MATAIO 4

1Ragi wanogoe Yesu e pei tea viragiana sake pae Naatana paki masop̃alo pano naga ega vei tea maridogoana pae diabolo. 2Go ragi waina e pali sua naaleatia rualima pati go nap̃ogiana rualima pati, e edaku pitolo. 3Go tea maridogo e umai po noa ki nia, e naga, Ku pe vei Sup̃e Natuna, p̃a vitip̃aki naga vatu maga waia eu one euga vei bred maga. 4Ma e pasadara po naga, E pei tea midiriana, e naga, Naatam̃oli ega wo da mauri pae bred sikina mau, ma ega wo mauri pae sara navasaana waina eu dave pae nawoka ni Sup̃e umai. 5Ragi wanogoe diabolo e piragi lua e paki natokoana tapu; go e lawo ki nia e lawodu tea varau pakilagi ni nasum̃a tapu, 6po noa ki nia, e naga, Ku pe vei Sup̃e Natuna, p̃a tum̃am̃a nadi ki‐go pakitano: nalakena e pei tea midiriana, e naga,

Ega wo dip̃a ki agelo aneana maga nalo kakam̃a:

Go euga wo dapetape ko doko nam̃elearuda maga,

Naga p̃a ta dapilagona te vatu sikai mau.

7Yesu e noa ki nia, e naga, E moro pei tea midiriana, e naga, P̃a ta maridogo Yehovah Sup̃e anigo mau. 8Diabolo e moro piragi lua e paki tava sikai waina e pakilagi liu, po pisei ki nia namarakiana maga mamau puti ni maramana, go nasamasamaana kakada; 9go e noa ki nia, e naga, Tea maga mamau puti waina, ku pe rowo pakitano po lotu ki nau, a pe wo dua puti ko ara. 10Ragi wanogoe Yesu e noa ki nia, e naga, P̃a vano, Satan: nalakena e pei tea midiriana, e naga, P̃a lotu ki Yehovah Sup̃e anigo, go p̃a maneana suasua ega sikina.

11Ragi wanogoe diabolo e doropusi a e doko; go kuga leo, agelo maga eu rumai po maneana suasua ki navinaga.

12Go ragi waina e dogo naga Yoane e pei tea kokoroana nasum̃a nasolisoliana, e m̃elu paki Calilea pano; 13go e doropusi Nasareth e madoko, po umai doko Kapernaum doko, natokoana ni elau, nadigi ni navanua ki Sebulun go ki Naftali: 14naga tea waina e pei tea noaana pae profeta Isaiah ega lolomana, e naga,

15Navanua ki Sebulun go navanua ki Naftali,

Napua ni elau, taleva kerua ni Yordan,

Calilea ni nalauna p̃ota maga,

16Narei waina eu doko namaligo doko

Eu punusi namarama warua sikai,

Go tea maga waina eu doko malo go melu ni namateana doko,

Namarama e madeada pakilina.

17Ragi wanogoe Yesu e pae asa dogorogo, po naga, Kuga midoa ki doa; nalakena namarakiana ni nakoroatelagi e pei m̃aladigi.

18Go e surata pae elau ni natasi ni Calilea, po punusi tamataida dua, Simon waina e pei tea sosoana ki Petero, go taina Anderea, ero do siva ki kup̃ena sikai paki natasi; nalakena ero pei tea araika. 19Go e noa ki da, e naga, Koroga rausi au, go aga wo mari mu koroga wo pei tea vuagoro naatam̃oli. 20Go ero m̃araverave doropusi kup̃ena adeada eu madoko, po dausi a. 21Go e moro surata m̃elu dua ki tokora wanogoe pano po punusi tamataida dua p̃ota, Yakobo natu ni Sebedaio, go taina Yoane, ero doko rarua sikoti tamada Sebedaio, eu do usuvaki kup̃ena adeada maga; go e soso ra. 22Go ero m̃araverave doropusi boti go tamada ero madoko, po dausi a.

23Go Yesu e surata papule Calilea mamau, po do pasa pisei ki da ekopu ni nasum̃a ni nasaisaiana adeada maga, po do dogorogo ki narogorogoana wia ni namarakiana, po do mari lua sara nasasanaana go sara namanainaiana m̃aleoputo ni narei. 24Go narogorogoana kakana e sokapule Siria mamau; go eu piragi umai punusi a tea maga mamau puti waina eu dogo kite sa, waina eu sua nasasanaana go navitinuana visarasara, tea maga waina eu pei dimon, go tea maga waina eu doropa, go tea maga waina eu sarumate, go e mari pauri ra. 25Go taua warua maga ni naatam̃oli maga eu dausi a, eu pae Calilea go Dekapolis go Yerusalem go Yudea go taleva kerua ni Yordan umai.

Currently Selected:

MATAIO 4: NTB

Highlight

Copy