LUK 15

A sivsivi mo sala

(Mat 18.12-14)

1Lo rani katukwale, a tangaloi* na vilevile mane* a takis nona kavman, mana tangaloi* vaivai hati tavalavarea ratuaki vake, rau tuku vanamai kwara rana gwerongo huri i Jisas. 2A Varisi* mana tangaloi* kikikila na Uliuli* Kokona maira, ramo tinakaki ramo toko kwahakwaha hati vovohia, ramo viti kwara, “A tangaloi hikani u lai tabetabekinira hinea aira a tangaloi vaivai hati tavalavarea, vunu u kanikani maira vake.” #Luk 5.30

3Hikani i Jisas mo viti na tavaluileo hika lakwara kwara, 4“?Diko te katukwale tikamu a bulana sivsivi vidolua, vae diko te katukwale u vano salakinia, vae ne vai kworoho? Ne tau terekakinira hi ngavu kaihikwa dongwaki kaihikwa lolo talui kaga duvu, ne vano ne soro haroa hi mo sala tarisaki ne hagwea. #Esik 34.11,16; Luk 19.10 5Lolona ne hagwea, ne havutia haburu, vae ne vohokinia ta tigwana, 6ne kwalia mule taliku vaki na vanua, vunu ne kware i rabuluina tabulutaki mana tangaloi hinea rau hugu valuvaluiara maia, ne viti lakwara kwara, ‘I kita vunu ne havutikita tabulutaki, huri nu hagwe na bulagu sivsivi hinea mo sala.’ 7Na viti lakwakamu, lo halaki hokinia hi, vae aira hinea lolo taetae ne havutira haburu huri na tangaloi vaivai hati te katukwale hinea mo bohi na domina tina hatiki. A hahavutiana hi ne siletia hinea mo havutira huri na tangaloi bakoto ngavu kaihikwa dongwaki kaihikwa, a kinau tikei lakwara kwara rana bohi na domiga luna.”

A mane vatu mo sala

8Vunu i Jisas mo viti vake kwara, “?Diko te vavine katukwale a nona mane* vatu hangavulu rau karekarea, vae ne vai salakinia katukwale tiura, vae ne vai kworoho? Ne tutuki na laeti, vunu ne hiri na hogo lolo ingwana, ne soro ngwakutaki vataha na ngwahukui na ingwa tarisaki ne hagwea. 9Vae lolona ne hagwea, ne kware na rabuluina tabulutaki mana tangaloi hinea rau hugu valuvaluiara maia, ne viti lakwara kwara, ‘I kita vunu ne havutikita tabulutaki, huri nu hagwe na nogu mane vatu hinea mo sala.’ 10Na viti lakwakamu, lo halaki hokinia hi, vae a kaihora noi God lolo taetae ne havutira haburu huri na tangaloi vaivai hati te katukwale hinea mo bohi na domina tina nona vaivai hati.”

A natu mo sala

11Vunu i Jisas mo hoke na leona taliku, mo viti “A tangaloi katukwale i natuna a natu ngwera kairua. 12Vae a natu vaki takuni hi mo viti lakwai tamana kwara, ‘Mama. A duvi na nomu vivilagoki hi kwara ki nogu, ko bete lakweau hika.’ Hikani i tamagaru mo kwaheki na nona vivilagoki lakwararua. 13Hikani vae he tuai tea i natuna a natu vaki takuni mo hokaki savi na nona vivilagoki hi mo lai ti tamana. Vunu mo lavi na maneki mo ngwalua tina vanuana mo vano vaki lo vanua dolua katukwale vakahao, mo toko ginaraki na nona mane* takwa-hi lo doridorina hinea rau hati. #Prov 29.3 14Vae mo mahuki savi na nona mane.

“Vunu lo vanua hi a taro mo hati maira mo gwakere kinira. Hikani a tangaloi hi a nona vivilagoki tikei vohoki. 15Hikani mo vano kwara ne boloki mana tangaloi na vanua hi. Vae mo horae kwara ne va tagahuri bulana dura. 16U lengaia haburu kwara ne kani te hinaka kana boboroa hinea mo toko bete lakwa na dura, vae a tangaloi rahe bete te hinaka lakwae vohoki. 17Vae vaki takuni a domina mo matakahi mo viti kwara, ‘I tamagu a nona tangaloi boloki savia a kaga hinaka u taritarisa maira, vunu u rusa radu, vae i nau hikani nu hugu hikeni mo marakatiau vae na tabilo. 18Na maraka na mule vaki mai tamagu, na viti lakwae kwara, “Mama. I nau nu vai vakasile vovohi God, vovohiko vake. #Sam 51.4 19Vae hikani nahe taritarisa tea kwara kona kwarekiau ki natumu taliku, vae ko tauau na kwareki a nomu tangaloi boloki.” ’ 20Hikani mo maraka mo tinakaki hala mo mule haro i tamana.

“Vae lolona aia vakahao radu nga tina tatana, i tamana mo taga kavihikinia, u hakavia haburu, mo kwalao hahavakinia mo haka tataloa mo bobonia. 21Hikani i natuna mo kwaha maia mo viti kwara, ‘Mama. I nau nu vai vakasile vovohi God vunu vovohiko vake. Vae hikani nahe taritarisa tea kwara kona kwarekiau ki natumu taliku.’ 22Vae i tamana mo kware na nona tangaloi boloki, mo viti lakwara kwara, ‘Heheri, tulu lavi na lugwa hinea u karea karakara nga, tulu lugwae kinia, tulu lai a ringi tulu mo tavu tilo bihuna, vunu tulu lai a kaikwokwori na garu tulu mo kwokwori na garuna kinia. 23Vunu tulu lavi na natu na buluki hinea u damoi, tulu kwohi mateia. Vunu ta vai na kanikani lakua tabulutaki hika, 24huri i natugu u mate, vae hikani u ahi taliku, u sala, vae hikani nu hagwea taliku.’ Hikani a kanikani lakua hi mo tinakaki. #Eves 2.1,5; 5.14

25“Lo mahaoki hi a natu ngwaraseaki aia lolo agoago*, vae mo toko mulemai vaki garagarani mana ingwa, hikani mo rongora ramo toko kaho ramo vai hakwana. 26Mo kware na tangaloi boloki katukwale mo uduhuri kinia, mo viti kwara, ‘?Ei, a havakinau hike?’ 27A tangaloi boloki hi mo daraki mo viti kwara, ‘I tuamu u mulemai taliku, vae i tamamu mo kwohi na natu na buluki damoi huri u hagwe i natuna u mulemai taliku u ahi.’ 28A natu ngwaraseaki mo lologute, mo vai kwara vae nehe soro te vaki lolo ingwa. Hikani i tamana mo ngwalua vaki varea maia, mo seseaka huria kwara vae ne soro tilo ingwa vake. 29Mo daraki lakwai tamana kwara, ‘Ko tagaia. Lo hukao rusa rau vano ba nu boloki haburu lakwako hoki na nomu tangaloi* boloki vuroki vohoki, vunu vake nahe rongo bulakiki na leomu tea. ?Vae kworohokinia? Kohe bete na kinau te vohoki lakweau, kwara te natu na nani diko te kinau dolua kwara vae kena vai kanikani mai rabuluigu. 30Vae i natumu hika u mahuki vunuhi na nomu vivilagoki lo ravavine tu huri hala, vae mo mulemai, kote maraka komo kwohi na natu na buluki damoi lakwae kwara ne kani.’ 31I tamana mo daraki lakwae mo viti kwara, ‘Natugu, i nigo ku hugu tigwaravu maiau, a nogu vivilagoki rau kwareki a nomu savira. #Sione 17.10 32Vae hikani u taritarisa kwara tana vai a kanikani lakua hika ne havutikita, huri i tuamu u mate vae hikani u ahi taliku, u sala vae hikani tau hagwea taliku.’ ”

Currently Selected:

LUK 15: HWT

Highlight

Copy