LUK 4

I Setano mo sinasina rongohi Jisas

(Mat 4.1-11; Mak 1.12-13)

1I Jisas mo galo hake tina Kwai Sotan kwara ne mule taliku, u kukwere kina Tanungwe Kokona. Vae a Tanungwe Kokona hi mo tomuakinia vaki lo vanua vuroki. 2Takwa-hi i Setano* mo toko sinasina rongohia a rani ngavu kaivati. Vae lo rani maira hi he kanikani te vohoki, vae a taro hi mo rovo mori marakatia. #Hib 4.15

3Vunu i Setano mo kwaha maia mo viti kwara, “Diko i nigo i Natu i God ko kwaha mana vatu hika ne bohi kina hinaka.”

4Vae i Jisas mo daraki lakwae mo viti “A Uliuli* Kokona u viti kwara,

‘A tangaloi nehe toka lai tea kina hinaka kehekeheki.’ ” #Dut 8.3

5Vunu i Setano mo lavia hake vaki lo vutivuti aulu mo vosangia lo taro gwanugwanu vohoki kina mamalukoro na varamana savia. 6Mo viti lakwae kwara, “Nana bete savi na huirana hika lakwako, vake mana vivilagokiki savia. A kinau vano hi vunuhia a nogu ba, vae i nau na vai lai na bete lakwa na tangaloi te nomo lengaia. #Mat 28.18 7Diko kona sovi hivo vovohiau kona kaluhakiau, a kinau savia hika rana kwareki a nomu.”

8Vae i Jisas mo daraki mo viti “A Uliuli Kokona u viti kwara,

‘Kona sovi hivo vovohi na Hugwe* a nomu God

kona kaluhakinia.

Kona boloki lakwae kehekeheki.’ ” #Dut 6.13

9Vunu i Setano mo lavia vaki Serusalem mo taua lo vuhunge na Ingwa Kokona. Mo kwaha maia mo viti kwara, “Diko i nigo i Natu i God ko rovo hivo hike, 10huri a Uliuli Kokona u viti kwara,

‘I God ne viti lakwa na nona kaihora tina taetae

kwara rana tagahuriko.’ #Sam 91.11

11U viti vake kwara,

‘Rana kwiri halehalekinigo ki kabaga

kwara vae a garumu,

a vatu nehe vai hokotia te vohoki.’ ” #Sam 91.12

12Vae i Jisas mo daraki lakwae mo viti “A Uliuli Kokona u viti kwara,

‘Ko hatu kahi haro na domi na Hugwe a nomu God.’ ” #Dut 6.16; 1 Kor 10.9

13I Setano mo sina rongohi Jisas lo hala rusa mo rovo, vunu mo tirakinia kwara vae te lo taroki ne mulemai taliku huria. #Hib 4.15

I Jisas mo tinakaki nona boloki lo vanua Galili

(Mat 4.12-17; Mak 1.14-15)

14Vunu i Jisas mo mule taliku vaki Galili*, vae a huirana na Tanungwe Kokona aia maia. A roro huria mo kwalao tivarea vunuhi na vanua takwa-hi. 15U huhui lo noga vale* na tiutangaroa, vae a tangaloi vunuhia rau kalukinia.

A ngwera Nasaret rau bega ki Jisas

(Mat 13.53-58; Mak 6.1-6)

16Vunu i Jisas mo vano vaki Nasaret hinea mo ngwarasea hake eia. Vae lo Rani* na Mabuana mo vano vaki lo vale* na tiutangaroa, hokinia mo toko vano tigwaravu. Mo maraka mo tu kwara ne valuki na Uliuli* Kokona. 17Hikani ramo bete na buku* nona tangaloi* duruduruki i Aesaea lakwae. Mo vukeri na buku hi mo hagwe na leo u uliana u viti kwara,

18“A Tanungwe nona Hugwe i God aia lugu,

huri aia u vuraeau ba

kwara vae na heretuvaki na Roro Karea

lakwa na kakaravi.

Aia u hokakiau kwara na koleki

lakwa na tangaloi rau hugu lolo ingwa na gwarugwaru

kwara vae rana soro tivarea,

vake na koleki

lakwara hinea a matadodo

kwara vae rana tagataga.

Aia u hokakiau

kwara na tirakinira hinea rau rongo hati,

rau hugu tavuti na huirana na noga tavaluivuro,

rana lakao tiura rana rongo karea.

19Vunu vake na tuliki na hukao hi

kwara vae a Hugwe i God

ne vakahiki na bulana tangaloi luna.” #Aes 61.1-2; 58.6

20I Jisas mo gworovi na buku hi mo betea taliku lakwa na tangaloi hi mo toko tagahuri a buku, vunu mo hugu hivo kwara ne heretuva. A tangaloi vunuhia lolo vale na tiutangaroa ramo tagataga huri Jisas. 21Mo tinakaki mo kwaha maira mo viti kwara, “A Uliuli Kokona hika tulu mo rongoa nomo valukia, u kworo hika karagwa.”

22Aira vunu rau kalukinia haburu, vake rau idila haburu kina leo karekarea aira vano hi mo vitira. Ramo kwaha ramo viti kwara, “?Kworohokinia? !Aia i natu i Sosev!” #Luk 3.23; Sione 6.42

23Mo kwaha maira mo viti kwara, “I nau nu kikilai kwara i kamu tulu ne viti a tavaluileo hika lakweau, hinea u vitiana vanamai evina kinia kwara ‘Tokita. Ko vakahikinigo sibomu.’ Vake tulu ne viti lakweau kwara ‘Ko vai hike lo gwatui-vanuamu hokinia hinea kemo rongo komo vai lo gwatuivanua Kavaneam.’ ” #Mat 4.13; Sione 2.12 24Vae i Jisas mo kwaha vake mo viti kwara, “Kareaki na viti lakwakamu, a tangaloi duruduruki, vae a tangaloi lo gwatui-vanuana vohoki rahe toko lai tabetabekinia tea. #Sione 4.44 25Tulu rongo na viti. Kareaki lo taro i Elaesa, lolona hi he uha tea a hukao kaitolu kaivatiki duviki, a gwati vavine u rusa lo vanua Isrel*, vae takwa-hi a gwakere lakua doluaki na vanua hi. #a Sem 5.17; b 1 King 16.1,7; 18.1 26Vae i God he hokaki i Elaesa te vohoki vaki mana gwati vavine maira hi kwara te katukwale lo vanua Isrel, vae u hokakinia kehekeheki vaki mana gwati vavine katukwale lo gwatuivanua Sarevat lo mahigwa na vanua Saeton. #1 King 17.9 27Vake lo taro na tangaloi duruduruki i Elisa, a tangaloi u rusa a lengeana hati na vinu #4.27: A lengeana hati na vinu. Lo Uliuli Kokona, u viti huri na lengeana hati na vinu. Rau viti huria u kwali na lengeana rusa mo magaraki na vinu na tangaloi, hoki na lengeana a levrasi, u hoki na lengeana ratuaki vake hi u magemu kwara a tangaloi ratuaki rana lavia. Lo Tangwata nona gwaloana noi Isrel, a lengeana maira hi rau vai na tangaloi rau hogora lo nako i God. Kona taga lui Levitikas 13 – 14. u vaira lo vanua Isrel. Vae i God he lalahi i Elisa tea kwara ne vakahikinia kwara te katukwale ne ngwasara tina lengeana hi, vae u lalahia kwara ne vakahiki i Neman kehekeheki hinea a ngwera Siria.” #2 King 5.1-14

28Hikani vunuhi na tangaloi lo vale na tiutangaroa ramo rongo mo kwaha hokinia hi rau lologute haburu. 29Ramo maraka ramo revei Jisas tivarea tina gwatuivanua, ramo lavia vaki lo vuti aulu hinea ramo tokaki vanua eia, rau vai kwara rana vohokinia hivo lo baha. 30Vae va lakao lalahi na livuka na vao hi va vano.

A tangaloi a tanungwe hati luna

(Mak 1.21-28)

31Vunu i Jisas mo vano vaki Kavaneam lo vanua Galili*, mo huhui na tangaloi takwa-hi lo Rani* na Mabuana. #Mat 4.13; Sione 2.12 32Aira vunu rau idila kinia lo hala mo huhui, huri a leona rau bakoto a huirana luna. #Mat 7.28-29; Sione 7.46 33A tangaloi katukwale lo vale* na tiutangaroa a tanungwe hati luna. Vae mo kwaha karakara mo viti kwara, 34“!Aa! Jisas ngwera Nasaret. ?Kwara kona vai aha maikami? ?Ku vai kwara kona magarakikami? I nau nu kikilaiko. I nigo a Tangaloi Kokona noi God.” #Mat 8.29; Mak 1.23-24; 5.7; Luk 8.28 #Luk 4.41; Sione 6.69

35Vae i Jisas mo suri na tanungwe hati hi mo viti kwara, “!Hugu butu! !Ko vano tina tangaloi hika!” A tanungwe hati hi mo vai suri na tangaloi hi tilo tano lo nakoga, mo vano tiua, vae he vai hokotia tea.

36Aira vunu rau idila haburu ramo kwahakwaha mulekinira ramo viti “!Hava na leo aira vano hika! A tangaloi hi u kwaha kina bakotoana mana huirana mo hora na tanungwe hati, vae ramo ngwalua.” 37Vae a roro hi huri i Jisas mo vano vataha na mahagweki lo vanua hi.

I Jisas mo vakahiki na tangaloi rusa

(Mat 8.14-17; Mak 1.29-34)

38I Jisas mo tiraki na vale* na tiutangaroa hi, vunu mo vano vaki tata i Saemon. I Saemon, i gwelikana vavine u lenga u mahaki haburu, vae ramo vitia lakwai Jisas. 39Mo vano mo tu maia tavaluki mana herena mo hora na mahakita tiua. Vunu a mahakita mo tirakinia, mo maraka vakatukwale mo hago maira, mo bete hinaka lakwara.

40A mataniaho mo soro, vunu aira vunu hi a rabuluiga eia rau lenga kina lengeana a gwatuki u rusa, ramo lavira vaki mai Jisas. Mo tau kabana luga savira mo vakahikinira aira vunu. 41A tanungwe hati vake ramo ngwalua tina tangaloi rusa, ramo kakaili, ramo viti kwara, “!I nigo i Natu i God!”

I Jisas mo surira kwara vae rana hatu kwaha, huri rau kikilai kwara aia i Vurae*. #a Mat 8.29; Mak 3.11; Luk 4.34; b Mak 3.12

I Jisas mo heretuva lo vale na tiutangaroa maira

(Mak 1.35-39)

42A rani mo kini i Jisas mo tiraki na vanua mo vano vaki lolo bubu vuroki hinea a tangaloi tikei eia. A tangaloi ramo tinakaki ramo soro haroa, vae ramo hagwea ramo vai kwara rana kwiribibia ne hatu vano. 43Vae aia mo viti lakwara kwara, “I nau nana heretuvaki na Roro Karea lo gwatugwatui-vanua dolua vake, na matangwasaraki kwara hika i God u tuku boloki vae ne hugwe koro na bulana tangaloi, huri i God u hokakiau kwara na vai kwehi.” #Luk 8.1

44Vae mo heretuva lo vale* na tiutangaroa maira doluaki na vanua hi. #Mat 4.23

Currently Selected:

LUK 4: HWT

Highlight

Copy