MAK 8

I Jisas mo vangani na tangaloi u tari vakaivati

(Mat 15.32-39)

1Lo taro hi a vao lakua dolua vake ramote mulemai tabulutaki taliku. Lolona a kaga hinaka tikei kwara rana kani, i Jisas mo kware na nona ngwalagelo vaki maia mo viti 2“Nu hakavi na tangaloi vano hika vohoki, huri rau hugu maiau a rani kaitolu, vae hika a hinaka tikei kwara rana kani. 3Diko na horara mule hinea rahe kanikani tea, vae rana matemateki vula lo hala, huri ratuaki rau vanamai vakahao lengalenga.”

4A nona ngwalagelo ramo uhia ramo viti “?Tana hagwe na hinaka ave lo vanua vuroki hika kwara ne taritarisa tana vangani na tangaloi vano hika kinia?”

5Mo uhira mo viti “?Tulu hago a bereti* kaivihe?”

Ramo daraki lakwae ramo viti “Kaibitu.”

6Mo kwaha mana vao kwara rana hugu evina. Vunu mo lavi na bereti kaibitu hi, mo lagwaki God huri, vunu mo volo utuutuhira, mo bete lakwa na nona ngwalagelo kwara rana hileki lakwa na vao. A nona ngwalagelo ramo vai hokinia. 7Aira rau hago ika kwaririgi vake, he rusa tea. I Jisas mo lagwaki God huri, vunu mo viti lakwa na nona ngwalagelo kwara rana hilekinira vake. 8-9Aira vunu rau kani, rau kugwa. A valuvaluga doluaki u tari vakaivati. Vunu a nona ngwalagelo ramo vileki na bereti vano hi hinea a tangaloi ramo kani dore, ramo hokonira a kete kaibitu rau kukwere kehe nga. I Jisas mo hora na tangaloi vano hi ramo mulemule, 10vunu heheriki aia mana nona ngwalagelo ramo galo tilolo agaga ramo vano vaki lo vanua Dalmanuta. #Mat 14.14-21; Mak 6.35-44; Luk 9.12-17; Sione 6.5-13

A Varisi ramo uduhuri na kaivosangi

(Mat 16.1-4)

11Hikani a Varisi* ratuaki rau vanamai, ramo maraka ramo viroro mai Jisas. Rau lengaia kwara rana kahi haro na domina, vae ramo uhia huri na kaivosangi tina taetae kwara ne vosangi kwara i God aia maia. #Mat 12.38; 16.1; Luk 11.16; Sione 6.30 12I Jisas mo mabuharaki mo viti “?Kworohokinia i kamu hinea tulu toka lo taro hika tulu mo uduhuri na kaivosangi kiau? Kareaki na viti lakwakamu, a kaivosangi tikei kwara na matangwasaraki lakwakamu tulu ne taga.” #Mat 12.39; Luk 11.29

13Mo tirakinira, mo mule taliku vaki lolo aga, mo tinakaki kwara ne kwalao utuhi na kwai tokatoka lakua vaki tavaluki.

A is nona Varisi maira mana noi Herot

(Mat 16.5-12)

14A nona ngwalagelo a lologa u bongi kwara rana lai a bereti*, a kaga bereti katukwale vohoki maira lolo aga. 15I Jisas mo kwahabibira mo viti “!Tulu tagahuri ne karea! A is nona Varisi* maira mana noi Herot* u hati.” #Luk 12.1

16Ramo maraka hika ramo toko vitiviti huri na leo hi siboga, ramo viti “U viti kwehi huri i kita tahe lai te bereti.”

17I Jisas u kikilai kwara rau tuku viti aha, vae mo uhira viti “?Kworoho tulu mo rongo hati tulu mo kwahakwaha kwehi kwara tulu he lai te bereti? ?Tulu he rongo kikilakinia te radu? ?Tulu he rongo duruhakinia te radu? !A domimiu rau vono! #Mak 6.52 18Tulu taga vae tulu he taga hoko tea. Tulu rongo vae tulu he rongo hoko tea. ?Tulu he domihagwe tea 19lolona hinea nomo volo utuutuhi na bereti kailima huri na tangaloi u tari vakailima? ?Vae a kete kaivihe tulu mo hokoni na bereti tilologa hinea tamo kani dore?”

Ramo daraki ramo viti “Hangavulu dongwana kairua.” #Mat 14.15-21; Mak 6.35-44; Luk 9.12-17; Sione 6.5-13

20I Jisas mo uhira taliku mo viti “?Lolona hinea nomo volo utuutuhi na bereti kaibitu huri na tangaloi u tari vakaivati, vae a kete kaivihe tulu mo hokoni na bereti tilologa hinea tamo kani dore?”

Ramo daraki ramo viti “Kaibitu.” #Mat 15.32-38; Mak 8.1-9

21Mo kwaha maira mo viti “?Vae tulu he rongo duruhakinia te radu?”

I Jisas mo vakahiki na tangaloi matadodo lo gwatuivanua Betsaeta

22Hikani ramo vanamai vaki lo gwatuivanua Betsaeta, vae a tangaloi ramo lavi na tangaloi katukwale a matana u dodo vaki mai Jisas. Rau lengaia kwara ne tau na kabana luna. 23I Jisas mo hago lo kaba na tangaloi hini a matana u dodo, mo lavia tivarea tina gwatuivanua. Mo lido tilo mata na tangaloi hi mo rovo, mo tau na kabana luna, vunu mo uduhuri kinia mo viti “?Ku taga hoko te kinau?” #Mak 7.32-33 #Sione 9.6

24A tangaloi hi mo lalangao mo viti “Nu taga a tangaloi rau tuku lakalakao vae rahe matangwasara tea. Aira hoki na vikai vohoki.” 25Vunu i Jisas mo tau na kabana tilo mata na tangaloi hi taliku, a tangaloi hi mo rada karakara, a matana ramo karea taliku, mo taga vunuhi na kinau rau matangwasara. 26I Jisas mo horae mule, mo viti kwara, “Hika ko hatu mule taliku vaki lo gwatuivanua hi, aia ko hena hika vaki tatamu.”

A matangwasarakiana noi Pita huri i Jisas

(Mat 16.13-20; Luk 9.18-21)

27Vunu i Jisas mana nona ngwalagelo rau vano vaki lo gwatuivanua kwaririgi dalidali na gwatuivanua lakua Sisaria Vilivae. Ramo lakao lo hala, i Jisas mo uduhuri kina nona ngwalagelo mo viti kwara, “?A tangaloi rau viti kwara i nau ihe?”

28Ramo daraki ramo viti “Tuaki rau viti kwara i nigo i Sione a tangaloi na bavtaes, tuaki rau viti kwara i nigo i Elaesa, vake ratuaki rau viti kwara i nigo a tangaloi* duruduruki te katukwale.” #Mak 6.14-15; Luk 9.7-8

29Aia mo uduhuri kinira mo viti “?Vae i kamu tulu viti kwara i nau ihe?”

I Pita mo daraki lakwae mo viti “I nigo i Vurae*.” #Sione 6.69

30Vunu i Jisas mo surira viti “Tulu hatu vitiau lakwa na tangaloi dolua vake.” #Mak 9.9

I Jisas mo matangwasaraki kwara vae ne mate, vunu ne maraka taliku

(Mat 16.21-23; Luk 9.22)

31Vunu i Jisas mo tinakaki mo toko huhui na nona ngwalagelo, mo viti kwara, “I nau a Natu* na Tangaloi, vae nana rongo hati haburu. A ngwarasea* maira, a tangaloi* lingilingi lalakua mana tangaloi* kikikila na Uliuli* Kokona maira rana bega kiau, rana kwohi mateiau. Vae takuni tina rani kaitolu na maraka taliku.” #Mat 17.12; Mak 9.12; Luk 17.25 32Aia mo viti na leo vano hikani mo matangwasara lakwara. Vunu i Pita mo lai gegeakinia, mo kwaha suria. 33Vae i Jisas mo tagai na nona ngwalagelo ratuaki, mo kwaha madi lui Pita mo viti “!Setano*, ko vano tiau! A domidomimu vano hi a domidomi nona tangaloi vohoki, hete domidomi noi God.”

A tangaloi noi Jisas rana hatu huri na noga domidomi siboga

(Mat 16.24-28; Luk 9.23-27)

34Vunu i Jisas mo kware na vao mana nona ngwalagelo vaki maia, mo kwaha maira mo viti “Diko te tangaloi u lengaia kwara ne huriau, ne tiraki na nona domidomi sibona ne kwali na kaibetuna, ne huriau. #Mat 10.38; Luk 14.27 35Diko te tangaloi ne uti na mamaurianana vae ne vai salakinia. Vae ihe hinea ne tiraki na mamaurianana huriau, vake huri na Roro Karea, vae ne ahi. #Mat 10.39; Luk 17.33; Sione 12.25 36Diko te tangaloi u lai savi na vivilagoki na varamana doluaki, vae diko a mamaurianana ne sala, vae nehe hagwe na kinau te vohoki. 37A kinau tikei kwara a tangaloi ne volitukuhi na mamaurianana kinia. 38Lo taro hika a tangaloi rau tuku vai na hatiki, rau tuku veveki rera vovohi God. Diko te tangaloi u maemae kwara ne matangwasarakiau mana nogu leo lo taro hika, vae i nau vake a Natu* na Tangaloi, na maemae kwara na matangwasarakinia, lolona hi na mulemai mana kaihora kokona rusa tina taetae lolo hahaviada noi Tamagu.” #Mat 10.33; Luk 12.9

Currently Selected:

MAK 8: HWT

Highlight

Copy