MAK 10
10
I Jisas mo huhui na tangaloi huri na talahi lakiana
(Mat 19.1-12; Luk 16.18)
1I Jisas mo tiraki takwa-hi mo vano vaki lo vanua Sutia, vunu mo vano tavaluki tina Kwai Sotan. A tangaloi rusa rau vanamai vaki maia taliku, mo toko huhuira hokinia mo toko vai tigwaravu.
2A Varisi* ramo vanamai vaki maia ramo toko tiusinae, ramo uhia kwara, “?A Tangwata* u tiraki kwara a ngwera ne talahi lakiana?”
3I Jisas mo daraki lakwara mo viti kwara, “?A hava tulikileo i Mosis mo betea lakwakamu tuai?”
4Hikani ramo viti lakwae kwara, “I Mosis mo tiraki na ngwera kwara vae ne uliuli lo veva na talahi lakiana vunu neri tirakinia.” #Dut 24.1,3; Mat 5.31; 19.7
5I Jisas mo viti lakwara kwara, “I Mosis mo uli na tulikileo hi lakwakamu huri a gwatumiu rau madi haburu. 6Vae lo tinatinakakiki, lolona i God mo tau na varamana, a Uliuli* Kokona u viti kwara, ‘I God u kihi na ngwera mana vavine, #Jen 1.27; 5.2 7vae huri hini a ngwera ne tiraki i tamana mai retahina ne bulu mai vavinehina, i rarua raru ne kwareki tarabehi katukwale.’ ” 8Vunu i Jisas mo viti kwara, “Hokinia hi raru nehe kwareki tea kairua, vae a tarabehi katukwale. #Jen 2.24; Eves 5.31 9A havakinau hi i God mo hariki tabulutaki, a tangaloi ne hatu talahi.”
10I Jisas mana nona ngwalagelo ramo mule vaki tataga, a ngwalagelo ramo uhi Jisas huri na kinau hi. 11Aia mo viti lakwara kwara, “Diko te ngwera u tiraki i vavinehina, vunu mote laki mana vavine dolua, u veveki rera ki vavinehina. 12Vake diko a vavine u tiraki tuana ngwarasea vunu mote laki mana ngwera dolua, u veveki rera ki tuana ngwarasea.” #Mat 5.32; Luk 16.18; 1 Kor 7.10-11
I Jisas mo vai tabetabeki na sakwarigi
(Mat 19.13-15; Luk 18.15-17)
13A tangaloi tuaki rau lai a sakwarigi, ramo vanamai vaki mai Jisas kwara ne tau kabana luga, vae a nona ngwalagelo ramo tu korora kwara rana hatu vai kwehi. 14Vae i Jisas mo tagai na doridori hi, u lologute kina nona ngwalagelo mo kwaha luga mo viti kwara, “Tulu tiraki na sakwarigi rana vanamai vaki maiau. Tulu hatu tu korora, huri a raranatu kwaririgi aira vake i God u kwarera kwara ne hugwe korora. 15Na viti bakotoki lakwakamu, a tangaloi hinea he hivokinia tea kwara ne mulemai hoki na natu kelekele kwara ne hugu tavuti na Hugwe Lakua i God, vae i God nehe kwareki te nona Hugwe lo taroki.” #Mat 18.3
16Vunu mo kwali na sakwarigi mo tau na kabana luga katukwale kehe, mo vai tabetabekinira.
A tangaloi hugwe
(Mat 19.16-30; Luk 18.18-30)
17Lo taro hi i Jisas mo tinakaki hala taliku, a tangaloi katukwale mo kwalao vovohia, mo titiugwao koro na nakona, mo uduhuri kinia mo viti kwara, “Tisa, i nigo a tangaloi karea. ?Na vai kworoho kwara vae na hagwe na ahiana vaki tuai?”
18Hikani i Jisas mo uduhuri kinia mo viti kwara, “?Kworoho komo vitiau kwara nu karea? Hete kwara te katukwale u karea, vae i God kehekeheki. 19Ku kikilai na leo na Tangwata* hi mo viti kwara, ‘Ko hatu ua mate tangaloi, ko hatu balu vavine, ko hatu babalu, ko hatu kurakura, ko hatu lai a kinau hete nomu lo babalua, ko domi mavaki tamamu mai retahimu.’ ” #a Eks 10.12-16; Dut 5.16-20; b Dut 24.14; Sem 5.4
20Hikani a tangaloi hi mo daraki lakwae mo viti kwara, “Tisa, nu rongohuri savi na leo na Tangwata vano hi ba lolona nomo ngwarasea hake vae vaki na hika.”
21I Jisas mo tagataga huria u lagwa maia, mo viti lakwae kwara, “A kinau katukwale vohoki maiko kohe vaia te radu. Ko vano ko hokaki savi na nomu vivilagoki, ko lavi na kaivoliki, komo betea lakwa na tangaloi kakaravi, vunu lo taroki konari hagwe nomu vivilagoki karekarea rusa lolo taetae, vunu ko vanamai ko huriau.” #Mat 6.20; Luk 12.33
22Lolona a tangaloi hi mo rongo na leo hi, a nakona mo hati, mo lakao tiua u rongo hati, huri a nona vivilagoki u rusa lengalenga. 23I Jisas mo taga laliki, mo viti lakwa na nona ngwalagelo kwara, “Raka, u madi haburu lakwa na tangaloi hugwe kwara rana soro tilo Vanua Karagwa hinea i God u hugwe koroa.” #Mak 4.19
24A nona ngwalagelo ramo mamarutiki kina leo hika. Vae i Jisas mo viti taliku lakwara kwara, “Raranatugu, u madi haburu lakwa na tangaloi kwara rana hivokinira rana hugu tavuti na Hugwe Lakua i God. 25U madi haburu lakwa na boboroa lakua hi u kwareki a kamel kwara ne soro lalahi na mata na nitili. Vae u madi siletia lakwa na tangaloi hugwe kwara ne hivokinia ne hugu tavuti na Hugwe Lakua i God.”
26A nona ngwalagelo rau idila, ramo uhiuhira kwara, “?Vae ihe ne va ahi te hika?”
27I Jisas mo tagataga hurira mo viti kwara, “A kinau hi u madi mana tangaloi vae mai God he madi tea, huri i God u vai lai vataha na kinau.” #Jen 18.14; Job 42.2; Sek 8.6; Mak 14.36
28Vunu i Pita mo maraka mo viti lakwae kwara, “?Kworohokinia maikami? Keu tiraki savi na kinau kemo huriko.”
29-30I Jisas mo viti lakwara kwara, “A tangaloi ne tiraki na ingwana, diko i ratuana, diko i rahagwena, diko i retahina, diko i tamana, diko i raranatuna, diko a nona vanua huri u domi mavakiau, vake huri na Roro Karea, vae nehe gwanugwanu te lo kinau vano hi. Kareaki na viti lakwakamu, a kinau vano hi ne hagwe savira vidolua kehe tiluga, hike lo varamana. Ne hagwe a ingwana, i ratuana, i rahagwena, i raretahina, i raranatuna, vake a nona vanua. Vae a tangaloi rana vai bulakikinia vake. Vae lo taroki ne vanamai neri hagwe na ahiana gwaravu vaki tuai. 31Vae u rusa hika rau tomua vae rana takuni, rau takuni hika vae rana tomua.” #Mat 20.16; Luk 13.30
I Jisas mo matangwasaraki vakaitoluki kwara vae ne mate vunu ne maraka taliku
(Mat 20.17-19; Luk 18.31-34)
32I Jisas mana nona ngwalagelo aira lo hala ramo toko galo hake vaki Serusalem. I Jisas u lakao tomuakinira, vae a nona ngwalagelo ramo huria rau idila kinia. A tangaloi hinea ramo hurihuri vake rau mataku. I Jisas mo lavi na nona ngwalagelo hangavulu dongwana kairua gegeaki taliku mo tinakaki mo kwaha maira mo viti huri na kinau hinea a tangaloi rana vai vovohia. 33Mo viti kwara, “!Tulu rongo! Hika tau tuku vano tagaulu vaki Serusalem. Vae i nau a Natu* na Tangaloi, rana tirakiau lakwa na tangaloi* lingilingi lalakua mana tangaloi* kikikila na Uliuli* Kokona, rana arekiau rana viti kwara vae nana mate. Rana tauau tilo kaba na tangaloi tavalavarea tina gwaloana noi Isrel*, 34rana vaivai tagaiau, rana lido tilugu, rana takwiliau, rana kwohi mateiau. Vunu takuni tina rani kaitolu na maraka taliku.” #Mat 16.21; 17.22-23; Mak 8.31; 9.31; Luk 24.7
A longilongi noi Semis mai Sione
(Mat 20.20-28)
35I Semis mai Sione, i raranatu i Seveti, raru vanamai vaki mai Jisas, raru mo viti kwara, “Tisa. Keru lengaia kwara kona vai na kinau hika lakwakamirua.” #Mat 4.21; 10.2; 17.1; Mak 1.19,29; 3.17; 5.37; 9.2; 10.41; 13.3; 14.33; Luk 5.10; 6.14; 8.51; 9.28,54; Bol 1.13
36Aia mo daraki lakwararua mo viti “?Kuru lengai na havakinau kwara na vai lakwakamurua?” #Mat 20.32; Mak 10.51; Luk 18.41
37Hikani raru mo viti lakwae kwara “Keru lengaia kwara lolona kona vanamai lo nomu huirana lakua hinea kona kwareki a Hugwe Lakua kona tirakikamirua kwara keru ne hugu kairuaki lo matuamu, kairuaki lo ngwairimu.” #Mat 19.28; Luk 22.30
38Vunu i Jisas mo viti lakwararua kwara, “?Kuru ne vai lai kwara kuru ne rongo hati lo tarabehimiru hokinia hinea i nau nana rongo hati? ?Diko kuru ne vai lai kwara kuru ne vano lalahi na taro madi hinea i nau vae nana vano luna?” #a Sione 18.11; b Luk 12.50
39Raru mo viti lakwae kwara, “Keru ne vai lai.”
Vunu i Jisas mo viti lakwararua kwara, “Io kareaki. Kuru ne rongo hati hokinia hinea i nau nana rongo hati, vunu kuru ne vano lalahi na taro madi hokinia hinea i nau nana vano luna. #Bol 12.2 40Vae kwara kuru ne hugu kairuaki lo matuagu kairuaki lo ngwairigu, hete nogu kwara na bete, huri i God u matai na tangaloi kairua ba, vae ne bete lakwararua.”
41Lolona aira hi hangavulu ramo rongo, ramo maraka ramo lologute ki Semis mai Sione. 42I Jisas mo kwarera vanamai vaki maia, mo kwaha maira mo viti “Tulu kikilai kwara a tangaloi lalakua nona tangaloi hinea rahe kikilai i God tea rau hugwe koro na noga tangaloi, vae a noga tomuai-tangaloi rau hago huirana korora savira. #Luk 22.25 43Vae i kamu tulu hatu vai hokinia. Diko te katukwale tikamu u lengaia kwara ne lakua, aia ne kwareki nomiu tangaloi boloki. 44Diko te katukwale tikamu u lengaia kwara ne tomua, vae aia ne kwareki a tangaloi* boloki vuroki lakwa na tangaloi doluaki. #Mat 23.11; Mak 9.35; Luk 22.26 45Tulu ne vai hokinia i nau nu vai, huri i nau vake a Natu* na tangaloi nu vanamai hete kwara a tangaloi rana boloki maiau, vae i nau kwara na boloki maira, na tirakiau sibogu na mate kwara na volitukuhi na tangaloi rusa tina noga hatiana.” #1 Tim 2.5-6
I Jisas mo vakahiki na matadodo i Batimeas
(Mat 20.29-34; Luk 18.35-43)
46Hikani ramo vanamai vaki Seriko. Vae lolona i Jisas mana nona ngwalagelo mana tangaloi rusa vake ramo ngwalua tina gwatuivanua hi, i Batimeas, i natu i Timeas, u hugu tavalahala tavaluki mo toko longilongi kinau huri aia a matadodo. 47Vae mo rongo kwara a tangaloi hi i Jisas a ngwera Nasaret mo lakao utu, mo tinakaki mo toko kwarekware mo viti kwara, “!Jisas! !Gwaloana noi Devit! !Ko hakaviau, ko vai tabetabekiau!” #Mat 9.27; 15.22
48A tangaloi u rusa ramo kwaha suria, ramo viti lakwae kwara ne hugu butu, vae mori kwaha karakara siletia tomua mo viti kwara, “!Gwaloana noi Devit! !Ko hakaviau, ko vai tabetabekiau!”
49I Jisas mo tu butu, mo viti kwara, “Tulu kwarea vanamai.”
Vae ramo kware na matadodo hi, ramo viti lakwae kwara, “Ko hatu rongo hati. Ko maraka, u kwareko.”
50Mo vohoki na lugwana letiu, mo maraka heheriki mo vanamai vaki mai Jisas. 51I Jisas mo kwaha maia viti “?Ku lengaia kwara na vai aha maiko?”
Hikani a matadodo hi mo daraki mo viti “Hugwe*, kwara na tagataga taliku.” #Mak 10.36
52Vunu i Jisas mo viti lakwae kwara, “Ko vano, a nomu hauhuriana u vakahikinigo.”
Vae heheriki mo tagataga lai taliku, vunu mo huri i Jisas lo hala. #Mat 9.22; Mak 5.34; Luk 7.50; 8.48; 17.19
Currently Selected:
MAK 10: HWT
Highlight
Share
Copy
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
