LUK 18
18
A tavaluileo huri na gwati vavine mana hugwe hati
1Hikani i Jisas mo viti na tavaluileo hika lakwara kwara ne huhuira rana tiutangaroa tigwaravu, vae rana hatu keokeo, a domiga ne hatu sovi. #Rom 12.12; Kol 4.2; 1 Tes 5.17 2Mo viti “A hugwe katukwale u toka lo gwatuivanua katukwale he mataku tea ki God, vake he domi mavaki na tangaloi te vohoki. 3Vunu a gwati vavine katukwale takwa-hi lo gwatuivanua aia hi nga, u tuku vanamai vaki mana tangaloi hi tigwaravu, mo seseaka huria kwara vae ne hago maia, mo viti ‘Ko hago maiau lo kinau aira hi a nogu tavaluivuro mo toko vaira vovohiau.’ 4Mo vanovano vae u tuai haburu a tangaloi hi mo bena kwara ne vai na leo na tubui hi. Vae vaki takuni mo toko domidomi lolo domina kwara, ‘Kareaki, i nau hika nahe mataku te ki God, vake nahe domi mavaki na tangaloi tea. 5Vae a gwati vavine hika mo vai utuutu maiau, vae huri hi na hago maia. Diko hetea ne toko vanamai nga vae ne ngwahiau kinia.’ ”
6Vunu a Hugwe* i Jisas mo viti kwara, “Tulu domidomi lo leo hi a hugwe hati hi mo vitia. 7?Hikani kworohokinia mai God? A bulana tangaloi hinea u mataira rau ngarahakinia u rani u bongi kwara ne hago maira. ?Vae tulu domi nehe vai bakotoki na noga kinau tea? ?Diko tulu domi kwara vae nehe vaivai heheri tea kwara ne hago maira? 8Vae na viti lakwakamu, i God ne vai bakotoki na noga kinau bulu maia nga. ?Vae i nau a Natu* na Tangaloi, na mulemai taliku vaki lo varamana nana hagwe lavi na tangaloi tea hinea rau hauhuri diko hetea?”
A tavaluileo huri na Varisi mana tangaloi na vilevile mane a takis nona kavman
9I Jisas u viti na tavaluileo hika lakwa na tangaloi hinea rau tuku domi kwara aira kehekeheki rau bakoto vae rau domi bulakiki na tangaloi doluaki. 10Mo viti “A tangaloi kairua raru vano vaki lo Vanua* Kokona noi God kwara raru ne tiutangaroa. Kairuaki aia a Varisi*, kairuaki aia a tangaloi* na vilevile mane* a takis nona kavman. 11A Varisi hi u tu kahea, mo tiutangaroa. #18.11: Lo hala kairuaki a domidomi na leo hi lo duviki tomuaki na ves hi aia hokinia hika kwara A Varisi hi u tu mo tiutangaroa lolo domina. Mo viti ‘God. Nu lagwakinigo huri i nau hete hoki na tangaloi doluaki hinea rau kodoka, rau vai kinau hinea rahe bakoto tea, rau balu vavine, vake i nau hete hoki na tangaloi na vilevile takis hika. 12Nu rete vakairua lo kwiki katukwale, vunu tigwaravu lolona nomo lai a kinau hangavulu vae nu lai katukwale tiura nomo bete lakwako.’ #Sione 14.20; Mat 23.23 13Vae a tangaloi na vilevile takis hini u tu vakahao he vai tea kwara ne lalangao vaki lo taetae, vae u vosai na gwagwana kehekeheki u vosangi kwara u rongo hati huri u kikilai kwara u vai kinau rau hati, mo viti ‘O, God ko hakaviau ko domidomi koro nogu hatiana, huri i nau a tangaloi vaivai hati.’ ” #a Luk 23.48; b Sam 51.1 14Vunu i Jisas mo viti kwara, “Na viti lakwakamu, a tangaloi aia hi u mule vaki tatana u kwareki a tangaloi bakoto koro na nako i God. Aia hi kairuaki tomuahiki, vae nehe hokinia tea, huri a tangaloi hinea rau lailai hakekinira siboga vae i God ne lailai hivokinira. Vunu aira hinea rau lailai hivokinira vae i God ne tabe hakekinira rana lalakua.” #Mat 23.12; Luk 14.11
I Jisas u vai tabetabeki na sakwarigi kwaririgi
(Mat 19.13-15; Mak 10.13-16)
15A tangaloi tuaki rau kwali raranatuga kwaririgi bise vaki mai Jisas kwara ne tau kabana luga. Vae a nona ngwalagelo ramo tagaira ramo tu korora kwara rana hatu vai kwehi. 16Vae i Jisas mo kware na sakwarigi vano hi vaki maia mo viti “Tulu tiraki na sakwarigi rana vanamai vaki maiau. Tulu hatu tu korora, huri a natu kwaririgi vake i God u kwarera kwara ne hugwe korora. 17Na viti bakotoki lakwakamu, a tangaloi hinea he hivokinia tea kwara ne mulemai hoki na natu kelekele kwara ne hugu tavuti na Hugwe Lakua i God, vae i God nehe kwareki te nona Hugwe lo taroki.” #Mat 18.3
A tangaloi hugwe
(Mat 19.16-30; Mak 10.17-31)
18A kaitomuaki nona gwaloana noi Isrel* katukwale mo uduhuri ki Jisas mo viti “Tisa, i nigo a tangaloi karea. ?Na vai kworoho kwara vae na hagwe na ahiana vaki tuai?” #Luk 10.25
19Hikani i Jisas mo uduhuri kinia mo viti kwara, “?Kworoho komo vitiau kwara nu karea? Hete kwara te katukwale u karea, vae i God kehekeheki. 20Ku kikilai na leo na Tangwata* hi mo viti ‘Ko hatu balu vavine, ko hatu ua mate tangaloi, ko hatu babalu, ko hatu kurakura, ko domi mavaki tamamu mai retahimu.’ ” #a Eks 20.13-16; Dut 5.17-20; b Eks 20.12; Dut 5.16
21Hikani a tangaloi hi mo daraki mo viti kwara, “Nu rongohuri savi na leo na Tangwata vano hi ba, lolona nomo ngwarasea hake vae vaki na hika.”
22Lolona i Jisas mo rongo hokinia hi mo kwaha maia mo viti kwara, “Kona vai na kinau katukwale vake. Ko hokaki savi na nomu vivilagoki, ko hileki a maneki lakwa na tangaloi kakaravi, vunu lo taroki konari hagwe nomu vivilagoki karekarea rusa lolo taetae, vae ko vanamai ko huriau.” #Mat 6.20 23Vae lolona a tangaloi hi mo rongo na leo hokinia hi u rongo hati, huri aia a tangaloi hugwe.
24I Jisas mo tagaia kwara u rongo hati haburu, mo viti “Raka, u madi haburu lakwa na tangaloi hugwe kwara rana soro tilo Vanua Karagwa hinea i God u hugwe koroa. 25U madi lakwa na boboroa lakua hi u kwareki a kamel, kwara ne soro lalahi na mata na nitili. Vae u madi siletia lakwa na tangaloi hugwe kwara ne hivokinia ne hugu tavuti na Hugwe Lakua i God.”
26A tangaloi ramo rongo na leo hi ramo viti kwara, “?Vae ihe ne va ahi te hika?”
27I Jisas mo daraki mo viti “Savi na kinau hinea a tangaloi rahe vai lai tea, i God u vai lai.” #Mak 14.36
28Hikani i Pita mo viti “?Kworohokinia maikami? Keu tiraki tatamai kwara kena huriko.”
29Vunu i Jisas mo viti kwara, “Io, kareaki na viti lakwakamu, diko te katukwale hinea i God u hugwe koroa vae huri hi u tiraki tatana, diko i vavinehina, diko i ratuana, diko i tamana mai retahina, diko i raranatuna, 30vae lo varamana hika ne hagwe na kinau rusa silesiletia tomua, vunu lo taroki hi vae ne vanamai, neri hagwe na ahiana gwaravu vaki tuai.”
I Jisas u matangwasaraki vakaitoluki kwara vae ne mate vunu ne maraka taliku
(Mat 20.17-19; Mak 10.32-34)
31Hikani i Jisas u lavi na nona ngwalagelo hangavulu dongwana kairua gegeaki mo kwaha maira mo viti kwara, “Tulu rongo. Hika tau tuku vano vaki Serusalem, vae vatavatahaki na kinau hinea a tangaloi* duruduruki ramo ulibibia tuai huriau i nau a Natu* na Tangaloi, vae ne mule luna. #Luk 24.25,44 32Rana tauau tilo kaba na tangaloi tavalavarea tina gwaloana noi Isrel*, rana vaivai tagaiau, rana barahiau, rana lido tilugu, 33rana takwiliau, vunu rana kwohi mateiau. Vae vaki takuni lo rani kaitoluki nari maraka taliku.” #Luk 9.22,44 34Vae a nona ngwalagelo rahe rongo kikilaki na leo te vano hika, a leoki he matangwasara te lakwara, huri rahe kikilai na domianaki te vohoki kwara i Jisas u tuku viti na havakinau. #Mak 9.32
I Jisas mo vakahiki na tangaloi a matana u dodo
(Mat 20.29-34; Mak 10.46-52)
35Hikani i Jisas mo vanamai vaki garagarani mana gwatuivanua Seriko, a tangaloi katukwale u hugu takwa-hi lo ngwararai-hala, a matana u dodo. U tuku longilongi kinau tina tangaloi. 36Vae lolona mo rongo na vao ramo lakao utu, mo uduhuri kwara, “?A havakinau hike?”
37Ramo viti lakwae kwara, “I Jisas a ngwera Nasaret u lakao utu hike.”
38Aia mo tau mo ngara karakara mo viti “!Jisas! !Gwaloana noi Devit! Ko hakaviau, ko vai tabetabekiau.” #Mat 9.27; 15.22; Luk 17.13
39A tangaloi ramo lakao tomuakinira ramo taraia ramo viti “!Ko hatu kurekurere!”
Vae hetea, mo ngara karakara vakevake nga, mo viti “!Gwaloana noi Devit! Ko hakaviau, ko vai tabetabekiau.”
40Hikani i Jisas mo tu takwa-hi, mo viti lakwara kwara rana lavi na tangaloi hi, a matana u dodo, vaki maia. Vae lolona mo vanamai vaki garagarani, i Jisas mo uhia, 41mo viti kwara, “?Ku lengaiau kwara na vai aha maiko?”
A tangaloi hi mo viti kwara, “Hugwe*. Nu lengaia kwara na tagataga taliku.” #Mak 10.36
42Vunu i Jisas mo viti lakwae kwara, “U karea, a matamu rau karea taliku. Hika a nomu hauhuriana u vakahikinigo.” #Luk 7.50; 17.19
43Vae heheriki mo tagataga lai, vunu mo huri i Jisas u kaluhaki God. Lolona a vao ramo tagaia ramo kaluhaki God aira vunu.
Currently Selected:
LUK 18: HWT
Highlight
Share
Copy
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
