A Bolokiana 5

I Ananaeas mai Savaera

1Vae a tangaloi a hinana i Ananaeas, i vavinehina a hinana i Savaera, u hokaki nogaru tano tuaki, 2vae u kwiribibi na kaivoliki duviki huria sibona, mo bete na duviki lakwa na kaihora* kokona vae i vavinehina u kikilai maia vake. #Bol 4.34-35,37 3I Pita mo kwaha maia mo viti kwara, “Ananaeas. ?Kworoho komo tiraki i Setano* mo hugwe koro na domimu mo vaiko komo sina na Tanungwe Kokona komo kwiribibi na duvi na kaivoli na tano komo hokakinia? #Sione 13.2 4A tano hi a nomu, vunu komori hokakinia, takuni tiua a kaivoliki u kwareki a nomu. ?Kworohokinia komo domikinia kwara kona vai kwehi? I nigo kohe sina na tangaloi tea, vae ku sina i God.” 5Heheriki vake i Ananaeas mo rongo hokinia hika mo sovi tegetano mo mate. Doluakinira ramo rongo na roro na kinau hi ramo mataku haburu. #Bol 2.43; 5.11; 19.17 6A ngwalagelo ramo vanamai tilolo ingwa, ramo lugwatia, vunu ramo lavia ramo taua lo gwaru-malanga*.

7Kwara te aoa kaitolu takuni tiua, i vavinehina mo soro he kikilai te radu nga. 8I Pita mo uduhuri kinia mo viti kwara, “Ko viti lakweau. ?Hikani a kaivoli savia hi i kamurua mai tuamu ngwarasea kuru mo lai huri na nomiru tano?”

Mo daraki mo viti “Io, a kaivoliki savia.”

9Hikani i Pita mo viti lakwae kwara, “?Kworohokinia kuru mo domikinia kwara kuru ne sina na Tanungwe nona Hugwe i God? A tangaloi ramo tau i tuamu ngwarasea lo gwaru-malanga aira takwa-hi lo matakihala hika, vae rana kwaliko tivarea vake.” #1 Kor 10.9 10Heheriki vake mo sovi tegetano vaki mana garu i Pita, mo mate, a ngwalagelo ramo vanamai ramo tagaia kwara u mate ramo kwalia tivarea, ramo taua lo gwaru-malanga tavaluki ti tuana ngwarasea. 11A kwarelua* noi Jisas doluaki, maira tuaki vake ramo rongo hokinia hi, rau mataku haburu. #Bol 2.43; 5.5; 19.17

A kaivosangi mana idilakiana rusa

12A kaihora* kokona rau vai a kaivosangi mana idilakiana rusa lolo livuka na tangaloi. Doluaki na tangaloi hauhuri rau vileki tabulutaki lo bulubulu katukwale tavuti na Varada nona hugwe lakua i Solomon lo Vanua* Kokona noi God. #a Bol 2.43; 6.8; 14.3; 15.12; b Sione 10.23; Bol 3.11 13A tangaloi rau kwaha mavakinira haburu, aia vae hete kwara diko te tangaloi tavalavarea ne bulu maira lo noga bulubulu. #Bol 2.47 14Vae a tangaloi rau vanamai vakevake ramo bulu mana bulubulu aia hi. A ngwera mana ravavine rusa ramo hauhuri lo Hugwe*. #Bol 2.41,47; 4.4; 6.7; 11.21,24; 21.20 15Hokinia lo duvi na boloki nona kaihora kokona ramo toko vai, a tangaloi rau kwali a tangaloi rau lenga vaki lo hala lalakua, ramo lulukinira lo here, lo gwana, kwara vae i Pita ne lakao garagarani, a nununa ne vano tiluga rana ahi. 16A vao ramo vanamai tina gwatugwatui-vanua laliki Serusalem, rau kwali a tangaloi rau lenga, aira hini vake a tanungwe hati luga, vae aira vunu ramo ahi. #Mak 6.56; Bol 19.11-12

Ramo vai bulakiki na kaihora kokona

17Vae a hugwe na tangaloi* lingilingi mana nona buluana savia mana bulubulu nona Satiusi*, rau karoki haburuki na kaihora* kokona, #Bol 4.1,6 18vunu ramo kwiribibira ramo taura lolo ingwa na gwarugwaru. #Bol 4.3 19Vae lolo bongi hini a kaihora nona Hugwe* tina taetae mo takahi na katama na ingwa na gwarugwaru hi, mo tomuaki na kaihora kokona vano hi tivarea, #Bol 12.7-10 20mo viti lakwara kwara, “Tulu vano tulu tu lolo Vanua* Kokona noi God, tulu viti savi na leo na ahiana karagwa hika lakwa na tangaloi.” 21A kaihora kokona rau rongohuri na leona, mo toko rani kalakala, ramo soro tilolo Vanua Kokona noi God ramo tinakaki ramo huhui.

A hugwe na tangaloi lingilingi mai rabuluina rau kware tabulutaki na ngwarasea* nona gwaloana noi Isrel*, huri na vileki-tabulutaki lakua na Tangaloi* Tovotovo Lalakua, vunu ramo hora a leo vaki lo ingwa na gwarugwaru kwara rana lavi na kaihora kokona vaki maira. #Bol 12.19 22Vae lolona a bulusman ramo maravuti, rahe hagwe na kaihora kokona te vano hi lolo ingwa na gwarugwaru, hokinia ramo halebohi mule vaki mana Tangaloi Tovotovo Lalakua 23ramo viti lakwara kwara, “Lolona kemo maravuti lo ingwa na gwarugwaru a matakihala u vono rau vaibibia u madi, a tangaloi hi rau tagahuri aira takwa-hi mana matakihala, vae kemo takahi na katama kehe hagwe na tangaloi te vano hi lolona.” 24Vunu a kaitomuaki na kaitagahuri na Vanua Kokona noi God, mana tangaloi* lingilingi lalakua ramo rongo hokinia hi, rau lengalengakinia kwara a havakinau mo vai na kaihora kokona vano hi. #Luk 22.4,52; Bol 4.1 25Vunu a tangaloi mo vanamai tilolo ingwa mo viti lakwara kwara, “Tulu rongo. A tangaloi vano hi tulu mo taura lolo ingwa na gwarugwaru, hika rau tu lolo Vanua* Kokona noi God rau tuku huhui na tangaloi.” 26Hikani a kaitomuaki hi mana nona tangaloi, ramo lavi na kaihora kokona vano hi mulemai taliku. Vae rahe vai kadira tea huri rau mataku kwara vae a tangaloi ramai te vohoira ki vatu. #Mat 14.5; 21.26,46; Mak 11.32; 12.12; Luk 20.19; 22.2

27Ramo lavi na kaihora kokona vano hi tilolo ingwa, ramo vaira ramo tu koro na nako na Tangaloi Tovotovo Lalakua. A hugwe na tangaloi lingilingi mo uduhuri kinira 28mo viti “?Kworohokinia? ?Keu surikamu kwara tulu nehe huhui te lo hina na tangaloi hika taliku, vae hika, tulu vai aha? Tulu mo viti laliki na nomiu huhuiana savisavi na gwatuivanua Serusalem, tulu lengaia kwara tulu ne tau na dai na tangaloi hika lo kabamai.” #a Bol 4.18; b Mat 27.25

29I Pita mana kaihora kokona tuaki vake ramo daraki taliku ramo viti kwara, “U taritarisa kwara tana rongohuri God sileti na tangaloi. #Bol 4.19 30Tulu mo kwohi Jisas, tulu mo durubibia lo kaibetu mo mate. Vae a God noi ratubuda mo rakatia tina mateana. #a Bol 2.24,32; 3.15; 4.10; 10.40; 13.30; 17.31; b Bol 2.23,36; 3.15; 4.10; 10.39 31I God mo tabe hakekinia vaki lo matuana mo kwarekinia a Kaitomuaki mana Kaivakahi, hokinia u bete a taro lakwakita a gwaloana noi Isrel kwara tana halebohi tina noda hatiana, vunu ne domidomi koro a noda hatiana. #a Hib 2.10; b Bol 2.33; d Luk 24.47; Bol 2.38 32I kami keu hago leo lo kinau vano hikani. Hete i kami sibomai, vae a Tanungwe Kokona u buluikami, hinea a hokohoko noi God lakwara hi rau rongohuria.” #a Luk 24.48; Sione 15.27; Bol 1.8; 2.32; 3.15; b Sione 15.26

33A Tangaloi Tovotovo Lalakua ramo rongo hokinia hi u vai kadi na domiga vohoki. A domiga u mautu huri na kaihora kokona vano hi kwara rana kwohi mateira. #Bol 7.54 34Vae katukwale tiura hi, a Varisi*, a hinana i Gameliel, aia a tangaloi kikikila na Uliuli* Kokona hinea a tangaloi rau domi mavakinia. Mo tu hake lo nako na Tangaloi Tovotovo Lalakua. Mo hora kwara rana lavi na kaihora kokona vano hi tivarea. #a Bol 22.3; b Bol 4.15 35Hikani mo kwaha mana Tangaloi Tovotovo Lalakua mo viti lakwara kwara, “Gwaloana noi Isrel. Lo kinau hinea tulu domiki kwara tulu ne vai vovohi na tangaloi vano hi tulu tagahuri ne karea. 36Lo taro nakwaiha ba i Tudas mo maraka mo viti kwara aia a tangaloi lakua. A tangaloi ramo bulu maia, aira kwara te vidolua vakaivati. Vae a tangaloi rau kwohi mateia, a nona tangaloi hi ramo huria rau kwalao girigiriki, a nona boloki va rovo. #Bol 21.38 37Takuni tiua hi, i Sutas a ngwera Galili* mote maraka hake lo taro na valuvalu tangaloi, mo vai na tangaloi rusa ramo huria. Vae rau kwohi mateia vake, a nona tangaloi ramo kwalao girigiriki. #Luk 13.1-2 38Hika na viti lakwakamu huri na tangaloi vano hi. Tulu tirakinira, vae diko a boloki hika a domikiana nona tangaloi vohoki, vae ne mulemai kina kinau vuroki. 39Vae diko u vanamai ti God i kamu tulu nehe tu koro lavia tea. Tulu mai vai, vae tulu mai te tu koro na bolokiana noi God.”

Hikani a Tangaloi Tovotovo Lalakua ramo huri na leona. 40Ramo kware na kaihora kokona tilolo ingwa, ramo takwilira, vunu ramo kwaha surira kwara rana hatu kwahakwaha lo hina i Jisas taliku, vunu ramo tirakinira ramo vano. #Bol 4.18 41A kaihora kokona vano hi ramo salati na Tangaloi Tovotovo Lalakua, u havutira haburu huri i God u tagaira kwara rau taritarisa, rana rongo hati, rana maemae lo nako na tangaloi huri na hina i Jisas. #Mat 5.10-12; 1 Pita 4.13 42Vae vataha na rani lolo Vanua Kokona noi God vake lolo noga tokaki-vanua, ramo toko huhui na tangaloi, ramo heretuvaki na Roro Karea huri Jisas kwara aia hi i Vurae*. #Bol 2.46

Currently Selected:

A Bolokiana 5: HWT

Highlight

Copy