LUK 6

A leo uhiuhi huri na Rani na Mabuana

(Mat 12.1-8; Mak 2.23-28)

1Lolona i Jisas mo lakao utuhi na agoago* na uit* lo Rani* na Mabuana, a nona ngwalagelo ramo rarahi na biuki na uit, ramo rahaki na vinuki tina biuki, ramo kani. #Dut 23.25 2A Varisi* ratuaki ramo viti kwara, “?Kworoho tulu mo vai na kinau a noda Tangwata* he tirakikita tea kwara tana vai lo Rani na Mabuana?” #Sione 5.10

3I Jisas mo daraki lakwara mo viti kwara, “?I kamu tulu he valu tea lo Uliuli* Kokona a havakinau i Devit mo vai? Aia mana nona ngwalagelo mo marakatira, 4vae mo soro tilolo ingwa noi God, mo lavi na bereti* hinea a tangaloi* lingilingi rau hilea ba lakwai God. Mo kania, vunu vake mo bete lakwa na nona ngwalagelo ramo kani. Aia a noda Tangwata he tiraki tea kwara a tangaloi haro nga rana kani na bereti hini, kehekeheki a tangaloi lingilingi maira.” #1 Saml 21.1-6 #Lev 24.5-9

5Vunu i Jisas mo kwaha rovonaki mo viti kwara, “I nau a Natu* na Tangaloi nu hugwe koro na Rani na Mabuana.”

A tangaloi hi a kabana u gogo

(Mat 12.9-14; Mak 3.1-6)

6Lo Rani* na Mabuana dolua vake, i Jisas u vano vaki lo vale* na tiutangaroa mo huhui. A ngwera katukwale takwa-hi a matuai kabana u gogo. 7A tangaloi* kikikila na Uliuli* Kokona mana Varisi* ratuaki rau lengaia kwara rana tu te lo kinau, rana vai na leo huri i Jisas kwara aia u vai kinau rau hati. Vae ramo tagataga-bibia kwara, diko ne vakahiki na tangaloi lo Rani na Mabuana, rana vaia huri. #Luk 14.1 8Vae i Jisas u kikilai na domiga, mo kwaha mana tangaloi hi a kabana u gogo mo viti kwara, “Maraka, ku tu, ko vanamai vaki hike tomua.” A tangaloi hi mo maraka mo vano mo tu takwa-hi. #Luk 5.22; 9.47 9Vunu i Jisas mo kwaha maira mo viti kwara, “?Na uduhuri kikamu, a noda Tangwata* u tirakikita kwara tana vai kworoho lo Rani na Mabuana? ?Tana vai tabetabeki na tangaloi diko tana vai bulakikinia? ?Tana vakahiki na tangaloi diko tana kwohi mateia?” 10Vae mo tagataga laliki mo tagaira aira vunu, vunu mo kwaha mana ngwera hi mo viti kwara, “Vukeri na kabamu.” Mo vai luna, a kabana mo karea taliku.

11Vae aira rau lologute haburu ramo kwahakwaha mulekinira kwara rana vai kworohoki i Jisas.

I Jisas mo kwareluahi na kaihora kokona hangavulu dongwana kairua

(Mat 10.1-4; Mak 3.13-19)

12Lo taro hi i Jisas mo vano hake vaki lo vuti kwara ne tiutangaroa. Mo hugu takwa-hi lolo bongi mo tiutangaroa lakwai God, mo vanovano vaki sirovobongi. 13Mo rani mo kware na nona ngwalagelo vaki maia mo kwareluahira hangavulu dongwana kairua tiura. Aira hi mo kwarekinira a kaihora* kokona. #Sione 6.70 14A hinaga aira hika. I Saemon, i Jisas mo tau na hinana i Pita, mai tuana i Aduru, i Semis, i Sione, i Viliv, i Batolomiu, 15i Matiu, i Tomas, i Semis i natu i Alveas, i Saemon hinea aia katukwale tina tangaloi* aira hi ramo karohuri na vanua noi God, a vanua Isrel*, #Bol 1.13 16i Sutas i natu i Semis, mai Sutas Iskariot, aia hi vae vaki takuni mo mulemai kina tangaloi hinea mo tovo kai Jisas lakwa na nona tavaluivuro.

I Jisas mo huhui vake u vakahiki na tangaloi

(Mat 4.23-25)

17I Jisas mo duvule hivo lo vuti mana nona kaihora* kokona. Mo tu lo tavotavolaki mana nona ngwalagelo rusa. Takwa-hi a vao rusa rau vanamai vataha na mahagweki, tina vanua Sutia, tina gwatuivanua lakua Serusalem, tina babaitahi na gwatuivanua lalakua Taea maia Saeton. 18Rau vanamai kwara rana rongoa, vake ne vakahikinira tina kaga lengeana. Aira hi rau rongo hati kina tanungwe hati rau vanamai vake, vae rau ahi. 19A tangaloi vunuhia rau vai kwara rana kihia, huri a huirana u vanamai tiua mo vakahikinira savira.

A hahavutiana mana rongoana hati

(Mat 5.1-12)

20Vunu i Jisas mo tagatagahuri na nona ngwalagelo mo kwaha mo viti kwara,

“I kamu hi tulu kakaravika,

ne havutikamu,

huri i God u hugwe korokamu.

21I kamu hi u marakatikamu hika,

ne havutikamu,

huri lo taroki vae tulu ne kugwa.

I kamu hi tulu rongo hati hika,

ne havutikamu,

huri lo taroki vae tulu ne lagwa. #a Jer 31.25; b Sam 126.5-6; Aes 61.3; Rev 7.16-17

22“I nau a Natu* na Tangaloi, vae diko lo taroki a tangaloi rana vai taratarakikamu, rana bega kikamu, rana kwaha bulakikikamu rana viti kwara i kamu a tangaloi hati, huri i kamu a nogu tangaloi, vae lo taro hi ne havutikamu. #Sione 15.19; 16.2; 1 Pita 4.14 23Diko rana vai kwehi, tulu ne lagwa tulu ne vai hakwana kina hahavutiana, huri i God u kwiribibi a kaitakwe lakua hurikamu lolo taetae. I ratubuga vake rau vai na doridori hokinia hi vohoki vovohi na tangaloi* duruduruki maira. #2 Kron 36.16; Mat 23.30,31; Luk 11.47

24“Vae i kamu hi a tangaloi hugwe,

a rongoana hati lakua lakwakamu,

huri tulu lai savi na nomiu kinau karekarea u rovo ba,

vae tulu nehe lai tea taliku. #Sem 5.1

25I kamu hi tulu kugwa hika,

a rongoana hati lakua lakwakamu,

huri lo taroki vae ne marakatikamu.

I kamu hi tulu lagwa hika,

a rongoana hati lakua lakwakamu,

huri lo taroki vae tulu ne rongo hati,

tulu ne tangi.

26“I kamu hi lo taroki a tangaloi savia rana kalukikamu, a rongoana hati lakua lakwakamu, huri i ratubuga vake rau vai hokinia hi vohoki lakwa na tangaloi duruduruki kurakura maira.” #Sem 4.4

A lagwaana huri na tavaluivuro

(Mat 5.38-48; 7.12a)

27Vunu i Jisas mo kwaha mo viti kwara, “Vae nana viti lakwakamu hinea tulu mo toko rongohuriau kwara, tulu lagwa mana nomiu tavaluivuro, tulu ne vaivai karea maira hinea rau vai taratarakikamu. #Prov 25.21; Rom 12.20 28Tulu tiutangaroa karea kinira hinea rau tiutangaroa hati kikamu, vake tulu tiutangaroa hurira hinea rau vai bulakikikamu. #Rom 12.14 29Diko te katukwale u rabako lo baririmu tavaluki, ko halebohi kinia tavaluki ne raba rovonakinia vake. Diko te katukwale u revei na kakavumu tiuko ko tirakinia ne lavi na lugwamu lolona vake. #Sione 18.22-23; Bol 23.3 30Aira hi rau longi te kinau tiuko, ko bete lakwara aira vunu. Vae diko te katukwale u lai te nomu havakinau, ko hatu uduharoa taliku. 31Tulu vaivai karea mana tangaloi vunuhia hokinia hi tulu mo domiki kwara rana vaivai karea maikamu. #Mat 7.12

32“?Diko tulu lagwa kehekeheki mana tangaloi hinea rau lagwa maikamu vae kworohokinia tulu ne lai kaitakwe huri? A tangaloi vaivai hati vake rau lagwa mana tangaloi hinea rau lagwa maira. 33?Vake diko tulu vaivai karea kehekeheki maira hinea rau vaivai karea maikamu vae kworohokinia tulu ne lai kaitakwe huri? A tangaloi vaivai hati vake rau vai kwehini. 34?Vake diko tulu tiraki te nomiu kinau kehekeheki lakwara hinea tulu tuku domi kwara vae tulu ne lai tiura taliku, vae kworohokinia tulu ne lai kaitakwe huri? A tangaloi vaivai hati vake rau tiraki noga kinau lakwa na tangaloi vaivai hati kwara vae rana lai tiura taliku hokinia hi ramo bete lakwara. 35!Hetea! Tulu ne lagwa mana nomiu tavaluivuro, tulu vaivai karea maira. Tulu ne tiraki nomiu kinau lakwara, tulu hatu domi kwara vae tulu ne lai tiura taliku, vae i kamu tulu neri kwali a kaitakwe lakua huri. Vae tulu ne kwareki i raranatu i God hinea Aulu Karakara, huri aia u karea mana tangaloi hinea rahe lagwalagwa tea, vake mana tangaloi hinea a doridoriga rau hati. #Lev 25.35-36 36Nomiu hahakavi ne eia huri a tangaloi, hoki i Tamamiu nona hahakavi eia huri a tangaloi.”

Tulu hatu taga kwaheki na doridori na tangaloi

(Mat 7.1-5; 15.14; 10.24-25)

37Vunu i Jisas mo viti lakwara kwara, “Tulu hatu taga kwaheki na doridori na tangaloi tulu mo viti kwara rau hati, vae i God ne mai taga kwaheki na doridorimiu ne mai viti kwara tulu hati vake. Tulu hatu tau a leo na rongo hati lakwa na tangaloi lo noga hatiana, vae i God nehe tau te leo na rongo hati lakwakamu lo nomiu hatiana. Tulu domidomi koro na hatiana nona tangaloi vae i God ne domidomi koro nomiu hatiana. #Mat 6.14 38Tulu betebete lakwa na tangaloi, vae i God ne bete lakwakamu. Ne bete u taritarisa lo dumuki bakotoki. Ne susunia hivo ne rugwekinia kwara ne kukwere ne karea, ne bete vakevake ne kukwere avuavu ne ngwaraburabu tulu ne kwali lengalengakinia. Lo dumuki hi tulu ne bete, i God ne bete lakwakamu hokinia.” #Mak 4.24

39Vunu i Jisas mo viti na tavaluileo hika lakwara mo viti kwara, “A matadodo nehe tagaoki na matadodo tea, vae diko ne tagaokinia i rarua vunu raru ne sovi tilolo kwalukwalu. #Mat 15.14; 23.16,24 40A tangaloi hinea u sekulu, he lakua tea sileti na nona tangaloi hinea mo huhuia. A tangaloi savia hinea rau sekulu ramo vai savi na noga huhuiana mo taritarisa mo rovo, vunu ramori hoki na noga tangaloi hinea mo huhuira. #Mat 10.24-25; Sione 13.16; 15.20

41“?Kworoho komo tagai na hogo kelekele lolo mata i tuamu vae kohe va tagai na leko te lolo matamu? 42?Ku domi kworohokinia kwara kona viti lakwai tuamu kwara, ‘Ai, tua, na lavi na hogo kelekele tina matamu,’ aia i nigo kohe va tagai na leko te lolo matamu? I nigo a tangaloi kurakura, ku viti kinau ki ringomu vohoki. Ko lavi na leko tina matamu tomua, vunu konari taga ne matangwasara, konari lavi na hogo kelekele hi tina mata i tuamu.”

A vikai mana kwaiki

(Mat 7.16-20; 12.33-35)

43Vunu i Jisas mo viti vake kwara, “A vikai karea u tuku kwai, a kwaiki rahe hati tea, diko a vikai hati u tuku kwai, a kwaiki rahe karea tea. 44A vikai savia tau kikilaira lo kwaiga. Konahe tovahi na kwai na karo karea tea tina karo na bubu hinea a kasiki eia, diko konahe vuvuki na kwai karea tea tina karo hohokoti. #Mat 12.33 45A tangaloi bakoto u viti kinau rau bakoto huri a domina lo kinau rau bakoto kehe. A tangaloi hati u viti kinau rau hati huri a domina lo kinau rau hati kehe. A tangaloi u kwaha, u viti huri na kinau hinea a domina u kukwere kinia.”

A kaitabe na ingwa kairua

(Mat 7.24-27)

46Vae i Jisas mo gweregwereki na nona leo mo viti “?Kworoho tulu mo kwareau kwara, ‘Hugwe*, Hugwe,’ aia nu viti kinau lakwakamu tulu he vai tea? #Mal 1.6; Mat 7.21 47Aira vunu hinea rau vanamai vaki maiau rau rongohuri na nogu leo, rau tabe tabetabekinira, na viti lakwakamu kwara aira hoki na havakinau. 48Aira hoki na tangaloi hinea u tabe ingwa. U keli na tano u bua, mo tau na tutuki lo vatu toka. Vunu a kwai mo huki vanamai tiluna, vae he kiluki lavia tea huri u tabea u karea u madi. 49Vae aia hinea u rongo na nogu leo, vae he tabe tabetabekinira tea, aia hoki na tangaloi hinea u tabe na ingwana lo tano a tutuki tikei. Vunu a kwai mo huki vanamai tiluna, vae u sovi vakatukwale mo matalatala va hati.”

Currently Selected:

LUK 6: HWT

Highlight

Copy