MAK 12

A tavaluileo huri na tangaloi hati rau tava tano

(Mat 21.33-46; Luk 20.9-19)

1Hikani i Jisas mo kwaha maira kina tavaluileo mo viti kwara, “A tangaloi katukwale u rivuki na karo aira hi ramo toko vaivai waen lo kwaiga, a talu katukwale. Mo hau na ara dalia, mo keli na kwalu huri na kaigwole na waen, mo tabe na ingwa na kaitagahuri u tu aulu kwara ne tagataga mana talu hi. Vunu mo tirakinia lakwa na tangaloi kwara rana boloki luna rana tava lakwae, mo tiraki na tatana mo vano mo lagalaga lo vanua dolua vakahao. #Aes 5.1-2 2Lo taro na makuriana mo hora na tangaloi boloki katukwale vaki mana tangaloi na tava tano vano hi, kwara ne lai te kaitava tiura. 3A tangaloi na tava tano vano hi ramo hagobibi na kaihora hi, ramo takwilia ramo horae mule taliku vuroki. 4Hikani a hugwe na talu hi mo hora na nona kaihora dolua vake, vae a tangaloi na tava tano vano hi ramo kwohi na gwatuna, vake ramo veveki rera kinia. 5Vunu a hugwe hi mote hora na kaihora katukwale vake, vae rau kwohi mateia. Rusa vake rau vaira kwehi nga, tuaki rau kwohira vohoki, tuaki rau kwohi mateira. 6Mo vanovano a tangaloi katukwale vohoki mo eno kwara ne horae, aia hi i natuna, a natu tabe. Vae rovonakinia hi mo horae vaki maira. Mo viti kwara, ‘Rana domi mavaki i natugu.’ #Jen 22.2; Mat 3.17; 17.5; Mak 1.11; 9.7; Luk 3.22; 2 Pita 1.17 7Vae a tangaloi na tava tano hini ramo maraka ramo toko kwahakwaha kinira ramo viti kwara, ‘!Tagaia! !A natu na hugwe hi aia hi! Vae te taroki a vanua noi tamana ne kwareki a nona. !De! !Ta kwohi mateia! Vunu a nona vanua ne kwareki a noda.’ 8Hikani ramo lavi na natu na hugwe hini, ramo kwohi mateia, ramo vohokinia tivarea tina talu hi.” #Hib 13.12

9I Jisas mo uduhuri kinira mo viti kwara, “?Vae a hugwe na talu hi ne vai kworoho? Ne vanamai ne kwohi mate savi na tangaloi na tava tano vano hi, vunu ne tau na talu hi tilo kaba na tangaloi na tava tano dolua. 10?I kamu tulu he valuki na leo te hika tina Uliuli* Kokona? Hi mo viti kwara,

‘A beru hinea a kaitabe na ingwa ramo bega kinia

rau domi kwara u hati,

vae mo mulemai mo kwareki a beruberu aulu. #Bol 4.11; 1 Pita 2.7

11Hikani a Hugwe* aia u vaia,

keu tagaia u karea haburu.’ ” #Sam 118.22-23

12A kaitomuaki nona gwaloana noi Isrel* ramo vai kwara rana kwiribibi i Jisas huri rau kikilai kwara u viti na tavaluileo hi u kwahakwaha kaga. Vae aira rau mataku kina vao, vae huri hi ramo tirakinia ra va vano. #Mat 14.5; Luk 22.2

A leo uhiuhi huri na voli takis

(Mat 22.15-22; Luk 20.20-26)

13A kaitomuaki nona gwaloana noi Isrel* vano hi ramo hora na Varisi* maira mana tangaloi noi Herot #12.13: A tangaloi noi Herot. Kona tagai na leo hi mana domianaki hi lo 3.6 lo leo hinea evina halaradu. ratuaki vaki mai Jisas kwara rana tiusinae kina leo uhiuhi. #Mak 3.6 14Ramo vanamai vaki maia ramo viti “Tisa, keu kikilai kwara i nigo a tangaloi bakoto, vae kohe mataku te kina tangaloi huri kohe domi huri tea kwara a tangaloi u lakua diko he lakua tea, vae ku tuku huhui na tangaloi savia kina hala noi God lo hala bakoto. ?Ko viti lakwakami, diko tana voli a takis lakwai Sisa*, a hugwe lakua Rom, tana galo lo noda Tangwata* diko hetea? ?Tana voli, diko hetea?”

15Vae i Jisas u kikilai kwara rau viti ki ringoga vohoki, mo daraki mo viti “?Kworoho tulu mo vai kwara tulu ne tiusineau? Tulu lavi na mane* vanamai, na tagaia.”

16Ramo lavia katukwale lakwae, mo uduhuri kinira mo viti kwara, “?A nakohe mana hinahe hika luna?”

Aira ramo darakinia ramo viti “A nako i Sisa mana hinana.”

17Hikani i Jisas mo darakinira mo viti “U karea, a kinau hinea a noi Sisa, tulu bete lakwai Sisa. A kinau hinea a noi God, tulu bete lakwai God.”

Vae rau idila haburu kinia. #Rom 13.7

A leo uhiuhi huri na marakaana tina mateana

(Mat 22.23-33; Luk 20.27-40)

18A Satiusi* ratuaki ramo vanamai vaki mai Jisas. Aira hi rau tuku viti kwara a tangaloi rau mate vae ranahe maraka te taliku tina mateana. #Bol 23.8 19Ramo uduhuri kinia ramo viti kwara, “Tisa, i Mosis u uli na tangwata* hika hurikita hinea mo viti ‘Diko a tangaloi u mate ti vavinehina, i natugaru tikei, vunu i tuana ne lavi na gwatina raru ne bava natu ne lai tanotano i tamana hi mo mate.’ #Jen 38.8; Dut 25.5 20Vakatukwale a ratua aira kaibitu, a natu tomua mo laki, vae u mate i natugaru tikei. 21Vunu hurihuria mote laki mana gwati hi, mo mate vake i natugaru tikei. A tua kaitoluki hokinia nga. 22Savira hokinia nga. A ratua hi kaibitu rau laki mana vavine hi rau mate rahe bava te natu vohoki. Vae ki rovonaki a vavine hi mo mate. 23?Vae lo rani kwahaia hi a mateana rana ahi taliku lo Rani na Marakaana, vae a vavine hi ne kwareki i vavinehihe? A ratua hi kaibitu aira vunu rau laki maia.”

24I Jisas mo daraki lakwara mo viti kwara, “Tulu vakasile vohoki. ?Tulu kikilai kwara kworoho? Huri i kamu tulu he kikilai na Uliuli* Kokona tea mana huirana noi God vake. 25Lolona a mateana rana maraka taliku vaki lo ahiana, rana hoki na kaihora maira lolo taetae, a ravavine mana ngwera ranahe laki tea. 26?Vae huri na mateana kwara rana maraka taliku, i kamu tulu he valu te lo buku* hi i Mosis mo uli lo vevehuri huri na vikai kelekele hi mo kao? U uliana ba kwara i God u viti lakwai Mosis kwara, ‘I nau a God noi Evraham, a God noi Aesik, vake a God noi Sekov.’ #a Eks 3.2; b Eks 3.6,15,16 27Aia a God na tangaloi rau ahi, hete God na tangaloi rau mate. Vae i kamu tulu vakasile vohoki.”

A tulikileo hinea u lakua karakara

(Mat 22.34-40; Luk 10.25-28)

28A tangaloi* kikikila na Uliuli* Kokona aia takwa-hi, mo rongora ramo toko vikwahaki. Aia u kikilai kwara i Jisas u bete na kaidaraki bakoto lakwara, hikani mo vanamai vaki maia mo uduhuri kinia mo viti “?A hava tulikileo hinea kwara u lakua karakara?”

29I Jisas mo viti “A tulikileo hinea kwara u lakua karakara aia hikani. Mo viti ‘Gwaloana noi Isrel*. Tulu rongohuri ne karea. A Hugwe* a noda God aia hi kehekeheki a Hugwe. 30Ko lagwa mana nomu Hugwe i God kina domimu vunuhia, mana mamaurianamu vunuhia, mana domidomimu vunuhia, mana huihuimu vunuhia.’ #Dut 6.4-5; Jos 22.5; Luk 10.27 31A tulikileo gwatu kairuaki aia hikani. Mo viti kwara, ‘Ko lagwa mana tangaloi rau hugu laliki maiko, kona vai tabetabekinira hokinia komo vai tabetabekinigo sibomu.’ A tulikileo tikei vake kwara u lakua karakara siletirarua hi.” #Lev 19.18; Rom 13.9; Gal 5.14; Sem 2.8

32A tangaloi kikikila na Uliuli Kokona hi mo kwaha mai Jisas mo viti “Tisa, u karea haburu. Kareaki hokinia hi komo viti. A Hugwe aia kehekeheki i God, a God tikei vake. #a Luk 20.39; b Dut 6.4; d Dut 4.35; Aes 45.21 33Hokinia a tangaloi ne lagwa mai God kina domina vunuhia, mana domidomina vunuhia, mana huihuina vunuhia, vake aia ne lagwa mana tangaloi laliki maia, ne vai tabetabekinira hokinia mo vai tabetabekinia sibona. U karea kwara tana rongohuri na tulikileo kairua hikani u sileti na boboroa tamo hura doluakinira mana kairoroi* ratuaki tamo hile lakwai God.” #a Dut 6.5; Jos 22.5; Luk 10.27; b Lev 19.18; Rom 13.9; Gal 5.14; Sem 2.8; d 1 Saml 15.22; Hos 6.6

34I Jisas u kikilai kwara u daraki u taritarisa, hikani mo kwaha maia mo viti “U garagarani kwara kona kwareki i God ki nomu Hugwe lakua.”

Takuni tiua hikani a tangaloi rau mataku kwara rana uduhuri te leo uhiuhi ki Jisas taliku. #Mat 22.46; Luk 20.40

A leo uhiuhi huri i Vurae

(Mat 22.41-46; Luk 20.41-44)

35Lolona i Jisas mo toko huhui na tangaloi lolo Vanua* Kokona noi God, aia mo uduhuri kinira mo viti kwara, “?Kworohokinia a tangaloi* kikikila na Uliuli* Kokona ramo toko viti kwara i Vurae* aia a gwaloana noi Devit kehekeheki? 36A Tanungwe Kokona u lalahi Devit vae mo viti

‘A Hugwe* i God u viti lakwa na nogu Hugwe kwara,

“Ko hugu hikeni lo matuagu,

ko mabu,

tarisaki hi na vai na nomu tavaluivuro

rana hugu tavutimu,

rana kwareki a nomu

tangaloi* boloki vuroki.” ’ #Sam 110.1; Bol 2.34-35; 1 Kor 15.25; Hib 1.13 [NOTE TO TYPESETTER: there should be only a thin space between the double and single quotation marks there.]

37I Devit sibona u kwarekinia kwara a nona Hugwe. ?Vunu kworohokinia i Vurae mo kwareki a gwaloana noi Devit?”

A vao lakua rau rongohuri i Jisas rau lagwa luna. #Luk 19.48; 21.38

I Jisas u kwaha likoki na tangaloi huri na tangaloi kikikila na Uliuli Kokona

(Mat 23.1-36; Luk 20.45-47)

38Lolona mo huhuira mo viti kwara, “Tulu likoki na tangaloi* kikikila na Uliuli* Kokona hinea rau lagwa kwara rana lakao laliki, rana lugwaki lugwaga hinea rau gwagwaravu, vunu rau lengaia kwara a tangaloi rana vai mavakinira lo nako na tangaloi maira na sara. 39Rau lengaia kwara rana hugu lolo vale* na tiutangaroa lo hagehagele hinea rau karea karakara, vake rau lai a hagele karekarea nona tangaloi lalakua lolo kanikani. 40Rau tuku sinasina na gwati ravavine, rau balu savi na noga kinau. Vunu vake rau tuku tiutangaroa gwagwaravu kwara rana sina na tangaloi kwara a tangaloi rana domi mavakinira. Vae rana kwali na kakadiki ne huira haburu.”

A hilehile nona gwati vavine

(Luk 21.1-4)

41Lolona i Jisas mo hugu garagarani mana tanotano na tuli mane lolo Ara Kokona na Ingwa Kokona noi God, mo toko tagataga-bibi na tangaloi ramo tuli noga mane*. A tangaloi hugwe rau tuli noga mane u rusa. #a Sione 8.20; b 2 King 12.9 42Vunu a gwati vavine kakaravi katukwale mo vanamai mo tuli na nona mane vatu kairua kwaririgi hoki na selen. 43I Jisas mo kware na nona ngwalagelo tabulutaki vaki maia, mo kwaha maira mo viti kwara, “Kareaki na viti lakwakamu, a gwati kakaravi hikani u bete nona hilehile u lakua karakara sileti na hilehile savia hinea a tangaloi doluaki ramo bete. 44A tangaloi hugwe aira vano hi rau bete noga hilehile duviki tina noga konata lakua. Vae a natu vavine hika u kakaravika haburu aia u hile savi na nona mane, a mane hinea kwara ne hago maia lo nona tokaana.” #2 Kor 8.12

Currently Selected:

MAK 12: HWT

Highlight

Copy