MATIU 25

A tavaluileo huri na ravavine takwae hangavulu

1Vunu i Jisas mo viti kwara, “Lo raniki aia hini i God ne lavi na tangaloi rana soro tilolo Vanua Karagwa hinea u hugwe koroa, ne hokinia hika. Vakatukwale, a ravavine takwae hangavulu rau lai noga laeti, ramo ngwalua kwara rana bulu mana ngwera na lakiana. #Luk 12.35-36 2Kailima rau reraka, kailima rau kikikila. 3Aira hi rau reraka rau lai noga laeti vae rahe lai te oel vake maira. 4Aira hini rau kikikila rau lai a noga laeti mana oel vake lolo botele. 5A ngwera na lakiana hi u vaivai ta tuai, vae a ravavine vano hini a mataga ramo maturuturu ramo maturu. 6Lo livukai-bongi a tangaloi mo toko kwarekware mo viti kwara, ‘!A ngwera na lakiana aia hike! !Tulu vanamai tulu bulu maia!’ 7A ravavine hangavulu vano hi ramo rada ramo vai ngwakutaki na noga laeti. 8Vunu a ravavine kailima hinea rau reraka ramo viti lakwara hinea rau kikikila ramo viti kwara, ‘Tulu bete te nomai oel huri a nomai laeti hika rana mate.’ 9Aira hi rau kikikila ramo daraki ramo viti kwara, ‘Hetea, nehe taritarisa tea maikita vunu. Tulu vano vaki lo ingwa na hokahokaki tulu mo voli nomiu.’ 10Hikani a ravavine reraka vano hi ramo vano kwara ra va voli noga oel, vae lolona ramo vano, a ngwera na lakiana mo maravuti. A ravavine kailima hinea rau rarai ramo soro harago maia vaki lolo kanikani na lakiana, vunu a tangaloi ramo hogoi na katama. #Rev 19.7,9

11“Vunu takuni tiua hi a ravavine tuaki ramo maravuti. Ramo kwarekware ramo viti kwara, ‘!Hugwe, Hugwe! !Takahi katama kena soro!’ 12Vae a ngwera na lakiana hi mo daraki mo viti kwara, ‘Tulu nehe soro lai tea. Nohe kikilaikamu tea vohoki.’ ” #Luk 13.25,27 #Mat 7.23

13Vunu i Jisas mo viti kwara, “Tulu tagahuri ne karea huri tulu he kikilai na raniki tea mana taroki vake.” #Mat 24.42; Mak 13.35; Luk 12.40

A tavaluileo huri na tangaloi boloki kaitolu

(Luk 19.11-27)

14Vunu i Jisas mo viti vake kwara, “Lo raniki aia hini, i God ne lavi na tangaloi rana soro tilolo Vanua Karagwa hinea u hugwe koroa hokinia hika. Vakatukwale a tangaloi u vano tina tatana kwara ne lagalaga. Vae tomuaki mo kware na nona tangaloi boloki mo taura ramo tagahuri na nona vivilagoki. #Mak 13.34; Luk 19.12-13 15Mo bete vatavatahakinira u taritarisa mana noga kikikila. U bete lakwai katukwale a vatu u tari mulemule vakailima, lakwai kairuaki a vatu u tari mulemule vakairua, vunu lakwai kaitoluki a vatu u tari mulemule vakatukwale. Vunu mo lakao lo halana. 16A tangaloi boloki hi u lavi na vatu u tari mulemule vakailima mo vano heheri mo bihubihu lo nona mane* mo seme tiluna u tari mulemule vakailima vake. 17A tangaloi boloki hi u lai u tari mulemule vakairua mo vai hokinia nga mo seme tiluna u tari mulemule vakairua vake. 18Vae a tangaloi boloki hi u lai u tari mulemule vakatukwale mo vano mo keli na kwalu lolo tano, mo tavuniki na mane na nona hugwe lolona.

19“Takuni tiua hi u tuai vae a hugwe nona tangaloi boloki vano hini mo mulemai mo vai tabetabeki na bukuga maia. #Mat 18.23 20A tangaloi boloki hi u lavi na vatu u tari mulemule vakailima mo soro vanamai mo hokaki na vatu u tari mulemule vakailima vake, mo viti kwara, ‘!Masi, tagaia! Ku bete na vatu lakweau u tari mulemule vakailima, vae hika a vatu u tari mulemule vakailima vake nomo seme tiluna.’ 21A nona hugwe mo kwaha maia mo viti kwara, ‘!Ku vai u karea haburu! !I nigo a tangaloi boloki karea! Ku karohuri komo tagahuri na mane kelekele. Vae hikani na tauko kona tagahuri na mane lakua. Ko vanamai ko bulu maiau, ta lagwalagwa tabulutaki.’ #a Mat 25.23; Luk 16.10; b Mat 24.47 22Vunu a tangaloi boloki hi mo lavi na vatu u tari mulemule vakairua mo soro mo viti kwara, ‘!Masi, tagaia! Ku bete na vatu u tari mulemule vakairua lakweau. Hika u tari mulemule vakairua vake nomo seme tiluna.’ 23A nona hugwe mo kwaha maia mo viti kwara, ‘!Ku vai u karea haburu! !I nigo a tangaloi boloki karea! Ku karohuri komo tagahuri na mane kelekele. Vae hikani na tauko kona tagahuri na mane lakua. Ko vanamai ko bulu maiau, ta lagwalagwa tabulutaki.’ #a Mat 25.21; Luk 16.10; b Mat 24.47 24Vunu a tangaloi boloki hi mo lavi na vatu u tari mulemule vakatukwale mo soro mo viti kwara, ‘Masi, nu kikilai kwara i nigo a tangaloi madi. Ku makuriki hinea i nigo kohe rivu tea, vake ku kwali hinaka lolo agoago* hinea i nigo kohe rivu tea. #Sione 4.37 25Hokinia nu mataku nomo vano nomo tano tavuniki na nomu mane lolo tano. !Tagaia! Hikani a nomu mane.’ 26A nona hugwe mo kwaha luna mo viti kwara, ‘!I nigo a tangaloi boloki hati! Ku boloboloki loiloi. Ku kikilai kwara nu makuriki nohe rivu tea eia, vake nu kwali a hinaka lolo agoago hinea nohe rivu tea eia. 27?Kworoho kohe tau na nogu mane tea lolo bagi? Kwara vae na mulemai nana lai savira taliku mana semesemeki.’ 28Vunu a hugwe na tangaloi boloki hi mo kwaha mana nona tangaloi boloki tuaki, mo viti ‘Tulu lavi na mane hini tiua, tulu mo betea lakwae hinea u hagovi na vatu u tari mulemule vakahangavulu, 29huri aira hinea a noga eia ba, ne beteana vakevake lakwara, vae a noga kinau ne rusa lengalenga. Vae aira hinea a noga tikei, diko te noga eia kelekele vae ne laiana tiura. #Mat 13.12; Mak 4.25; Luk 8.18 30Vae a tangaloi boloboloki hati hikani, tulu vohokinia tivarea tilolo dodoki. Ne toko va ngara ne kati raharahaki na livona takwahini.’ ” #a Mat 8.12; 22.13; b Mat 13.42,50; 22.13; 24.51; Luk 13.28

A kwahekiana ki rovonaki

31Vunu i Jisas mo viti taliku kwara, “Lolona i nau a Natu* na Tangaloi na vanamai mana kaihora tina taetae savia, i nau a Hugwe Lakua nari hugu lo hagehagelegu lakua. #a Dut 33.2; Sek 14.5; Mat 16.27; Sut 14; b Mat 19.28; Rev 3.21; 20.11 32A tangaloi na ureure doluaki na varamana rana vileki tabulutaki koro na nakogu. Vunu nari kwahekinira a gwatuki kairua, hoki na kaitagahuri na sivsivi mo kwaheki na sivsivi tina nani. #Esik 34.17 33Na tau na sivsivi lo matuagu, a nani lo ngwairigu. 34Vunu i nau a Hugwe Lakua nari viti lakwa na tangaloi hini lo matuagu kwara, ‘I kamu hini i Tamagu u vai tabetabekikamu, tulu vanamai. Lolona i Tamagu mo tau na varamana vae u matai na tanotanomiu ba lo Vanua Karagwa hinea ne vanamai hika hinea aia u hugwe koroa. Tulu vanamai, tulu hugu lo tanotanomiu, #Luk 12.32 #Luk 22.30 35huri u marakatiau vae tulu vanganiau, nu madoku tulu mo bete a inuinu lakweau. Nomo hala vanovano tulu mo lai tabetabekiau vaki tatamiu. 36A vulavulagu tikei tulu mo bete lugwa lakweau. Nu lenga tulu mo tagahuriau, nu hugu lolo ingwa na gwarugwaru tulu mo tirokiau.’ #Aes 58.7 37Aira hini rau bakoto rana uduhuri kiau rana viti kwara, ‘?Hugwe*, keu tagaiko kihokua hinea u marakatiko kemo vanganiko diko ku madoku kemo bete a inuinu lakwako? 38?Keu tagaiko kihokua komo hala vanovano kemo lai tabetabekinigo vaki tatamai, diko a vulavulamu tikei kemo bete lugwa lakwako? 39?Keu tagaiko kihokua komo lenga diko i nigo lolo ingwa na gwarugwaru kemo tirokinigo?’ 40I nau a Hugwe Lakua nari daraki taliku nomo viti kwara, ‘Kareaki na viti lakwakamu, lolona hi tulu mo vai na doridori hi lakwae te katukwale ti ratuagu vano hikani hinea hete vitiviti huri luna u evina siletira ratuaki, hi tulu vaia lakweau.’ #Prov 19.17; Mat 10.42; 18.5; Mak 9.41

41“Vunu nate viti lakwara hini lo ngwairigu kwara, ‘!Tulu vano tiau! !I God u arekikamu u rovo ba! Tulu vano vaki lolo kabu hinea nehe mate lai tea vaki tuai, u raraiana huri i Setano* mana nona kaihora rusa, #a Mat 7.23; b Mak 9.48; Sut 7; Rev 20.10 42huri u marakatiau vae tulu he vanganiau tea, nu madoku vae tulu he bete te inuinu lakweau. 43Nomo hala vanovano tulu he lai tabetabekiau tea vaki tatamiu, a vulavulagu tikei vae tulu he bete tea lugwa lakweau. Nu lenga diko nu hugu lolo ingwa na gwarugwaru vae tulu he tagahuriau tea.’ 44Vunu rana daraki lakweau rana viti kwara, ‘?Hugwe, keu tagaiko kihokua mo marakatiko diko ku madoku, diko komo hala vanovano diko ku lenga, diko i nigo lolo ingwa na gwarugwaru vae kehe hago tea maiko?’ 45I nau nari daraki taliku lakwara na viti kwara, ‘Kareaki na viti lakwakamu, lolona hinea tulu bemiu hago maia te katukwale tiura hikani hinea hete vitiviti huri luna u evina siletira ratuaki, hi tulu bemiu hago maiau.’ 46Vae aira vano hikani na horara letiu rana kwali na kakadiki vaki tuai a gwereki tikei. Vae aira hinea rau bakoto rana vano vaki lo ahiana vaki tuai.” #Dan 12.2; Sione 5.29

Currently Selected:

MATIU 25: HWT

Highlight

Copy