MATAIO 8

1Go ragi waina e pae tava siwo umai, taua warua maga ni naatam̃oli eu dausi a. 2Go kuga leo, lepero sikai e umai punusi a po lotu ki nia, po naga, Nawota, ku pe suasua, ku pe mariatae mari au a pe tautau. 3Go e sai ki nam̃elearuna, po kisidogo e, po naga, A suasua; p̃a tautau. Go e dautau m̃araverave ki naveileperoana aneana. 4Go Yesu e noa ki nia, e naga, P̃a vunusi naga p̃a ta noa ki te naata asa mau; ma p̃a vano, p̃a tum̃am̃a pisei ki tea viri ako, go p̃a vitua ki navituaana waina Moses e pitip̃aki asa, naga ega vei nanoasokisokiana sikai paki da.

5Go ragi waina e umai sili sua Kapernaum, senturio sikai e umai punusi a, e pavarani a, po naga, Nawota, 6natureai suasua aginau e one ekopu ni nasum̃a e sarumate, e pitinu p̃arua asa. 7Go e noa ki nia, e naga, Kinau aga valoti po mari pauri a. 8Go senturio e pasadara po naga, Nawota, a da p̃ia mau naga p̃a umai paki ekopu ni nasum̃a aginau: ma p̃a vasa navasaana sikai ega sikina, go natureai aginau ega wo pei tea maripauriana. 9Nalakena kinau ma a pei naatam̃oli sikai waina a doko etano ki naveinawotaana, po peani naatam̃oli ni navakalo seara waina eu doko etano ki nau: go a noa ki tea waia, a naga, P̃a vano, go e pano; go a noa ki tea p̃ota sikai, a naga, P̃a umai, go e umai; go a noa ki tea suasua aginau, a naga, P̃a mari tea waia, go e mari a. 10Go ragi waina Yesu e dogo e, e maga, po noa ki tea maga waina eu dausi a, E naga, Lomau a noa ki mu, naga A da pap̃ai nasaralomauana warua dapalana, a da pap̃ai a Israel mau. 11Go a noa ki mu, naga tea laapa euga wo pae ist go west umai, go euga wo kere one sikoti Abraham, go Isaak, go Yakob, namarakiana ni nakoroatelagi: 12ma namarakiana natuna maga euga wo pei tea nadikiana paki namaligo ni etaku ni uvea; tokora wanogoe natagiana go nakati‐pati‐ana eroga wo doko asa. 13Go Yesu e noa ki senturio, e naga, P̃a vano; ega manigo pei tea mariana ega tapala waina ku saralomau. Go natureai aneana e pei tea maripauriana aura wanogoe.

14Go ragi waina Yesu e umai paki ekopu ni nasum̃a ki Petero, e punusi anagoroi p̃ilana e masaki one. 15Go e kisidogo nam̃elearuna, go namasakiana e marua ki nia; go e duleana po maneana suasua ki navinaga. 16Go ragi waina e po pei ragi melu, eu piragi umai punusi a tea laapa waina eu pei dimon: go e mari dimon maga eu dave pano ki navasaana sikai, go tea maga waina eu sasana e mari pauri puti ra: 17naga tea waina e pei tea noaana pae profeta Isaiah ega lolomana, e naga, Nae e dape namanainaiana anigida maga po dapetape nasasanaana anigida maga.

18Go ragi waina Yesu e punusi taua warua maga ni naatam̃oli maga eu dalivirigoro e, e pitip̃aki naga euga vaki taleva kerua pano. 19Go tea midiri sikai e umai po noa ki nia, e naga, Tea vasapiseiki, aga wo dausi ko paki tokora waina p̃a wo paki asa pano. 20Go Yesu e noa ki nia, e naga, Foks maga eu peani m̃oru, go manu maga ni nakoroatelagi eu peani vete; ma naatam̃oli Natuna e da peani te tokora mau waina ega lesi nap̃auna asa. 21Go tea p̃ota sikai ni tea vasapiseikiana aneana maga e noa ki nia, e naga, Nawota, p̃a suasua ki nau naga aga vano po ova ki tamagu ega vea. 22Ma Yesu e noa ki nia, e naga, P̃a rausi au; go p̃a toropusi tea mate maga naga euga ova ki tea mate adeada maga.

23Go ragi waina e pagi rarua sikai, tea vasapiseikiana aneana maga eu dausi a. 24Go kuga leo, nalagi atu warua sikai e pakilina natasi, dapala waina boti e do pei tea tap̃augoroana ki napeao: ma nae e maturu. 25Go eu rumai punusi a, po pulevule a, po naga, Nawota, p̃a mauti pauri; au pe mate. 26Go e noa ki da, e naga, Ekasana ku mataku, tea saralomau kiki maga? Ragi wanogoe e duleana, po pasa kasua ki nalagi maga go natasi; go e dam̃ate p̃arua. 27Go naatam̃oli maga wanogoe eu maga, po naga, Naatam̃oli dapale sava sei, waina nalagi go natasi ero dogo parati ki nia?

28Go ragi waina e duagoto sua umai paki navanua ki naka ni Cadara, tea rua waina ero pei dimon ero sua e, ero dave pae matigo maga umai, ero mata sa p̃arua sa, dapala waina te naata sikai e da mariatae surata liu pae napua wanogoe mau. 29Go kuga leo, ero pioso, po naga, Aroga kasa ki‐go, Sup̃e Natuna? Ku po umai paki nea naga p̃a mari gami aroga vitinu ega vea ki ragi kakana kite? 30Go navata sikai ni wago laapa eu doko uvea ki da eu do ganikani. 31Go dimon maga eu pavarani a, eu naga, Ku pe mari gami auga tave pano, p̃a tip̃aki lua gami auga va sili navata ni wago maga. 32Go e noa ki da, e naga, Kuga vano. Go eu dave umai, po pano sili wago maga wanogoe: go kuga leo, navata mamau eu sava kasua siwo napatira paki natasi, po mate noai. 33Go tea maga waina eu do pagani ra eu sava pano, po paki natokoana, po dogorogo ki naleo maga mamau puti, go tea waina e pakilina ki tea rua waina ero pei dimon. 34Go kuga leo, natokoana mamau eu dave puti umai naga euga sua Yesu: go ragi waina eu punusi a, eu pavarani a naga ega m̃elu dua ki kokoi adeada maga pano.

Currently Selected:

MATAIO 8: NTB

Highlight

Copy