MAIKA 7
7
1Ai ki nau! Nalakena a po dakiusi ragi waina eu pila saisai sua ki nawa matua maga, dakiusi navilavilaeana ni nawa ni vaine ragi waina naleleiana e nopu: m̃okai kakana waina ega vei tea kaniana e dika; naatagu e masau p̃arua ki takavea ni napuliva. 2Naatam̃oli vei lomau e pano puoli m̃elu dua ki maramana, go tea waina e leana m̃aleoputo ni naatam̃oli maga e dika: eu mamau puti kusugoro raki nada; eu palako taida maga ki vaivai sikai sara naata sikasikai. 3Nam̃elearuda dua ero doko tea waina e sa naga euga mari m̃arekareka asa; tea maraki e do datago, go tea vasap̃otae e dape ruku sikai; go naatam̃oli vakilagi e lua ki namarisakiana ni naatana: dapala nogoe eu saisai asa po pausi a. 4Tea wia lua kakada e dakiusi tea makalikali sikai: tea leana liu kakada e sa liu nakoro vivitip̃a sikai: naaleatia ki tea vavaigoro anigo, naaleatia ni navarati‐ko‐ana e po pakilina; namidoaki‐putua‐kiana adeada e doko m̃aladigi. 5Kuga ta saralomau tamu ri sikai mau maau, kuga ta pavatu tea ataeana anigo sikai mau maau: p̃a vavaigoro namata ni nawokam̃a m̃elu dua ki tea waina e one narum̃am̃a. 6Nalakena natuna naanoai e dododao tamana, natuna nagoroi e duleana dip̃a p̃ilana, sulina dip̃a tuana; tea kokona ki naatam̃oli sikai eu pei tea maga ni nasum̃a aneana.
7Ma kinau, kinau aga wo leogoro Yehovah; naleogoroana aginau e doko Sup̃e ni namauti‐pauri‐au‐ana: Sup̃e aginau ega wo dogo au. 8P̃a ta laelaea goro au mau, tea kokona ki nau O: a dowo, ma aga wo moro duleana; a doko namaligo doko, ma Yehovah ega wo maginau pei namarama sikai. 9Aga wo sua namaetoana ki Yehovah nalakena a mari naleo sa dip̃a e; pa pa nae ega wo pululu navululuana aginau, po maginau mari navasap̃otaeana: ega wo piragi au dave paki namarama; go aga wo leo punusi namarinaleoleanaana aneana. 10Go tea kokona ki nau ega wo punusi a, go namaliereana ega wo kovagoro e; nae waina e noa ki nau, e naga, Yehovah Sup̃e anigo wai? Namatagu maga eroga wo leodao asa; sala waia nae ega wo pei tea vasiana dapala nalepa ni napua maga ni natokoana. 11Doko naaleatia waina p̃aaka kakam̃a maga euga wo pei tea tavagi‐piri‐ana, doko naaleatia wanogoe, kokoi kakam̃a maga euga wo pei tea risugiana euga wo p̃arua. 12Doko naaleatia wanogoe euga wo umai punusi ko, pae Assiria go natokoana maga ni Ityipt, go pae Ityipt pa pa paki Noaisara, go pae natasi pa pa paki natasi, go pae tava pa pa paki tava. 13Ma navanua ega wo pei maso maladi doko, nalakena tea maga waina eu doko asa doko, nalakena nawa ni natomariana adeada maga.
14P̃a leo parati ki pakale narei anigo ki tiko anigo, navata ni tea veaniana anigo, waina eu sikida doko mala ni nakau, doko m̃aleoputo ni Karmel: euga wo ganikani doko Bashan go Cilead, dapala waina e doko naaleatia maga ni tuai. 15Dapala waina e doko naaleatia maga ni naumaiana anigo m̃elu dua ki navanua ni Ityipt, aga wo pisei ki nia naleo maga ni namagaana. 16Nalauna maga euga wo punusi a, po matamaliere namarimatuaana mamau puti adeada: euga wo doropusi nam̃elearuda ega toko nawokada, nadaligada maga euga wo p̃ono. 17Euga wo menae nam̃otam̃ota dakiusi m̃aata sikai; dakiusi naleo kakaravi maga ni natano, euga wo duruuru umai m̃elu dua ki tokora kokoroana adeada maga: euga wo matau ki Yehovah Sup̃e anigida, go euga wo m̃anaunau nalakena nigo. 18Sei e dakiusi ko, Sup̃e O, waina e do dape lua namarinaleotageleana, po do pakalau natapiriana ki namagovai ni tea veaniana aneana waina eu pei tea toropusiana doko? Waina e da mauti namaetoana aneana pa pa po du mau du mau, nalakena e maro nadodomiana. 19Ega wo maradoa liliu po maritadodomi gida; ega wo pasi namarinaleotageleana anigida nam̃ele natuana: go p̃a wo nadi ki namarinaleosaana adeada maga mamau puti paki epua maga ni natasi. 20P̃a wo pakavuro nalomauana paki Yakob, go nadodomiana paki Abraham, waina ku pivisa paki tamagida maga asa pae naaleatia maga ni tuai.
Currently Selected:
MAIKA 7: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
