MATIU 26

A tovotovo huri na mateana kai Jisas

(Mak 14.1-2; Luk 22.1-2; Sione 11.45-53)

1I Jisas mo huhui na nona ngwalagelo kina kinau aira vano hi mo rovo, vunu mo kwaha maira mo viti kwara, #Mat 7.28; 11.1; 13.53; 19.1 2“I kamu tulu kikilai kwara a rani kairua vake vunu a taro na Kanikani* na Tivekiana. Vae i nau a Natu* na Tangaloi, a tangaloi rana tirakiau tilo kaba na nogu tavaluivuro kwara rana duruau tilo kaibetu.” #a Eks 12.1-27; b Mat 20.18-19; 27.26; Mak 15.15; Luk 24.7,20; Sione 19.16

3Hikani a tangaloi* lingilingi lalakua mana ngwarasea* nona gwaloana noi Isrel* rau vileki tabulutaki lolo ingwa i Kaeavas, a hugwe na tangaloi* lingilingi. 4Ramo tovotovo kwara rana kwiribibi i Jisas tavuniki, rana kwohi mateia. 5Vae ramo viti kwara, “Ta hatu vaia lolo taro na kanikani lakua, vae a vao ramai vikwali maikita.”

A vavine mo vurae i Jisas lo gwatuivanua Betani

(Mak 14.3-9; Sione 12.1-8)

6I Jisas mo hugu lo gwatuivanua Betani lolo ingwa i Saemon hinea tuai a lengeana hati na vinu #26.6: A lengeana hati na vinu. Kona tagai na leo hi mana domianaki lo 8.2 lo leo hinea evina halaradu. mo vaia. 7Lolona mo toko kanikani a vavine mo vanamai vaki maia mana botele u kihiana kina vatu a hinaki a alabasta*, u kukwere kina vurae boniboni lolona, a maneki u lakua haburu, mo lilingia tilo gwatu i Jisas. #Luk 7.36-38 8A ngwalagelo noi Jisas ramo tagaia ramo lologute ramo viti kwara, “?Kworohokinia mo vai behiki na vurae boniboni hi? 9Hi kwara ne hokakinia a maneki ne lakua, ne bete na maneki lakwa na tangaloi kakaravi.”

10Vae i Jisas u kikilai na havakinau hi ramo viti, mo kwaha maira mo viti “?Huri aha tulu mo vai na vavine hi mo rongo hati? Aia u vai na kinau karea lakweau. 11I kamu a kakaravi rau hugu maikamu tigwaravu, vae i nau nahe hugu tea maikamu tigwaravu. #Dut 15.11 12A vavine hi mo lilingi na vurae boniboni tilo tarabehigu, u vurae rarai na tarabehigu huri kwara vae rana tauau tilo gwaru-malanga*. 13Kareaki na viti lakwakamu, takwanahavaki a tangaloi rana kwalahaki na Roro Karea hika doluaki na varamana, vae rana viti huri na kinau hika a vavine hi mo vai, rana domihagwea luna.”

I Sutas mo masinge kwara ne tiraki i Jisas tilo kaba na nona tavaluivuro

(Mak 14.10-11; Luk 22.3-6)

14Vunu katukwale tina ngwalagelo hangavulu dongwana kairua, a hinana i Sutas Iskariot, u vano vaki mana tangaloi* lingilingi lalakua. 15Mo viti kwara, “?Diko na tiraki i Jisas lakwakamu, tulu ne bete na havakinau lakweau?” Hikani ramo valuki na mane* vatu a silva ngavu kaitolu hinea u taritarisa mana vatu tari vakahangavulu-dongwana-kailima, ramo betera lakwae. #Eks 21.32; Sek 11.12 16Vunu mo tinakaki lo taro hi, i Sutas mo soro haro na halaki kwara ne tiraki i Jisas tilo kabaga.

A ngwalagelo noi Jisas rau vai rarai huri na Kanikani na Tivekiana

(Mak 14.12-16; Luk 22.7-13)

17Lo rani tomuaki na Kanikani* na Bereti* hini a Is Tikei Lolona, a ngwalagelo ramo vanamai vaki mai Jisas ramo uduhuri kinia ramo viti kwara, “?Ku lengaia kwara kena vai rarai na Kanikani* na Tivekiana huriko ave?” #Eks 12.14-20

18Mo viti lakwara kwara, “Tulu vano vaki mana tangaloi katukwale lo gwatuivanua lakua, tulu mo viti lakwae kwara, ‘A Tisa u viti kwara, “A tarogu u maravuti. I kami mana nogu ngwalagelo kena kani na Kanikani na Tivekiana lolo ingwamu.” ’ ”

19A ngwalagelo ramo vai hokinia hi i Jisas mo viti lakwara, ramo vai rarai savi na kinau huri na Kanikani na Tivekiana.

I Jisas mo viti terekaki kwara katukwale tiura ne tirakinia tilo kaba na nona tavaluivuro

(Mak 14.17-21; Luk 22.14,21-23; Sione 13.21-30)

20Lolo raviraviki, i Jisas mana nona ngwalagelo hangavulu dongwana kairua ramo hugu hivo kwara rana kanikani. 21Lolona ramo toko kanikani, i Jisas mo kwaha maira mo viti kwara, “Kareaki na viti lakwakamu, vae katukwale tikamu ne tirakiau tilo kaba na nogu tavaluivuro.”

22A ngwalagelo ramo rongo hati, aira katukwale kehe ramo uduhuri ki Jisas ramo viti kwara, “?Hugwe*, ihe? ?I nau?”

23Hikani i Jisas mo daraki lakwara mo viti kwara, “Aia te katukwale tikamu tulu mo hehe na kamiu bereti* lolo laha maiau, vae ne tirakiau tilo kaba na nogu tavaluivuro. #Sam 41.9 24I nau a Natu* na Tangaloi, vae na mate hoki na Uliuli* Kokona mo viti. vae nu hahakavi haburu huri na tangaloi hinea ne tirakiau tilo kaba na tavaluivuro. U karea lakwa na tangaloi hi kwara ne va hatu vora.” #Sam 22.7,8,16-18; Aes 53.9

25Hikani i Sutas aia hi mo tiraki Jisas mo uduhuri kinia mo viti kwara, “?Tisa, ihe? ?I nau?”

I Jisas mo daraki lakwae mo viti kwara, “Aia hokinia hi komo viti.”

A kanikani kokona nona Hugwe

(Mak 14.22-26; Luk 22.14-20; 1 Kor 11.23-25)

26Lolona ramo toko kanikani, i Jisas mo lavi na bereti*, mo lagwaki God huri. Vunu mo volo utuutuhia mo bete lakwa na nona ngwalagelo mo viti kwara, “Tulu lai, tulu kani. Hikani a tarabehigu.” #Mat 14.19; 15.36; Mak 6.41; 8.6; Luk 9.16

27Vunu mo lavi na laha, mo lagwaki God huri, vunu mo bete lakwara mo viti kwara, “Tulu inu luna i kamu vunu, 28huri hikani a daigu hinea ne vai na leo harikiana noi God maikamu ne tu. A daigu hi ne huki tivarea huri na tangaloi rusa kwara i God ne domidomi koro na noga hatiana. #1 Kor 10.16 #Eks 24.8; Jer 31.31; Sek 9.11; Hib 9.20 29Na viti lakwakamu, i nau nahe inumi na waen te hi taliku rovonaki hini na inumi na waen karagwa maikamu lo Vanua Karagwa hinea i Tamagu u hugwe koroa.”

30Hikani ramo kahoki na bolo na kaluhakiana, vunu ramo ngwalua tivarea ramo vano vaki lo Vuti na Vikai* a Violev. #a Sam 113—118; b Luk 22.39

I Jisas mo viti terekaki kwara i Pita ne herevunikinia

(Mak 14.27-31; Luk 22.31-34; Sione 13.36-38)

31Vunu i Jisas mo kwaha maira mo viti kwara, “Bongi hika tulu ne tagai na havakinau hinea a tangaloi rana vai vovohiau, vae vunuhikamu a domimiu rana sovi, tulu ne kwalao tiau, huri a Uliuli* Kokona u viti kwara, ‘I God ne kwohi matei na kaitagahuri na sivsivi, a bulana sivsivi rana kwalao katukwale kehe.’ #Sek 13.7; Mat 26.56; Sione 16.32 32Vae takuni tina nogu marakaana tina mateana na vano tomuakikamu vaki Galili*.” #Mat 28.7,16

33Vunu i Pita mo kwaha mai Jisas mo viti “Diko aira vunu a domiga rana sovi rana kwalao tiuko, vae i nau nahe kwalao te tiuko vohoki.”

34Vae i Jisas mo kwaha mai Pita mo viti kwara, “Kareaki na viti lakwako, bongi hika a toa nehe tarere te radu nga kona herevunikiau vakaitolu kwara kohe kikilaiau tea.” #Mat 26.69-75; Mak 14.66-72; Luk 22.56-62; Sione 18.25-27

35I Pita mo daraki mo viti kwara, “Diko i nau na mate haragoki maiko, vae i nau nanahe herevunikinigo tea.”

A ngwalagelo savira ramo viti hokinia nga. #Sione 11.16

I Jisas mo tiutangaroa lo Getsemane

(Mak 14.32-42; Luk 22.39-46)

36Vunu i Jisas mana nona ngwalagelo ramo vano vaki lo talutalu u kwareki Getsemane. Mo kwaha maira mo viti kwara, “Tulu hugu hikeni na va vano vaki takwahinea na tiutangaroa.” #Sione 18.1

37Mo lavi i Pita mai raranatu i Seveti kairua ramo huria. A domina mo tinakaki mo mava mo rongo hati. #Mat 17.1; Mak 5.37; 14.33; Luk 8.51; 9.28 38Vunu mo kwaha maira mo viti kwara, “A rongoana hati lolo domigu u lakua haburu, u vaiau nu rongo hati kwara na mate. Tulu hugu hike, tulu tagataga maiau.” #a Sam 42.5,11; 43.5; Sione 12.27; b Sione 4.9

39Aia mo lakao kusaki kelekele tiura, mo sovi hivo mo ngwalulu tagwao lo tano mo tiutangaroa mo viti “Tamagu. Diko ku vai lai, ko lavi na laha na rongoana hati hika tiau. Vae ko hatu vai luna i nau nomo lengaia, aia ko vai luna hokinia i nigo ku lengaia.” #Hib 5.7-8

40Vunu mo mule taliku haro na nona ngwalagelo hi kaitolu mo hagwera rau maturu, mo kwaha mai Pita mo viti “?Kworoho i kamu kaitolu tulu he vai lai tea kwara tulu ne tagataga maiau te aoa katukwale? 41Tulu tagataga ne karea, tulu tiutangaroa kwara tulu nehe sovi te tilo sinasina hati. A domimiu u huira, vae a tarabehimiu u keokeo.” #Mat 6.13; Luk 11.4 42Vunu i Jisas mo vano tiura vakairuaki mo tiutangaroa mo viti kwara, “Tamagu, diko konahe lavi na laha na rongoana hati hika tea tiau rovonaki na inumia, a nomu lengalengaiana ne mule luna.” #Mat 6.10

43Vunu mo mule harora taliku mo hagwera rau maturu, huri a mataga rau mava.

44I Jisas mo tirakinira taliku mo vano tiura mo tiutangaroa vakaitoluki kina leo hokinia hi tomua. #2 Kor 12.8 45Vunu mo mule taliku vaki mana nona ngwalagelo mo kwaha maira mo viti kwara, “?Tulu maturu, tulu mabu radu nga? !Tulu tagaia! A taroki u maravuti kwara a tangaloi ne tirakiau a Natu* na Tangaloi, tilo kaba na tangaloi vaivai hati maira. #a Sione 12.23; 13.1; 17.1; b Mat 17.22; Mak 9.31; 10.33; Luk 9.44; 24.7 46Tulu maraka, ta vano. Tulu tagaia, a tangaloi mo tovo kagu aia hi u maravuti.” #Sione 14.31

Ramo lavi Jisas

(Mak 14.43-50; Luk 22.47-53; Sione 18.3-12)

47I Jisas mo toko kwahakwaha radu nga, i Sutas, aia hi katukwale tiura hangavulu dongwana kairua, mo maravuti. A vao lakua ramo huria ramo kwali a bue mana ngwasa. A tangaloi* lingilingi lalakua mana ngwarasea* maira nona gwaloana noi Isrel* rau horara. 48A tangaloi hini u tovo kai Jisas, u viti terekaki na kaivosangi lakwara ba, mo viti kwara, “A tangaloi na bobonia, aia hi. Tulu kwiribibia.” 49Lolona i Sutas mo maravuti, mo hena bakatoki vovohi Jisas, mo kwaha mo viti kwara, “Tisa, a magemuana ne eno maiko.” Hi mo bobonia.

50I Jisas mo daraki mo viti kwara, “Tua, ku vanamai huri na havakinau ko vaia.” #26.50: Lo hala kairuaki a domidomi na leo i Jisas hi aia hokinia hika kwara, “?Tua, ku vanamai vaki hike huri aha?”

Vunu ramo vanamai vaki mai Jisas ramo kwiribibia ramo lavia. 51Hikani katukwale tiura hinea rau hugu mai Jisas mo rauni na nona bue mo tai suati na gwero na tangaloi boloki nona hugwe na tangaloi* lingilingi. #Sione 18.26 52Vunu i Jisas mo viti lakwae kwara, “Ko tau nomu bue taliku lo tanotanoki, huri savira hinea rau lai a bue rana mate kina bue. #Jen 9.6; Rev 13.10 53?Ko he kikilai tea kwara na vai lai na kware haro i Tamagu vae heheriki ne hora na kaihora tina taetae, u sileti na bulubulu lalakua a gwatu hangavulu dongwana kairua rana hago maiau? 54?Vae kwara vae na vai kwehi a Uliuli* Kokona ne kworo kworohokinia hinea mo viti kwara ne mule luna hokinia hi?”

55Vunu i Jisas mo kwaha mana vao mo viti kwara, “?Kworoho tulu mo vanamai huriau tulu mo hago bue mana ngwasa kwara tulu ne laviau hokinia kwara, i nau te tangaloi uabalu tangaloi? Vataha na rani nu hugu maikamu nomo toko huhui lolo Vanua* Kokona noi God vae tulu he kwiribibiau tea. #Luk 19.47; 21.37; Sione 18.20 56Vae a kinau savia vano hi ramo mule luna kwara a havakinau hinea a tangaloi* duruduruki ramo uli lo Uliuli Kokona ne kworo.”

Vunu a nona ngwalagelo vunuhira ramo tirakinia ramo kwalao tiua. #Sek 13.7; Mat 26.31; Sione 16.32

I Jisas mo tu koro na nako na Tangaloi Tovotovo Lalakua

(Mak 14.53-65; Luk 22.54-55,63-71; Sione 18.13-14,19-24)

57Aira hinea rau kwiribibi i Jisas, ramo lavia vaki lo ingwa i Kaeavas, a hugwe na tangaloi* lingilingi. A tangaloi* kikikila na Uliuli* Kokona mana ngwarasea* rau vileki tabulutaki takwa-hi. 58I Pita mo toko huri tiutiuki i Jisas mo maravuti lolo loloiara na ingwa na hugwe na tangaloi lingilingi. Mo soro tilolo loloiara, mo hugu hivo mana kaitagahuri maira kwara ne tagai na gweregwere na kinau hi. 59A tangaloi* lingilingi lalakua mana Tangaloi* Tovotovo Lalakua doluaki ramo soro haro na tangaloi kurakura kwara rana va viti te kwara i Jisas u vai na hatiki, vae ne mate huri. 60Vae venaha u rusa rau maraka ramo kurakuraki leo huria vae rahe hagwe na leo te vohoki huria. rovonaki a tangaloi kairua raru mo tu vaki tomua 61raru mo viti kwara, “A tangaloi hika u viti kwara, ‘I nau nu vai lai kwara na talahi na Ingwa Kokona noi God, vunu lo rani kaitolu na tabea taliku.’ ” #Mat 27.40; Sione 2.19; Bol 6.14

62A hugwe na tangaloi lingilingi mo maraka hake, mo kwaha mai Jisas mo viti kwara, “?Kworohokinia, kohe va daraki na leoga tea hinea ramo toko vitira vovohiko?” 63Vae i Jisas u hugu butu. Vunu a hugwe na tangaloi lingilingi mo kwaha maia taliku mo viti kwara, “Nu hahariki tilui God Tatoka, ko viti lakwakami. ?I nigo i Vurae* i Natu i God diko hetea?” #a Aes 53.7; Mat 27.12,14; Luk 23.9; Sione 19.9; b Mat 16.16-17

64I Jisas mo daraki lakwae mo viti kwara, “Aia hokinia hi komo viti. Vae na viti lakwakamu, takuni tina taro hikani tulu ne tagaiau i nau a Natu* na Tangaloi, na hugu lo matuai God na Huirana, na vanamai lo taenalangi na taetae.” #a Sam 110.1; b Dan 7.13; Mat 24.30

65Vunu a hugwe na tangaloi lingilingi hi mo dare na lugwana mo kwaha mo viti kwara, “!U kwahakwaha hati vovohi God! ?Kworohokinia tamote soro haro na hagoleo vake? Hika vohoki tulu rongo na nona leo hati vovohi God. #Nam 14.6; 2 Saml 13.19; Esra 9.3; Job 1.20; 2.12; Jer 36.24; Bol 14.14 66?Tulu domi kworohokinia?”

Ramo daraki ramo viti kwara, “U taritarisa kwara ne mate.” #Lev 24.16; Sione 19.7

67Vunu ramo lido tilo nakona, ramo tukwaia. Aira hini rau tukwaia, #Aes 50.6; 53.5 68ramo viti kwara, “Vurae, i nigo a tangaloi* duruduruki. !Ko viti lakwakami! ?Ihe hi mo tukwaiko?”

I Pita mo herevuniki i Jisas

(Mak 14.66-72; Luk 22.56-62; Sione 18.15-18,25-27)

69Hikani i Pita u hugu varea lolo loloiara na ingwa. Lolona hini a vavine boloki katukwale nona hugwe na tangaloi* lingilingi mo vanamai vaki maia, mo viti kwara, “I nigo vake, ku tuku hurihuri i Jisas, a ngwera Galili*.”

70Vae mo harovia lo nakoga savira mo viti kwara, “Nohe kikilai na havakinau tea hi komo toko viti huria.”

71I Pita mo vano, mo ngwalua lo matakihala na loloiara hi. A vavine boloki dolua mo tagaia vake, mo viti lakwa na tangaloi ratuaki rau tu takwahini kwara, “A tangaloi hika u tuku huri i Jisas a ngwera Nasaret.”

72I Pita mo harovia taliku mo viti kwara, “Nu hahariki, i nau nohe kikilai na tangaloi te hini.”

73He tuai tea a tangaloi rau tu takwahini ramo vanamai vaki mai Pita, ramo viti kwara, “Kareaki i nigo vake katukwale tiura. Keu rongo lo dilaomu.”

74Vunu i Pita mo maraka mo hahariki mo viti kwara, “!Ei! Diko nu kura, i God ne vai kadiau huri. Nohe kikilai na tangaloi te hini.”

Heheriki hini a toa mo tarere. 75I Pita mo domihagwe na havakinau hinea i Jisas mo viti lakwae kwara, “A toa nehe tarere te radu nga kona herevunikiau vakaitolu kwara kohe kikilaiau tea.” I Pita mo soro tivarea mo karuki na mena tinangi. #Mat 26.34; Mak 14.30; Luk 22.34; Sione 13.38

Currently Selected:

MATIU 26: HWT

Highlight

Copy