LUK 21

A hilehile nona gwati vavine

(Mak 12.41-44)

1I Jisas mo tagataga laliki mo tagai na tangaloi hugwe ramo toko tuli noga hilehile vaki lo tanotano na tuli mane* lolo Ara Kokona na Ingwa Kokona noi God. 2Vae mo tagai na gwati vavine katukwale u kakaravika haburu, mo vanamai mo tuli na nona mane vatu kairua kwaririgi. 3Vunu i Jisas mo kwaha mo viti “Kareaki na viti lakwakamu, a gwati kakaravi hikani u bete nona hilehile u lakua karakara sileti na hilehile hinea a tangaloi savira ramo bete. 4A tangaloi hugwe aira vano hi rau bete noga hilehile duviki tina noga konata lakua. Vae a natu vavine hika u kakaravika haburu aia u hile savi na nona mane hinea kwara ne hago maia lo nona tokaana.” #2 Kor 8.12

I Jisas u vitiviti huri na magarakiana na Vanua Kokona noi God

(Mat 24.1-2; Mak 13.1-2)

5Ratuaki tiura ramo toko vitiviti huri na Vanua* Kokona noi God kwara a vatu luna rau lalakua, rau karekarea, vake mana hilehile nona tangaloi u rusa ramo bete kwara ki noi God. Hikani i Jisas mo viti 6“A kinau vano hikani tulu mo toko tagaira, vae a taroki ne maravuti a vatu vano hi vae hete kwara te katukwale ne eno lo tanotanona. A tangaloi rana vai savi na vatu vano hi rana visoviki.” #Luk 19.44

A rongoana hati mana vai bulabula

(Mat 24.3-14; Mak 13.3-13)

7Hikani ramo uhia ramo viti “?Tisa, a kinau vano hi vae rana vanamai kihokua? ?Vunu a hava kaivosangi kwara ne vosangi bakotoki na taroki hi kwara vae rana mule luna?”

8Vunu i Jisas mo viti “Tulu tagahuri ne karea, vae te tangaloi ne mai sinakamu, huri a tangaloi rusa rana vanamai lo hinagu rana viti ‘I nau hika, i nau i Vurae*.’ Vunu rana viti kwara, ‘A taro i Vurae ne mulemai u garagarani.’ Vae tulu hatu hurira luna. #Dan 7.22; Vil 4.5 9Vae diko tulu mo rongo na roro na vuro, a tangaloi ramo maramaraka hurira, tulu hatu mataku. A kinau aira vano hi vae rana vanamai tomua, vae a rani rovonaki nehe vanamai te kwahaia hi.” #Dan 2.28

10Vunu i Jisas mo vano nga mo viti kwara, “A tangaloi na vanua katukwale rana vai vuro vovohi na tangaloi na vanua dolua, a hugwe na mamalukoro katukwale ne vai vuro vovohi na hugwe na mamalukoro dolua. #Aes 19.2; 2 Kron 15.6 11Vae ne ruru ne hati vohoki vataha na mahagweki, ne gwakere lolo vanua laliki, vunu a lengeana hati rana vai na tangaloi vataha na mahagweki. A kinau rana vanamai rana vai a tangaloi rana mataku vohoki, rana tagai na kaimatai rusa lo mahaleki vake.

12“Tomuaki vunu a kinau aira vano hi savira ranari mule luna, a tangaloi rana kwiribibikamu, rana vai bulakikikamu. Rana taukamu tilo kaba na ngwarasea* na vale* na tiutangaroa kwara rana arekikamu, vake rana taukamu lolo ingwa na gwarugwaru. Rana lavikamu tomuaki na nako na tomutomuai-tangaloi mana hugwe lalakua huriau. #Mat 10.18; Luk 12.11 13Vae hika a taromiu kwara tulu ne matangwasaraki na Roro Karea lakwara. 14Tulu vai domimiu ne madi terekaki kwara vae tulu hatu domi haroki na leo kwara tulu ne malo na leo hi ramo viti vovohikamu. #Mat 10.19; Luk 12.11-12 15Vae i nau kehekeheki nari bete leo lakwakamu mana loloraniki, vunu a nomiu tavaluivuro ranahe kwaha lai tea vovohikamu, ranahe kwaha hivoulu tea lo leomiu. #Bol 6.10 16Vunu i ratamamiu mai raretahimiu, mai ratuamiu, mai rabelamiu, mana nomiu buluana rana taukamu tilo kaba na nomiu tavaluivuro. Vae i kamu ratuaki a nomiu tavaluivuro rana kwohi mateikamu. #Mat 10.21-22 17Vunu savi na tangaloi rana bega kikamu huriau. 18Vae a vulu hi lo gwatumiu hete kwara te katukwale ne sala. #1 Saml 14.45; Luk 12.7 19Tulu tu ne madi vae tulu ne ahi lai.”

I Jisas mo vitiviti huri na magarakiana na gwatuivanua lakua Serusalem

(Mat 24.15-21; Mak 13.14-19)

20Vunu i Jisas mo viti vake kwara, “Lolona tulu ne tagai na gwatuivanua lakua Serusalem a tangaloi na vuro rana tu dalidalia, tulu ne kikilai kwara u garagarani hika vae a tangaloi rana magaraki na vanua hi kareaki. 21Lo taroki aia hi vae a tangaloi hinea rau hugu lo vanua Sutia u karea kwara rana kwakwalaoki vaki lolo vuti. Vunu aira hinea rau hugu lo gwatuivanua lakua rana kwalao tiua, aira hinea rau hugu tavalavarea ranahe mulemai tea vaki lolo gwatuivanua lakua hi, 22huri kwahaia hi a ‘Taro na Kakadiki,’ kwara vae a leo hinea a Uliuli* Kokona tuai mo vitia ne kworo. #Dut 32.35; Hos 9.7; Jer 46.10 23Oo, a rongoana hati lakua haburu lakwa na ravavine hinea rau tatagwangira mana raretahi rau bava natu karagwa lo rani aira vano hi, huri vae a rongoana hati lakua ne vanamai tilo vanua hika, i God a nona lologute ne tu vovohi na tangaloi aira hi. #1 Kor 7.26 24Vae a tavaluivuro rana tai mateira ratuaki kina bue, vunu rana gwarubibira ratuaki rana lavira rana taura vatavataha na vanua laliki lo varamana. Vunu a tangaloi tavalavarea tina gwaloana noi Isrel* rana soro vaki lo gwatuivanua lakua Serusalem rana hugwe koroa, ne vanovano vae tarisaki a taroga ne rovo.” #a Jer 21.7; b Esra 9.7; d Sek 12.3; Sam 79.1; Aes 63.18; Dan 9.26; e Dan 12.7; Rom 11.25; Rev 11.2

A Natu na Tangaloi vae ne mulemai taliku

(Mat 24.29-31; Mak 13.24-27)

25Vunu i Jisas mo vano nga mo viti kwara, “A tangaloi rana tagai na kaimatai rusa lo mataniaho, lo vula, lo vitu. Vunu hike lo varamana, a tangaloi lo vanua ratuaki rana rongo hati haburu kina roro na navo lalakua hinea ramo marobe. #a Aes 13.10; Esik 32.7; Joel 2.30-31; Rev 6.12-13; b Sam 46.2-3; 65.7; Aes 24.19 26A tangaloi rana mataku haburu vae rana matemate kina matakuta huri rau domidomi haburu lo kinau savia hinea rana vanamai tilo varamana, huri vae savi na kinau hinea rau huira lo mahaleki, i God ne vaira rana kusa tina tanotanoga. #Hag 2.6,21 27Vunu a tangaloi ranari tagaiau i nau a Natu* na Tangaloi na mulemai lolo taenalangi mana huirana mana hahaviada lakua. #Dan 7.13; Mat 26.64; Rev 1.7 28A kinau aira vano hini rana tinakaki rana mule luna, vunu i kamu tulu ne tu bakotoki tulu ne lalangao, huri a taroki u garagarani vae na kasatukuhikamu tina rongohati savia.” #Rom 13.11

A huhuiana tina vikai u kwareki a vivik

(Mat 24.32-35; Mak 13.28-31)

29Vunu i Jisas mo viti na tavaluileo hika lakwara mo viti “Tulu domihagwe na vikai* hinea u kwareki a vivik #21.29: A gwaloana noi Isrel rau kikilai na taro lo vikai hi a vivik hokinia i kita tau kikilai na taro lo vikai hi a virara. mana vikai ratuaki vake. 30Lolona a vikai vano hi ramo tinakaki ramo tavutavu, tulu kikilai kwara hika a taro na bulamiu saru. 31Vae lo hala hokinia hi, tulu ne tagai na kinau vano hini rana mule luna vae tulu neri kikilai kwara a Vanua Karagwa hinea i God u hugwe koroa nehe tuai tea ne maravuti.

32“Kareaki na viti lakwakamu, a tangaloi hinea rau toka hika kwahale ranahe mate vunu tea, tarisaki savi na kinau vano hi rana mule luna. 33A taetae mana varamana vae raru ne tikei vae a leogu nehe tikei lai te vohoki.” #Luk 16.16

A leo huri na likokiana

34Vunu i Jisas mo viti kwara, “Tulu tagahurikamu ne karea. Tulu hatu mahuki na taro tulu mo vai kanikani tigwaravu, tulu mo inuinu kwara tulu ne reraka kinia. A domimiu ne hatu kwalao laliki huri na maurianamiu lo varamana hika. Diko tulu vai na kinau hokinia hi, vae a Ranigu #21.34: A Ranigu. Kona taga A RANI NONA HUGWE lo Deksenare lo buku hika takuni. ne vanamai ne vakamarutikamu, hoki na vuna mo tavidiri mo kwiribibi na manu, #a Mat 24.48-50; Luk 17.27; b 1 Tes 5.3 35huri a Rani hi vae ne vanamai lakwa na tangaloi savira lo varamana doluaki. #Aes 24.17 36Vae tulu likoliko ne karea, vake tulu tiutangaroa tigwaravu vae tulu ne huira karakara kwara vae tulu ne gui lavi na kinau vano hi savira, vunu tulu ne tu lai lo nakogu i nau a Natu* na Tangaloi.” #a Mak 13.33; b Rev 6.17

37U rani i Jisas u huhui tigwaravu lolo Vanua* Kokona noi God, vunu raviravi, tigwaravu u vano mo hugu lolo Vuti na Vikai* a Violev. #a Luk 19.47; b Luk 22.39 38A tangaloi vunuhira ramote vano vaki lolo Vanua Kokona noi God sirovobongi bise ramo gwerongo huria mo toko kwahakwaha maira.

Currently Selected:

LUK 21: HWT

Highlight

Copy