshanim g e-alidag Jesus Christ matt d wo Jiosh hemajkamgak. 10Ia at jiwia g t-doꞌibiakam Jesus Christ k am i t-tashogi g Jiosh hoꞌigeꞌidadag. Kah att g s-kehg haꞌichu ahgaj k s-mai matt has masma s-ap am wo gahi wuwha g muhkig edgidch g pi ha huhugedam doakag.

11Jiosh at am i ni-kei mant wo ahgachugad g s-kehg haꞌichu ahgaj ch wo ha mashchamad. 12Kuni heg hekaj hab muꞌi ni-shoꞌigchud ch pi shaꞌi has ni-elid id amjed nani pi s-mahch hegai mani ab s-wohochud. T heg wo e nako mat s-ap wo ni-nuhkudad mant wehs am hab wo juh mat haschu wehhejed ab i ni-gawulkai k ab wo ai mat ep wo jiwia.

13Ab ani m-mashcham mo has chuꞌig g Jiosh haꞌichu ahga. Kupt heg wo waꞌi ahgahid nap pi heg s-wohochud ch ab si tatchua g Christ ch d hemako heg wehm. 14Am o t-eda g Hekia S-apꞌekam Gewkdag ch ab t-mahkch g gewkdag. Kutt hekaj am wo si s-ap nuhkud g s-kehg haꞌichu ahgaj g Jiosh.

15Am ap wa s-mahch mat ia wabsh i ni-dagito hegam mo ab Asia t amjed ia ni-wehmajkahim, chum wa g Phygelus ch Hermogenes. 16-17K wabshaba g Onesiphorus pi has e elid mani d lihso ch an i ni-gahghi ia jiwiak Rome kihhim t am am hugkam mat ni-cheh k muꞌikko ia i ni-chehgimed k ab ni-mamka g s-ap tahhadkam. Kuni ab tahni g Jiosh mat baꞌich ab wo i s-ha hoꞌigeꞌel hegam Onesiphorus. 18Jiosh at wo wa s-hoꞌigeꞌel g Onesiphorus heg i tash ed matt ab wo nam g Jiosh. S-mahch ap mat heꞌes haꞌichu s-ap am hab ni-juni g Onesiphorus amai Ephesus kihhim t am.

Currently Selected:

2 TIMOTHY 1: ood

Highlight

Copy